Мүгәддәс Китаб һәјатлары дәјишир

ТҮТҮН беҹәрән бир инсаны өз мәшғулијјәтини дәјишмәјә, еләҹә дә Мүгәддәс Китаб һәгигәтини гәбул етмәјә нә тәшвиг етди? Ички дүшкүнү олан бир гадына өз һәјат тәрзини дәјишмәјә ҝүҹ верән нә олду? Ҝәлин ҝөрәк онларын өзләри бу һагда нә дејирләр.

«Бөјүк аиләнин үзвү олмагдан севинҹ дујурам» (ДИНО АЛАЈ).

АНАДАН ОЛДУҒУ ИЛ: 1949

ӨЛКӘ: АВСТРАЛИЈА

КЕЧМИШДӘ: ТҮТҮН БЕҸӘРӘН

АВТОБИОГРАФИЈА. Валидејнләрим 1939-ҹу илдә Албанијадан Австралијанын Квинсленд штатында јерләшән Мариба шәһәринә көчмүшдүләр. Бу әразијә өз адәт-әнәнә вә мәдәнијјәтләрини ҝәтирән мүхтәлиф халгларла јанашы боснијалылар, јунанлар, италјанлар вә сербләр дә ҝәлмишдиләр. Марибада түтүнчүлүклә мәшғул олурдулар вә мәним валидејнләрим дә бу ишә гошулдулар.

Мәндән әввәл бир баҹым вә ики гардашым дүнјаја ҝәлмишди. Әфсуслар олсун ки, бир јашым оланда атам үрәк тутмасындан өлдү. Анам јенидән аилә гурду вә онун дөрд оғлу олду. Һамымыз өҝеј атамын түтүн фермасында бөјүмүшүк.

Јенијетмә чағында евимизи тәрк етдим. 23 јашым оланда Сајми адлы гызла јерли мәсҹиддә евләндик, чүнки һәр икимиз мүсәлман идик. Бүтүн гоһумларым Ислам дининә мәнсуб иди. Мән Гураны вә Мәһәммәд пејғәмбәрин һәјаты һаггында китаб охумушдум. Ејни заманда Мүгәддәс Китабы да (Төврат, Зәбур вә Инҹил) охујурдум. Мүгәддәс Китабда адлары чәкилән пејғәмбәрләрдән Гуранда да бәһс олунурду вә Мүгәддәс Китабы охумағым онларын нә заман јашадыгларыны өјрәнмәјә көмәк едирди.

Бир дәфә Јеһованын Шаһидләри гапымызы дөјдүләр. Бундан сонра онлар мүнтәзәм олараг бизә журнал вә китаб ҝәтирирдиләр. Сајми илә мән онлары мәмнунијјәтлә охујурдуг. Јеһованын Шаһидләри илә бир чох дини мөвзулара даир мараглы сөһбәтләр едирдик. Онлар һәр дәфә мәним суалларыма өз фикирләри илә јох, Мүгәддәс Китабдан ҹаваб верирдиләр. Бу, мәнә хош тәәссүрат бағышлајырды.

Јеһованын Шаһидләри мәнә Мүгәддәс Китабы арашдырмаға вә өз јығынҹаг ҝөрүшләринә дәвәт етсәләр дә, һәмишә имтина едирдим. Мәним фикрим-зикрим анҹаг шәхси фермаја вә бөјүк аиләјә саһиб олмагда иди. Һеч вахт өз фермам олмаса да, беш ушаг атасы олдум.

МҮГӘДДӘС КИТАБ ҺӘЈАТЫМЫ ДӘЈИШДИ. Јеһованын Шаһидләри илә илк ҝөрүшүмдән доггуз ил кечмишди, мән һәлә дә өз етигадыма садиг идим. Лакин онлардан алдығым бүтүн әдәбијјатлары охујурдум. Һәр базар ҝүнү Сајми илә мән бу нәшрләри охумаға вахт ајырырдыг. Бу илләр әрзиндә алдығымыз журналларын һамысыны сахлајырдыг. Башгалары үрәјимдә бөјүјән иманымы сынаға чәкәндә бу әдәбијјатларын көмәји әвәзсиз иди.

Мәсәлән, бир христиан тәблиғчиси мәнә өз динини гәбул етдирмәјә чалышырды. О, Сајминин кичик гардашыны вә мәним өҝеј гардашларымдан бирини өз дининә ҹәлб етмәјә наил олду. Чох кечмәмиш мүхтәлиф динләрдән олан танышларым да мәни өз динләринә ҹәлб етмәјә сәј ҝөстәрирдиләр. Бәзиләри мәнә Јеһованын Шаһидләрини тәнгид атәшинә тутан әдәбијјатлар вердиләр. Бу тәнгидчиләрдән тәлимләрини Мүгәддәс Китаб әсасында изаһ етмәји хаһиш етдим, амма онлар буну едә билмәдиләр.

