Надүрүст дүнјада дүрүстлүјү неҹә горумаг олар?

УДДУҒУМУЗ һава кими, надүрүстлүк һәр јаны бүрүјүб. Инсанлар бир-бирләрини алдадырлар, мүштәриләрдән артыг пул ҝөтүрүрләр, оғурлуг едирләр, борҹларыны гајтармырлар вә ишдә кимәсә кәләк ҝәлдикләри илә өјүнүрләр. Белә бир мүһитдә јашадығымыз үчүн биз дүрүст олмаг гәтијјәтимизи тез-тез сынаға чәкән вәзијјәтләрлә үзләширик. Бәс бизә дүрүст галмаға нә көмәк едәҹәк? Үч ваҹиб амили нәзәрдән кечирәк. Бунлар Аллаһ горхусу, тәмиз виҹдан вә оланымызла кифајәтләнмәкдир.

Аллаһ горхусу

Јешаја пејғәмбәр јазмышды: «Рәбдир һаким олан, Рәбдир ганунумузу гојан, Падшаһымыз Рәбдир» (Јешаја 33:22). Әҝәр биз Јеһованы Һөкмдарымыз кими гәбул едириксә, Ондан горхаҹағыг. Белә горху бизи надүрүст һәрәкәтләрдән чәкиндирәҹәк. Сүлејманын мәсәлләри 16:6 ајәсиндә дејилир: «Инсан Рәбб горхусуна ҝөрә писликдән дөнәр». Бу, Аллаһын гәддар олдуғуну дүшүнән инсанларын кечирдији ваһимәли горху һисси дејил. Әксинә, бу, рифаһымызла дәриндән марагланан сәмави Атамызы кәдәрләндирмәкдән бизи чәкиндирән нараһатчылыг һиссидир (1 Пет. 3:12).

Белә нараһатчылығын вә ја горху һиссинин фајдасыны ҝөстәрән нүмунәјә бахаг. Рикардо вә онун арвады Фернанда банк һесабларындан 700a доллар мәбләғиндә пул ҝөтүрдүләрb. Фернанда пуллары сајмадан чантасына гојду. Борҹларыны өдәјиб евләринә ҝәләндә чох тәәҹҹүбләндиләр, чүнки Фернанданын чантасында демәк олар ки, банкдан ҝөтүрдүкләри гәдәр пул галмышды. «Јәгин, банк ишчиси чашыб бизә артыг пул вериб», — дејә онлар фикирләшдиләр. Онлар башга борҹларыны да өдәмәли идиләр, буна ҝөрә дә ағылларына ҝәлән илк фикир пуллары өзләриндә сахламаг иди. Рикардо дејир: «Биз бирликдә Јеһоваја дуа етдик ки, пуллары гајтармаг үчүн бизә ҝүҹ версин. Јеһованын Сүлејманын мәсәлләри 27:11 ајәсиндәки чағырышы бизи Ону разы салмаға вә артыг пуллары банка гајтармаға тәшвиг етди».

Мүгәддәс Китаб әсасында тәрбијә едилмиш виҹдан

Мүгәддәс Китабы арашдырмагла вә өјрәндикләримизи һәјатымызда тәтбиг етмәклә биз виҹданымызы тәрбијә едә биләрик. Белә олан һалда Аллаһын ‘ҹанлы вә гүдрәтли’ сөзү нәинки бизим зеһнимизә, һәтта үрәјимизә тәсир ҝөстәрәҹәк вә бизи ‘һәр саһәдә дүрүст олмаға’ тәшвиг едәҹәк (Ибр. 4:12; 13:18).

Жуан адында бир нәфәр беш мин долларлыг борҹа ҝирмишди. Сонра о, борҹуну өдәмәдән башга шәһәрә көчдү. Сәккиз илдән сонра Жуан һәгигәти өјрәнди вә Мүгәддәс Китаб әсасында тәрбијә едилмиш виҹданы ону борҹ алдығы инсанла әлагә сахлајыб пуллары гајтармаға тәшвиг етди. Анҹаг Жуан алдығы аз мәваҹиблә арвадыны вә дөрд ушағыны доландырмалы олдуғу үчүн һәмин адам борҹу һәр ај аз-аз өдәмәсинә разылыг верди.

