Кечмишдә руһун рәһбәрлијинә табе олан Аллаһын садиг бәндәләри
«Рәбб Јеһова вә Онун Руһу мәни ҝөндәрди» (ЈЕШАЈА 48:16, КИТАБЫ МУКАДДЕС).
1, 2. Иманымыз олсун дејә бизә нә лазымдыр? Кечмишдә јашајан Аллаһын садиг хидмәтчиләринин нүмунәсини арашдырмағымызын бизә һансы фајдасы олаҹаг?
ҺАБИЛИН ҝүнләриндән бәри ајдын ҝөрүндүјү кими, «һамы иман саһиби дејил» (2 Салон. 3:2). Инсанда бу хүсусијјәт һарадандыр? О, нәјин сајәсиндә Аллаһа иман едир? Иман, әсас етибарилә, Аллаһын Кәламында олан сөзләри ешитдикдән сонра јараныр (Ром. 10:17). Иман руһун бәһрәсинин тәркиб һиссәләриндән биридир (Галат. 5:22, 23). Буна ҝөрә дә иман саһиби олмаг вә ону тәзаһүр етдирмәк үчүн бизә мүгәддәс руһ ҝәрәкдир.
2 Кечмишдә јашамыш вә бөјүк иман саһиби олан киши вә гадынларда бу хүсусијјәтин анаданҝәлмә олдуғуну дүшүнмәк бөјүк сәһв оларды. Мүгәддәс Китабда һаггында охудуғумуз Аллаһын нүмунәви хидмәтчиләри «бизим кими» ади инсанлар иди (Јаг. 5:17). Онларын да шүбһәләри, горхдуглары шејләр вә зәиф ҹәһәтләри варды. Лакин Аллаһын руһунун сајәсиндә «зәифдән ҝүҹлүјә» чевриләрәк онлар бүтүн манеәләри ашмышлар (Ибр. 11:34). Јеһованын руһунун онларда неҹә фәалијјәт ҝөстәрдијини арашдырмаг бизи, бу ҝүн иманымыза едилән һүҹумлара бахмајараг, хидмәтимизи сәдагәтлә давам етдирмәјә тәшвиг едәҹәк.
Аллаһын руһу Мусаја ҝүҹ вермишди
3-5. а) Һарадан билирик ки, Мусаја вәзифәсини иҹра етмәјә мүгәддәс руһ көмәк едирди? б) Мусанын нүмунәсиндән Јеһованын мүгәддәс руһу нә гәдәр вермәси барәдә нә өјрәнирик?
3 Ерамыздан әввәл 1513-ҹү илдә Муса барәдә дејилмишди ки, о, јер үзүндә јашајан инсанлардан «даһа итаәткар» иди (Сај. 12:3). Аллаһ бу итаәткар, һәлим хидмәтчисинә Исраил халгы арасында бөјүк мәсулијјәтләр һәвалә етмишди. Онун руһу Мусаја пејғәмбәрлик етмәк, һөкм чыхармаг, Мүгәддәс Китабын бәзи һиссәләрини јазмаг вә мөҹүзәләр ҝөстәрмәк сәлаһијјәти вермишди. (Јешаја 63:11—14 ајәләрини оху.) Амма бир дәфә Муса јүкүнүн һәддән артыг ағыр олдуғундан шикајәт етмишди (Сај. 11:14, 15). Буна ҝөрә дә Јеһова «[Мусада] олан Руһдан ҝөтүрүб» 70 нәфәр кишијә верди ки, она көмәк етсинләр (Сај. 11:16, 17). Мусанын бу ҹүр дүшүнмәсинә бахмајараг, о, бу ишдә тәк дејилди; ејни шеји она көмәк етмәјә тәјин едилән 70 нәфәр барәдә дә демәк олар.
4 Тапшырығыны јеринә јетирмәси үчүн Мусаја лазыми гәдәр мүгәддәс руһ верилмишди. Һәтта едилән дәјишикликдән сонра да Мусада олан руһ кифајәт гәдәр иди. Нә Мусадакы руһ она азлыг едирди, нә дә ки 70 нәфәрдә олан руһ онлар үчүн чох иди. «Аллаһ... руһуну сәхавәтлә верир» вә биз Онун «долғунлуғундан» бәһрәләнирик (Јәһ. 1:16; 3:34).
