Гој һәр бир гәрарын Јеһоваја иззәт ҝәтирсин
«Узагҝөрән һәр аддымына нәзәр салар» (СҮЛ. МӘС. 14:15).
1, 2. а) Вердијимиз һәр бир гәрарда әсас мәгсәдимиз нә олмалыдыр? б) Биз һансы суаллары нәзәрдән кечирәҹәјик?
ҜҮН әрзиндә биз јүзләрлә гәрарлар гәбул едирик. Онларын әксәријјәти аз әһәмијјәтлидир, диҝәрләри исә һәјатымыза бөјүк тәсир ҝөстәрир. Кичик вә ја бөјүк олмаларындан асылы олмајараг, әсас одур ки, гәрарларымыз Јеһоваја иззәт ҝәтирсин. (1 Коринфлиләрә 10:31 ајәсини оху.)
2 Сәнин үчүн гәрарлар гәбул етмәк асандыр, јохса чәтин? Әҝәр биз мәсиһчи јеткинлијинә наил олмаг истәјириксә, јахшы илә писи бир-бириндән ајырмағы вә киминсә јох, өз әгидәмизә ујғун гәрарлар вермәји өјрәнмәлијик (Ром. 12:1, 2; Ибр. 5:14). Јахшы гәрарлар вермәји өјрәнмәк үчүн даһа һансы ваҹиб сәбәбләр вар? Нәјә ҝөрә гәрар вермәк бәзән чәтин олур? Һансы аддымлар бизә Аллаһа иззәт ҝәтирән гәрарлар гәбул етмәкдә көмәк едәҹәк?
Гәрар гәбул етмәјин ваҹиблији
3. Гәрарларымыза кимләр вә ја нәләр тәсир едә биләр вә нәјә ҝөрә биз буна јол вермәмәлијик?
3 Сөһбәт Мүгәддәс Китаб нормаларындан ҝедәндә биз гәтијјәтсизлик ҝөстәририксә, синиф вә ја иш јолдашларымыз белә гәнаәтә ҝәлә биләрләр ки, әгидәмиз мөһкәм дејил вә демәли, бизә асанлыгла тәсир ҝөстәрмәк олар. Бу инсанлар бизи дилә тута биләрләр ки, јалан данышмагда, фырылдаг ишләтмәкдә вә ја оғурлуг етмәкдә онлара гошулаг вә ја һеч олмаса пис әмәлләрини өрт-басдыр едәк (Чых. 23:2). Лакин Аллаһа иззәт ҝәтирән гәрарлар вермәји баҹаран мәсиһчи имкан вермәјәҹәк ки, кимдәнсә горхдуғуна вә ја киминсә тәрәфиндән гәбул едилмәк истәдијинә ҝөрә Мүгәддәс Китаб әсасында тәрбијә едилмиш виҹданына зидд даврансын (Ром. 13:5).
4. Нәјә ҝөрә башгалары бәзән бизим јеримизә гәрар вермәк истәјирләр?
4 Бизим јеримизә гәрар вермәк истәјән инсанларын һамысы буну пис нијјәтдән ирәли ҝәләрәк етмир. Јахшылығымызы истәјән достларымыз тәкид едә биләрләр ки, онларын мәсләһәтинә гулаг асаг. Әҝәр биз евдән узагда јашајырыгса, чох еһтимал ки, ваҹиб гәрарлар вермәли оланда гоһумларымыз бизә ҝөрә нараһат олдуглары үчүн мүдахилә етмәк истәјәҹәкләр. Нүмунә үчүн тибби мүалиҹә үсулларыны ҝөтүрмәк олар. Мүгәддәс Китаб гандан истифадә етмәји ајдын шәкилдә гадаған едир (Һәв. иш. 15:28, 29). Диҝәр мүалиҹә үсуллары барәдә исә Мүгәддәс Китабда ачыг-ајдын һеч нә дејилмир вә биздән ҝөзләнилир ки, һансыса мүалиҹә үсулуну гәбул едиб-етмәјәҹәјимизә өзүмүз гәрар верәкa. Аилә үзвләримизин бу барәдә өз фикирләри ола биләр. Амма бу кими гәрарлар вермәли олан һәр бир вәфтиз олунмуш мәсиһчи «өз мәсулијјәт јүкүнү» дашымалыдыр (Галат. 6:4, 5). Бизим үчүн ән ваҹиби инсанлары разы салмаг јох, Аллаһ гаршысында тәмиз виҹданымызы горумагдыр (1 Тим. 1:5).