Оланымызла кифајәтләнәк

Һәвари Павел јазмышды: «Нәји варса, онунла гане олмағы баҹаран инсан үчүн Аллаһа сәдагәт, доғрудан да, бөјүк газанҹ мәнбәјидир... Јемәјимиз, палтарымыз вә галмаға јеримиз варса, бунларла гане олаҹағыг» (1 Тим. 6:6—8). Бу мүдрик мәсләһәтә риајәт етсәк, онда инсанларда тамаһкарлыг ојадан шүбһәли ишләрә баш гошмајаҹағыг вә тез бир заманда варланмағы вәд едән гејри-реал үсуллара әл атмајаҹағыг (Сүл. мәс. 28:20). Һәмчинин бу, бизә Аллаһын әсас тәләбатларымызы өдәјәҹәјинә там әмин олараг Онун Падшаһлығыны һәјатымызда һәмишә биринҹи јерә гојмаға көмәк едәҹәк (Мат. 6:25—34).

‘Вар-дөвләт алдадыҹы гүввәјә’ маликдир. Буна ҝөрә һәмишә јадда сахламалыјыг ки, әҝәр еһтијаты әлдән версәк, тамаһкарлыг тәләсинә дүшәҹәјик (Мат. 13:22). Аканы јадымыза салаг. О, исраиллиләрин мөҹүзәли шәкилдә Иордан чајынын бир тајындан о бири тајына неҹә кечдикләрини өз ҝөзләри илә ҝөрмүшдү. Буна бахмајараг, тамаһ она үстүн ҝәлди вә о, Јерихо шәһәринин талан малындан гызыл-ҝүмүш вә баһалы палтар оғурламаг фикринә дүшдү. Бу, она һәјаты баһасына баша ҝәлди (Јешуа 7:1, 20—26). Тәәҹҹүблү дејил ки, әсрләр сонра Иса нөвбәти хәбәрдарлығы сөјләди: «Ҝөзләринизи дөрд ачын вә өзүнүзү һәр ҹүр тамаһкарлыгдан горујун» (Лука 12:15).

Ишдә дүрүстлүк

Инди исә дүрүст олмаг гәтијјәтимизи сынаға чәкә биләҹәк вәзијјәтләри нәзәрдән кечирәк. Бәзи мүәссисәләрдә оғурлуг етмәк гәбаһәт сајылмаса да, унутмамалыјыг ки, ишдә дүрүст олмаг үмумијјәтлә оғурлуг етмәмәк демәкдир (Тит. 2:9, 10). Дөвләт мүәссисәсиндә чалышан Журандир езамијјәт хәрҹләри барәдә һәмишә дүзҝүн һесабат верирди. Онун әмәкдашлары исә хәрҹләдикләриндән даһа чох мәбләғ ҝөстәрирдиләр, чүнки шөбә мүдиринин дә бунда әли вар иди. Үстәлик, мүдир дүрүстлүјүнә ҝөрә Журандири мәзәммәт етди вә бундан сонра ону езамијјәтә ҝөндәрмәди. Бир мүддәт сонра һәмин мүәссисәдә јохлама кечириләндә Журандири дүрүстлүјүнә ҝөрә тәрифләдиләр вә вәзифәсини артырдылар.

Сатыҹы ишләјән Андренин мүдири она тапшырмышды ки, бәзи хидмәтләрә ҝөрә мүштәриләрдән икигат артыг пул ҝөтүрсүн. Гардаш Мүгәддәс Китаб принсипләринә садиг галмаг үчүн Јеһовадан дуада ҹәсарәт истәди (Мәз. 145:18—20). О, мүдиринә нәјә ҝөрә онун ҝөстәришинә әмәл етмәјәҹәјини изаһ етмәјә чалышды, лакин бунун һеч бир хејри олмады. Буна ҝөрә дә Андренин јүксәкмәваҹибли ишиндән чыхмагдан башга әлаҹы галмады. Тәхминән бир илдән сонра һәмин мүдир ондан ишә гајытмағы хаһиш етди вә деди ки, артыг бурада мүштәриләри алдатмырлар. Андре менеҹер вәзифәсинә тәјин едилди.

Борҹларын гајтарылмасы

Һәвари Павел мәсиһчиләрә тапшырыр: «Һеч кәсә һеч бир борҹунуз олмасын» (Ром. 13:8). Борҹуну гајтармаг истәмәјән инсан өзүнә һагг газандырараг белә дејә биләр: «Онсуз да онун пулу башындан ашыр». Лакин Мүгәддәс Китаб бизи хәбәрдарлыг едир: «Пис адам борҹ алыр, гајтармыр» (Мәз. 37:21).