Бүтүн бу тәзјигләр Јеһованын Шаһидләриндән алдығым әдәбијјатлар васитәсилә Мүгәддәс Китабы даһа дәриндән арашдырмағыма сәбәб олду. Нәһајәт баша дүшдүм ки, өјрәндикләримә мүвафиг давранмағын вахтыдыр.

Јеһованын Шаһидләри илә Мүгәддәс Китабы өјрәнмәсәм дә, онларын јығынҹагларына ҝетмәјә башладым. Әввәл чох һәјәҹанланыр вә утанырдым, лакин һәмин јығынҹагларда чохлу сәмими инсанларла таныш олдум, өјрәндикләрим исә хошума ҝәлирди. Нәһајәтдә белә гәнаәтә ҝәлдим ки, Јеһованын Шаһиди олмалыјам вә 1981-ҹи илдә өзүмү Аллаһа һәср едиб вәфтиз олундум.

Һәјат јолдашым гәрарыма гаршы чыхмырды, анҹаг һәрдән нараһат олурду ки, бәлкә мәни алдадырлар. Мән вәфтиз оланда о да ҝәлди. Өјрәндијим һәгигәтләрлә онунла һәмишә бөлүшүрдүм. Вәфтизимдән бир ил кечмишди. Мәзунијјәтдән евә гајыданда Сајми дә Јеһованын Шаһиди олмаг арзусуну билдирди. Бу, мәним үчүн чох ҝөзләнилмәз иди! О, 1982-ҹи илдә вәфтиз олунду.

Һәјатымызда лазыми дәјишикликләри етмәк о гәдәр дә асан дејилди. Мүгәддәс Китаб принсипләринә зидд олдуғу үчүн даһа түтүн беҹәрмәдим (2 Коринфлиләрә 7:1; Јагуб 2:8). Мүнасиб иш тапмаг хејли вахт апарды. Бәзи гоһумларымыз да илләрлә евимизә ајаг басмадылар. Мүгәддәс Јазыларын бујурдуғу кими, онларла мәһәббәтлә давранмаға чалышырдыг. Бунун нәтиҹәсиндә јахын гоһумларымызла арамыздакы мүнасибәтләр өз гајдасына дүшдү.

МӘНӘ ФАЈДАСЫ. Утанҹаглыг һисси, мадди чәтинликләр вә аиләм тәрәфиндән тәгибләр кими чәтинликләрлә гаршылашанда проблемләрин өһдәсиндән ҝәлмәк үчүн Јеһованын мәнә көмәк етмәсиндә Онун нә гәдәр сәбирли олдуғуну өјрәндим. Мәсәлән, инди мән јығынҹагда ағсаггалам вә тез-тез сәһнәдән өјрәтмәли олурам. Буна бахмајараг, һәлә дә һәјәҹандан јаранан кәкәләмәклә мүбаризә апарырам. Лакин мүнтәзәм етдијим дуанын вә Јеһованын көмәји сајәсиндә бу мәсулијјәтин өһдәсиндән ҝәлә билирәм.

Һәјат јолдашымла мүнасибәтләримиз даһа да мөһкәмләнди. Буну һеч нәјә дәјишмәрәм. Ушагларымызын тәрбијәсиндә мүәјјән сәһвләрә јол версәк дә, өјрәндијимиз Мүгәддәс Китаб һәгигәтләрини онлара ашыламаға чалышырдыг (Ганунун тәкрары 6:6—9). Бөјүк оғлумуз һәјат јолдашы илә миссионер кими хидмәт едир.

Бир дәфә аиләликҹә Јеһованын Шаһидләринин јығынҹагларына ҝәлмәјә башлајанда диггәтими ҹәлб едән бир мәгамы хатырлајырам. Машыны сахлајыб залда јығышан ҹамаата нәзәр јетирдим. «Ичәридә нә ҝөрүрсүнүз?» — дејә аиләмдән сорушдум. Орада мүхтәлиф мәдәнијјәтләрдән, дилләрдән олан инсанларын — абориҝенләр, албанлар, австралијалылар, хорватлар арасында әмин-аманлыг һөкм сүрүрдү. Тәкҹә Австралијада дејил, бүтүн дүнјада олан руһани баҹы-гардашлардан ибарәт бөјүк бир аиләнин үзвү олмагдан севинҹ дујурам (1 Петер 5:9).

«Баҹым мәндән үмидини үзмәди» (ЈЕЛЕНА ВЛАДИМИРОВНА СЈОМИНА).

АНАДАН ОЛДУҒУ ИЛ: 1952

ӨЛКӘ: РУСИЈА

КЕЧМИШДӘ: ИЧКИ ДҮШКҮНҮ, ИНТИҺАРА ҸӘҺД ЕТМИШДИ

АВТОБИОГРАФИЈА. Мән Москванын јахынлығында јерләшән сакит вә балаҹа Красногорск шәһәриндә анадан олмушам. Мүәллим аиләсиндә бөјүмүшәм. Мәктәбдә јахшы охујурдум вә мусиги тәһсили алмышдым. Ҝәләҹәјим парлаг ҝөрүнүрдү.