5. Иманымызын ҝәми кими гәзаја уғрамасындан гачынмаг неҹә мүмкүндүр?
5 Гәтијјәтсизлик тәһлүкәли ола биләр. Шаҝирд Јагуб јазмышды ки, гәтијјәтсиз инсан ‘бүтүн ишләриндә сәбатсыздыр’ (Јаг. 1:8). Фыртыналы дәниз сүкансыз гајығы ора-бура атдығы кими, белә адам дәјишкән инсан фикри илә отуруб-дурур. Иманы ҝәми кими гәзаја уғрајанда дүшдүјү пис вәзијјәтә ҝөрә башгаларыны ҝүнаһландырмаг онун үчүн неҹә дә асандыр! (1 Тим. 1:19). Бу ҹүр агибәтдән гачынмаг үчүн биз ‘иманда сарсылмаз олмалыјыг’. (Колослулара 2:6, 7 ајәләрини оху.) Бунун үчүн биз Аллаһын Кәламына етибар етдијимизи ҝөстәрән гәрарлар вермәји өјрәнмәлијик (2 Тим. 3:14—17). Бизә гәрар гәбул етмәјә нә мане ола биләр?
Гәрар вермәк нәјә ҝөрә чәтиндир?
6. Горху һисси бизә неҹә тәсир едә биләр?
6 Сәһв гәрар вермәк, мүвәффәгијјәтсизлијә уғрамаг вә ја башгаларынын ҝөзүндә ахмаг ҝөрүнмәк горхусу инсанын әл-голуну бағлаја амилләрдән бәзиләридир. Белә инсанлары баша дүшмәк чәтин дејил. Чүнки һеч ким проблемләрә вә ола билсин, рүсвајчылыға сәбәб олаҹаг гәрарлар вермәк истәмир. Бунунла белә, Аллаһа олан мәһәббәтимизин сајәсиндә вә Онун Кәламынын көмәјилә горхуларымызы азалтмаг мүмкүндүр. Неҹә? Аллаһа мәһәббәт бизи тәшвиг едәҹәк ки, ваҹиб гәрарлар гәбул етмәздән өнҹә һәмишә Онун Кәламына вә Мүгәддәс Китаба әсасланан нәшрләрә мүраҹиәт едәк. Онда сәһвләримиз аз олаҹаг. Ахы Мүгәддәс Китаб «ҹаһилләрә узагҝөрәнлик, ҝәнҹ оғлана билик вә дәрракә» вермәјә гадирдир (Сүл. мәс. 1:4).
7. Давуд падшаһын нүмунәсиндән нә өјрәнирик?
7 Вердијимиз гәрарларын һамысы дүзҝүн олаҹаг? Јох, чүнки һәр биримиз сәһвләрә јол веририк (Ром. 3:23). Мәсәлән, Давуд падшаһ һикмәтли вә садиг инсан олса да, онун бәзи гәрарлары јахшы олмадығы үчүн бундан һәм өзү, һәм дә башгалары әзијјәт чәкирди (2 Шам. 12:9—12). Бу сәһвләрә бахмајараг, Давуд Аллаһын бәјәндији гәрарлар вермәјә сон гојмады (1 Пад. 15:4, 5). Әҝәр биз, Давуд кими, Јеһованын сәһвләримизә әһәмијјәт вермәјиб ҝүнаһларымызы бағышладығыны јадда сахласаг, онда кечмишдәки сәһвләримизә бахмајараг, гәрарлар гәбул етмәјә горхмајаҹағыг. Јеһова Ону севән вә Она итаәт едән инсанлара һәмишә дәстәк олур (Мәз. 51:1—4, 7—10).
