Аллаһ Өз мәһәббәтини бизә ҝөстәрир

«Лүтф... салеһлик васитәсилә әбәди һәјат үчүн һөкм сүрсүн» (РОМ. 5:21).

1, 2. Инсанлар һансы мирасы вә ја әнамы гијмәтли сајырлар? Бәс һәгигәтән дә дәјәрли олан әнам һансыдыр?

«РОМАЛЫЛАРЫН хәләфләринә гојдуглары... ән бөјүк мирас онларын ганунлары вә инсанларын ганунлара әсасән јашамалы олдуглары фикри иди» (Доктор Девид Уилјамс, Мелбурн Университети, Австралија). Лакин бу мирас нә гәдәр гијмәтли олса да, ондан да дәјәрли мирас вә ја әнам мөвҹуддур. Сөһбәт Аллаһын тәгдим етдији әнамдан ҝедир. Онун сајәсиндә бизим Аллаһ гаршысында салеһ елан олунмаг вә хилас олуб әбәди јашамаг үмидимиз вар.

² Аллаһын бу әнамы неҹә тәгдим етмәси мүәјјән мәнада Онун әдаләт принсипләри илә бағлыдыр. Анҹаг һәвари Павел «Ромалылара мәктуб»унун 5-ҹи фәслиндә буну гуру һүгуги факт кими тәгдим етмир. Әксинә, о, бу фәсли руһландырыҹы вә әминлик ифадә едән сөзләрлә башлајыр: «Имана ҝөрә салеһ елан олундуғумуз үчүн, ҝәлин Ағамыз Иса Мәсиһ васитәсилә Аллаһла арамыздакы сүлһү горујаг». Аллаһын бу әнамыны алан инсанларын үрәјиндә Она гаршы мәһәббәт јараныр. Белә инсанлардан бири дә һәвари Павел иди. О јазмышды: «Бизә верилмиш мүгәддәс руһ васитәсилә үрәјимизә Аллаһын мәһәббәти долмушдур» (Ром. 5:1, 5).

3. Аллаһын тәгдим етдији әнамла әлагәдар мәнтиги олараг һансы суаллар јараныр?

³ Бәс нәјә ҝөрә Аллаһын мәһәббәтлә тәгдим етдији әнама еһтијаҹымыз вар иди? Аллаһ бу әнамы неҹә тәгдим едә биләрди ки, Онун әдаләт нормалары позулмасын вә бу, бүтүн инсанлара фајда ҝәтирсин? Бу әнамы алмаг үчүн инсандан нә тәләб олунур? Ҝәлин бу суалларын ҹавабыны тапаг вә ҝөрәк бундан Аллаһын мәһәббәтли олдуғу неҹә ҝөрүнүр.

Аллаһын мәһәббәти ҝүнаһа гаршы

4, 5. а) Јеһова бизә олан бөјүк мәһәббәтини неҹә ҝөстәриб? б) Ромалылара 5:12 ајәсини баша дүшмәк үчүн биз нәји билмәлијик?

⁴ Инсанлара бөјүк мәһәббәтиндән ирәли ҝәләрәк Јеһова Өз јеҝанә Оғлуну онлара көмәк етмәк үчүн јер үзүнә ҝөндәрди. Павел буну белә ифадә едир: «Аллаһ... Өз мәһәббәтини бизә онунла ҝөстәрир ки, биз һәлә ҝүнаһлы икән Мәсиһ уғрумузда өлдү» (Ром. 5:8). «Биз һәлә ҝүнаһлы икән» ифадәсинә диггәт јетирәк. Һамы бәшәријјәтин ҝүнаһа неҹә батдығыны билмәлидир.