5 Һал-һазырда сынағын вармы? Мәсулијјәтләринин артдығыны вә онларын сәндән даһа чох вахт тәләб етдијини һисс едирсәнми? Хәрҹләринин артдығы вә ола билсин, сәһһәтинин писләшдији бир һалда, сәнә аиләни руһани вә мадди ҹәһәтдән тәмин етмәк чәтин дејил ки? Јығынҹагдакы мәсулијјәтләрин чохдур? Әмин ол ки, Аллаһ мүгәддәс руһу васитәсилә истәнилән вәзијјәтин өһдәсиндән ҝәлә билмәјин үчүн сәнә ҝүҹ вермәјә гадирдир (Ром. 15:13).
Мүгәддәс руһ Бесалелә габилијјәт верди
6-8. а) Аллаһын руһу сајәсиндә Бесалел вә Оһолиав һансы иши ҝөрмүшдүләр? б) Бесалел вә Оһолиава Аллаһын руһунун рәһбәрлик етдији нәдән ҝөрүнүр? в) Нәјә ҝөрә Бесалелин нүмунәси хүсусилә руһландырыҹыдыр?
6 Мусанын ҝүнләриндә јашајан Бесалелин нүмунәсиндән мүгәддәс руһун фәалијјәти барәдә даһа чох өјрәнә биләрик. (Чыхыш 35:30—35 ајәләрини оху.) Бесалел мүгәддәс мәскәнин ваҹиб әшјаларынын дүзәлдилмәсинә нәзарәт етмәк үчүн тәјин едилмишди. Бу мөһтәшәм лајиһәдән әввәл онун бу саһәләрдә һансыса баҹарығы вар идими? Ола билсин, варды, анҹаг ҝөрүнүр, бундан әввәл о, мисирлиләр үчүн кәрпиҹ кәсирди (Чых. 1:13, 14). Бәс Бесалел бу чәтин тапшырығын өһдәсиндән неҹә ҝәләҹәкди? Јеһова ону «Руһу илә һикмәт, дәрракә, билик вә һәр ҹүр мәһарәтлә долдурмушдур ки,.. баҹарыг ҝөстәрә билсин». Әҝәр онун анаданҝәлмә һансыса баҹарығы вар идисә, мүгәддәс руһ ону даһа да артырды. Буну Оһолиав барәдә дә демәк олар. Ҝөрүнүр, Бесалел вә Оһолиав онлара тапшырылан иши јахшы өјрәнмишдиләр, чүнки онлар ону өзләри ҝөрмәклә јанашы, башгаларына да өјрәдирдиләр. Бәли, Аллаһ онларын үрәјинә өјрәтмәк габилијјәти гојмушду.
7 Бесалел вә Оһолиавын дүзәлтдији мүгәддәс мәскәнин тәхминән 500 ил истифадә олунмасы да онлара Аллаһын руһунун рәһбәрлик етдијини сүбут едир (2 Салн. 1:2—6). Мүасир истеһсалчылардан фәргли олараг, онларын мүгәддәс мәскәнин үзәринә өз имзаларыны вә ја нишанларыны гојмаг фикри јох иди. Бүтүн иззәт Јеһоваја мәхсус иди (Чых. 36:1, 2).
8 Бу ҝүнләри бизә хүсуси баҹарыг тәләб едән чәтин тапшырыглар верилә биләр. Бу, тикинти иши, чап иши, конгресләрин тәшкили, фәлакәт баш вермиш әразиләрдә ҝедән ишләрә рәһбәрлик етмәк, еләҹә дә һәкимләрә вә хәстәхана һејәтинә гана даир Мүгәддәс Китаб мөвгејимизи баша салмаг иши ола биләр. Бәзән бу ишләри арамыздакы мүтәхәссисләр, чох вахт исә бу саһәдә тәҹрүбәләри олмајан көнүллүләр иҹра едирләр. Аллаһ Өз руһу илә онларын сәјләринә уғур газандырыр. Башгаларынын сәндән баҹарыглы олдуғуну дүшүнәрәк Јеһованын вердији һансыса тапшырыгдан нә вахтса имтина етмисәнми? Јадда сахла ки, сәнә верилән истәнилән тапшырығы иҹра етмәјин үчүн Јеһованын руһу билик вә баҹарыгларыны артыраҹаг.
Аллаһын руһу илә Јешуа уғур газанды
9. Исраиллиләр Мисирдән чыхдыгдан сонра һансы вәзијјәтлә үзләшдиләр вә бунунла әлагәдар һансы суал ортаја чыхыр?
9 Аллаһын руһу Муса илә Бесалелин ҝүнләриндә јашајан даһа бир исраиллијә дә рәһбәрлик едирди. Мисирдән чыхдыгдан бир гәдәр сонра амалеглиләр һеч бир сәбәб олмадан Аллаһын халгына һүҹум етдиләр. Исраиллиләр һеч вахт мүһарибә етмәмишдиләр вә бу, онларын азад бир халг кими илк дөјүшү олаҹагды (Чых. 13:17; 17:8). Лакин онлара башчы лазым иди. Бәс бу, ким олмалы иди?