8. Һәвари Павелин никаһ барәдә јаздыгларындан нә өјрәнирик?
8 Инсан ваҹиб гәрар гәбул етмәли оланда чох вахт дахилиндә нараһатчылыг кечирир. Бәс бу нараһатчылыглары неҹә азалтмаг олар? Биз унутмамалыјыг ки, һәрдән мүәјјән вәзијјәтләрдән бир нечә дүзҝүн чыхыш јолу олур. Һәвари Павелин Аллаһдан илһам алараг никаһ барәдә нә јаздығына диггәт јетирәк. Биз охујуруг: «Кимсә ҹинси истәкләрини ҹиловлаја билмирсә вә ҝәнҹлијинин баһар чағы артыг өтүбсә, гој белә етсин: евләнмәк истәјирсә, гој евләнсин. О, ҝүнаһ иш тутмур. Беләләри евләнә биләрләр. Лакин кимсә буна еһтијаҹ дујмур, гәрарында әзмли вә ирадәси мөһкәмдирсә, һәмчинин үрәјиндә бакирлијини горумағы гәт едибсә, о, јахшы иш ҝөрүр» (1 Кор. 7:36—38). Павел субајлығы ән јахшы сечим адландырды. Лакин бу, дүзҝүн олан јеҝанә сечим дејилди.
9. Башгаларынын гәрарымыза неҹә јанашаҹағы бизи нараһат етмәлидирми? Изаһ ет.
9 Башгаларынын гәрарымыза неҹә јанашаҹағы бизи нараһат етмәлидирми? Мүәјјән мәнада, һә. Бүтләр үчүн ҝәтирилдији еһтимал олунан гидадан гәбул етмәк барәдә Павелин дедији сөзләрә диггәт јетирәк. Павел етираф едирди ки, бу гәрар, ола билсин, өзү-өзлүјүндә сәһв дејил. Амма белә гәрар виҹданы зәиф олан инсаны бүдрәдә биләрди. О, нә мәсләһәт ҝөрдү? «Јемәк гардашым үчүн манеәдирсә, мән иман јолунда гардашымы бүдрәтмәмәк үчүн әсла әт јемәрәм» (1 Кор. 8:4—13). Дүздүр, гәрар гәбул едәркән ән ваҹиби онун Јеһова илә мүнасибәтимизә неҹә тәсир едәҹәјини нәзәрә алмагдыр. Бунунла белә, башгаларынын виҹданыны да унутмамалыјыг. (Ромалылара 14:1—4 ајәләрини оху.) Һансы Мүгәддәс Китаб принсипләри бизә Аллаһы иззәтләндирән гәрарлар вермәјә көмәк едәҹәк?
Јахшы гәрар вермәк үчүн алты аддым
10, 11. а) Аиләдә өзүмүзә архајын шәкилдә давранмамаг үчүн нәји гәбул етмәлијик? б) Ағсаггаллар бүтүн јығынҹагла әлагәдар гәрарлар гәбул етмәли оланда нәји јадда сахламалыдырлар?
10 Өзүнә архајын олма. Һәр һансы аддым атмаздан әввәл өзүмүздән сорушмалыјыг: «Бу кими гәрарлар вермәјә мәним ихтијарым вар?» Падшаһ Сүлејман јазмышды: «Ловғалыг ҝәләндә шәрәфсизлик ҝәтирәр, һикмәт итаәткарын јанына ҝәләр» (Сүл. мәс. 11:2).
