Ушағым вәфтиз олмаға һазырдыр?

«ГЫЗЫМ инди Јеһованын хидмәтчиси олдуғу үчүн о гәдәр хошбәхтәм ки! Әминәм, о да хошбәхтдир», — дејә Филиппиндә јашајан Карлосa адында бир мәсиһчи өз һиссләрини бөлүшүр. Јунаныстандан олан бир ата исә јазыб: «Ушагларымызын үчү дә јенијетмә вахтларында вәфтиз олдуғуна ҝөрә јолдашымла мән фәрәһ дујуруг. Онлар руһани ҹәһәтдән инкишаф едирләр вә Јеһоваја хидмәт етдикләринә ҝөрә чох севинирләр».

Һәгигәтән дә, өвладлары вәфтиз олунанда мәсиһчи валидејнләр севинҹдән јерә-ҝөјә сығмырлар. Амма бәзән севинҹ һисси илә јанашы, онлар нараһатчылыг да кечирирләр. Бир ана дејир: «Бир тәрәфдән севинирдим, диҝәр тәрәфдән исә нараһат олурдум». Валидејнләрин нәјә ҝөрә белә гарышыг һиссләр кечирдијини баҹынын нөвбәти сөзләриндән ҝөрмәк олар: «Мән баша дүшүрдүм ки, оғлум инди Јеһованын гаршысында там мәсулијјәт дашыјыр».

Вәфтиз олмаг бүтүн ушагларын мәгсәди олмалыдыр. Бунунла белә, бәзи мәсиһчи валидејнләр дүшүнүрләр: «Дүздүр, ушағым руһани ҹәһәтдән јахшы инкишаф едиб, амма ҝөрәсән, әхлагсызлыға гаршы дурмаг вә Јеһованын гаршысында тәмизлији горумаг үчүн о, кифајәт гәдәр мөһкәмдир?» Диҝәр валидејнләри исә башга суал нараһат едә биләр: «Дүнја өвладымы мадди шејләрин далынҹа гачмаға сөвг едәндә о, севинҹлә вә ҹанла-башла Аллаһа хидмәт етмәји давам етдирәҹәкми?» Һансы Мүгәддәс Китаб принсипләри валидејнләрә ушагларынын вәфтизә һазыр олуб-олмадыгларыны мүәјјән етмәјә көмәк едә биләр?

Ән ваҹиб тәләб

Аллаһын Кәламында вәфтиз үчүн јаш һәдди гојулмајыб; орада бу ваҹиб аддымы атмаг истәјәнләрин руһани вәзијјәтинә өнәм верилир. Иса өз давамчыларына тапшырмышды: «Бүтүн милләтләрин ичиндә шаҝирд һазырлајын, онлары... вәфтиз един» (Мат. 28:19). Демәли, вәфтиз олмаға јарарлы олмаг үчүн инсан, илк нөвбәдә, Мәсиһин шаҝирди олмалыдыр.

Шаҝирд олмаг нә демәкдир? «Мүгәддәс Јазыларын дәрк едилмәси» енсиклопедијасында (инҝ.) изаһ олунур: «Бу термин, әсас етибарилә, Мәсиһин тәлимләрини садәҹә олараг гәбул едәнләрә јох, онлара дәгиг әмәл едән инсанлара аиддир». Бәс ушаглар Мәсиһин әсил шаҝирди ола биләрләр? Гырх илдән чохдур ки, Латын Америкасында миссионер кими хидмәт едән бир баҹы ики доғма баҹысы вә өзү һагда дејир: «Биз Јеһоваја хидмәт етмәк вә Ҹәннәтдә јашамаг истәдијимизи дәрк етмәк үчүн кифајәт гәдәр јеткин идик. Ҝәнҹлијә хас олан сынагларла үзләшәндә Јеһоваја һәср олунмағымыз бизә мөһкәм галмаға көмәк етди. Һәјатымызы Јеһоваја еркән јашларында һәср етдијимизә ҝөрә пешман дејилик».

Ушағынызын Мәсиһин шаҝирди олуб-олмадығыны неҹә мүәјјән едә биләрсиниз? Мүгәддәс Китабда дејилир: «Һәтта ушаг да әмәлләри илә, ишләринин саф, доғру, јохса әксинә олмасы илә танынар» (Сүл. мәс. 20:11). Ҝәлин ҝөрәк, ушағын һансы әмәлләри онун, һәгигәтән дә, Мәсиһин шаҝирди олдуғуну ҝөстәрир (1 Тим. 4:15).

