ОХУҸУЛАРЫМЫЗ СОРУШУР...

Шејтаны Аллаһмы јарадыб?

▪ Мүгәддәс Китабда ачыгланыр ки, һәр шеји Аллаһ јарадыб. Буна ҝөрә дә, бәзиләри белә гәнаәтә ҝәлмишләр ки, онда Шејтаны да Аллаһ јарадыб (Ефеслиләрә 3:9; Вәһј 4:11). Анҹаг Мүгәддәс Китаб бунун белә олмадығыны ачыг-ајдын ҝөстәрир.

Јеһова Аллаһын јаратдығы варлыг сонрадан Иблис олду. Ҝәлин бахаг, Мүгәддәс Китабда Јеһова Аллаһ һаггында бир Јарадан кими дејиләнләрлә Аллаһын баш дүшмәнинин мөвҹуд олмасы нә дәрәҹәдә бир-биринә ујғун ҝәлир. Орада Аллаһ һаггында дејилир: «О, ишләри камил Гајадыр, чүнки бүтүн јоллары һагдыр, садиг Аллаһдыр, һеч заман һагсызлыг етмәз, адил вә доғру олан Одур» (Ганунун тәкрары 32:3—5). Ајдын шәкилдә ҝөрүрүк ки, Шејтан бир вахтлар камил вә садиг бир мәхлуг, јәни Аллаһын мәләкләриндән бири олуб. Јәһја 8:44 ајәсиндә Иса пејғәмбәр Иблисин «һәгигәтә бағлы галмады»ғыны сөјләјир. Демәли, Шејтан башланғыҹда дүрүст вә нөгсансыз иди.

Лакин сонрадан Шејтана чеврилән бу мәләк, Јеһова Аллаһын јаратдығы диҝәр шүурлу варлыглар кими, јахшыны вә писи сечмәк азадлығына малик иди. О, Аллаһа үсјан етмәји сечмәклә вә илк инсан ҹүтүнү буна тәһрик етмәклә «Дүшмән» мәнасыны дашыјан Шејтан олду (Јарадылыш 3:1—5).

Бу пис руһани варлыг һәмчинин «Бөһтанчы» мәнасыны верән Иблис олду. Иланын архасында дуран вә јаландан истифадә едәрәк Һәвваны Јараданын вердији ајдын гануну позмаға тәһрик едән ҝөзәҝөрүнмәз варлыг Шејтан Иблис иди. Елә буна ҝөрә дә, Иса пејғәмбәр Шејтаны јаланчы вә јаланын атасы адландырмышды (Јәһја 8:44).

Бәс јахшы, әҝәр бу руһани варлығын һеч бир зәифлији јох идисә вә о, пис тәсирләрә мәруз галмырдыса, неҹә олду ки, онда бу ҹүр јанлыш арзулар баш галдырды? Ачыг-ајдын ҝөрүнүр ки, о, јалныз вә јалныз Аллаһа мәхсус олан ибадәтә јијәләнмәк истәди вә ҝөрдү ки, инсанлары Јеһова Аллаһдан узаглашдырыб, өз һакимијјәтинә табе етдирмәк мүмкүндүр. О, һакимијјәт әлдә етмәк арзусуну боғмаг әвәзинә, бу һагда дүшүнмәјә давам етди вә јол верди ки, бу фикир ахырда ону өз истәјәни һәјата кечирмәјә тәшвиг етсин. Бу просес Мүгәддәс Китабда белә тәсвир олунур: «Һәр кәс өз нәфсинин торуна дүшәрәк јолдан чыхыб сынаныр. Сонра нәфс бојлу галыб ҝүнаһ доғур» (Јагуб 1:14, 15; 1 Тимотејә 3:6).

Белә бир нүмунәјә нәзәр салаг: мүһасиб ҝөрүр ки, һеч кимин хәбәри олмадан идарәдән пул оғурламаг үчүн сәнәдләри сахталашдыра биләр. О, бир анлыг бејнинә ҝәлән бу фикри гова биләр. Анҹаг үзәриндә дүшүнмәјә давам едәрсә, бу фикир онда арзуја чевриләҹәк вә чох еһтимал ки, бир ҝүн о, өз истәјини һәјата кечирәҹәк. Белә етмәклә о, оғру олаҹаг. Әҝәр ишләтдији ҹинајәти ҝизләтмәк мәгсәдилә јалана әл атарса, үстәлик, јаланчы да олаҹаг. Буна бәнзәр тәрздә, Аллаһын јаратдығы мәләк үрәјиндәки јанлыш арзуну бөјүтмәклә вә һәјата кечирмәклә ирадә азадлығындан инсанлары аздырмаг вә Аллаһа үсјан галдырмаг үчүн истифадә етди. Бунунла да о, өзү Шејтан Иблис олду.

Шүкүрләр олсун ки, вахты чатанда Аллаһ Шејтан Иблиси мәһв едәҹәк (Ромалылара 16:20). Бу арада Јеһова Аллаһын хидмәтчиләри Шејтанын фәндләриндән бихәбәр дејилләр, һәмчинин онун фитнәләриндән мүдафиәјә маликдирләр (2 Коринфлиләрә 2:11; Ефеслиләрә 6:11). Беләликлә, «Иблисә мүгавимәт ҝөстәрин вә о, сиздән гачаҹаг» (Јагуб 4:7).

[32–ҹи сәһифәдәки шәкил]

Камил мәләк Аллаһа үсјан етмәји сечмәклә Шејтан олду