Јеһоваја Хидмәт өмрүм боју мәнә севинҹ ҝәтириб

Нәгл етди Фред Раск

Давуд Мәзмур 27:10 ајәсиндә јазмышды: «Ата-анам мәни атса белә, Рәбб мәни гәбул едәр». Һәлә һәјатымын еркән илләриндә мән бу сөзләрин һәгигилијинә әмин олдум. Сизә елә бу барәдә данышмаг истәјирәм.

МӘН Ҹорҹија штатында (АБШ) јашајан бабамын фермасында бөјүмүшәм. О заман, 1930-ҹу илләрдә өлкәдә бөјүк игтисади бөһран түғјан едирди. Атам анамын вә јениҹә доғулмуш гардашымын өлүмүндән сонра дәрддән өзүнә јер тапа билмирди. О, мәни дул галмыш бабамын јанында гојуб узаг бир шәһәрә иш далынҹа ҝетмишди. Сонрадан атам бир нечә дәфә мәни өз јанына апармаға чалышса да, бу баш тутмады.

Бүтүн ев ишләринә бабамын бөјүк гызлары бахырды. Бабам диндар дејилди, анҹаг ҹәнуб баптистләр килсәсинә аид олан бу бибиләрим өз динләринә чох һәссас јанашырдылар. Онлар мәни дөјмәклә һәдәләјәрәк һәр базар ҝүнләри килсәјә ҝетмәјә мәҹбур едирдиләр. Бунун уҹбатындан еркән јашларымдан динә о гәдәр дә бөјүк һөрмәт бәсләмирдим. Амма дәрсләр вә идман лап мәнлик иди.

Һәјатымда дөнүш нөгтәси олан ҝөрүш

Ҝүнләрин бир ҝүнү, 1941-ҹи илдә 15 јашым оланда бир јашлы киши арвады илә бизим евә ҝәлмишди. Мәни онунла таныш едәндә дедиләр ки, бу адам әмим Талмаҹ Раскдыр. Әввәлләр онун барәсиндә һеч вахт ешитмәмишдим. Сонра билдим ки, Талмаҹ әми вә онун арвады Јеһованын Шаһидидирләр. О, Аллаһын нијјәтини — инсанларын јер үзүндә әбәди јашајаҹагларыны изаһ етди. Мәним бу ешитдикләрим килсәдә ешитдијим тәлимләрдән кәскин шәкилдә фәргләнирди. Аиләмизин әксәр үзвләри онун дедикләрини рәдд етдиләр, һәтта нифрәтлә гаршыладылар. Бундан сонра евимизин гапылары онларын үзүнә һәмишәлик бағланды. Лакин мәндән ҹәми үч јаш бөјүк олан кичик бибим Мери Мүгәддәс Китабы вә ону изаһ едән нәшрләри ҝөтүрдү.

Мери һәгигәти тапдығыны дәрһал баша дүшдү вә 1942-ҹи илдә вәфтиз олунуб Јеһованын Шаһиди олду. Иса сөјләмишди ки, «инсанын дүшмәнләри өз евиндәкиләри олаҹаг». Мери бу сөзләрин доғрулуғуна өз тәҹрүбәсиндән әмин олду (Мат. 10:34—36). Доғмалары она ҝүн вериб ишыг вермирдиләр. Шәһәрин мәмурлары арасында сөзү кечән Меринин бөјүк баҹысы шәһәрин мери илә әлбир олуб Талмаҹ әмини һәбс етдирди. Ону лисензијасыз сәјјар тиҹарәтлә мәшғул олмагда иттиһам етдиләр. Мәһкәмә иттиһам һөкмү чыхартды. Һаким елә мерин өзү иди.

Шәһәримиздә чыхан гәзетдә мерин бу сөзләри ҝәтирилирди: «Бу кишинин... пајладығы әдәбијјат зәһәр кими тәһлүкәлидир». Талмаҹ әми сонрадан аппелјасија мәһкәмәсинә мүраҹиәт едиб бу иши удса да, он ҝүн дәмир бармаглыглар арасында кечирмәли олмушду.

