Аллаһын Кәламындан нә өјрәнирик?

Аиләдә хошбәхтлијә неҹә наил олмаг олар?

Бу мәгалә сизи марагландыран суаллара тохунур вә онларын ҹавабыны Мүгәддәс Китабынызда тапмаға көмәк едир. Јеһованын Шаһидләри сизинлә бу суаллары мәмнунијјәтлә мүзакирә едәҹәкләр.

1. Аиләнин хошбәхт олмасы үчүн нәјә ҝөрә мүтләг рәсми никаһ олмалыдыр?

Хошбәхт Аллаһ олан Јеһова никаһын банисидир. Рәсми никаһ хошбәхт аилә үчүн зәруридир, чүнки аилә садәҹә ики инсан арасында бағланан иттифаг јох, ушагларын дүнјаја ҝәлдији вә бөјүјүб боја-баша чатдығы тәһлүкәсиз бир мүһит олмалыдыр. Аллаһ никаһа неҹә јанашыр? О, никаһын даими олмасыны, киши вә гадын арасында мүнасибәтләрин рәсми гејдијјата алынмасыны истәјир (Лука 2:1—5). Аллаһ һәмчинин истәјир ки, әрлә арвад бир-биринә сәдагәтли олсун (Ибраниләрә 13:4). Јеһова Аллаһ јалныз әрин вә ја арвадын хәјанәтә јол вердији тәгдирдә Өз хидмәтчиләринә бошанмаға вә јенидән евләнмәјә иҹазә верир. (Матта 19:3—6, 9 ајәләрини оху.)

2. Әрлә арвад бир-бири илә неҹә рәфтар етмәлидир?

Јеһова Аллаһ киши вә гадыны елә јарадыб ки, онлар бир-бирини тамамласын (Јарадылыш 2:18). Бир аилә башчысы кими, әр аиләсини мадди ҹәһәтдән тәмин етмәк вә Аллаһ һаггында өјрәтмәк мәсулијјәтини өз үзәринә ҝөтүрмәли, арвадына фәдакар мәһәббәт ҝөстәрмәлидир. Әрлә арвад бир-бирини севмәли вә һөрмәт етмәлидир. Нөгсансыз әр вә ја арвад јохдур, буна ҝөрә дә никаһларынын хошбәхт олмасы үчүн онлар бир-бирини бағышламағы баҹармалыдырлар. (Ефеслиләрә 4:31, 32; 5:22—25, 33; 1 Петер 3:7 ајәләрини оху.)

3. Никаһда хошбәхт дејилсинизсә, һәјат јолдашыныздан ајрылмалысынызмы?

Әҝәр һәјат јолдашынызла аранызда проблемләриниз варса, илк нөвбәдә, бир-биринизлә мәһәббәтлә рәфтар етмәји өјрәнин (1 Коринфлиләрә 13:4, 5). Аллаһын Кәламы аилә проблемләрини һәлл етмәк үчүн ајрылмағы мәсләһәт ҝөрмүр. Лакин вәзијјәт чыхылмаз олан һалларда Аллаһын хидмәтчиләри ајры јашамағы мәгсәдәујғун һесаб едә биләрләр. (1 Коринфлиләрә 7: 10—13 ајәләрини оху.)

4. Аллаһ ушаглара нә арзу едир?

Јеһова Аллаһ сизин хошбәхт олмағынызы истәјир. Ҝәнҹлик дөврүндән һәзз аласыныз дејә ән ҝөзәл мәсләһәтләри верир. О истәјир ки, сиз валидејнләринизин мүдриклијиндән вә тәҹрүбәсиндән фајдаланасыныз (Колослулара 3:20). Јеһова Аллаһ сизин Ону севиндирмәк үчүн етдијиниз һәр бир шеји гијмәтләндирир. (Ваиз 11:9—12:1; Матта 19:13—15; 21:15, 16 ајәләрини оху.)

5. Ушагларынын хошбәхт олмасы үчүн валидејнләр нә едә биләрләр?

Сиз ушагларынызы гида, ев вә ҝејимлә тәмин етмәк үчүн ишләмәлисиниз (1 Тимотејә 5:8). Анҹаг хошбәхт олмалары үчүн онлара һәмчинин Аллаһы севмәји өјрәтмәли вә Онун һаггында билик ашыламалысыныз (Ефеслиләрә 6:4). Сизин Аллаһа олан мәһәббәтиниз өвладларыныза дәрин тәсир бағышлаја биләр. Аллаһын Кәламына әсасән вердијиниз тәрбијә онларын дүшүнҹә тәрзинин дүзҝүн формалашмасына өз тәсирини ҝөстәрә биләр. (Ганунун тәкрары 6:4—7; Сүлејманын мәсәләләри 22:6.)

Ушаглары руһландырмаг вә тәрифләмәк онлара фајда ҝәтирир. Ејни заманда, онлара тәлим-тәрбијә дә вермәк лазымдыр. Адәтән, өзләрини неҹә апармалы олдугларына даир өјүд-нәсиһәт верәндә ушагларын хошуна ҝәлмир (Сүлејманын мәсәләләри 22:15). Бунунла белә, тәлим-тәрбијә һеч вахт кобуд вә гәддарҹасына олмамалыдыр. (Колослулара 3:21 ајәсини оху.)

Јеһованын Шаһидләри әсас етибары илә валидејнләрә вә ушаглара көмәк етмәк үчүн бир чох китаблар нәшр етмишләр. Бу китаблар Мүгәддәс Китаба әсасланыр. (Мәзмур 19:7, 11 ајәләрини оху.)

Әлавә мәлумат алмаг үчүн Јеһованын Шаһидләри тәрәфиндән нәшр олунан бу китабын 14-ҹү фәслинә баха биләрсиниз.