⁵ Павел буну белә изаһ едир: «Ҝүнаһ бир адам васитәсилә, өлүм дә ҝүнаһ васитәсилә дүнјаја ҝирдији кими, өлүм бүтүн адамлара кечди, чүнки һамы ҝүнаһ ишләјиб» (Ром. 5:12). Буну баша дүшмәк чәтин дејил, чүнки Аллаһ Мүгәддәс Китаб васитәсилә һәјатын неҹә јарандығыны ачыглајыр. Орадан биз билирик ки, Аллаһ ики инсаны, Адәмлә Һәвваны јаратмышды. Јарадан камил олдуғу үчүн бизим улу валидејнләримиз дә камил иди. Аллаһ онлара јалныз бир шеји гадаған етмишди вә габагҹадан демишди ки, һәмин гануну позсалар, өләҹәкләр (Јар. 2:17). Анҹаг онлар фәлакәтлә нәтиҹәләнән сечим етмәклә Аллаһын әдаләтли әмриндән чыхдылар вә бунунла Јеһованы Али Һөкмдар вә ганунлар тәсис едән бир Шәхс кими рәдд етдиләр (Ганун. т. 32:4, 5).

6. а) Нәјә ҝөрә Адәмин нәсли Мусаја Ганун верилмәздән әввәл дә өлүрдү, сонра да өлүр? б) Һемофилија кими хәстәликләрин нүмунәси әсасында нәји изаһ етмәк олар?

⁶ Адәмин өвладлары о ҝүнаһ етдикдән сонра дүнјаја ҝәлди. Буна ҝөрә дә ҝүнаһ вә онун нәтиҹәләри онларын һамысына кечди. Әлбәттә, онлар Адәм кими биләрәкдән Аллаһын гануну позмамышдылар, буна ҝөрә дә Аллаһ онлары Адәмин етдији ҝүнаһа ҝөрә иттиһам етмирди. Үстәлик, о вахт Аллаһ һәлә Өз ганунларыны вермәмишди (Јар. 2:17). Бунунла белә, Адәмин нәсли ҝүнаһы мирас алды. Беләликлә, ҝүнаһ вә өлүм Аллаһын исраиллиләрә ганунлар верән вахтадәк ағалыг едирди. Ганун вериләндә исә бу, Адәмин нәслинин ҝүнаһлы олдуғуну ачыг-ајдын ҝөстәрди. (Ромалылара 5:13, 14 ајәләрини оху.) Мирас алдығымыз ҝүнаһын бизә неҹә тәсир етдијини талассемија, јахуд да һемофилија кими ирси хәстәликләрин, јәни гүсурларын нүмунәси әсасында ҝөстәрмәк олар. Ола билсин, сиз ешитмисиниз ки, рус чары ЫЫ Николај вә онун јолдашы Александра Фјодоровнанын оғлу Алексеј ган хәстәлији олан һемофилијаны мирас алмышды. Белә аиләләрдә доғулан ушагларын һамысы бу хәстәликләрдән әзијјәт чәкмәсә дә, онларын дашыјыҹысы ола биләрләр. Лакин ҝүнаһын нәтиҹәси тамамилә фәрглидир. Бу гүсурун Адәмдән бизә кечмәси гачылмаз иди. Ону өз үзәриндә һамы һисс едир вә о, һәмишә өлүмлә нәтиҹәләнир. Ҝүнаһ дүнјаја ҝәлән һәр ушаға кечир. Бәс ондан нә вахтса јаха гуртармаг мүмкүн олаҹаг?

Аллаһ Мәсиһ васитәсилә нә етди?

7, 8. Ики камил инсанын тутдуғу јоллар һансы фәргли нәтиҹәләрә ҝәтириб чыхартды?

⁷ Инсанларын мирас алдыглары ҝүнаһдан азад олмалары үчүн Јеһова мәһәббәтдән ирәли ҝәләрәк бир тәдбир ҝөрүб. Павел изаһ етмишди ки, бу, маһијјәт етибарилә, икинҹи Адәм олан диҝәр камил инсан васитәсилә мүмкүн олуб (1 Кор. 15:45). Бу ики камил инсанын тутдуғу јол тамамилә фәргли нәтиҹәләр верди. Һансы нәтиҹәләри? (Ромалылара 5:15, 16 ајәләрини оху.)