Мери бибинин мәнә көмәји

Мери јени етигадыны јалныз мәнимлә јох, гоншуларымызла да бөлүшүрдү. О, бир кишијә «Јени дүнја»a китабыны вермишди. Ҝүнләрин бир ҝүнү Мери онунла Мүгәддәс Китаб өјрәнмәси кечирмәјә ҝедәркән мәни дә өзү илә апарды. Һәмин кишинин арвады Меријә деди ки, әри бүтүн ҝеҹәни јатмајыб о китабы охујуб. Динлә мәшғул олмаг фикрим олмаса да, өјрәндикләрим үрәјимә јағ кими јајылырды. Лакин Јеһованын Шаһидләринин Аллаһын халгы олдуғуна мәни инандыран, әсас етибарилә, онларын тәлимләри јох, инсанларын онлара гаршы пис мүнасибәти иди.

Мәсәлән, бир ҝүн Мери илә помидор тохаламагдан гајыданда ҝөрдүк ки, бөјүк бибиләрим, фонограф вә Мүгәддәс Китаб хәбәри олан пластинкалар да дахил олмагла, она мәхсус олан бүтүн әдәбијјатлары зибил јандырылан собада јандырыблар. Мән өзүмдән чыхдығым бир һалда, бибим өзүндән разы вә сакит шәкилдә мәнә: «Сән буна ҝөрә сонра бизә тәшәккүр едәҹәксән», — деди.

Мери иманындан дөнмәдији вә гоншулара тәблиғ етмәји дајандырмадығы үчүн 1943-ҹү илдә евдән ҝетмәли олду. Артыг о вахт мән нәинки Аллаһын адынын Јеһова олдуғуну, һәм дә Онун чох мәһәббәтли, шәфгәтли олдуғуну вә инсанлары ҹәһәннәм одунда јандырмадығыны өјрәндим. Јығынҹаг ҝөрүшләриндә иштирак етмәсәм дә, билирдим ки, Онун гајғыкеш тәшкилаты вар.

Бир мүддәт кечәндән сонра газон бичәркән бир машын јаваш-јаваш мәнә сары ҝәләрәк јанымда сахлады. Машында олан ики кишидән бири мәним Фред олуб-олмадығымы сорушду. Онларын Јеһованын Шаһидләри олдугларыны биләндә дедим: «Ҝәлин тәһлүкәсиз јерә ҝедиб орада сөһбәт едәк». Онлары Мери ҝөндәрмишди. Бу ики нәфәрдән бири сәјјар хидмәтчи Шилд Тутҹијан иди. О, мәни чох руһландырды вә еһтијаҹ дујдуғум руһани рәһбәрлији верди. Јеһованын Шаһидләринин етигадларыны мүдафиә етдијим үчүн инди бүтүн аиләнин «диггәти» мәндә иди.

Мери мәскунлашдығы Вирҝинија штатындан мәнә мәктуб ҝөндәрди. Мәктубда јазылмышды ки, әҝәр Јеһоваја хидмәт етмәк нијјәтим варса, ҝәлиб онунла бирҝә јашаја биләрәм. Елә һәмин ан ҝетмәк гәрарына ҝәлдим. 1943-ҹү илин октјабрында, ҹүмә ҝүнү ахшам бәзи лазыми әшјаларымы гутуја јығыб евимиздән бир гәдәр аралыда олан ағаҹа бағладым. Шәнбә ҝүнү исә гутуну орадан ҝөтүрдүм вә долајы јолла гоншумузун евинә тәрәф ҝедәрәк шәһәрә ҝетдим. Роанок шәһәринә ҝәләркән Меринин галдығы Една Фоулз баҹынын евини тапдым.

Руһани инкишаф, вәфтиз вә Бет-Ел

Една шәфгәтлији илә танынан мәсһ олунмуш мәсиһчи иди. Ону мүасир Лидија адландырмаг оларды. Нәјә ҝөрә? Чүнки о, бөјүк бир ев кирајә ҝөтүрмүшдү вә орада Мери бибидән башга, ики гызы илә бирҝә гардашы арвады да галырды. Онун гызлары — Гледис вә Грејс сонрадан миссионер олдулар. Һал-һазырда 90 јашларында олан Гледис Јапонија филиалында сәдагәтлә хидмәт едир.

Една баҹынын евиндә галдығым мүддәтдә јығынҹагларда мүнтәзәм иштирак едир вә хидмәтлә әлагәдар тәлим алырдым. Азад шәкилдә Аллаһын Кәламыны өјрәнмәјим вә ҝөрүшләрдә иштирак етмәјим сајәсиндә ҝетдикҹә артан руһани иштаһамы тәмин едирдим. 1944-ҹү ил ијунун 14-ү вәфтиз олдум. Мери, Гледис вә Грејс пионер хидмәтинә башладылар вә Вирҝинија штатынын шималында хидмәт етмәјә тәјин олундулар. Онларын көмәји илә Лисбург шәһәриндә јығынҹаг тәшкил олунмушду. 1946-ҹы илин әввәлиндә мән дә пионер олдум вә онлара јахын олан әразидә тәблиғ етмәјә башладым. Һәмин ил биз бирҝә августун 4-дән 11-дәк Оһајо штатынын Кливленд шәһәриндә кечирилән бејнәлхалг конгресә ҝетдик. Бу конгрес, һәгигәтән дә, унудулмаз иди.