Неҹә мүәјјән етмәли?

Ушағыныз сөзүнүзә бахыр? (Колос. 3:20). Она тапшырдығыныз ев ишләрини ҝөрүр? Мүгәддәс Китабда дејилир ки, Исанын 12 јашы оланда о, «һеч вахт валидејнләринин сөзүндән чыхмырды» (Лука 2:51). Әлбәттә, бу ҝүн һеч бир ушаг валидејнләринә мүкәммәл сурәтдә табе ола билмәз. Лакин һәгиги мәсиһчиләр Исанын изләри илә ҝетмәлидирләр. Буна ҝөрә дә әҝәр бир ҝәнҹ вәфтиз олмаг истәјирсә, һамы ону валидејнләринин сөзүнә гулаг асан бириси кими танымалыдыр (1 Пет. 2:21).

Нөвбәти суалларын үзәриндә дүшүнүн: ушағыныз хидмәтдә фәал иштирак етмәклә Падшаһлыг ишини һәјатында «биринҹи јерә» гојур? (Мат. 6:33). Онун хош хәбәри башгалары илә бөлүшмәк истәји вар, јохса сиз ону хидмәтә чыхмаға вә ја гапы ағзында инсанларла сөһбәт етмәјә аз гала мәҹбур етмәли олурсунуз? О, вәфтиз олунмамыш бир тәблиғчи кими өз мәсулијјәтләрини дәрк едир? Саһәсиндә Мүгәддәс Китаба мараг ҝөстәрән инсанлара тәкрарән баш чәкмәјә ҹан атыр? Синиф јолдашларына вә мүәллимләринә Јеһованын Шаһиди олдуғуну дејиб?

Ушағыныз јығынҹаг ҝөрүшләриндә иштирак етмәји ваҹиб һесаб едир? (Мәз. 122:1). «Ҝөзәтчи Гүлләси»нин мүзакирәсиндә вә Јығынҹағын Мүгәддәс Китаб өјрәнмәсиндә шәрһ вермәји хошлајыр? Теократик Хидмәт Мәктәбиндә алдығы тапшырыглары һәвәслә јеринә јетирир? (Ибр. 10:24, 25).

Мәктәбдә вә ја башга бир јердә пис достлугдан гачынмагла өзүнү әхлаги ҹәһәтдән тәмиз сахламаға чалышыр? (Сүл. мәс. 13:20). Онун гулаг асдығы маһнылар, бахдығы филм вә верилишләр, ојнадығы видеоојунлар вә Интернетдән истифадә етмәси барәдә нә демәк олар? Онун сөзләриндән вә әмәлләриндән Мүгәддәс Китаб нормаларына ујғун јашамаг истәдији ҝөрүнүр?

Ушағыныз Мүгәддәс Китабы нә дәрәҹәдә јахшы билир? Аиләви ибадәт заманы өјрәндикләрини өз сөзләрилә демәји баҹарыр? Мүгәддәс Китабын әсас тәлимләрини изаһ едә билир? (Сүл. мәс. 2:6—9). Мүгәддәс Китабы, о ҹүмләдән садиг вә ағыллы нөкәрин нәшрләрини охумаг онун үчүн мараглыдыр? (Мат. 24:45). Мүгәддәс Китаб тәлимләри вә ајәләри илә әлагәдар суаллар верир?

Бу суалларын көмәјилә сиз ушағынызын руһани вәзијјәтинин нә јердә олдуғуну мүәјјән едә биләҹәксиниз. Онлары нәзәрдән кечирдикдән сонра, ола билсин, сиз гәнаәтә ҝәлдиниз ки, ушағыныз һәлә мүәјјән саһәләрин үзәриндә ишләмәлидир. Амма әҝәр онун һәјат тәрзи, һәгигәтән дә, Мәсиһин шаҝирди олдуғуну ҝөстәрирсә вә о, һәјатыны Јеһоваја һәср едибсә, ола билсин, сиз она вәфтиз олмаға иҹазә вердиниз.

Ушаглар Јеһоваја һәмд едә биләрләр

Аллаһын бир чох хидмәтчиләри јенијетмә вә һәтта ушаг икән Онун гаршысында садигликләрини горуја билмишдиләр. Јусифи, Шамуели, Јошијаны вә Исаны јадыныза салын (Јар. 37:2; 39:1—3; 1 Шам. 1:24—28; 2:18—20; 2 Салн. 34:1—3; Лука 2:42—49). Филипин пејғәмбәрлик едән гызларынын дөрдү дә, ҝөрүнүр, еркән јашларындан јахшы тәрбијә алмышды (Һәв. иш. 21:8, 9).

