Проблемләр јарананда Пинхас кими даврана биләрсәнми?
ЈЫҒЫНҸАГДА ағсаггал кими хидмәт етмәк бөјүк шәрәфдир. Лакин Аллаһын Кәламында ачыг-ајдын дејилир ки, ағсаггаллар бир чох проблемләрлә үзләширләр. Бәзән онлар јығынҹагда ҝүнаһ ишләдән инсанын ишинә бахараг «Рәбб үчүн һакимлик» етмәли олурлар (2 Салн. 19:6). Јахуд да нәзарәтчи, Муса кими, өзүнү һазыр билмәдији бир тапшырыг ала биләр. Аллаһ Мусаја бир иш тапшыранда о, һәлимҹәсинә ҹаваб верди: «Ахы мән кимәм ки, фиронун јанына [ҝедим]?» (Чых. 3:11).
Гардашлар Аллаһын фәал гүввәсинин васитәсилә јығынҹагда ағсаггал тәјин едилирләр. Елә һәмин гүввәнин тәсири алтында јазылмыш Мүгәддәс Китаб проблемләрин өһдәсиндән мүвәффәгијјәтлә ҝәлән нәзарәтчиләрин ҹанлы нүмунәси илә зәнҝиндир. Елеазарын оғлу Пинхас Һарунун нәвәси иди вә ҝәләҹәкдә баш каһин олаҹагды. Онун һәјатында баш верән үч һадисә ҝөстәрир ки, мәсиһчи јығынҹағынын ағсаггаллары проблемләри һәлл едәркән ҹәсарәтли, дәрракәли олмалы вә Јеһоваја там ҝүвәнмәлидирләр.
«Иҹманын арасындан галхды»
Исраиллиләр Моав дүзәнлијиндә дүшәрҝә саланда Пинхас һәлә ҝәнҹ оғлан иди. Мүгәддәс Китабда охујуруг: «Исраил халгы Шиттимдә јашајаркән кишиләри Моав гызлары илә зина етмәјә башлады... Исраил халгы гурбан әтиндән једи вә онларын аллаһларына сәҹдә етди» (Сај. 25:1, 2). Јеһова ҝүнаһ ишләдән исраиллиләри өлүмҹүл вәба илә ҹәзаландырды. Исраиллиләрин ҝүнаһ ишләтдијини вә вәбаја дүчар олдуғуну ешидәндә Пинхасын һәмин ан кечирдији һиссләри тәсәввүр едә биләрсинизми?
Нөвбәти ајәләрин бириндә дејилир: «Бу ан Исраил өвладларындан олан бир нәфәр ҝәлди, Мусанын вә Һүзур чадырынын ҝиришиндә ағлашан бүтүн Исраил өвладларынын иҹмасынын ҝөзү өнүндә гоһумларына Мидјанлы бир гадын ҝәтирди» (Сај. 25:6). Каһин Пинхас нә етди? О, ҝәнҹ иди, анҹаг белә тәһгирамиз һәрәкәтә јол верән һәмин адам исә Исраил башчыларындан вә ибадәтдә халга рәһбәрлик едәнләрдән бири иди (Сај. 25:14).
Лакин Пинхас адамлардан јох, Јеһовадан горхурду. Пинхас онлары ҝөрән кими дәрһал әлинә бир низә ҝөтүрүб, онларын ардынҹа чадырын ичинә ҝирди вә низәни һәр икисинин гарнына сохду. Јеһова Пинхасын ҹәсарәт вә гәтијјәтинә неҹә гијмәт верди? О, елә һәмин ан вәбаны дајандырды вә мүкафат олараг Пинхасла «әбәди каһинлик әһди» бағлады. Бу о демәк иди ки, каһинлик онун нәслиндә галаҹагды (Сај. 25:7—13).
