Ганунсузлуға нифрәт едирсәнми?

«Сән [Иса]... пислијә нифрәт етдин» (ИБР. 1:9).

1. Иса мәһәббәт барәдә нә өјрәдирди?

МӘҺӘББӘТИН ваҹиблијини вурғулајараг Иса Мәсиһ шаҝирдләринә демишди: «Сизә јени бир әмр верирәм: бир-биринизи севин. Мән сизи севдијим кими, сиз дә бир-биринизи севин. Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:34, 35). Иса давамчыларына бир-бирләрини фәдакарҹасына севмәји әмр етмишди. Бу ҹүр мәһәббәт онларын сәҹијјәви хүсусијјәти олаҹагды. Иса һәмчинин: «Дүшмәнләринизи һәмишә севин вә сизи тәгиб едәнләр үчүн һәмишә дуа един», — дејә онлары сәсләјирди (Мат. 5:44).

2. Мәсиһин давамчылары нәјә нифрәт етмәји өјрәнмәлидирләр?

² Шаҝирдләринә мәһәббәт һагда өјрәтмәклә јанашы, Иса онлара нәләрә нифрәт етмәли олдугларыны да өјрәтмишди. Иса һагда габагҹадан дејилмишди: «Сән салеһлији севдин, пислијә [ганунсузлуға] нифрәт етдин» (Ибр. 1:9; Мәз. 45:7). Бу сөзләр ҝөстәрир ки, салеһлији севмәк аздыр, ҝәрәк ҝүнаһа, јәни ганунсузлуға нифрәт етмәји дә өјрәнәк. Һәвари Јәһјанын бунунла әлагәдар дедији сөзләр хүсусилә диггәтәлајигдир: «Ҝүнаһ ишләјән адам ганунсузлуг едир, она ҝөрә ки, ҝүнаһ ганунсузлугдур» (1 Јәһ. 3:4).

3. Биз нәјә нифрәт етмәлијик вә бу мәгаләдә һансы дөрд саһә мүзакирә олунаҹаг?

³ Јахшы оларды ки, бир мәсиһчи кими, өзүмүздән сорушаг: «Мән ганунсузлуға нифрәт едирәмми?» Ҝәлин һәјатымызын дөрд саһәсинә — 1) спиртли ичкиләрдән суи-истифадә етмәјә, 2) сеһирбазлыг вә ҹадуҝәрлијә, 3) әхлагсызлыға вә 4) ганунсузлуғу севәнләрә мүнасибәтимизә нәзәр салаг вә бахаг, бу саһәләрдә пислијә нифрәт етдијимизи неҹә ҝөстәрә биләрик.

Ичкинин гулу олма

4. Нәјә ҝөрә Иса спиртли ичкиләрдән суи-истифадә едәнләрә алныачыглыгла мәсләһәт верә билирди?

⁴ Иса шәрабын Аллаһын әнамларындан бири олдуғуну гәбул едирди вә өзү дә һәрдән шәраб ичирди (Мәз. 104:14, 15). Лакин о, бир дәфә дә олсун бу мәсәләдә һәддини ашараг Аллаһын әнамындан суи-истифадә етмәди (Сүл. мәс. 23:29—33). Буна ҝөрә дә о, алныачыглыгла спиртли ичкиләрлә бағлы мәсләһәтләр верә билирди. (Лука 21:34 ајәсини оху.) Спиртли ичкиләрдән суи-истифадә едән кәс диҝәр ҹидди ҝүнаһлара јол верә биләр. Һәвари Павел дә бу һагда јазырды: «Һабелә шәрабдан сәрхош оланаҹан ичмәјин, чүнки бу әјјашлыға ҝәтириб чыхарыр, әксинә, мүгәддәс руһла долун» (Ефес. 5:18). О һәмчинин јығынҹагдакы јашлы гадынлара «шәраб дүшкүнү» олмамағы нәсиһәт едирди (Тит. 2:3).

5. Ички ичмәк истәјән кәс өзүнә һансы суаллары вермәлидир?

⁵ Әҝәр сән ички ичмәк гәрарына ҝәлмисәнсә, өзүндән соруш: «Сәрхошлуға Иса кими јанашыраммы? Әҝәр кимәсә бунунла бағлы мәсләһәт вермәк лазым ҝәләрсә, буну тәмиз виҹданла едә биләҹәјәм? Мән проблемләрдән вә стрессдән јаха гуртармаг үчүнмү ичирәм? Һәр һәфтә нә гәдәр ички ичирәм? Кимсә мәнә чох ичдијимә ејһам вуранда буна неҹә реаксија ҝөстәрирәм: дәрһал өзүмә һагг газандырыр, јахуд да инҹијирәмми?» Ичкинин гулу олмаг бизим дүшүнмәк вә мүдрик гәрарлар гәбул етмәк баҹарығымыза мәнфи тәсир ҝөстәрир. Мәсиһин давамчылары дүшүнмә габилијјәтләрини горумаг истәјирләр (Сүл. мәс. 3:21, 22).