10. Јешуанын рәһбәрлик етдији Исраил ордусу нәјин сајәсиндә гәләбә газанды?
10 Јеһова Јешуаны сечди, лакин она ҝөрә јох ки, о, бу саһәдә зәнҝин тәҹрүбәјә малик иди. Мәҝәр о, мүһарибә һагда нәсә билирди? Јешуа Мисирдә кәрпиҹкәсән вә гул иди, еләҹә дә сәһрада манна јығырды. Дүздүр, Јешуанын бабасы Елишама Ефрајим гәбиләсинин рәһбәри иди вә ҝөрүнүр, дөрд һиссәјә бөлүнмүш вә һәрәсинә үч гәбилә дахил олан — 108 100 нәфәрдән ибарәт һиссәләрин биринә башчылыг едирди (Сај. 2:18, 24; 1 Салн. 7:26, 27). Јеһова Муса васитәсилә билдирди ки, ордуја нә Елишама, нә дә онун оғлу Нун башчылыг едәҹәк. О, дүшмәнләр үзәриндә гәләбә чалмаг үчүн Јешуаны тәјин етди. Дөјүш, демәк олар ки, бүтүн ҝүнү давам етди. Јешуа Аллаһа вә Онун руһунун рәһбәрлијинә гејд-шәртсиз табе олдуғу үчүн исраиллиләр гәләбә газандылар (Чых. 17:9—13).
11. Јешуа кими, биз дә мүгәддәс хидмәти мүвәффәгијјәтлә неҹә јеринә јетирә биләрик?
11 Мусанын өлүмүндән сонра «һикмәт руһу» илә долан Јешуа халгын башчысы тәјин едилди (Ганун. т. 34:9). Мүгәддәс руһ она Муса кими пејғәмбәрлик етмәк вә ја мөҹүзәләр ҝөстәрмәк баҹарығы вермәди. Лакин бу руһун көмәји сајәсиндә о, Кәнан торпағы уғрунда ҝедән һәрби јүрүшләрдә халга башчылыг едирди. Бу ҝүн биз дә дүшүнә биләрик ки, мүгәддәс хидмәтин мүәјјән саһәләрини иҹра етмәк үчүн лазыми билик вә баҹарығымыз јохдур. Јешуа кими, биз дә Аллаһын ҝөстәришләринә хырдалығынадәк риајәт етсәк, уғур газанаҹағымыза әмин ола биләрик (Јешуа 1:7—9).
«Ҝидеонун үзәринә Рәббин руһу енди»
12-14. а) 300 исраиллинин мидјанлыларын бөјүк ордусуну мәһв етмәсиндән нә өјрәнирик? б) Јеһова Ҝидеону она дәстәк олаҹағына неҹә әмин етди? в) Бу ҝүн биз Јеһовадан көмәји неҹә алырыг?
12 Јешуа өләндән сонра да Јеһова мүгәддәс руһу илә садиг хидмәтчиләрини мөһкәмләндирмәјә давам едирди. «Һакимләр» китабы «зәифдән ҝүҹлүјә» чеврилән инсанларын нүмунәләри илә зәнҝиндир (Ибр. 11:34). Мәсәлән, Аллаһ Өз руһу илә Ҝидеону тәшвиг етмишди ки, халгы дүшмәнин әлиндән азад етсин (Һак. 6:34). Ҝидеонун топладығы орду мидјанлыларын ордусундан дөрд дәфә кичик иди. Ҝидеонун әсҝәрләри аз олса да, Јеһованын ҝөзүндә бу сај һәддән артыг чох иди. О, ики дәфә Ҝидеона әсҝәрләринин сајыны азалтмағы әмр етди вә бундан сонра бир исраилли әсҝәрә 450 нәфәр дүшмән әсҝәри дүшүрдү (Һак. 7:2—8; 8:10). Бу сај Јеһованы гане едирди. Исраиллиләр мөһтәшәм гәләбә газандыглары тәгдирдә, буну өз ҝүҹү вә ја ағыллары сајәсиндә етдикләри илә өјүнмәјәҹәкдиләр.