Әлбәттә ки, мәсиһчи ағсаггаллар зоракылыға әл атмырлар. Лакин онлар, Пинхас кими, гәтијјәт вә ҹәсарәт ҝөстәрмәјә һазыр олмалыдырлар. Ҝәлин Ҝилјермо адлы гардашын нүмунәсинә бахаг. Ондан интизам комитәсиндә иштирак етмәк хаһиш едиләндә ҹәми бир нечә ај иди ки, ағсаггал тәјин едилмишди. Бу комитә ҝүнаһ ишләтмиш бир ағсаггалын ишинә бахмалы иди. Һәмин ағсаггал вахтилә Ҝилјермоја көмәк едирди. О дејир: «Мәндән буну хаһиш едәндә өзүмү чох нараһат һисс етдим. Ҝеҹәләр ҝөзүмә јуху ҝетмирди. Елә һеј дүшүнүрдүм ки, һиссләрә гапылмадан бу проблеми Јеһованын нормаларына ујғун неҹә һәлл етмәк олар». Бунун сајәсиндә о, белә бир чәтин вәзијјәти һәлл етмәк үчүн лазыми ҹәсарәт әлдә етди вә ҝүнаһ ишләдән гардаша руһани көмәк ҝөстәрмәјә мүвәффәг олду (1 Тим. 4:11, 12).
Ҝөрдүјүмүз кими, бәзән јығынҹагда јаранан вәзијјәт ағсаггаллардан ҹәсарәт вә гәтијјәтлә һәрәкәт етмәји тәләб едир. Һәмин вәзијјәтләрдә бу хүсусијјәтләри тәзаһүр етдирән ағсаггаллар иман вә сәдагәт нүмунәсинә чеврилирләр. Әлбәттә, һәмиманлыларынын ҹидди ҝүнаһындан хәбәр тутан диҝәр мәсиһчиләрдән дә ҹәсарәт тәләб олунур. Ејнилә, јығынҹагдан кәнар едилән дост вә ја гоһумла үнсијјәти дајандырмаг үчүн мәсиһчидән сәдагәт ҝөзләнилир (1 Кор. 5:11—13).
Дәрракә тәһлүкәли вәзијјәтин гаршысыны алыр
Пинхасын ҹәсарәтли олмасынын сәбәби ҝәнҹләрә хас олан чылғынлыг дејилди. Ҝәлин ҝөрәк Пинхас башга бир һадисәдән хәбәр тутанда дәрракә хүсусијјәтини, јәни ағыл вә еһтијатла давранмаг баҹарығыны неҹә тәзаһүр етдирмишди. Рувен, Гад вә Менашше гәбиләсинин јарысы Иордан чајынын јахынлығында сәҹдәҝаһ тикмишдиләр. Бу барәдә ешидән диҝәр исраиллиләр дүшүндүләр ки, онлар буну јалан аллаһлара ибадәт етмәк мәгсәдилә едибләр вә онлара гаршы дөјүшә чыхмаға һазырлашдылар (Јешуа 22:11, 12).
Бәс Пинхас нә етди? О, дәрракә илә давранараг Исраил башчылары илә бирҝә һәмин гәбиләләрин јанына ҝедиб мәсәләни онларла мүзакирә етди. Бүтпәрәстликдә иттиһам олунан гәбиләләр бу гурбанҝаһы «Рәбб һүзурунда Она хидмәт [етмәк]» мәгсәди илә тикдикләрини дејәрәк вәзијјәтә ајдынлыг ҝәтирдиләр (Јешуа 22:13—34).
Һәр һансыса бир һәмиманлысынын нәдәсә иттиһам олундуғуну вә ја онун һаггында хошаҝәлмәз бир сөз дејилдијини ешидәндә мәсиһчинин Пинхас кими давранмасы неҹә дә мүдриклик оларды! Белә һалларда дәрракәли мәсиһчи дәрһал үрәјиндә һәмиманлысы барәдә пис дүшүнмәјә башламајаҹаг вә ја ешитдији хошаҝәлмәз мәлуматы башгаларына демәјәҹәк (Сүл. мәс. 19:11).