11 Валидејнләр бәзән ушагларына гәрарлар гәбул етмәјә иҹазә версәләр дә, ушаглар һеч вахт бу ихтијары өз үзәрләринә ҝөтүрмәмәлидирләр (Колос. 3:20). Гадынын аиләдә мүәјјән сәлаһијјәти олса да, о, әринин башчылығына табе олмалыдыр (Сүл. мәс. 1:8; 31:10—18; Ефес. 5:23). Ејнилә, әрләр дә аиләдәки сәлаһијјәтләринин мәһдуд олдуғуну гәбул етмәли вә Мәсиһин башчылығына табе олмалыдырлар (1 Кор. 11:3). Ағсаггаллар јығынҹагла әлагәдар чохлу гәрарлар вермәли олурлар. Лакин бу заман онлар Мүгәддәс Китабда јазыланлардан кәнара чыхмалы дејилләр (1 Кор. 4:6). Һәмчинин садиг нөкәрдән алдыглары рәһбәрлијә дәгиг риајәт етмәлидирләр (Мат. 24:45—47). Әҝәр биз тәвазөкарлыг ҝөстәрәрәк јалныз ихтијарымыз чатдығы гәрарлар версәк, өзүмүзү вә башгаларыны бир чох нараһатчылыглардан вә мәјуслугдан горумуш олаҹағыг.
12. а) Нәјә ҝөрә биз мәсәләни һәртәрәфли арашдырмалыјыг? б) Буну неҹә етмәк олар? Изаһ ет.
12 Мәсәләни һәртәрәфли арашдыр. «Чалышганын нијјәти хејир ҝәтирәр, тәләсән еһтијаҹ ичинә дүшәр», — дејә Сүлејман јазмышды (Сүл. мәс. 21:5). Тутаг ки, сәнә ишҝүзар тәклиф ҝәлиб. Һиссләрә гапылараг ону дәрһал гәбул етмәјә тәләсмә. Әввәла, бүтүн фактлары топла, бу саһәдә тәҹрүбәси олан инсанларла мәсләһәтләш вә һәмин мәсәләјә аид олан Мүгәддәс Китаб принсипләрини арашдыр (Сүл. мәс. 20:18). Һәр шеји јербәјер етмәк үчүн ики сијаһы тәртиб ет — бириндә бу ишин мүсбәт, диҝәриндә исә мәнфи ҹәһәтләрини гејд ет. Гәрар вермәздән өнҹә отуруб мәсрәфләри һесабла (Лука 14:28). Бу гәрарын мадди вәзијјәтинә, ән әсасы исә Јеһова илә мүнасибәтләринә неҹә тәсир едәҹәјини ҝөтүр-гој ет. Мәсәләни һәртәрәфли арашдырмаг үчүн вахт вә сәј тәләб олунса да, бу, бизи тез-тәләсик гәрар вермәјин нәтиҹәсиндә јаранан башағрысындан горујаҹаг.
13. а) Јагуб 1:5 ајәси бизи нәјә әмин едир? б) Дуада Аллаһдан мүдриклик диләмәјин һансы көмәји дәјә биләр?
13 Дуада Аллаһдан мүдриклик дилә. Гәрарларымыз јалныз о һалда Аллаһа иззәт ҝәтирәҹәк ки, биз дуада Ондан көмәк диләјәк. Шаҝирд Јагуб јазмышды: «Әҝәр сизләрдән киминсә һикмәти чатышмырса, гој һәр кәсә сәхавәтлә вә гынамадан верән Аллаһдан даима диләсин вә она вериләҹәк» (Јаг. 1:5). Гәрар вермәк үчүн Аллаһын мүдриклијинә еһтијаҹ дујдуғумузу етираф етмәкдә утаныласы бир шеј јохдур (Сүл. мәс. 3:5, 6). Чүнки јалныз өзүмүзә ҝүвәнәрәк һансыса гәрар гәбул етсәк, бу, бизи сәһв истигамәтә јөнәлдә биләр. Аллаһдан көмәк истәјәндә вә Мүгәддәс Китаб принсипләрини арашдыранда мүгәддәс руһ бизә һансы нијјәтдән ирәли ҝәләрәк бу вә ја диҝәр јолу тутмаг истәдијимизи ҝөрмәјә көмәк едәҹәк. (Ибр. 4:12; Јагуб 1:22—25 ајәләрини оху.)
14. Гәрар вермәли оланда нәјә ҝөрә вахты узатмамалыјыг?