Јунаныстанда јашајан бир һәмиманлымыз дејир: «Вәфтиз оланда мәним 12 јашым вар иди. Бу гәрарыма ҝөрә һеч вахт пешман олмамышам. Һәмин вахтдан 24 ил өтүб вә бунун 23 илини пионер кими хидмәт етмишәм. Јеһоваја олан мәһәббәтим мәнә ҝәнҹлијә хас олан проблемләрин өһдәсиндән ҝәлмәјә көмәк етмишди. Дүздүр, 12 јашым оланда Мүгәддәс Китаб һаггында билијим индики гәдәр дејилди, лакин мән Јеһованы севдијими вә Она әбәдијјән хидмәт етмәк истәдијими дәрк едирдим. Чох шадам ки, Јеһова мәнә индијәдәк Она хидмәт етмәјә көмәк едиб».

Ҝәнҹ вә ја јашлы олмасындан асылы олмајараг, Мәсиһин шаҝирди олдуғуну әмәлдә ҝөстәрән инсан вәфтиз олмалыдыр. Һәвари Павел јазмышды: «Инсан үрәкдән иман едәндә салеһлијә, иманыны дили илә бәјан едәндә исә хиласа јетишир» (Ром. 10:10). Мәсиһин ҝәнҹ шаҝирди вәфтиз олунанда бу һәм онун, һәм дә валидејнләри үчүн бөјүк наилијјәтдир. Буна ҝөрә дә јол вермәјин ки, нә исә сизи вә ушагларынызы бу севинҹдән мәһрум етсин.

[Һашијә]

[5 сәһифәдәки шәкил]

Вәфтизә дүзҝүн мүнасибәт

Бәзи валидејнләр ушагларынын вәфтиз олунмаларыны сүрүҹүлүк вәсигәсини алмаға бәнзәдирләр; онлар бу ваҹиб аддымын мүәјјән дәрәҹәдә рискли олдуғуну һесаб едирләр. Бәс вәфтиз вә мүгәддәс хидмәт инсанын ҝәләҹәк фираванлығыны тәһлүкә алтына гојур? Мүгәддәс Китаба әсасән, јох. Сүлејманын мәсәлләри 10:22 ајәсиндә дејилир: «Рәббин хејир-дуасы инсана сәрвәт ҝәтирәр, даһа она гүссә вермәз». Павелин ҝәнҹ Тимотејә јаздығы сөзләр дә диггәтәлајигдир: «Нәји варса, онунла гане олмағы баҹаран инсан үчүн Аллаһа сәдагәт, доғрудан да, бөјүк газанҹ мәнбәјидир» (1 Тим. 6:6).

Дүздүр, Јеһоваја хидмәт етмәк елә дә асан дејил. Јеремја да пејғәмбәр кими хидмәт етдији мүддәтдә бир чох проблемләрлә үзләшмишди. Бунунла белә, о, хидмәти барәдә јазмышды: «Сөзләрин мәнә севинҹ вә үрәјимә шадлыг ҝәтирди. Чүнки Сәнә мәхсусам, еј Ордулар Аллаһы Рәбб!» (Јер. 15:16). Јеремја дәрк едирди ки, севинҹинин мәнбәји Аллаһа хидмәт етмәсидир. Шејтан дүнјасы бизә проблемләрдән башга һеч нә ҝәтирмир. Валидејнләр ушагларына бу фәрги ҝөрмәјә көмәк етмәлидирләр (Јер. 1:19).

[Чәрчивә/6 сәһифәдәки шәкил]

Бәлкә, һәлә тездир?

Ушаг вәфтиз үчүн бүтүн тәләбләрә ҹаваб версә дә, валидејнләр елә фикирләшә биләрләр ки, она бу аддымы атмаг һәлә тездир. Буна сәбәб нә ола биләр?

Горхурам ки, ушағым вәфтиз олунандан сонра ҝүнаһ ишләдиб јығынҹагдан кәнар едиләҹәк. Бәс вәфтизини ҝеҹикдирән ҝәнҹин өз һәрәкәтләринә ҝөрә Аллаһын гаршысында ҹаваб вермәјәҹәјини дүшүнмәк нә дәрәҹәдә мәнтигәујғундур? Сүлејман ҝәнҹләрә мүраҹиәт едәрәк демишди: «Бил ки, Аллаһ... [һәрәкәтләринә] ҝөрә сәни мүһакимә едәҹәк» (Ваиз 11:9). Һәвари Павел исә: «Һәр кәс өзүнә ҝөрә Аллаһын гаршысында ҹаваб верәҹәк», — дејәркән һеч бир јаш фәрги гојмады (Ром. 14:12).

