Аллаһын Кәламыны охумагдан зөвг алырсанмы?
«МҮГӘДДӘС КИТАБЫ тәзә-тәзә охумаға башлајанда бу, мәним үчүн әсил ишҝәнҹә иди, чүнки охудугларымы баша дүшмүрдүм. Бир дә ҝөрүрдүм ки, фикрим башга јердәдир», — дејә Лорен хатырлајыр.
Башгалары да етираф едирләр ки, Мүгәддәс Китабы охумаға башлајанда бу, онлар үчүн мараглы дејилди. Буна бахмајараг, онлар тәслим олмадылар, чүнки дәрк едирдиләр ки, Аллаһын Кәламыны һәр ҝүн охумаг дүзҝүндүр. Марк дејир: «Мүгәддәс Китабы охујанда вә шәхси өјрәнмә илә мәшғул оланда инсанын фикри асанлыгла јајына биләр. Аллаһын Кәламыны һәр ҝүн охумаг мәндә вәрдиш һалыны аланадәк чох чалышдым вә бунун үчүн чохлу дуа едирдим».
Аллаһын Кәламы олан Мүгәддәс Китабы даһа чох гијмәтләндирмәји неҹә өјрәнә биләрсән? Ону охумаг мараглы олсун дејә нә етмәк олар? Нөвбәти мәсләһәтләрә диггәт јетир.
Мәгсәдләр вә үсуллар
Охумаздан әввәл дуа ет вә фикрини топла. Јеһовадан хаһиш ет ки, сәндә Онун Кәламыны охумаға ҝүҹлү истәк јаратсын вә Онун мүдриклијини даһа дәриндән баша дүшмәјин үчүн үрәјини вә зеһнини ачсын (Мәз. 119:34). Әкс тәгдирдә, тез бир заманда Мүгәддәс Китабы сәтһи охумаға башлајаҹагсан, сонра исә һәвәсин тамамилә сөнәҹәк. Линн дејир: «Һәрдән елә тез охујурам ки, мараглы фикирләри нәзәрдән гачырырам. Чох вахт исә әсас фикирләри тута билмирәм. Буна ҝөрә дә Аллаһа дуа едирәм ки, фикрим јајынмасын. О да мәнә көмәк едир».
Өјрәндикләрини гијмәтләндир. Унутма ки, Мүгәддәс Китаб һәгигәтләрини баша дүшүб онлары тәтбиг етмәкдән сәнин һәјатын асылыдыр. Буна ҝөрә дә практики фикирләр тапыб онлары тәтбиг етмәк үчүн мәгсәдјөнлү шәкилдә сәј ҝөстәр. Крис дејир: «Мүгәддәс Китабы охујанда сәһв бахышларымы вә нијјәтләрими мүәјјән етмәјә көмәк едән фикирләр ахтарырам. Мүгәддәс Китабы вә нәшрләримизи јазанлар шәхсән мәнимлә таныш олмасалар да, орадакы мәлуматларын мәнә аид олдуғуну ҝөрмәк неҹә дә хошдур!»
Гаршына әлчатан мәгсәдләр гој. Мүгәддәс Китаб персонажлары барәдә јени шејләр өјрәнмәјә чалыш. Онлар барәдә мараглы тәфсилатлар тапмаг үчүн «Ҝөзәтчи Гүлләси»нин тематик индексинә мүраҹиәт ет. Мүгәддәс Китабда бәһс олунан киши вә гадынлары даһа јахшы таныдыгҹа, бу инсанларын кечирдикләри һиссләр барәдә өјрәндикҹә онлар сәнин үчүн даһа реал олаҹаг.
Мүгәддәс Китаб әсасында мүлаһизә јүрүтмәјин јени үсулларыны ахтар (Һәв. иш. 17:2, 3). Софија адлы бир баҹы Мүгәддәс Јазылары охујаркән белә едир. О дејир: «Хидмәтдә вә башга вахтларда Мүгәддәс Китаб һәгигәтләрини даһа ајдын чатдырмаг үчүн мүлаһизә јүрүтмәјин јени үсулларыны тапмаға чалышырам. “Ҝөзәтчи Гүлләси” журналында фикирләрин изаһ олунма тәрзиндән чох шеј өјрәнмәк олар» (2 Тим. 2:15).