13 Ҝидеон вә онун ордусу демәк олар ки, һазыр идиләр. Әҝәр сән бу кичик дәстәнин үзвү олсајдын, горхаг вә еһтијатсыз силаһдашларынын артыг дәстәни тәрк етдијини билмәк сәнин архајынлығыны артырарды, јохса дөјүшүн нәтиҹәси барәдә дүшүнәндә ҹанына вәлвәлә дүшәрди? Бизә Ҝидеонун һансы һиссләри кечирдији барәдә еһтимал ирәли сүрмәк лазым дејил. Јеһова нә дејирдисә о да ону едирди! (Һакимләр 7:9—14 ајәләрини оху.) Ҝидеон Аллаһын онунла олаҹағыны сүбут едән әламәт ҝөстәрмәсини истәјәндә Аллаһ ону мәзәммәт етмәди (Һак. 6:36—40). Әксинә, иманыны даһа да мөһкәмләндирди.
14 Јеһова бир Хиласкар кими түкәнмәз ҝүҹә маликдир. О, халгыны һәр бир чәтинликдән гуртармаға гадирдир вә лазым ҝәләрсә, бунун үчүн зәиф вә аҹиз ҝөрүнән инсанлардан истифадә едә биләр. Бәзән бизә елә ҝәлә биләр ки, чохлары бизим әлејһимизәдир вә вәзијјәтимиз чыхылмаздыр. Бу ҹүр һалларда Аллаһын Ҝидеона әламәт вердији кими, бизә дә мөҹүзәви шәкилдә әламәт верәҹәјини ҝөзләмирик. Әксинә, биз рәһбәрлик алмаг вә Јеһованын бизә дәстәк олдуғуна әмин олмаг истәјириксә, Онун Кәламыны охумалы вә руһу илә идарә етдији јығынҹагларда иштирак етмәлијик (Ром. 8:31, 32). Јеһованын мәһәббәт долу вәдләри бизим иманымызы мөһкәмләндирир вә Онун, һәгигәтән дә, бизим Көмәкчимиз олдуғуна әминлијимизи артырыр!
«Ифтаһын үзәринә Рәббин руһу енди»
15, 16. Ифтаһын гызында фәдакарлыг руһу һарадан иди вә бу, мүасир валидејнләри неҹә руһландыра биләр?
15 Ҝәлин диҝәр нүмунәјә бахаг. Исраиллиләр аммонлуларла дөјүшмәли оланда «Ифтаһын үзәринә Рәббин руһу енди». Јеһованы иззәтләндирмәк үчүн гәләбә арзусунда олан Ифтаһ она баһа баша ҝәлән бир вәд верди. Ифтаһ анд ичди ки, әҝәр Јеһова аммонлулары онун әли илә мәғлуб етсә, евә гајыдаркән гаршысына илк чыханы Она һәср едәҹәк. Ифтаһ гәләбә илә евә дөнәндә гызы гача-гача ону гаршыламаға чыхды (Һак. 11:29—31, 34). Бәс бу, Ифтаһ үчүн ҝөзләнилмәз иди? Ҝөрүнүр, јох. Чүнки онун ҹәми-ҹүмләтаны бир өвлады вар иди. О, гызыны Шилода јерләшән мүгәддәс мәскәндә хүсуси хидмәти иҹра етмәјә ҝөндәрмәклә Јеһоваја вердији вәди јеринә јетирди. Јеһованын садиг хидмәтчиси олан бу гыз әмин иди ки, атасынын вәди јеринә јетирилмәлидир. (Һакимләр 11:36 ајәсини оху.) Јеһованын руһу онларын һәр икисинә дә лазыми ҝүҹ верди.
16 Ифтаһын гызында белә бир фәдакарлыг руһу һарадан иди? Шүбһә јохдур ки, онун иманыны атасынын хидмәтдә ҝөстәрдији сәј вә садиглик формалашдырмышды. Валидејнләр, сизин нүмунәниз ушагларын нәзәриндән гачмыр. Вердијиниз гәрарлар дедијиниз сөзләрә инаныб-инанмадығыныздан хәбәр верир. Ушагларыныз сәмими-гәлбдән дуа етмәјинизә, тәлимләринизә вә Јеһоваја үрәкдән хидмәт етмәк үчүн ҝөстәрдијиниз сәјләрә диггәт јетирирләр. Бу, онларын үрәјиндә Јеһоваја хидмәт етмәк арзусу ојада биләр. Онда сиз севинҹиниздән јерә-ҝөјә сығмајаҹагсыныз.
«Рәббин Руһу гүввә илә Шимшонун үстүнә енди»
17. Шимшон Аллаһын руһунун көмәјилә нәләр едирди?