Дәрракә ағсаггаллара Пинхас кими давранмаға неҹә көмәк едә биләр? Он илдән чохдур ки, ағсаггал кими хидмәт едән Хајме адлы гардаш дејир: «Тәблиғчи мәнә киминләсә шәхси проблеми олдуғуну дејәндә дәрһал Јеһовадан дуада хаһиш едирәм ки, мәнә тәрәфкешлик етмәмәјә вә Мүгәддәс Китаба әсасланан мәсләһәт вермәјә көмәк етсин. Бир дәфә бир баҹы мәнә јахынлашыб башга јығынҹагдан олан мәсул гардашла онун арасындакы проблемдән данышды. Һәмин гардаш исә мәним јахын достум иди вә мән онунла чәкинмәдән бу барәдә даныша биләрдим. Лакин баҹы илә бирҝә бир нечә Мүгәддәс Китаб принсипи үзәриндә дүшүндүк вә баҹы ҝедиб биринҹи о гардашын өзү илә данышмаға разылыг верди (Мат. 5:23, 24). Онлар дәрһал барышмадылар. Буна ҝөрә дә мән онун диггәтини Мүгәддәс Китабын диҝәр принсипләринә јөнәлтдим. Баҹы деди ки, бу вәзијјәт барәдә јенидән дуа едәҹәк вә гардашы бағышламаға чалышаҹаг».
Бу иш нә илә нәтиҹәләнди? Хајме гардаш давам едир: «Бир нечә ајдан сонра баҹы мәнә деди ки, һәмин гардаш бир мүддәтдән сонра өзү она јахынлашыб дедији сөзә ҝөрә пешман олдуғуну сөјләди. Гардаш баҹы илә хидмәтә чыхды вә ондан үзр истәди. Бунунла да проблем өз һәллини тапды. Әҝәр мән тәрәфкешлик етсәјдим вә онларын мүбаһисәсинә гарышсајдым, нәтиҹә белә јахшы олмазды». Мүгәддәс Китаб нөвбәти мәсләһәти верир: «Ҝөрдүјүн шејләр барәдә дава јаратмаға тәләсмә» (Сүл. мәс. 25:8). Дәрракәли ағсаггал һәмиманлысы илә арасында проблем олан мәсиһчини Мүгәддәс Китабын сүлһү горумаг вә сүлһә ҹан атмаг мәсләһәтини тәтбиг етмәјә тәшвиг едәндә мүдрик давранмыш олур.
Пинхас Јеһоваја мүраҹиәт едирди
Бир мүддәтдән сонра Пинхас Аллаһын сечилмиш халгы үчүн баш каһин вәзифәсини иҹра етмәк шәрәфинә лајиг ҝөрүлдү. Јухарыда гејд олундуғу кими, о артыг ҝәнҹ јашларында өзүнү чох ҹәсарәтли вә дәрракәли инсан кими ҝөстәрмишди. Лакин чәтинликләрин өһдәсиндән ҝәлиб-ҝәлмәмәси Јеһоваја нә дәрәҹә ҝүвәнмәсиндән асылы иди.
Бир левилинин ҹаријәси Бинјамин гәбиләсиндән олан Ҝивеа кишиләри тәрәфиндән зорланараг өлдүрүлмүшдү. Бу фаҹиәви һадисәдән сонра диҝәр гәбиләләр бинјаминлиләрә гаршы мүһарибәјә галхдылар (Һак. 20:1—11). Онлар дөјүшә ҝетмәздән өнҹә Јеһоваја дуада мүраҹиәт етдиләр, лакин бөјүк иткиләр верәрәк ики дәфә мәғлуб олдулар (Һак. 20:14—25). Бәс бундан сонра онлар дуа етмәјин мәнасыз олдуғуну дүшүндүләрми? Јеһова, доғруданмы, диҝәр гәбиләләрин Ҝивеа кишиләринин етдији пислијин ҹәзасыны вермәләрини истәјирди?