14 Гәрар вер. Әҝәр һәлә арашдырма апармамысанса вә Аллаһдан мүдриклик диләмәмисәнсә, бу аддымы атмаға тәләсмә. Мүдрик инсан диггәтлә «һәр аддымына нәзәр салар» (Сүл. мәс. 14:15). Амма вахты узатмаг лазым дејил. Чүнки белә олан һалда инсан бош бәһанәләр ҝәтирмәјә башлајаҹаг ки, тәки лазым олан аддымы атмасын (Сүл. мәс. 22:13). Бунунла белә, о, өз гәрарыны вериб — о гәрарлашдырыб ки, һәјатыны башгалары идарә етсин.
15, 16. Гәрарымызы һәјата кечирмәк үчүн нә тәләб олунур?
15 Гәрарыны һәјата кечир. Әҝәр биз өз гәрарымыза әсасән давранмаг үчүн сәј ҝөстәрмириксә, гәрар вермәк үчүн сәрф етдијимиз вахт һәдәр ҝедәҹәк. Сүлејман јазмышды: «Чалышмаг үчүн нә баҹарырсан, вар ҝүҹүнлә ет» (Ваиз 9:10). Гәрарымызы һәјата кечирәркән вахтымыздан вә ҝүҹүмүздән дүзҝүн истифадә етмәлијик. Јалныз белә етдијимиз тәгдирдә уғур газанаҹағыг. Туталым, бир тәблиғчи пионер олмаг гәрарына ҝәлиб. О, бу хидмәтдә уғур газанаҹаг? Газанаҹаг, амма бир шәртлә: ишинин вә әјләнҹәләрин онун хидмәтә сәрф етмәли олдуғу вахты вә ҝүҹүнү алмасына јол вермәсә.
16 Јахшы гәрары һәјата кечирмәк чох вахт асан олмур, чүнки «бүтүн дүнја... Шәририн әлиндәдир» (1 Јәһ. 5:19). Биз «сәмави аләмдәки шәр руһи гүввәләрә... вә бу зүлмәти идарә едән дүнја һөкмдарларына гаршы» мүбаризә апармалыјыг (Ефес. 6:12). Аллаһы иззәтләндирмәк гәрарыны верән инсанларын мүбаризә апармалы олаҹагларыны һәм һәвари Павел, һәм дә шаҝирд Јәһуда демишдиләр (1 Тим. 6:12; Јәһуда 3).
17. Гәрарлар гәбул едәркән Аллаһ биздән нә ҝөзләјир?
17 Гәрарларына јенидән нәзәр сал вә лазымдырса, дәјишиклик ет. Гәрарларымызын һамысы планлашдырдығымыз кими һәјата кечмир, чүнки ‘заман вә фүрсәт’ һәр кәсин габағына чыхыр (Ваиз 9:11). Амма елә гәрарлар вар ки, Јеһова, үзләшдијимиз сынаглардан асылы олмајараг, о гәрарлара әсасән јашамағымызы тәләб едир. Әҝәр инсан һәјатыны Јеһоваја һәср едибсә вә ја евлилик анды верибсә, гәрарыны дәјишмәји ағлына белә ҝәтирмәмәлидир. Аллаһ бу инсанлардан өз гәрарларына ујғун давранаҹагларыны ҝөзләјир. (Мәзмур 15:1, 2, 4 ајәләрини оху.) Амма әксәр гәрарлар бунлар гәдәр ваҹиб дејил. Мүдрик инсан вахташыры гәрарларына нәзәр салыр. О јол вермир ки, гүрур вә ја инадкарлыг гәрарларында дәјишиклик етмәјә вә ја онлары тамамилә дәјишмәјә мане олсун (Сүл. мәс. 16:18). Белә инсан һәр шејдән чох һәјатынын Аллаһа иззәт ҝәтирмәсини истәјир.
Башгаларыны да өјрәт
18. Валидејнләр ушагларына јахшы гәрарлар вермәји неҹә өјрәдә биләрләр?
