Мүгәддәс китаб һәјатлары дәјишир

ҜӘНҸ гадыны ушаглыгдан өјрәндији дини әгидәләринә ујғун јашамагдан әл чәкмәјә вадар едән нә олмушдур? Ҝәлин охујаг ҝөрәк, о, өзү бу һагда нә дејир.

«Инди һәјатымын әсил мәнасыны тапмышам» (ЛИЗА АНДРЕ).

АНАДАН ОЛДУҒУ ИЛ: 1986

ӨЛКӘ: ЛҮКСЕМБУРГ

КЕЧМИШДӘ: ЈОЛУНУ АЗМЫШ УШАГ

АВТОБИОГРАФИЈА. Мән Лүксембург јахынлығында јерләшән балаҹа, тәмиз, тәһлүкәсиз вә чичәкләнән бир шәһәрдә бөјүјүб боја-баша чатмышам. Бешушаглы аиләнин сонбешији олмушам. Валидејнләрим Јеһованын Шаһидләридир вә Аллаһын принсипләрини баҹы-гардашларыма вә мәнә ашыламаг үчүн әлләриндән ҝәләни етмишләр.

Јенијетмәлик дөврүнә гәдәм гојанда Јеһованын Шаһидләринин тәлимләринә даир ҹидди шүбһәләрим јаранмаға башлады. Әввәлҹә мән бу шүбһәләрә мәһәл гојмурдум, амма ҝет-ҝедә иманым зәифләјирди. Валидејнләрим вар гүввәләри илә чалышырдылар ки, мәни дүз јола јөнәлтсинләр, анҹаг мән онларын көмәјини рәдд едирдим. Валидејнләримин хәбәри олмадан мән һакимијјәтә, демәк олар ки, һөрмәт етмәјән ҝәнҹләрлә отуруб-дурурдум. Мәнә елә ҝәлирди ки, онлар сәрбәстдирләр, мән дә онлар кими јашамаг истәјирдим. Биз топлашыб бир јердә чохлу вахт кечирир, ким-киминлә ҝәлди јатыр вә наркотик гәбул едирдик. Мән әввәлҹә һәјатдан һәзз алырмыш кими ҝөрүнән инсанларын јанында олмаға чох шад идим.

Әслиндә исә хошбәхт дејилдим. Онларын арасында һәјат чох мәнасыз иди; онлар һеч нә һагда дүшүнмүрдүләр. Мәни исә дүнјада бу гәдәр һагсызлығын баш алыб ҝетмәси чох нараһат едирди. Вахт кечдикҹә мән даһа чох депрессијаја гапылырдым.

МҮГӘДДӘС КИТАБ ҺӘЈАТЫМЫ ДӘЈИШДИ. 17 јашларында олардым, өзүмү чох пис һисс едирдим. Нә һалда олдуғуму ҝөрән анам јенидән Мүгәддәс Китабы өјрәнмәјәми хаһиш етди. О деди ки, Аллаһын Кәламынын тәлимләрини арашдырдыгдан сонра онлара ујғун јашајыб-јашамамаға өзүм гәрар верәрәм. Бу сәмими сөһбәт һәјатымда әсил дөнүш нөгтәси олду. Мән Мүгәддәс Китабы бөјүк баҹым Каролина вә онун һәјат јолдашы Акифлә өјрәнмәјә разылыг вердим. Баҹымын јолдашы ушаглыгдан јох, артыг јеткин јашларында Јеһованын Шаһиди олмушду. Буна ҝөрә дә мән һисс едирдим ки, Акифлә ачыг даныша биләрәм, бу да мәним үчүн чох ваҹиб иди.

Јеһованын Шаһиди олмаг үчүн һәјат тәрзимин мүнасиб олмадығыны билирдим, анҹаг әввәлҹә елә дүшүнүрдүм ки, өз һәјатымла нә едиб-етмәҹәјим мәним шәхси ишимдир. Мүгәддәс Китабы өјрәнмәјә башладыгдан сонра исә баша дүшдүм ки, һәрәкәтләрим Јеһова Аллаһа тәсир едир (Мәзмур 78:40, 41; Сүлејманын мәсәлләри 27:11). Һәмчинин анладым ки, бу, башгаларына да өз тәсирини ҝөстәрир.

Мүгәддәс Китабы арашдырмаға давам етдикҹә онун Аллаһын Кәламы олдуғуна инанмаг үчүн мәнтигли вә инандырыҹы сәбәбләрин олдуғуну ҝөрдүм. Мисал үчүн, инанылмаз дәрәҹәдә дәгигликлә јеринә јетмиш чохлу Мүгәддәс Китаб пејғәмбәрликләрини өјрәндим. Бу кими биликләрин сајәсиндә әввәлки шүбһәләрим арадан галхды.

Мүгәддәс Китабы өјрәнмәјә башладыгдан тәхминән бир ил сонра валидејнләримлә Јеһованын Шаһидләринин Алманијадакы филиалында көнүллү кими хидмәт едән бөјүк гардашымын јанына ҝетдик. Гардашымын нә гәдәр хошбәхт олдуғуну ҝөрмәк мәнә ҝүҹлү тәсир бағышлады. Чохдандыр ки, мән бу хошбәхтлијин һәсрәтиндә идим! Орадакы диҝәр көнүллүләр дә мәнә хош тәәссүрат бағышладылар. Онлар мәним дүрүст олмајан, кәскин һиссләр далынҹа гачан достларымдан чох фәргләнирдиләр. Бундан гыса мүддәт сонра үрәкдән Јеһоваја дуа едиб һәјатымын галан һиссәни Она хидмәтә һәср едәҹәјимә сөз вердим. 19 јашым оланда өзүмү Јеһоваја һәср едәрәк вәфтиз олундум.

МӘНӘ ФАЈДАСЫ. Инди һәјатымын әсил мәнасыны тапмышам. Инсанлара Мүгәддәс Китабдан Јеһова вә Онун ҝәләҹәјә даир вәдләри һагда өјрәтмәкдән севинҹ дујурам. Һәмчинин бир фајдасы да одур ки, артыг аиләм мәним үчүн нараһат олмур.

Мән кечмишдә етдијим сәһвләри баша дүшүрәм вә чалышырам, онлары бир даһа тәкрарламајым. Әксинә, диггәтими Јеһованын бағышлајан олдуғуна вә мәнимлә јахындан марагландығына ҹәмләјим. Үрәкдән Сүлејманын мәсәлләри 10:22 ајәсиндәки сөзләрә гошулурам: «Рәббин хејир-дуасы инсана сәрвәт ҝәтирәр, даһа она гүссә вермәз».

[20–ҹи сәһифәдәки јазы]

«Биз топлашыб бир јердә чохлу вахт кечирир, ким-киминлә ҝәлди јатыр вә наркотик гәбул едирдик»

[21–ҹи сәһифәдәки јазы]

«Мән кечмишдә етдијим сәһвләри баша дүшүрәм вә чалышырам, онлары бир даһа тәкрарламајым».