Охудугларыны хәјалында ҹанландыр. Ибраниләрә 4:12 ајәсиндә Аллаһын сөзүнүн «ҹанлы» олдуғу дејилир. Мүгәддәс Китабы охујанда һадисәләри тәсәввүр ет. Бунун үчүн Мүгәддәс Китаб персонажларынын ҝөрдүкләрини ҝөрмәјә, ешитдикләри сәсләри вә кечирдикләри һиссләри тәсәввүр етмәјә чалыш. Өзүндән соруш: «Мәним вәзијјәтимлә онларын вәзијјәти арасында һансы охшарлыглар вар?» Чәтинликләри неҹә дәф етдикләриндән өзүн үчүн дәрс ҝөтүр. Белә етсән, охудугларыны даһа јахшы баша дүшәҹәксән вә онлары јадда сахламаг сәнин үчүн чәтин олмајаҹаг.
Чәтин ајәләри баша дүшмәк үчүн кифајәт гәдәр вахт ајырыб онлары арашдыр. Мүгәддәс Китабы охујаркән әлавә тәдгигат апармағы тәләб едән мараглы суалларын јарана биләр. Таныш олмајан сөзләрин мәнасыны арашдыр, һашијәләрә бах. Охудугларыны даһа јахшы баша дүшдүкҹә вә онлары тәтбиг етдикҹә Мүгәддәс Китаб сәнин үчүн даһа мараглы олаҹаг. Онда сән дә, мәзмурчу кими, нөвбәти сөзләри дејә биләҹәксән: «Әбәдилик Сәнин [Јеһованын] ҝөстәришләринә маликәм, чүнки онлар гәлбимә севинҹ верир» (Мәз. 119:111).
Охујанда тәләсмә. Шәхси өјрәнмә үчүн нә гәдәр вахт ајырдығына фикир вер. Таразлы ол ки, бу, јығынҹаг ҝөрүшләринә һазырлашмаг үчүн даһа аз вахт сәрф етмәјинә сәбәб олмасын. Ракел адлы бир баҹы дејир: «Чох вахт елә ҝәрҝин олурам ки, фикрими топлаја билмирәм. Буна ҝөрә дә һәр дәфә аз-аз мәшғул олурам. Онда шәхси өјрәнмә мәнә даһа чох фајда ҝәтирир». Крис етираф едир: «Мән ҝәрҝин оланда виҹданым мәни нараһат едир, чүнки охудугларым јадымда галмыр вә чох вахт үрәјимә тәсир етмир». Буна ҝөрә дә тәләсмә.
Аллаһын сөзүнә гаршы иштаһа ојат. Һәвари Петер јазыб: «Анадан тәзәҹә доғулмуш чаға кими Аллаһын сөзүндәки саф сүдә гаршы иштаһа ојадын ки, онун васитәсилә бөјүјүб хиласа јетишәсиниз» (1 Пет. 2:2). Көрпәләрә ана сүдүнә гаршы иштаһа инкишаф етдирмәјә еһтијаҹ јохдур, чүнки бу истәк онларда тәбиидир. Амма Мүгәддәс Китабда ачыг дејилир ки, бизим Аллаһын сөзүнә гаршы иштаһа инкишаф етдирмәјә еһтијаҹымыз вар. Әҝәр Мүгәддәс Китабдан ҝүндә јалныз бир сәһифә охусан, тезликлә сәндә дә белә иштаһа јаранаҹаг. Илк бахышдан чәтин ҝөрүнән иш тезликлә сәнә зөвг верәҹәк.
Охудугларынын үзәриндә дүшүн. Бунун да фајдасы аз дејил. Бу, сәнә арашдырдығын мөвзулары бир-бирилә әлагәләндирмәјә көмәк едәҹәк. Тезликлә сән, санки, бир ипә дүзүлмүш чох гијмәтли руһани һикмәт мирвариләри әлдә едәҹәксән (Мәз. 19:14; Сүл. мәс. 3:3).