17 Ҝәлин сонунҹу нүмунәјә диггәт јетирәк. Филиштлиләр исраиллиләрә зүлм верәндә онлары азад етмәк үчүн «Рәббин Руһу... [Шимшону] идарә етмәјә башлады» (Һак. 13:24, 25). Аллаһдан алдығы гејри-ади, һејрәтамиз ҝүҹ сајәсиндә Шимшон бөјүк ишләр ҝөрмүшдү. Филиштлиләр исраиллиләри Шимшону онлара тәслим етмәјә вадар едәндә «Рәббин Руһу гүввә илә Шимшонун үстүнә енди. Голларына бағланан ип алышыб јанан кәтан кими гырылыб јерә төкүлдү» (Һак. 15:14). Бир ағылсыз һәрәкәти уҹбатындан ҝүҹүнү итирән Шимшон иман сајәсиндә јенидән ҝүҹ әлдә етди (Ибр. 11:32—34; Һак. 16:18—21, 28—30). Вәзијјәт гејри-ади олдуғу үчүн Аллаһын руһу Шимшонда гејри-ади тәрздә фәалијјәт ҝөстәрирди. Аллаһ бу ҝүн хидмәтчиләринә белә ҝүҹ вермәсә дә, бу һадисә бизи руһландыра биләр. Ҝәлин ҝөрәк неҹә.
18, 19. а) Шимшонун нүмунәси бизи нәјә әмин едир? б) Бу мәгаләдә арашдырдығымыз садиг инсанларын нүмунәсиндән сән нә өјрәндин?
18 Биз елә Шимшона көмәк едән мүгәддәс руһа ҝүвәнирик. Инанырыг ки, бу гүввә Исанын бизә тапшырдығы тәблиғ ишини јеринә јетирмәјә көмәк едир (Һәв. иш. 10:42). Лакин бу иш үчүн мүәјјән баҹарыглар тәләб олунур вә ола билсин, онлар биздә анаданҝәлмә јохдур. Биз неҹә дә шадыг ки, Јеһова Өз руһу илә бизә һәвалә етдији чохсајлы вә мүхтәлиф ишләрин өһдәсиндән ҝәлмәјә көмәк едир! Буна ҝөрә дә биз Јешаја пејғәмбәрин сөзләринә шәрикик: «Рәбб Јеһова вә Онун Руһу мәни ҝөндәрди» (Јешаја 48:16). Бәли, бизи ҝөндәрән мүгәддәс руһдур! Биз Јеһованын Мусанын, Бесалелин вә Јешуанын габилијјәтләрини артырдығы кими, бизим дә габилијјәтләримизи артыраҹағына шүбһә етмәдән өз ишимизи үрәклә јеринә јетирә биләрик. Биз әминликлә «руһун гылынҹыны, јәни Аллаһын сөзүнү» әлимизә ҝөтүрүрүк, чүнки инанырыг ки, Аллаһ Ҝидеона, Ифтаһа вә Шимшона ҝүҹ вердији кими, бизә дә ҝүҹ верәҹәк (Ефес. 6:17, 18). Чәтинликләрлә үзләшәндә Јеһованын көмәјинә ҝүвәнсәк, Шимшон физики ҹәһәтдән ҝүҹлү олдуғу кими, биз дә руһани ҹәһәтдән ҝүҹлү олаҹағыг.
19 Бу нүмунәләрдән ајдын ҝөрүнүр ки, Јеһова һәгиги ибадәтин тәрәфиндә мөһкәм дуран инсанлардан хејир-дуаларыны әсирҝәмир. Мүгәддәс руһун бизә рәһбәрлик етмәсинә јол верәндә иманымыз мөһкәмләнир. Јунанҹа Мүгәддәс Јазылар да руһун рәһбәрлијинә табе олан инсанларын нүмунәләри илә долудур вә онлары арашдырмаг бизим үчүн фајдалы оларды. Онда биз Јеһованын руһунун ерамызын 33-ҹү илин Әллинҹи ҝүн бајрамындан әввәл вә сонра неҹә фәалијјәт ҝөстәрдијини өјрәнәҹәјик. Лакин бу һагда сөһбәт нөвбәти мәгаләдә ҝедәҹәк.
Мүгәддәс руһун...
• Мусаја
• Бесалелә
• Јешуаја
• Ҝидеона
• Ифтаһа
• Шимшона
неҹә көмәк етдијини билмәјин сәни нәјә ҝөрә руһландырыр?
[22–ҹи сәһифәдәки шәкил]
Јеһованын мүгәддәс руһунун көмәјилә Шимшон физики ҹәһәтдән ҝүҹлү олдуғу кими, биз дә руһани ҹәһәтдән ҝүҹлү олаҹағыг
[21–ҹи сәһифәдәки шәкил]
Валидејнләр, сизин хидмәтдә ҝөстәрдијиниз сәј ушагларыныза сирајәт едир