Јеһоваја олан етибары гәтијјән сарсылмајан Пинхас јенидән гаршымыза чыхыр, лакин бу дәфә Исраилин баш каһини кими. О, Јеһоваја дуа едәрәк дејирди: «Сојдашларымыз олан Бинјамин өвладларына гаршы бир даһа дөјүшә чыхагмы, јохса бу ишдән әл чәкәк?» Онун дуасына ҹаваб олараг Јеһова бинјаминлиләри онлара тәслим етди, Ҝивеа исә јандырылыб јерлә јексан едилди (Һак. 20:27—48).
Биз бу һадисәдән өзүмүз үчүн һансы ибрәт дәрси ҝөтүрә биләрик? Јығынҹагдакы бәзи проблемләр, ағсаггалларын бүтүн сәјләринә вә көмәк үчүн Јеһоваја етдикләри дуалара бахмајараг, узун мүддәт өз һәллини тапмаја биләр. Белә һалларда ағсаггаллар Исанын нөвбәти сөзләрини јадда сахламалыдырлар: «Дурмадан диләјин, сизә вериләҹәк; дурмадан ахтарын, тапаҹагсыныз; дурмадан гапыны дөјүн вә сизә ачаҹаглар» (Лука 11:9). Әҝәр дуанын ҹавабынын ҝеҹикдији тәәссүраты јаранырса, ағсаггаллар әмин ола биләрләр ки, Јеһова өз вахтында ҹаваб верәҹәк.
Мәсәлән, Ирландијада бир јығынҹағын Падшаһлыг Залына бөјүк еһтијаҹы варды, лакин гардашлар планлашдырма ишинә бахан јерли мәмурун иҹазәсини ала билмирдиләр. О, гардашларын тикмәк истәдикләри әрази үчүн һазырладыглары лајиһәләрин һамысыны рәдд етмишди. Бүтүн үмидләри өлкә мигјасында бу ишә бахан баш мәмура галмышды. Пинхасын ҝүнләриндә олдуғу кими, дуа етмәјин көмәји дәјдими?
Јерли ағсаггаллардан бири хатырлајыр: «Јеһоваја дәфәләрлә дуаларымызда јалвардыгдан сонра биз баш гәрарҝаһа јола дүшдүк. Мәнә дедиләр ки, баш мәмурла ҝөрүшмәк үчүн бир нечә һәфтә ҝөзләмәли олаҹағыг. Лакин ҝөзләмәјимиз беш дәгигәдән артыг чәкмәди. Јенидән ишләнмиш лајиһәмизә бахан кими о, тикинтијә башламаға иҹазә верди. Бундан сонра јерли мәмур бизә көмәк етмәк үчүн әлиндән ҝәләни едирди. Бу һадисәдән сонра биз дуанын, һәгигәтән дә, бөјүк тәсирә малик олдуғуна бир даһа әмин олдуг». Бәли, Јеһова Она ҝүвәнән ағсаггалларын сәмими дуаларыны ҹавабсыз гојмур.
Гәдим Исраилдә Пинхас чијинләриндә бөјүк мәсулијјәт јүкү дашыјырды, лакин ҹәсарәтли, дәрракәли олмасы вә Јеһоваја ҝүвәнмәси сајәсиндә о, бүтүн чәтинликләрин өһдәсиндән мүвәффәгијјәтлә ҝәлирди. Пинхасын чалышганлыгла Аллаһын халгынын гејдинә галмасы Јеһова тәрәфиндән мүсбәт гаршыланырды. Тәхминән мин илдән сонра Езра јазмышды: «Елеазар оғлу Пинхас онларын башчысы иди вә Рәбб онунла иди» (1 Салн. 9:20). Гој бу сөзләр Аллаһын халгына рәһбәрлик едән гардашларын һамысынын, еләҹә дә диҝәр мәсиһчиләрин үзәриндә јеринә јетсин.