Натан. Һәгиги ибадәтин садиг мүдафиәчиси

Һакимијјәт саһиби олан бир инсанын һүзуруна ҝәләрәк онун һәрәкәтинин пис вә буна ҝөрә дүзәлмәли олдуғуну баша салмаг елә дә асан иш дејил. Бәс әҝәр белә инсан ад-саныны горумаг наминә, үстәлик, гәтл һадисәси дә төрәдибсә, онда неҹә, онун гаршысына чыхмаға ҹүрәт едәрдинми?

Гәдим Исраилин падшаһы Давуд Бат-Шева илә әхлагсызлыг етмишди вә о, һамилә галмышды. Ҝүнаһларыны өрт-басдыр етмәк үчүн Давуд Бат-Шеванын әрини өлдүртдүрүб онунла евләнмишди. Бу һадисәнин үстүндән ајлар кечмәсинә бахмајараг, Давуд һәлә дә икили һәјат јашајырды вә шүбһәсиз, падшаһ вәзифәсини иҹра етмәјә давам едирди. Анҹаг Јеһованын онун бу ҝүнаһына ҝөз јуммаг фикри јох иди. Буна ҝөрә О, пејғәмбәр Натаны Давудун јанына ҝөндәрди.

Бу, чох чәтин тапшырыг иди. Өзүнү Натанын јеринә гој. Шүбһә јохдур ки, Натаны Давуда ҝүнаһлары барәдә хатырлатмаға Јеһоваја вә Онун нормаларына ҝөстәрдији һәдсиз сәдагәт тәшвиг етмишди. Пејғәмбәр буну неҹә етди вә падшаһ Давуду төвбә етмәсинә еһтијаҹы олдуғуна неҹә инандырды?

НӘЗАКӘТЛИ МҮӘЛЛИМ

Нијә дә бир нечә дәгигә ајырыб 2 Шамуел 12:1—25 ајәләрини охумајасан? Тәсәввүр ет ки, сән Натансан вә Давуда бу әһвалаты данышырсан: «Бир шәһәрдә ики адам вар иди. Онлардан бири варлы, о бири исә касыб иди. Варлы адамын чохлу сүрүләри вә нахыры вар иди. Лакин касыб адамын сатын алыб бәсләдији бир көрпә диши гузудан башга һеч нәји јох иди. О, гузусуну өз јанында ушаглары илә бәрабәр бөјүтмүш, она өз јемәјиндән једиртмиш, өз ичдији габдан су ичиртмиш вә гојнунда јатыртмышды. Гузу она доғма гызы кими иди. Бир ҝүн варлы адамҝилә јаделли бир гонаг ҝәлир. Варлы адам онлара ҝәлән гонаға јемәк һазырламаг үчүн өз сүрүсүндән вә нахырындан һејван ҝөтүрүб кәсмәјә гыјмады. О ҝедиб касыбын гузусуну ҝөтүрүб кәсди вә јанына ҝәлән гонаға јемәк һазырлады» (2 Шам. 12:1—4).

Вахтилә өзү чобан олан Давуд, ҝөрүнүр, бу әһвалатын һәгиги олдуғуна инанды. Бир Мүгәддәс Китаб шәрһчиси демишди: «Ола билсин, Натан әдаләтсизликлә үзләшән вә сон үмидләри падшаһ Давуд олан инсанларын дәрдини әввәлләр дә она чатдырырды. Давуд фикирләшди ки, бу елә һәмин вәзијјәтләрдән биридир». Һәтта бу шәрһчинин дедији кими олса да, Натана падшаһла белә данышмаг үчүн ҹәсарәт вә Аллаһа сәдагәт лазым иди. Натанын данышдығы әһвалатдан сонра өзүндән чыхан Давуд: «Вар олан Рәбб һаггы, буну едән адам өлүмә лајигдир», — дејә нида етди! Бундан сонра Натанын сарсыдыҹы сөзләри сәсләнди: «О адам сәнсән!» (2 Шам. 12:5—7).

Ҝәл ҝөрәк Натан нәјә ҝөрә белә давранды. Гәлби кимәсә бағланан инсан вәзијјәти олдуғу кими ҝөрә билмир. Һамымыз сәһв һәрәкәт едәндә өзүмүзә бәраәт газандырмаға мејиллијик. Натанын чәкдији мәсәл Давуду гејри-ихтијари олараг өз һәрәкәтини мүһакимә етмәјә вадар етди. Падшаһ ајдын шәкилдә ҝөрдү ки, Натанын һаггында данышдығы варлы адамын һәрәкәти чох писдир. Анҹаг Натан һәмин мәсәлин Давуда аид олдуғуну онун бу һәрәкәти шәхсән өзү мүһакимә етдикдән сонра ачыглады. Бундан сонра Давуд ҝүнаһынын нә дәрәҹәдә ағыр олдуғуну дәрк етди. Бу, она мәзәммәти гәбул етмәсинә көмәк етди. Давуд Бат-Шева илә ҝүнаһ ишләтмәклә Јеһоваја хор бахдығыны бојнуна алды вә лајиг олдуғу ҹәзаны гәбул етди (2 Шам. 12:9—14; Мәз. 51, ҝириш сөзләр).