Һәмин конгресдә о вахтлар тәшкилата рәһбәрлик едән Нејтан Норр гардаш Бруклиндәки Бет-Елин ҝенишләндирмә планларындан данышды. Бураја јени јашајыш бинасынын тикинтиси, еләҹә дә типографијанын ҝенишләндирилмәси дахил иди. Чохлу ҝәнҹ гардашлара еһтијаҹ вар иди. Мән гәрара алдым ки, мәһз Бет-Ел Јеһоваја хидмәт етмәк истәдијим јердир. Әризә бланкыны долдурандан бир нечә ај сонра, јәни 1946-ҹы ил декабрын 1-дә мәни Бет-Елә дәвәт етдиләр.

Мән чатдырылма шөбәсиндә ишләјирдим. Тәхминән бир илдән сонра типографијанын нәзарәтчиси Макс Ларсон ишләдијим јерә ҝәлиб хидмәти шөбәјә тәјин олундуғуму билдирди. Бурада, хүсусилә дә бу шөбәнин нәзарәтчиси олан Томас Салливанла хидмәт етдијим мүддәтдә Мүгәддәс Китаб принсипләринин тәтбиги вә Аллаһын тәшкилатынын фәалијјәти барәдә чох шеј өјрәндим.

Атам бир нечә дәфә Бет-Елдә мәнә баш чәкмишди. Артыг о да диндар олмушду. 1965-ҹи илдә сонунҹу дәфә Бет-Елә ҝәләндә мәнә демишди: «Үрәјин истәјәндә јаныма ҝәлә биләрсән, анҹаг мән бир даһа сәни ҝөрмәк үчүн бура ҝәлмәјәҹәјәм». Атамын өлүмүндән габаг мән бир нечә дәфә она баш чәкмишдим. О әмин иди ки, ҝөјләрә ҝедәҹәк. Мән исә үмид едирәм ки, атам Јеһованын јаддашындадыр вә әҝәр бу беләдирсә, о дириләндә фикирләшдији јердә — ҝөјдә јох, јер үзүндә бәрпа олунмуш Ҹәннәтдә јашајаҹаг.

Диҝәр унудулмаз конгресләр вә тикинти лајиһәләри

Конгресләр һәр заман руһани инкишафа тәкан вериб. Буну хүсусилә 1950-ҹи илләрдә Нју–Јоркун «Јанки» стадионунда кечирилән бејнәлхалг конгресләр барәдә демәк олар. 1958-ҹи илдә «Јанки» вә «Поло Граундс» стадионларында 123 өлкә вә әразидән топлашан инсанларын үмуми ән јүксәк сајы 253 922 нәфәр иди. Һәмин конгресдә баш верән бир һадисә һеч вахт јадымдан чыхмајаҹаг. Конгрес бүросунда көмәк едирдим ки, Норр гардаш сүрәтлә мәнә јахынлашараг деди: «Фред, јахынлыгда иҹарәјә ҝөтүрүлмүш банкет залында топлашан пионерләр гаршысында чыхыш едәҹәк гардашы тәјин етмәји унутмушам. Һеч өзүм дә билмирәм, бу, неҹә олду! Хаһиш едирәм, тез өзүнү ора чатдыр вә мүнасиб билдијин мөвзуда јахшы бир нитг сөјлә». Ора ҝәлиб чатанда тәнҝнәфәс олмушдум вә јол боју дуа едирдим.

1950—1960-ҹы илләрдә Нју–Јорк шәһәриндә јығынҹагларын сајы сүрәтлә артдығы үчүн Падшаһлыг Заллары кими иҹарәјә ҝөтүрүлән јерләр артыг кифајәт етмирди. 1970—1990-ҹы илләр арасында Манһеттендә үч бина алынды вә онлардан Падшаһлыг Заллары дүзәлдилди. Мән бу лајиһәләрлә әлагәдар јарадылан тикинти комитәләринин сәдри идим. Бу ҝүнәдәк һәгиги ибадәтин мәркәзи олан бу биналардакы иши бирҝә малијјәләшдирән вә баша вуран јығынҹаглары Јеһованын неҹә хејир-дуаландырдығыны өз ҝөзләримлә ҝөрмүшәм вә бунунла бағлы бир чох хош хатирәләрим вар.