⁸ Павел дејир: «Әнамын нәтиҹәси ҝүнаһын нәтиҹәсиндән там фәрглидир». Адәм Аллаһын ганунуну поздуғуна ҝөрә ҝүнаһкар иди, буна ҝөрә дә лајиг олдуғу ҹәзаны — өлүм һөкмүнү алды. Лакин өлән јалныз о дејилди. Биз охујуруг: «Бир нәфәрин ҝүнаһы уҹбатындан чохлу адам [өлдү]». Адәмә кәсилән әдаләтли һөкм тәләб едирди ки, биз дә дахил олмагла, онун бүтүн гејри-камил нәсли ејни ҹәзаны алсын. Буна бахмајараг, ондан сонра дүнјаја ҝәлән камил инсан олан Исанын тамамилә башга нәтиҹәјә наил олдуғуну билмәк бизә тәсәлли верир. Сөһбәт һансы нәтиҹәдән ҝедир? Бу суалын ҹавабыны Павелин јаздығы сөзләрдән ҝөрмәк олар: «Һәр ҹүр инсан јашамаг үчүн салеһ елан едилир» (Ром. 5:18).

9. Ромалылара 5:16, 18 ајәләринә әсасән, Аллаһ инсанларын салеһ елан олунмалары үчүн нә едиб?

⁹ «Салеһ елан едилмәк» кими тәрҹүмә олунан јунан ифадәсинин мәнасы нәдир? Бир Мүгәддәс Китаб тәрҹүмәчиси бу барәдә јазыб: «Бу, һүгуги чаларлары олан бир метафорадыр. Бу ифадә алтында инсанын дахилиндә баш верән дәјишиклик јох, онун Аллаһ гаршысындакы мөвгејинин дәјишилмәси нәзәрдә тутулур... Бу метафора Аллаһы гаршысына ҝәтирилән вә гејри-салеһликдә иттиһам олунан мүттәһимин хејринә гәрар чыхаран, башга сөзлә, она бәраәт газандыран бир һаким кими тәсвир едир».

10. Исанын ҝөрдүјү һансы иш инсанларын салеһ елан олунмалары үчүн әсас верир?

¹⁰ «Бүтүн дүнјанын Һакими» олан Јеһова гејри-салеһ инсанлара нәјин әсасында бәраәт газандыра биләрди? (Јар. 18:25). Белә бир әсасын олмасы үчүн Аллаһ мәһәббәтдән ирәли ҝәләрәк јеҝанә Оғлуну јер үзүнә ҝөндәрди. Иса сынагларла, истеһза вә тәһгирләрлә үзләшсә дә, Атасынын ирадәсини мүкәммәл сурәтдә јеринә јетирди. О, ишҝәнҹә дирәјиндә сон нәфәсинәдәк Аллаһ гаршысында нөгсансызлығыны горуду (Ибр. 2:10). Камил һәјатыны гурбан вермәклә Иса Адәмин нәслини өлүм вә ҝүнаһдан азад едә билән фидјә тәгдим етди (Мат. 20:28; Ром. 5:6—8).

11. «Мүвафиг... фидјә» дејиләндә нә нәзәрдә тутулур?

¹¹ Мүгәддәс Китабын башга јериндә Павел Исанын гурбаныны «мүвафиг... фидјә» адландырыр (1 Тим. 2:6). Нә нәјә мүвафиг иди? Адәм гејри-камиллији вә өлүмү милјардларла инсана, јәни бүтүн нәслинә өтүрдү. Дүздүр, камил инсан олан Исадан милјардларла камил инсанлар төрәјә биләрдиa. Буна ҝөрә биз елә баша дүшүрдүк ки, Исанын, үстәҝәл ондан төрәјә биләҹәк камил нәслинин һәјаты Адәмин вә онун гејри-камил нәслинин итирдији һәјата бәрабәр олан гурбаны тәшкил едир. Амма Мүгәддәс Китабын һеч бир јериндә Исадан төрәјә биләҹәк нәслин фидјәнин һиссәси олдуғу дејилмир. Ромалылара 5:15—19 ајәләриндә јазылыб ки, гуртулушумузу «тәк бир инсан»ын өлүмү тәмин едир. Бәли, Исанын камил һәјаты Адәминкинә мүвафиг иди. Диггәт јалныз Иса Мәсиһә јөнәлдилиб вә бу, белә дә олмалыдыр. Исанын «бир салеһ [әмәли]», јәни итаәткарлығы вә өлүмәдәк садиг галмасы сајәсиндә һәр ҹүр инсанын гаршысында Аллаһын әнамыны алмаг, јәни салеһ елан олунмаг вә јашамаг имканы ачылыб (2 Кор. 5:14, 15; 1 Пет. 3:18). Аллаһ ҝүнаһлы инсанлара неҹә бәраәт газандырыр?