Сеһирбазлыгдан узаг дур!

6, 7. а) Исанын Шејтана вә ҹинләрә мүнасибәти неҹә иди? б) Нәјә ҝөрә сеһирбазлыг чох ҝениш јајылыб?

⁶ Јер үзүндә олдуғу мүддәтдә Иса Шејтана вә онун ҹинләринә ҝүҹлү мүгавимәт ҝөстәрирди. Шејтан Исаны нөгсансызлыг јолундан дөндәрмәк истәјәндә Иса онун арзусуну үрәјиндә гојду (Лука 4:1—13). Иса һәмчинин онун дүшүнҹәсинә вә һәрәкәтләринә тәсир едә биләҹәк һијләҝәр, мәкрли фәндләри сезир вә онлары дәф едирди (Мат. 16:21—23). Јер үзүндә олдуғу мүддәтдә о, лајиг оланлара ҹинләрин зүлм вә әсарәтиндән азад олмаға көмәк едирди (Марк 5:2, 8, 12—15; 9:20, 25—27).

⁷ Иса 1914-ҹү илдә Падшаһлыг тахтына чыханда ҝөјләри Шејтанын вә онун ҹин мәләкләринин пис тәсириндән азад етди. Јер үзүнә атылан Шејтан «бүтүн дүнјаны» алдатмаг нијјәтиндә һәмишәкиндән даһа чох гәрарлыдыр (Вәһј 12:9, 10). Буна ҝөрә дә сеһирбазлығын бу гәдәр ҹазибәдар олмасы вә ҝетдикҹә даһа чох јајылмасы бизи тәәҹҹүбләндирмир. Бәс биз өзүмүзү бу тәләдән неҹә горуја биләрик?

8. Әјләнҹә сечими илә әлагәдар өзүмүзә һансы суаллары вермәлијик?

⁸ Мүгәддәс Китаб ачыг-ајдын спиритизмлә әлагәнин тәһлүкәли олдуғуну дејир. (Ганунун тәкрары 18:10—12 ајәләрини оху.) Бу ҝүн Шејтан вә онун ҹинләри сеһирбазлығын вә ҹадуҝәрлијин даһа ҝениш јајылмасына хидмәт едән филмләр, китаблар вә електрон ојунлар васитәсилә инсанларын дүшүнҹә тәрзинә тәсир ҝөстәрирләр. Буна ҝөрә дә әјләнҹә сечәркән мүтләг өзүмүздән сорушмалыјыг: «Сон бир нечә ај әрзиндә сеһирбазлығын јер алдығы филмләрә, верилишләрә бахмышам, електрон ојунлары ојнамышам, китаб вә ја комиксләр охумушам? Сеһирбазлыгдан узаг дурмағын ваҹиб олдуғуну дәрк едирәм, јохса бу тәһлүкәјә мәһәл гојмурам? Әјләнҹә сечәркән онун Јеһоваја неҹә тәсир едәҹәји барәдә дүшүнүрәмми? Әҝәр Шејтанын мәнә тәсир етмәси үчүн “гапыны” ачыг сахламышамса, Јеһоваја вә Онун салеһ принсипләринә олан мәһәббәт мәни гәтијјәтли аддым атыб бу “гапыны” бағламаға тәшвиг едәҹәкми?» (Һәв. иш. 19:19, 20).

Исанын әхлагсызлыға даир хәбәрдарлығы

9. Инсан өз үрәјиндә ганунсузлуға мәһәббәти неҹә јетишдирир?