Биз бундан һансы ибрәт дәрси ҝөтүрә биләрик? Мүгәддәс Китабы өјрәдәнин мәгсәди динләјиҹиләринә дүзҝүн нәтиҹәјә ҝәлмәјә көмәк етмәкдир. Натан Давуда һөрмәт етдији үчүн мәсәләни онун нәзәринә нәзакәтли шәкилдә чатдырды. О билирди ки, Давуд үрәјиндә әдаләти вә салеһлији севир. Бу мәсәлин көмәјилә Натан Давудда һәмин хүсусијјәтләри ојатды. Биз дә сәмими-гәлбли инсанлара Јеһованын нөгтеји-нәзәрини баша дүшмәјә көмәк едә биләрик. Неҹә? Нәјин дүзҝүн олдуғуна даир биликләрини ишә салмагла. Лакин бу заман биз өзүмүзү елә апармамалыјыг ки, санки, онлардан үстүнүк вә онлара ҝөстәриш вермәјә һаггымыз вар. Биз јох, Мүгәддәс Китаб нәјин дүз, нәјин исә сәһв олдуғуну мүәјјән едир.

Натаны нүфузлу падшаһы мәзәммәт етмәјә тәшвиг едән ән башлыҹа сәбәб Јеһоваја олан сәдагәти иди (2 Шам. 12:1). Бу хүсусијјәт бизә дә Јеһованын салеһ принсипләрини мәтанәтлә мүдафиә етмәјә ҹәсарәт верәҹәк.

ҺӘГИГИ ИБАДӘТИН МҮДАФИӘЧИСИ

Ҝөрүнүр, Натанла Давуд јахшы дост идиләр, чүнки Давуд оғулларындан биринин адыны Натан гојмушду (1 Салн. 3:1, 5). Мүгәддәс Китабда илк дәфә Натанын ады Давудла сөһбәт едәркән чәкилир. Онларын һәр икиси дә Јеһованы севирди. Шүбһәсиз, падшаһ Давуд Натанын фикрини гијмәтләндирирди. Буну Давудун Јеһоваја мәбәд тикмәк арзусуну Натана ачыгламасындан ҝөрмәк олар: «“Бах мән сидр ағаҹындан тикилән бир сарајда јашајырам,.. Аллаһын сандығы исә бир чадырда галыр”. Натан падшаһа деди: “Ҝет, үрәјиндәки нијјәтини һәјата кечир, чүнки Рәбб сәнинләдир”» (2 Шам. 7:2, 3).

Јеһованын садиг хидмәтчиси олан Натан Давудун јер үзүндә һәгиги ибадәтин даими мәркәзини тикмәк планыны ҹанла-башла дәстәкләди. Лакин бу заман Натан Јеһованын ирадәсини јох, өз шәхси фикрини ифадә етди. Һәмин ҝеҹә Аллаһ пејғәмбәринә тапшырды ки, падшаһа тамамилә башга ҝөстәриши чатдырсын: Јеһованын мәбәдини Давуд тикмәјәҹәк. Буну Давудун оғулларындан бири едәҹәк. Анҹаг Натан Давуда билдирди ки, Аллаһ онунла әһд бағлајыр вә бу әһдә әсасән, онун тахты «әбәди мөһкәм галаҹаг» (2 Шам. 7:4—16).

Мәбәди тикмәк мәсәләсиндә Натанын фикри Аллаһын ирадәси илә үст-үстә дүшмәди. Бунунла белә, тәвазөкар пејғәмбәр дејинҝәнлик етмәдән Аллаһын нијјәтинә динмәз-сөјләмәз бојун әјди вә ону дәстәкләди. Аллаһ бизә дүзәлиш верәндә Натанын давранышы бизим үчүн неҹә дә ҝөзәл нүмунәдир! Натанын пејғәмбәр кими сонракы фәалијјәти ҝөстәрир ки, о, Аллаһын рәғбәтини итирмәмишди. Аллаһ һәтта Натаны вә ҝөрүҹү Гады илһамландырараг онларын васитәсилә Давуда 4000 мусигичинин мәбәддәки хидмәтини тәшкил етмәји тапшырды (1 Салн. 23:1—5; 2 Салн. 29:25).