Фидјә сајәсиндә бәраәт

12, 13. Нәјә ҝөрә салеһ елан олунанлар Аллаһын мәһәббәтинә вә мәрһәмәтинә еһтијаҹ дујурлар?

¹² Јеһова Аллаһ Оғлунун тәгдим етдији фидјә гурбанлығыны гәбул етди (Ибр. 9:24; 10:10, 12). Буна бахмајараг, Исанын јер үзүндә олан садиг һәвариләри дә дахил олмагла, бүтүн шаҝирдләри һәлә дә гејри-камил идиләр. Онлар пис әмәлләрдән гачмаға чалышсалар да, бу, онларда һәмишә алынмырды. Нәјә ҝөрә? Чүнки мирас алдыглары ҝүнаһ һәлә дә онларын дахилиндә иди (Ром. 7:18—20). Лакин онларын вәзијјәти артыг аҹынаҹаглы дејилди, чүнки Аллаһ Исанын «мүвафиг» фидјә гурбанлығыны гәбул етмишди вә хидмәтчиләринин рифаһы наминә ону тәтбиг етмәјә һазыр иди.

¹³ Анҹаг бу о демәк дејил ки, һансыса јахшы ишләр ҝөрдүкләринә ҝөрә Аллаһ фидјә гурбанлығынын дәјәрини һәвариләрә вә диҝәрләринә тәтбиг етмәјә борҹлу иди. Әксинә, Аллаһ буну мәрһәмәтиндән вә бөјүк мәһәббәтиндән ирәли ҝәләрәк етди. О, һәвариләрә вә башгаларына бәраәт газандырмаг гәрарына ҝәлди вә артыг онлары мирас алдыглары ҝүнаһдан азад олунмуш һесаб едирди. Павел буну белә изаһ едир: «Доғрудан да, сиз бу лүтф сајәсиндә иман васитәсилә хилас олдунуз, амма буна өзүнүз наил олмадыныз, бу, Аллаһын әнамыдыр» (Ефес. 2:8).

14, 15. Аллаһын салеһ елан етдији инсанлары һансы мүкафат ҝөзләјир? Лакин онлар нә етмәлидирләр?

¹⁴ Күлли-Ихтијар Аллаһын мирас алдығымыз ҝүнаһы вә етдијимиз сәһвләри бағышламасы, һәгигәтән дә, чох дәјәрли әнамдыр! Биз билмирик, инсанлар мәсиһчи олмаздан өнҹә нә гәдәр ҝүнаһ едибләр, анҹаг Аллаһ фидјә гурбанлығынын сајәсиндә бүтүн бу ҝүнаһлары бағышлајыб. Павел јазыр: «Чохлу ҝүнаһдан сонра верилән әнамын нәтиҹәсиндә... инсанлар салеһ елан едилдиләр» (Ром. 5:16). Бу ҝөзәл әнамы алан, јәни салеһ елан олунан һәвариләр вә диҝәр инсанлар һәгиги Аллаһа иманла хидмәт етмәји давам етдирмәли идиләр. Бәс Аллаһа бу ҹүр хидмәт едәнләри гаршыда һансы мүкафат ҝөзләјирди? «Бол лүтф вә салеһлик әнамы аланлар... тәк бир шәхс — Иса Мәсиһ васитәсилә јашајыб падшаһлыг едәҹәкләр». Ҝөрдүјүмүз кими, Адәмдән мирас алдығымыз ҝүнаһдан фәргли олараг, салеһлик әнамынын нәтиҹәси һәјатдыр. (Ром. 5:17; Лука 22:28—30 ајәләрини оху.)