⁹ Иса Јеһованын гојдуғу ҹинси әхлаг нормаларыны дәстәкләјирди. О демишди: «Мәҝәр охумамысыныз ки, Јарадан башланғыҹдан онлары киши вә гадын олараг јарадыб вә белә дејиб: “Буна ҝөрә дә инсан өз ата-анасындан ајрылыб арвадына бағланаҹаг вә икиси бир бәдән олаҹаг”? Беләликлә, онлар артыг ики јох, бир бәдәндир. Буна ҝөрә дә Аллаһын бир бојундуругда бирләшдирдијини гој һеч кәс ајырмасын» (Мат. 19:4—6). Иса јахшы билирди ки, ҝөзүн ҝөрдүкләри үрәјә тәсир едир. Буна ҝөрә дә Дағүстү тәблиғиндә деди: «“Зина етмә”, — дејилдијини ешитмисиниз. Мән исә сизә дејирәм: гадына бахыб она гаршы шәһвәтлә аловланан һәр бир адам артыг үрәјиндә онунла зина етмиш олур» (Мат. 5:27, 28). Исанын хәбәрдарлығыны гулагардына вуранлар, әслиндә, үрәкләриндә ганунсузлуға мәһәббәт јетишдирирләр.

10. Инсанын порнографија әсарәтиндән азад ола биләҹәјини ҝөстәрән һадисә даныш.

¹⁰ Шејтан ҹинси әхлагсызлығы јајмаг үчүн порнографијадан истифадә едир. Тезликлә мәһв едиләҹәк бу көһнә дүнјаны, санки, порнографија «сели» басыб. Порнографијаја баханлар әдәбсиз сәһнәләри бејинләриндән силмәкдә чәтинлик чәкирләр. Һәтта онларда порнографијаја алудәчилик јарана биләр. Ҝәлин бир гардашын нүмунәсинә бахаг. О дејир: «Мән ҝизлиҹә порнографијаја бахырдым. Хүлјаларымда Јеһоваја хидмәт етдијим дүнја илә әлагәси олмадығыны дүшүндүјүм бир дүнја гурмушдум. Ҝөрдүјүм ишин пис олдуғуну билә-билә, өзүм-өзүмә дејирдим ки, Аллаһ һәлә дә хидмәтими гәбул едир». Неҹә олду ки, бу гардаш өз дүшүнҹә тәрзини дәјишди? О дејир: «Проблемим барәдә ағсаггалларла сөһбәт етмәк гәрарына ҝәлдим, һалбуки бу, мәним һәјатымда гәбул етдијим ән чәтин гәрар иди». Ҝәрҝин мүбаризәдән сонра гардаш бу алчалдыҹы вәрдишә галиб ҝәлди. О етираф едир: «Бу ҝүнаһдан әл чәкәндән сонра һисс етдим ки, виҹданым, һәгигәтән дә, тәмиздир». Ганунсузлуға нифрәт едәнләр порнографијаја дә нифрәт етмәји өјрәнмәлидирләр.

11, 12. Маһны сечиминдә ганунсузлуға нифрәт етдијимизи неҹә ҝөстәрә биләрик?

¹¹ Маһнылар вә маһныларын сөзләри емосијаларымыза, јәни мәҹази үрәјимизә ҝүҹлү тәсир ҝөстәрир. Та гәдимдән бу ҝүнә гәдәр һәгиги ибадәтдә лајигли јер тутан мусиги Аллаһын бизә бәхш етдији ҝөзәл әнамларындан биридир (Чых. 15:20, 21; Ефес. 5:19). Лакин Шејтанын пис дүнјасынын јајдығы мусиги әхлагсызлығы тәрәннүм едир (1 Јәһ. 5:19). Гулаг асдығын маһныларын әхлагыны позуб-позмадығыны неҹә мүәјјән едә биләрсән?

¹² Өзүндән соруш: «Бу маһныларда гәтл, әхлагсызлыг, зина вә Аллаһа күфр тәрәннүм едилирми? Әҝәр һәмин маһныларын сөзләрини кимәсә охусам, о инсан мәним ганунсузлуға нифрәт етдијими, јохса үрәјимин позулдуғуну дүшүнәҹәк?» Ганунсуз әмәлләрин тәрәннүм едилдији маһнылара гулаг асдығымыз бир һалда, ганунсузлуға нифрәт етдијимизи неҹә иддиа едә биләрик?! Иса демишди: «Ағыздан чыхан шејләр үрәкдән ҝәлир... Бунлар адамы мурдар едир. Мисал үчүн, пис фикирләр, гәтл, зина, ҹинси әхлагсызлыг, оғурлуг, јалан шаһидлик, күфр үрәкдән чыхыр». (Мат. 15:18, 19; мүгајисә ет: Јагуб 3:10, 11.)

Ганунсузлуғу севәнләрә Иса кими бах

13. Исанын пис јолдан әл чәкмәјән инсанлара гаршы мүнасибәти неҹә иди?