Һәдәр ҝетмәјән вахт
Шәхси өјрәнмәни сәмәрәли вә мүнтәзәм кечирмәк үчүн сәј тәләб олса да, бунун хејир-дуасы бөјүкдүр. Бунун сајәсиндә Мүгәддәс Китабы даһа јахшы баша дүшәҹәксән (Ибр. 5:12—14). Аллаһын Кәламындан әлдә етдијин дәрракә вә һикмәт сәнә хошбәхтлик, мәмнунлуг вә гәлб раһатлығы ҝәтирәҹәк. Орада гәләмә алынан мүдрик кәлмәләр онлары гаврајан вә тәтбиг едән инсанлар үчүн «һәјат ағаҹыдыр» (Сүл. мәс. 3:13—18).
Аллаһын Кәламыны дәриндән арашдырмагла дәрракә газанаҹагсан (Сүл. мәс. 15:14). Бунун сајәсиндә вердијин мәсләһәтләр үрәкдән ҝәләҹәк вә тамамилә Мүгәддәс Китаба әсасланаҹаг. Әҝәр гәрар гәбул едәндә Мүгәддәс Јазылардан, еләҹә дә «садиг вә ағыллы нөкәр»ин нәшрләриндән охудугларыны әлдә рәһбәр тутсан, Јеһованын Кәламынын вердији әмин-аманлығы вә гәлб раһатлығыны дујаҹаг, никбин вә руһани бахышлы инсан олаҹагсан (Мат. 24:45). Даһа бир хејир-дуа исә одур ки, Јеһова илә мүнасибәтләринә аид олан һәр шејдә уғур газанаҹагсан (Мәз. 1:2, 3).
Аллаһа мәһәббәтдән долуб-дашан үрәјин сәни иманыны башгалары илә бөлүшмәјә тәшвиг едәҹәк. Бунун мүкафаты, һәгигәтән дә, бөјүкдүр. Инсанларын диггәтини хош хәбәрә ҹәлб етмәк, о ҹүмләдән хидмәтинин сәмәрәли вә севиндириҹи олмасы үчүн Софија гаршысына мүхтәлиф ајәләри јадда сахлајыб онлардан истифадә етмәк мәгсәдини гојуб. О дејир: «Инсанларын Мүгәддәс Китаб ајәләринә неҹә мүнасибәт ҝөстәрдикләрини ҝөрмәк фәрәһләндириҹидир».
Аллаһын Кәламыны һәвәслә охумағын ән бөјүк хејир-дуасы исә Јеһова илә сых мүнасибәтдир. Мүгәддәс Китабы тәдгиг етмәјин сајәсиндә Аллаһын гајда-ганунлары илә јахындан таныш олаҹагсан, үстәлик, Онун мәһәббәт, сәхавәтлилик вә әдаләт кими ҝөзәл хүсусијјәтләрини гијмәтләндирмәји өјрәнәҹәксән. Бундан даһа ваҹиб вә даһа дәјәрли нә ола биләр?! Буна ҝөрә дә Аллаһын Кәламыны дәриндән арашдыр. Буна сәрф етдијин вахт һәдәр ҝетмәјәҹәк (Мәз. 19:7—11).
[5-ҹи сәһифәдәки чәрчивә/шәкил]
МӘГСӘДЛӘР ВӘ ҮСУЛЛАР
▪ Охумаздан әввәл дуа ет вә фикрини топла.
▪ Өјрәндикләрини гијмәтләндир.
▪ Гаршына әлчатан мәгсәдләр гој.
▪ Мүгәддәс Китаб әсасында мүлаһизә јүрүтмәјин јени үсулларыны ахтар.
▪ Охудугларыны хәјалында ҹанландыр.
▪ Чәтин ајәләри баша дүшмәк үчүн кифајәт гәдәр вахт ајырыб онлары арашдыр.
▪ Охујанда тәләсмә.
▪ Аллаһын сөзүнә гаршы иштаһа ојат.
▪ Охудугларынын үзәриндә дүшүн.
[4-ҹү сәһифәдәки шәкил]
Мүгәддәс Китабы охујаркән өзүнү персонажларын гаршылашдығы вәзијјәтдә тәсәввүр етмәјә чалыш