¹⁵ Һәмин әнамы аланлар салеһ елан олунуб Аллаһын руһани оғуллары олурлар. Мәсиһин һәмварисләри олан бу мәсиһчиләрин Аллаһын руһани оғуллары кими ҝөјләр һәјаты үчүн дирилдилиб онунла бирҝә падшаһлыг етмәк үмидләри вар. (Ромалылара 8:15—17, 23 ајәләрини оху.)

Аллаһ мәһәббәтини башгаларына ҝөстәрир

16. Ҹәннәтә чевриләҹәк јер үзүндә јашамаға үмид едәнләр Аллаһын әнамыны неҹә ала биләрләр?

¹⁶ Иман тәзаһүр етдирән вә сәдагәтлә Аллаһа хидмәт едән мәсиһчиләрин һамысы Мәсиһлә бирҝә ҝөјләрдә падшаһлыг етмәјәҹәк. Мәсиһчиликдән өнҹә јашајан инсанлар кими, чохлары Ҹәннәтә чевриләҹәк јер үзүндә јашамаг үмидинә маликдир. Бәс онлар артыг инди Аллаһын ҝөзәл әнамыны алмаға, јәни јер үзүндә јашамаг үчүн салеһ елан едилмәјә үмид едә биләрләрми? Павелин Ромадакы мәсиһчиләрә јаздығы мәктуба әсасән, үмид едә биләрләр!

17, 18. а) Ибраһим иман етдији үчүн Аллаһ ону неҹә инсан һесаб едирди? б) Нәјә әсасән Јеһова Ибраһими салеһ һесаб едирди?

¹⁷ Павел буну бөјүк иман саһиби олан Ибраһимин нүмунәси әсасында изаһ етди. Онун дөврүндә нә Исраил халгына верилән Ганун вар иди, нә дә ки Мәсиһ јер үзүнә ҝәлиб ҝөјләр һәјаты үчүн јол ачмышды (Ибр. 10:19, 20). Биз охујуруг: «Дүнјанын вариси олмаг вәди Ибраһимә вә онун нәслинә ганун васитәсилә јох, имандан доған салеһлик васитәсилә вәд едилмишди» (Ром. 4:13; Јаг. 2:23, 24). Буна ҝөрә дә Јеһова Она садиг олан Ибраһими салеһ һесаб едирди. (Ромалылара 4:20—22 ајәләрини оху.)

¹⁸ Амма бу о демәк дејил ки, Јеһоваја хидмәт етдији узун мүддәт әрзиндә Ибраһим һеч бир ҝүнаһ етмәмишди. О, бу мәнада салеһ дејилди (Ром. 3:10, 23). Бунунла белә, мисилсиз мүдриклијә саһиб олан Јеһова Ибраһимин гејри-ади иманыны вә бундан ирәли ҝәләрәк етдији ишләри нәзәрә алмышды. Хүсусилә дә Ибраһим онун нәслиндән ҝәләҹәк Өвлада иман бәсләјирди. Бу өвлад Мәсиһ олду (Гал. 3:6; Һәв. иш. 3:25). Буна ҝөрә дә сәмави Һаким олан Јеһова «Мәсиһ Исанын өдәдији фидјә» сајәсиндә кечмишдә едилән ҝүнаһлары бағышлаја билир. Демәли, Ибраһим вә мәсиһчиликдән өнҹә јашајан Аллаһын диҝәр садиг хидмәтчиләри дириләҹәкләр. (Ромалылара 3:24, 25 ајәләрини оху; Мәз. 32:1, 2.)

Аллаһ гаршысында салеһ ада малик олдуғуну гијмәтләндир

19. Јеһованын Ибраһими салеһ елан етмәси нәјә ҝөрә чохларынын гәлбини исиндирмәлидир?