¹³ Иса ҝүнаһкарлары, јәни ганунсузлуг едәнләри төвбәјә чағырмаға ҝәлдијини демишди (Лука 5:30—32). Бәс пис јолдан әл чәкмәк истәмәјән инсанлара онун мүнасибәти неҹә иди? Иса белә инсанларын тәсири алтына дүшмәмәјимиз үчүн ҹидди хәбәрдарлыг етмишди (Мат. 23:15, 23—26). О, ачыг-ајдын демишди: «Мәнә: “Ағам, Ағам”, — дејән һәр кәс сәмави падшаһлыға ҝирмәјәҹәк, јалныз ҝөјдәки Атамын ирадәсини јеринә јетирән ора ҝирәҹәк. О ҝүн [Аллаһын һөкм чыхараҹағы ҝүн] чохлары мәнә дејәҹәк: “Аға, Аға, мәҝәр биз сәнин адынла пејғәмбәрлик етмирдик? Мәҝәр сәнин адынла ҹинләри говмурдуг? Мәҝәр сәнин адынла чохлу мөҹүзәләр ҝөстәрмирдик?”» О заман Иса төвбә етмәјән ҝүнаһкарлара дејәҹәк: «Рәдд олун» (Мат. 7:21—23). Онлара гаршы нәјә ҝөрә белә һөкм чыхарылаҹаг? Чүнки белә инсанлар Аллаһы рүсвај едир вә ганунсуз әмәлләри илә диҝәрләринә зәрәр јетирирләр.

14. Нәјә ҝөрә төвбә етмәјән ҝүнаһкар јығынҹагдан кәнар едилир?

¹⁴ Аллаһын Кәламына әсасән, төвбә етмәјән ҝүнаһкар јығынҹагдан кәнар едилмәлидир. (1 Коринфлиләрә 5:9—13 ајәләрини оху.) Бу, она ҝөрә ваҹибдир ки, 1) Јеһованын адына күфр едилмәсин, 2) јығынҹагда позғунлуг јајылмасын вә 3) мүмкүндүрсә, ҝүнаһ етмиш инсан төвбә етмәјә тәшвиг олунсун.

15. Јеһоваја садиг галмаг истәјириксә, өзүмүзә һансы ваҹиб суаллары вермәлијик?

¹⁵ Пис јолдан дөнмәк истәмәјән инсанлара Иса кими бахырыгмы? Биз нөвбәти суалларын үзәриндә дүшүнмәлијик: «Мәсиһчи јығынҹағындан кәнар едилән вә ја Јеһованын Шаһиди олмагдан имтина едән инсанла мүнтәзәм олараг үнсијјәт едирәмми? Әҝәр һәмин адам артыг мәнимлә бир евдә јашамајан јахын гоһумумдурса, онда неҹә?» Бу кими вәзијјәтләрдә салеһлијә мәһәббәтин вә Јеһоваја сәдагәтин сынана биләрa.

16, 17. Бир баҹы һансы чәтинликлә үзләшди вә төвбә етмәјән оғлу барәдә чыхарылан гәрары дәстәкләмәкдә она нә көмәк етди?

¹⁶ Бир баҹынын нүмунәсинә нәзәр салаг. Онун һәдди-бүлуға чатмыш оғлу вахтилә Јеһованы севирди. Лакин сонрадан о, ганунсузлуг етмәјә башлады вә төвбә етмәдији үчүн јығынҹагдан кәнар едилди. Баҹымыз һәм Јеһованы, һәм дә оғлуну чох севирди, буна ҝөрә дә оғлу илә үнсијјәти кәсәрәк Мүгәддәс Китабын буна даир әмрини јеринә јетирмәк онун үчүн сон дәрәҹәдә ағыр иди.

¹⁷ Сән бу баҹыја нә мәсләһәт ҝөрәрдин? Бир ағсаггал Јеһованын онун һиссләрини јахшы баша дүшдүјүнү деди. Ағсаггал ону Јеһованын бәзи руһани оғулларынын үсјан галдырдығы заман кечирдији һиссләр үзәриндә дүшүнмәјә тәшвиг етди. О гејд етди ки, Јеһова бу вәзијјәтин нә дәрәҹәдә ағыр олдуғуну билсә дә, төвбә етмәјән ҝүнаһкары јығынҹагдан кәнар етмәји тәләб едир. Баҹы гардашын мәсләһәтинә әмәл етди вә оғлу барәдә чыхарылан гәрары дәстәкләдиb. Бу ҹүр садиглик Јеһованын гәлбини севиндирир (Сүл. мәс. 27:11).