ПАДШАҺЛЫҒЫН МҮДАФИӘЧИСИ

Натан билирди ки, јаша долмуш падшаһ Давуду Сүлејман әвәз едәҹәк. Буна ҝөрә дә Адонија Давудун тагәтдән дүшмәсиндән истифадә едәрәк гејри-гануни шәкилдә һакимијјәти әлә кечирмәк ҹәһди ҝөстәрәндә Натан гәти аддымлар атды. Бу вәзијјәтдә дә Натан нәзакәт вә садиглик ҝөстәрди. Илк өнҹә Натан Бат-Шеваны тәшвиг етди ки, тахта оғлу Сүлејманын отураҹағы барәдә Давудун вердији анды она хатырлатсын. Сонра Натанын өзү падшаһын отағына дахил олуб хәләфинин Адонија олаҹағына әмр вериб-вермәдијини сорушду. Вәзијјәтин нә дәрәҹәдә ҹидди олдуғуну анлајан јашлы падшаһ Натана вә диҝәр садиг хидмәтчиләринә ҝөстәриш верди ки, Сүлејманы мәсһ едиб падшаһ елан етсинләр. Адонијанын дөвләт чеврилиши баш тутмады (1 Пад. 1:5—53).

ТӘВАЗӨКАР ТАРИХЧИ

Ҝүман едилир ки, «Биринҹи Шамуел» китабынын 25-дән 31-дәк фәсилләрини, еләҹә дә «Икинҹи Шамуел» китабыны Натан вә Гад јазыблар. Һәмин китабларда гәләмә алынан тарихи һадисәләр барәдә дејилир: «Падшаһ Давудун әввәлдән ахыра гәдәр бүтүн ишләри ҝөрүҹү Шамуелин китабында, пејғәмбәр Натанын китабында вә ҝөрүҹү Гадын китабында јазылмышдыр» (1 Салн. 29:29). Мүгәддәс Китабда һәмчинин дејилир ки, Натан «Сүлејманын... ишләри» барәдә дә јазмышдыр (2 Салн. 9:29). Ҝөрүнүр, Натан Давудун өлүмүндән сонра да сарај ишләриндә фәал иштирак едирди.

Натан һаггында билдикләримизин бөјүк гисми онун шәхсән јаздығы еһтимал едилән мәлуматлардан гајнагланыр. Натанын мүәјјән мәсәлләрдә сусмасы да бизә онун һаггында чох шеј дејир. Ајдындыр ки, Натан тәвазөкар тарихчи иди вә һеч вахт шөһрәтпәрәстлијә гапылараг ад-сан ахтармырды. Бир Мүгәддәс Китаб лүғәтиндә дејилир ки, Аллаһын Кәламында Натан «һаггында габагҹадан һеч бир мәлумат верилмәјән вә нәсил шәҹәрәси бәлли олмајан» бир шәхс кими гаршымыза чыхыр. Натанын әҹдадлары вә шәхси һәјаты барәдә һеч нә мәлум дејил.

ЈЕҺОВАЈА САДИГЛИКДӘН ИРӘЛИ ҜӘЛӘН ДАВРАНЫШ

Мүгәддәс Китабда Натан һаггында мәлумат аз олса да, тамамилә ајдындыр ки, о, тәвазөкар олмагла јанашы, Аллаһын гурулушуну ҹанла-башла дәстәкләјирди. Јеһова Аллаһ она ҹидди вә мәсулијјәтли тапшырыглар вермишди. Натанын Аллаһа садиглији вә Онун әмрләринә дәрин һөрмәт ҝөстәрмәси үзәриндә дүшүн. Чалыш, бу кими хүсусијјәтләри тәглид едәсән.

Чәтин ки, нә вахтса сәнә әхлагсызлыға јол верән падшаһы мәзәммәт етмәк вә ја дөвләт чеврилишинин гаршысыны алмаг тапшырылсын. Анҹаг Аллаһын көмәјилә Она садиг гала вә салеһ нормаларына риајәт едә биләрсән. Һәмчинин сән һәгигәти өјрәдән ҹәсарәтли, лакин ејни заманда нәзакәтли мүәллим, еләҹә дә тәмиз ибадәтин мүдафиәчиси ола биләрсән.

[25-ҹи сәһифәдәки шәкил]

Падшаһлығын мүдафиәчиси олан Натан Бат-Шева илә нәзакәтлә данышды