¹⁹ Јеһованын Ибраһими салеһ һесаб етмәси бүтүн һәгиги мәсиһчиләрин гәлбини исиндирмәлидир. Мәсиһлә падшаһлыг едәҹәк руһла мәсһ олунмуш мәсиһчиләрдән фәргли олараг, Ибраһим башга мәнада салеһ елан олунмушду. Аллаһын сечдији о инсанлар «мүгәддәс олмаг үчүн» чағырылырлар вә Аллаһ онлары Өз оғуллары кими гәбул едир (Ром. 1:7; 8:14, 17, 33). Ибраһим исә «Јеһованын досту» олду, бу заман фидјә гурбанлығы һәлә тәгдим олунмамышды (Јаг. 2:23; Јешаја 41:8). Бәс бәрпа едилмиш Ҹәннәтдә јашамаға үмид едән һәгиги мәсиһчиләр барәдә нә демәк олар?

20. Јеһова Ибраһим кими салеһ һесаб етдији инсанлардан нә ҝөзләјир?

²⁰ Мәсһ олунмуш мәсиһчиләрдән фәргли олараг, бу адамлар «Аллаһын әнамы, јәни Онун лүтфү сајәсиндә Мәсиһ Исанын өдәдији фидјә васитәсилә гуртулуб» сәмави һәјат үчүн салеһ елан едилмирләр (Ром. 3:24; 5:15, 17). Буна бахмајараг, онлар Аллаһа вә Онун тәгдим етдији фидјә гурбанлығына иман ҝәтирир вә буну хејирхаһ әмәлләри илә ҝөстәрирләр. Онларын хејирхаһ әмәлләриндән бири «Аллаһын падшаһлығы... [вә] Ағамыз Иса Мәсиһ һаггында» тәблиғ етмәләридир (Һәв. иш. 28:31). Буна ҝөрә Јеһова Ибраһими салеһ һесаб етдији кими, онлары да салеһ һесаб едә биләр. Онларын алдығы әнам — Јеһова илә достлуг — мәсһ олунмушларын алдығы әнамдан фәргләнир. Бунунла белә, онлар бу әнамы јүксәк гијмәтләндирирләр.

21. Јеһованын мәһәббәти вә әдаләти сајәсиндә гаршымызда һансы имкан ачылыб?

²¹ Әҝәр сән јер үзүндә јашамаға үмид едәнләрдән бирисәнсә, онда јадда сахламалысан ки, бу имкан һансыса инсан һөкмдарынын дүшүнүлмәмиш шәкилдә вердији вәд сајәсиндә јаранмајыб. Әксинә, бу, Каинатын Али Һөкмдарынын һикмәт долу нијјәтинин бәһрәсидир. Јеһова Өз нијјәтини мәрһәлә-мәрһәлә һәјата кечирир. Онун атдығы бу аддымлар әдаләт принсипләринә мүвафигдир, үстәлик, бизә олан бөјүк мәһәббәтинин тәзаһүрүдүр. Буна ҝөрә дә һәвари Павел әсаслы олараг демишди: «Аллаһ... Өз мәһәббәтини бизә онунла ҝөстәрир ки, биз һәлә ҝүнаһлы икән Мәсиһ уғрумузда өлдү» (Ром. 5:8).

[Һашијә]

Јадыныздадырмы?

• Адәмин нәсли нәји мирас алыб вә онун нәтиҹәси нәдир?

• Мүвафиг фидјә неҹә өдәнилди вә о, нәјә мүвафиг иди?

• Салеһ елан олунмаг әнамы гаршында һансы имканы ачыр?

[13 сәһифәдәки шәкил]

Камил инсан олан Адәм ҝүнаһ ишләтди, диҝәр камил инсан олан Иса исә «мүвафиг... фидјә» гурбанлығыны тәгдим етди

[15 сәһифәдәки шәкил]

Исанын сајәсиндә биз салеһ елан олуна биләрик. Мәҝәр бу, хош хәбәр дејил?!