18, 19. а) Ганунсузлуг едәнләрлә әлагәләрини кәсән инсанлар нәјә нифрәт етдикләрини ҝөстәрирләр? б) Јеһоваја вә Онун ганунларына садиг галмағымыз һансы бәһрәләри ҝәтирә биләр?

¹⁸ Әҝәр сән дә бу кими вәзијјәтләрлә үзләшмисәнсә, әмин ол ки, Јеһова дәрдинә шәрикдир. Јығынҹагдан кәнар едилән вә ја Јеһованын Шаһиди олмагдан имтина едән кәслә әлагәни кәсмәклә сән ҝөстәрирсән ки, бу ҹүр нәтиҹәјә сәбәб олан әһвал-руһијјәјә вә әмәлләрә нифрәт едирсән. Бунунла јанашы, сән ҝөстәрирсән ки, ҝүнаһ ишләдән кәс сәнин үчүн әзиздир вә сән онун јахшылығыны истәјирсән. Јеһоваја садиг галмағын ҹәзаландырылан кәсин төвбә едиб јығынҹаға гајытмаг еһтималыны артыра биләр.

¹⁹ Әввәлләр јығынҹагдан кәнар едилән вә сонрадан бәрпа олунан бир нәфәр дејир: «Мән чох шадам ки, Јеһова тәшкилатына олан мәһәббәтиндән ирәли ҝәләрәк ону тәмиз сахлајыр. Кәнардан бәзиләринә сәрт ҝөрүнән бу тәдбир бөјүк әһәмијјәт кәсб едир вә әслиндә, мәһәббәтин тәзаһүрүдүр». Неҹә дүшүнүрсән, әҝәр јығынҹагдакы баҹы-гардашлар вә онун һәгигәтдә олан аилә үзвләри онунла мүнтәзәм олараг әлагә сахласајдылар, о, бу нәтиҹәјә ҝәләрди? Әҝәр биз јығынҹагдан кәнар едиләнләрлә әлагәдар Мүгәддәс Китабда верилән ҝөстәришләрә әмәл едириксә, демәли, биз салеһлији севир вә Јеһованын давраныш нормалары тәсис етмәк һүгугунун олдуғуну гәбул едирик.

«Шәрә нифрәт един!»

20, 21. Нәјә ҝөрә ганунсузлуға нифрәт етмәји өјрәнмәк ваҹибдир?

²⁰ Һәвари Петер јазмышдыр: «Ајыг-сајыг олун, ојаг дурун». Нәјә ҝөрә? Чүнки дүшмәнимиз олан «Иблис нәрилдәјән шир кими ҝәзиб удмаға адам ахтарыр» (1 Пет. 5:8). О «адам» сән дә ола биләрсән. Чох шеј ганунсузлуға нә дәрәҹәдә нифрәт етмәји өјрәндијиндән асылыдыр.

²¹ Етираф етмәк лазымдыр ки, бу, асан дејил. Биз ҝүнаһлы доғулмушуг вә ҹисмани арзуларымызы тәмин етмәјә тәшвиг едән дүнјада јашајырыг (1 Јәһ. 2:15—17). Амма Иса Мәсиһи тәглид етсәк вә Јеһова Аллаһы үрәкдән севсәк, ганунсузлуға нифрәт етмәји өјрәнәҹәјик. Буна ҝөрә дә ҝәлин ‘шәрә нифрәт едәк’ вә һеч вахт шүбһә етмәјәк ки, Јеһова ‘мөминләрин ҹаныны горумаға, онлары писләрин әлиндән гуртармаға’ гадирдир (Мәз. 97:10).

[Һашијәләр]

Неҹә ҹаваб верәрдиниз?

• Спиртли ичкиләрә даир мүнасибәтимизи мүәјјән етмәјә нә көмәк едәҹәк?

• Өзүмүзү сеһирбазлыгдан горумаг үчүн һансы тәдбирләри ҝөрмәлијик?

• Порнографијаја бахмаг нәјә ҝөрә тәһлүкәлидир?

• Бизә әзиз олан адам јығынҹагдан кәнар едилибсә, ганунсузлуға нифрәт етдијимиз нәдән ҝөрүнәҹәк?

[29-ҹу сәһифәдәки шәкил]

Спиртли ички ичмәк истәјирсәнсә, өзүнә һансы суаллары вермәлисән?

[30-ҹу сәһифәдәки шәкил]

Шејтанын әјләнҹәләр васитәсилә ҝөстәрдији тәсири һеч вахт унутма

[31-ҹи сәһифәдәки шәкил]

Порнографијаја бахан инсан үрәјиндә нәјә гаршы мәһәббәт инкишаф етдирир?