18 Ушагларынын Аллаһа иззәт ҝәтирән гәрарлар вермәји өјрәнмәләри үчүн валидејнләр чох шеј едә биләрләр. Илк нөвбәдә, валидејнләр өзләри бу саһәдә јахшы нүмунә олмалыдыр (Лука 6:40). Әҝәр мүнасибдирсә, валидејнләр мүәјјән бир гәрары неҹә вердикләрини ушагларына даныша биләрләр. Һәмчинин онлар ушагларына иҹазә верә биләрләр ки, бәзи гәрарлары өзләри версинләр. Әҝәр ушагларын гәрары дүзҝүндүрсә, онлары тәрифләјин. Бәс әҝәр дүзҝүн дејилсә, онда неҹә? Адәтән, валидејнләрин етдији илк шеј ушагларыны һәмин гәрарын пис нәтиҹәләриндән горумагдыр, амма белә етмәклә онлар, неҹә дејәрләр, гаш дүзәлтдикләри јердә вуруб ҝөзү чыхардырлар. Мәсәлән, валидејн ушағына сүрүҹүлүк вәсигәси алмаға иҹазә вериб. Туталым, ушаг јол һәрәкәти гајдасыны позуб вә буна ҝөрә ҹәримәләниб. Белә баханда, ҹәримәни валидејн дә өдәјә биләр. Амма ушагдан ишләјиб өзүнүн ҹәримәни өдәмәси тәләб олунса, чох еһтимал ки, о, өз һәрәкәтләринә ҝөрә мәсулијјәт дашымағы өјрәнәҹәк (Ром. 13:4).
19. Мүгәддәс Китабы өјрәтдијимиз инсанлара нәји өјрәтмәлијик вә буну неҹә едә биләрик?
19 Иса шаҝирдләринә башгаларыны өјрәтмәји тапшырмышды (Мат. 28:20). Мүгәддәс Китабы өјрәтдијимиз инсанлара өјрәдә биләҹәјимиз ән ваҹиб дәрсләрдән бири дүзҝүн гәрар вермәкдир. Бунун үчүн биз онларын әвәзинә гәрар вермәмәлијик. Јахшы оларды ки, онлара Мүгәддәс Китабын принсипләри үзәриндә мүлаһизә јүрүтмәји өјрәдәк. Онда онлар өзләри неҹә давранмалы олдугларыны биләҹәкләр. Ахы «һәр кәс өзүнә ҝөрә Аллаһын гаршысында ҹаваб верәҹәк» (Ром. 14:12). Беләликлә, һамымызын Аллаһы иззәтләндирән гәрарлар вермәк үчүн тутарлы сәбәби вар.
[Һашијә]
a Бу мөвзу даһа әтрафлы «Бизим Падшаһлыг Хидмәтимиз»ин 2006-ҹы ил нојабр сајынын әлавә вәрәгәсиндәки «Мән ганын фраксијаларына вә өз ганымдан истифадә едиләрәк апарылан тибби проседуралара неҹә јанашырам?» мәгаләсиндә мүзакирә олунур.
Неҹә ҹаваб верәрдиниз?
• Биз нәјә ҝөрә гәрарлар гәбул етмәји өјрәнмәлијик?
• Горху бизә неҹә тәсир ҝөстәрә биләр вә она неҹә үстүн ҝәлмәк олар?
• Һансы алты аддым бизә Аллаһа иззәт ҝәтирән гәрарлар гәбул етмәкдә көмәк едәҹәк?
[16-ҹы сәһифәдәки чәрчивә/шәкил]
Јахшы гәрар вермәк үчүн алты аддым
1 Өзүнә архајын олма
2 Мәсәләни һәртәрәфли арашдыр
3 Дуада Аллаһдан мүдриклик дилә
4 Гәрар вер
5 Гәрарыны һәјата кечир
6 Гәрарларына јенидән нәзәр сал вә лазымдырса, дәјишиклик ет
[15-ҹи сәһифәдәки шәкил]
Гәтијјәтсиз инсан фыртыналы дәниздә сүкансыз гајыг кимидир