Аллаһын һәм вәфтиз олунмуш, һәм дә вәфтиз олунмамыш хидмәтчиләри Онун гаршысында мәсулијјәт дашыјырлар. Унутмајын ки, Јеһова ҝүҹләринин чатмадығы сынаглара мәруз галмаларына јол вермәмәклә Өз хидмәтчиләрини мүдафиә едир (1 Кор. 10:13). Нә гәдәр ки онлар «ајыг-сајыг» галырлар вә сынаглар заманы садигликләрини горујурлар, Аллаһын онлара көмәк едәҹәјинә үмид едә биләрләр (1 Пет. 5:6—9). Бир баҹы јазыр: «Вәфтиз олунмуш ушаглар бу дүнјанын писликләриндән узаг дурмаға даһа гәрарлы олурлар. Он беш јашында вәфтиз олан оғлум вәфтизә мүдафиә кими бахыр. О дејир ки, бунун сајәсиндә Јеһованын ганунуна зидд олан шејләр етмәк барәдә дүшүнмүр. Һәгигәтән дә, вәфтиз инсаны салеһликдән бәрк-бәрк јапышмаға тәшвиг едир».

Әҝәр сиз ушағынызы сөз вә нүмунәнизлә Јеһоваја итаәт етмәји өјрәтмисинизсә, әмин ола биләрсиниз ки, о, вәфтиздән сонра да бу јолдан дөнмәјәҹәк. Сүлејманын мәсәлләри 20:7 ајәсиндә дејилир: «Салеһ камалы [«нөгсансызлығы», ЈД] илә јашар, өзүндән сонра ҝәлән нәсли бәхтијар олар».

Истәјирәм ки, өвладым әввәлҹә бәзи мәгсәдләрә наил олсун. Ушаглар ҝәләҹәкдә өзләрини тәмин етмәк үчүн мүәјјән бир сәнәтә јијәләнмәлидирләр. Лакин һәгиги ибадәти биринҹи јерә гојмаг әвәзинә, онлары тәһсил алмаға вә мадди фираванлыға ҹан атмаға тәшвиг етмәк тәһлүкәлидир. Падшаһлыг һаггында хәбәри тәмсил едән, амма бәһрә вермәјән «тохум» барәдә Иса демишди: «Тиканлыға дүшмүш тохум о адама аиддир ки, сөзү ешидир, лакин бу дөврүн гајғылары вә вар-дөвләтин алдадыҹы гүввәси сөзү боғур вә о бар вермир» (Мат. 13:22). Әҝәр ушағын руһани мәгсәдләрә наил олмасы дүнјәви мәгсәдләринә чатмасындан асылы олса, онун Аллаһа хидмәт етмәк истәји галмајаҹаг.

Бир тәҹрүбәли ағсаггал вәфтиз олмаға һазыр олан, амма валидејнләри буна иҹазә вермәјән ушаглар барәдә демишди: «Белә ушағын вәфтиз олмасына мане олмаг онун руһани инкишафынын гаршысыны ала вә мәјуслуға гапылмасына сәбәб ола биләр». Бир сәјјар нәзарәтчиси исә јазмышды: «Белә ҝәнҹ дүшүнә биләр ки, Јеһова илә мүнасибәтләри лазыми сәвијјәдә дејил вә ја наилијјәтләри башгаларынкы илә мүгајисәдә даһа аздыр. О, өзүнү нәјәсә јарарлы һисс етмәк үчүн дүнјаја үз тута биләр».

[6 сәһифәдәки шәкил]

Ушағым әввәлҹә университетә дахил олмалыдыр?

[3 сәһифәдәки шәкил]

Ушағын Мәсиһин шаҝирди олуб-олмадығыны онун әмәлләриндән ҝөрмәк олар

[3 сәһифәдәки шәкил]

Ушағыныз ҝөрүшләрә һазырлашыр? Онларда иштирак едир?

[4 сәһифәдәки шәкил]

Сөзүнүзә бахыр?

[4 сәһифәдәки шәкил]

Тәблиғә чыхыр?

[4 сәһифәдәки шәкил]

Дуа едир?