Аилә гурдугда әримлә бәрабәр елә бир әразијә көчдүк ки, орада сөјүш сөјмәк, сәрхошлуг етмәк вә сигарет чәкмәк ади һал иди. О вахт анламырдым, амма һәмин мүһит мәнә өз пис тәсирини ҝөстәрди. Әввәл-әввәл мәҹлисләрә садәҹә охумаг вә ҝитара чалмаг үчүн ҝедирдим. Лакин бир дәфә белә мәҹлисләрин бириндә мәнә сигарет вә ички тәклиф етдиләр. Гыса вахт әрзиндә ички дүшкүнү олдум.

Бу вәрдишим һәјатымы корлады. Мүәјјән вахтдан сонра елә бир вәзијјәтә дүшмүшдүм ки, јемәк јемәјә белә һалым олмурду. Өлмәк истәјирдим вә интиһара ҹәһд етдим, амма алынмады. Бунун баш тутмадығына инди чох севинирәм.

Бүтүн бунлара бахмајараг, баҹым мүнтәзәм јаныма ҝәлирди. О, Јеһованын Шаһиди иди вә изаһ етмәјә чалышырды ки, Мүгәддәс Китаб мәнә көмәк едә биләр. Бу, мәни марагландырмырды. Баҹымын ҝәлмәсини истәмәсәм дә, о, мәндән үмидини үзмүрдү. Онун мәнә ҝөстәрдији сәбир вә мәһәббәт Мүгәддәс Китабы өјрәнмәјимә сәбәб олду.

МҮГӘДДӘС КИТАБ ҺӘЈАТЫМЫ ДӘЈИШДИ. Мүгәддәс Китабы өјрәнмәјә башлајанда ичкини атмаг гәрарына ҝәлдим. Елә һәмин вахт сәрхош гоншум һүҹум едиб мәни дөјдү. Ағыр вәзијјәтдә хәстәханаја дүшдүм. Габырғамын дөрдү сынмыш вә ҝөзүмүн бири зәдәләнмишди. Хәстәханада галмағым ичкини атмаға көмәк етди.

Һәмин вахтлар дурмадан дуа едирдим. Мүгәддәс Китабын бир парчасы — Мәрсијәләр 3:55, 56 ајәләри мәнә бөјүк тәсәлли ҝәтирди: «Ја Рәбб, исмини о гујунун дибиндән сәсләдим. “Гулағыны тыхама, фәрјадымы динлә” дејәркән сәсими ешитдин».

Јеһованын дуаларыма ҹаваб вердијинә сидги-үрәкдән инанырдым. Әввәлки һәјатыма гајытмамаг үчүн О, мәнә ҝүҹ верирди. Һәрдән елә олурду ки, јенидән ичмәк истәјим баш галдырырды. Белә истәкләрә ујмадығым үчүн чох севинирәм.

Мүгәддәс Китабы өјрәндикҹә баша дүшдүм ки, әримә аилә башчысы кими һөрмәт етмәлијәм (1 Петер 3:1, 2). Мәним үчүн бу, о гәдәр дә асан дејилди, чүнки онун үзәриндә һәмишә ағалыг етмәјә өјрәшмишдим. Јеһоваја көмәк үчүн јалварырдым. Дәјишикликләр бир ан ичин баш вермәди, даһа јахшы һәјат јолдашы олмаг үчүн мүәјјән вахт тәләб олунду.

Мәндә баш верән дәјишикликләри ҝөрән әрим чох тәәҹҹүбләнмишди. О вахта гәдәр о, Мүгәддәс Китабла һеч марагланмырды. Мән сигарети атмаг гәрарына ҝәләндә о деди: «Әҝәр сигарети атсан, мән Мүгәддәс Китабы өјрәнмәјә башлајаҹағам!» Икимиз дә сигарети ејни ҝүндә атдыг.

МӘНӘ ФАЈДАСЫ. Әрим сөзүнүн үстүндә дурараг Мүгәддәс Китабы өјрәнмәјә башлады. Инди биз Мүгәддәс Јазылары һәр ҝүн бирликдә охујуб үзәриндә дүшүнүрүк вә орадакы мәсләһәтләри һәјатымызда тәтбиг етмәјә чалышырыг.

Алдығым фајдадан әлавә, аилә һәјатымызын неҹә јахшылашдығыны сөзлә ифадә етмәк олмур. Она јахынлашмаға изин вердији үчүн Јеһоваја миннәтдарам (Јәһја 6:44). Һәмчинин, мәндән үз дөндәрмәдијинә ҝөрә баҹыма да чох миннәтдарам. Мүгәддәс Китабын һәгигәтән дә һәјатлары дәјишмәјә гадир олдуғуну өз үзәримдә ҝөрдүм.

[11–ҹи сәһифәдәки шәкил]

Баша дүшдүм ки, өјрәндикләримә мүвафиг давранмағын вахтыдыр

[13–ҹү сәһифәдәки шәкил]

Баҹымын мәнә ҝөстәрдији сәбир вә мәһәббәт Мүгәддәс Китабы өјрәнмәјимә сәбәб олду