Бәс әҝәр ‘заман вә фүрсәт’ уҹбатындан борҹумузу гајтармаға имканымыз јохдурса, онда неҹә? (Ваиз 9:11). Франсиско ипотека кредитини өдәмәк үчүн Алфредодан једди мин доллар борҹ ҝөтүрдү. Анҹаг ишиндә јаранан бәзи проблемләрә ҝөрә борҹуну тәјин олунмуш вахтда гајтара билмәди. Франсиско Алфредо илә бу барәдә сөһбәт етди вә борҹуну һиссә-һиссә өдәмәјә разылыг алды.

Јалан тәәссүрат бағышламагдан гачын

Биринҹи әсрдә мәсиһчи јығынҹағында хидмәт едән Һананја илә Сапфиранын нүмунәсини јадымыза салаг. Тарлаларыны сатдыгдан сонра онлар мәбләғин бир һиссәсини һәвариләрә ҝәтириб јаландан бүтүн пулу ианә етдикләрини дедиләр. Онлар башгаларында елә тәәссүрат јаратмаг истәјирдиләр ки, ҝуја чох сәхавәтлидирләр. Анҹаг һәвари Петер Аллаһын мүгәддәс руһунун көмәјилә онларын јаланыны ифша етди вә Јеһова бу әр-арвады өлүмлә ҹәзаландырды (Һәв. иш. 5:1—11).

Јалана әл атан Һананја илә Сапфирадан фәргли олараг, Мүгәддәс Китабы јазан шәхсләр сәмими вә дүрүст идиләр. Мәсәлән, Муса пејғәмбәр ачыг етираф етмишди ки, бир дәфә өзүндән чыхдығы үчүн Аллаһ она Вәд едилмиш дијара дахил олмаға иҹазә вермәди (Сај. 20:7—13). Еләҹә дә Јунус Ниневада тәблиғ етмәздән өнҹә вә сонра ҝөстәрдији зәифлији өрт-басдыр етмәди, әксинә, ону Мүгәддәс Китабда гәләмә алды (Јун. 1:1—3; 4:1—3).

Сөзсүз ки, һәгигәти демәк үчүн инсана ҹәсарәт лазымдыр — һәтта бунун хошаҝәлмәз нәтиҹәләри олса белә. Буну мәктәбдә охујан 14 јашлы Наталјанын һадисәсиндән ҝөрмәк олар. О, јазылы имтаһанын нәтиҹәләрини ҝөздән кечирәндә ҝөрдү ки, мүәллимин дүзҝүн кими ишарә етдији ҹаваб әслиндә сәһв имиш. Наталја билирди ки, мүәллиминә десә, бу, гијмәтләринә мәнфи тәсир ҝөстәрәҹәк. Наталја дејир: «Валидејнләрим мәни һәмишә өјрәдирдиләр ки, Јеһованы разы салмаг үчүн дүрүст олмалыјам. Буну мүәллимимә демәсәјдим, виҹданым мәни нараһат едәрди». Мүәллим шаҝирдини дүрүстлүјүнә ҝөрә тәрифләди.

Дүрүстлүк Јеһоваја шәрәф ҝәтирир

Бир ҝүн 17 јашлы Жизел ичиндә сәнәдләр вә 35 доллар олан бир пул кисәси тапды. О, кисәни мәктәбин мүдријјәтинә тәһвил верди ки, ону саһибинә чатдырсынлар. Бир ајдан сонра мәктәбин мүдир мүавини бүтүн синиф гаршысында мәктуб охуду. Орада Жизелә дүрүстлүјүнә, валидејнләринә исә она ҝөзәл тәрбијә вердикләринә вә руһани дәјәрләр ашыладыгларына ҝөрә миннәтдарлыг билдирилирди. Онун ‘јахшы ишләри’ Јеһоваја иззәт ҝәтирди (Мат. 5:14—16).

«Худбин, пулпәрәст, өзүнү өјән, өзүндән разы... вәфасыз» инсанларын ичиндә јашајан бизләрә дүрүст галмаг үчүн сәј ҝөстәрмәк тәләб олунур (2 Тим. 3:2). Амма Аллаһ горхусу, Мүгәддәс Китаб әсасында тәрбијә едилмиш виҹдан вә оланымызла кифајәтләнмәк бизә надүрүст дүнјада дүрүст галмаға көмәк едәҹәк. Бунун сајәсиндә бизим адил вә әдаләти севән Јеһова илә достлуг мүнасибәтләримиз даһа мөһкәм олаҹаг (Мәз. 11:7).

[Һашијәләр]

[7-ҹи сәһифәдәки шәкилләр]

Аллаһ горхусу дүрүст олмаг гәтијјәтимизи мөһкәмләндирәҹәк

[8-ҹи сәһифәдәки шәкил]

Бизим дүрүст давранышымыз Јеһоваја иззәт ҝәтирир