Һәјатымдакы дәјишикликләр

Бир ҝүн 1957-ҹи илдә јашадығым бина илә типографијанын арасындакы паркдан кечәркән бирдән јағыш јағмаға башлады. Гаршыда ҹазибәдар сарышын бир гыз ҝөрдүм. О, Бет-Елә јени ҝәлмишди. Онун чәтири олмадығы үчүн тәклиф етдим ки, мәнимкиндән истифадә едәк. Ҝәләҹәк һәјат јолдашым Марҹори илә белә таныш олдум. Биз 1960-ҹы илдә евләндик вә индијәдәк әл-әлә вериб пис вә јахшы ҝүнләримиздә Јеһоваја севинҹлә хидмәт едирик. 2010-ҹу илин сентјабрында евлилијимизин 50 иллијини гејд етдик.

Бал ајындан гајыдар-гајытмаз, Норр гардаш мәнә хәбәр верди ки, Ҝилеад Мәктәбинә тәлимчи тәјин олунмушам. Бу, мәним үчүн хүсуси шәрәф иди! 1961—1965-ҹи илләрдә, әсас етибарилә, филиалда хидмәт едәнләрдән тәшкил олунан вә һәр бири узун мүддәт давам едән беш синиф кечирилмишди. Бу синифләрдә охујанлар филиалын идарәетмә ишләри илә бағлы хүсуси тәлим алмышдылар. 1965-ҹи илин пајыз ајларындан етибарән исә тәлим мүддәти беш аја гәдәр азалдылды вә јенидән бүтүн диггәт миссионерләрин һазырланмасына јөнәлди.

1972-ҹи илдә мәни Ҝилеад Мәктәбиндән Јазы ишләри илә бағлы мәктублашма шөбәсинә кечиртдиләр. Мән бу шөбәнин нәзарәтчиси идим. Мүхтәлиф суаллары вә проблемләри һәлл етмәк үчүн апардығым арашдырмалар сајәсиндә Аллаһын Кәламындакы тәлимләри даһа јахшы баша дүшдүм вә башгаларына јардым ҝөстәрәркән Аллаһымызын јүксәк принсипләрини даһа јахшы тәтбиг етмәји өјрәндим.

1987-ҹи илдә мәни јени јарадылмыш Хәстәхана мәлумат хидмәти шөбәсинә тәјин етдиләр. Бу шөбә Хәстәханаларла әлагә комитәсиндә хидмәт едән ағсаггаллар үчүн семинарлар тәшкил едирди. Бурада онлар һәкимләрә, һакимләрә, сосиал ишчиләрә ганла әлагәдар Мүгәддәс Китаба әсасланан мөвгејимизи неҹә изаһ етмәји өјрәнирдиләр. Проблемләрдән бири о иди ки, һәкимләр өзбашына, чох вахт исә мәһкәмәнин иҹазәсини алараг ушагларымыза ган көчүрүрдүләр.

Һәкимләрә алтернатив мүалиҹә үсулларындан истифадә етмәји тәклиф едәндә онлар, адәтән, бунларын әлчатмаз вә ја баһа баша ҝәлдијини дејирдиләр. Бир дәфә ҹәрраһлардан бири һәмин сөзү дејәркән мәним ҹавабым белә олду: «Зәһмәт олмаса, әлинизи узадын». О, әлини узаданда мән дедим: «Билирсиниз, бу ән јахшы алтернатив үсуллардан биридир». Бу хош сөзләр ҹәрраһын өзүнүн дә јахшы билдији бир һәгигәти хатырлатды — әмәлијјат заманы скалпелдән (ҹәрраһ бычағындан) еһтијатла истифадә етмәклә ганахманы минимума ендирмәк мүмкүндүр.

Бу ијирми ил әрзиндә һәкимләри вә һакимләри маарифләндирмәк сәјләримизә Јеһова хејир-дуа верди. Онлар бизим мөвгејимизи даһа јахшы баша дүшәндә мүнасибәтләри хејли дәјишди. Онлар өјрәндиләр ки, тибби арашдырмалар алтернатив мүалиҹә үсулларынын еффектив олдуғуну сүбут едир вә бизимлә әмәкдашлыг етмәјә разы олан бир чох һәкимләр, еләҹә дә хәстәханалар вар вә еһтијаҹ јаранарса, хәстәни ора көчүрмәк олар.

1996-ҹы илдән етибарән Марҹори илә бирликдә Бруклиндән 110 километр шималда јерләшән Ҝөзәтчи Гүлләсинин Тәлим Мәркәзиндә (Патерсон, Нју–Јорк штаты) хидмәт едирик. Бурада мән гыса мүддәт хидмәти шөбәдә ишләдим, сонра исә филиал һејәтинә вә сәјјар нәзарәтчиләрә тәлим кечирдим. Јазы ишләри илә бағлы мәктублашма шөбәси Бруклиндән Патерсона көчүрүлдү вә 12 илдир ки, мән јенә дә бу шөбәнин нәзарәтчисијәм.

Аһыл јашларынын чәтинликләри

Сәксән јашымы өтәндән сонра Бет-Елдәки мәсулијјәтләрими иҹра етмәк чәтинләшди. Он илдән чох хәрчәнҝ хәстәлији илә мүбаризә апардым. Өзүмү Јеһованын өмрүнү узатдығы Хизгија падшаһ кими һисс едирәм (Јешаја 38:5). Һәјат јолдашымын да сәһһәти зәифдир вә биз онун Алсһејмер хәстәлији илә бирҝә мүбаризә апарырыг. Марҹори Јеһованын сәриштәли хидмәтчиләриндән биридир. О, ҝәнҹләрә өрнәк, мәним садиг көмәкчим вә достумдур. О, һәмишә Мүгәддәс Китабы дәриндән арашдырыр вә башгаларына ону мәһарәтлә өјрәдирди. Онун руһани ушагларынын чоху индијәдәк онунла әлагә сахлајырлар.

Бибим Мери 2010-ҹу илин март ајында 87 јашында вәфат едиб. О, Аллаһын Кәламыны мәһарәтлә өјрәдән бир инсан кими ад газанмышды вә чохларына һәгиги ибадәтин тәрәфини тутмагда көмәклик ҝөстәрмишди. О, һәјатынын бир чох илләрини таммүддәтли хидмәтә һәср етмишди. Бибим мәнә Аллаһын Кәламындакы һәгигәтләри анламаға вә мәһәббәтли Аллаһымыз Јеһованын онун кими хидмәтчиси олмаға көмәк етдијинә ҝөрә үрәкдән она миннәтдарам. Мери вахтилә Исраилдә миссионер кими хидмәт едән әринин јанында дәфн едилиб. Мән әминәм ки, онлар Јеһованын јаддашындадырлар вә вахты ҝәләндә дириләҹәкләр.

Јеһоваја хидмәт етдијим 67 илә бојланыб баханда Онун бол хејир-дуаларына ҝөрә үрәјим миннәтдарлыгла долур. Јеһованын ирадәсини јеринә јетирмәк мәним үчүн чох севиндириҹи иди! Мән һәмишә онун лүтфүнә ҝүвәнирдим вә чох үмид едирәм ки, Онун Оғлунун вердији вәд һәјата кечәндә орада мәним дә пајым олаҹаг: «Мәним адым уғрунда евләрини, баҹы-гардашыны, атасыны, анасыны, ушагларыны вә торпагларыны гојан бундан гат-гат артыгламасы илә алаҹаг вә әбәди һәјата говушаҹаг» (Мат. 19:29).

[Һашијә]

[19–ҹу сәһифәдәки шәкил]

Бабамын фермасында, Ҹорҹија штаты, АБШ, 1928-ҹи ил

[19–ҹу сәһифәдәки шәкил]

Мери биби вә Талмаҹ әми

[20–ҹи сәһифәдәки шәкил]

Мери, Гледис вә Грејс

[20–ҹи сәһифәдәки шәкил]

Мәним вәфтизим, 14 ијун 1944-ҹү ил

[20–ҹи сәһифәдәки шәкил]

Бет-Елдәки хидмәти шөбәдә

[21–ҹи сәһифәдәки шәкил]

Мери биби илә бирҝә бејнәлхалг конгресдә, «Јанки» стадиону, 1958-ҹи ил

[21–ҹи сәһифәдәки шәкил]

Тој ҝүнүмүз

[21–ҹи сәһифәдәки шәкил]

Марҹори илә бирҝә, 2008-ҹи ил