«Әввәлки ишләр бир даһа хатырланмајаҹаг»

БӘЗИ хатирәләр инсана хош тәәссүрат бағышлајыр. Севдијимиз инсанларла кечирдијимиз хош анларын хатирәси үрәјимизи исиндирир. Лакин елә хатирәләр дә вар ки, инсана дахилән әзаб верир. Кечмишдә баш верән пис шејләрин хатирәси сәни дә үзүрмү? Әҝәр бу беләдирсә, ола билсин, сән: «Нә вахтса бу кәдәрли хатирәләри јаддан чыхара биләҹәјәмми?» — дејә дүшүнүрсән. Ҝәл ҝөрәк Јешаја пејғәмбәрин гәләмә алдығы сөзләрдән һансы тәсәллини ала биләрик. (Јешаја 65:17 ајәсини оху.)

Јеһова Аллаһ кәдәрли хатирәләрә сәбәб олан шејләри тамамилә арадан галдырмаг нијјәтиндәдир. О, буну неҹә едәҹәк? Бүтүн пислији јер үзүндән силиб әвәзиндә гат-гат јахшы шејләр јарадаҹаг. Аллаһ Јешаја пејғәмбәр васитәсилә сөз верир: «Будур, Мән јени ҝөјләр вә јени јер јарадырам». Бу вәдин нә демәк олдуғуну баша дүшмәјимиз үрәјимиздә үмид јарадаҹаг.

«Јени ҝөјләр» дедикдә нә нәзәрдә тутулур? Буну баша дүшмәк үчүн ҝәл бу ифадәнин Мүгәддәс Китабда ишләдилдији ики мәгамы нәзәрдән кечирәк. Биринҹиси, Аллаһын Кәламында «јени ҝөјләр» ифадәси јухарыда ҝәтирилән ајәдән башга ики јердә дә истифадә олунур. Вә һәр ики ајәдә бу ифадә бөјүк дәјишикликләрлә әлагәдар ишләнилир (2 Петер 3:13; Вәһј 21:1—4). Икинҹиси, Мүгәддәс Јазыларда «јени ҝөјләр» ифадәси алтында рәһбәрлик вә ја һөкумәт нәзәрдә тутула биләр (Јешаја 14:4, 12; Даниел 4:25, 26). Бундан белә нәтиҹәјә ҝәлмәк олар ки, «јени ҝөјләр» јер үзүндә әдаләти бәргәрар едә биләҹәк јени һөкумәтдир. Буна јалныз бир һөкумәт — Аллаһын Падшаһлығы наил ола биләҹәк. Иса пејғәмбәр елә бу сәмави һөкумәтин ҝәлиши һаггында дуа етмәји өјрәдирди. Бу сәмави һөкумәт Аллаһын ирадәсини јер үзүндә јеринә јетмәсинин гајғысына галаҹаг (Матта 6:9, 10).

Бәс «јени јер» нәдир? Дүзҝүн нәтиҹәјә ҝәлмәк үчүн Мүгәддәс Китабдан ики факты нәзәрдән кечирәк. Биринҹиси, Аллаһын Кәламында «јер» дедикдә планет јох, инсанлар нәзәрдә тутулур (Мәзмур 96:1). Икинҹиси, Мүгәддәс Китабдакы пејғәмбәрлијә әсасән, Аллаһын рәһбәрлији алтында садиг инсанлар бүтүн дүнјада һөкм сүрәҹәк салеһлијә јијәләнәҹәкләр (Јешаја 26:9). Буна ҝөрә дә «јени јер» ифадәси Аллаһа итаәткар вә Онун тәләбләринә ујғун јашајан инсан ҹәмијјәтинә ишарә едир.

Јеһова Аллаһын пис хатирәләри көкүндән силәҹәјини тәсәввүр едә биләрсән?! Тезликлә Јеһова Өз вәдинә садиг галараг салеһлијин һөкм сүрәҹәји јени дүнја јарадаҹагa. Сәбәбиндән асылы олмајараг бүтүн пис хатирәләр кечмишдә галаҹаг. Салеһ инсанлар ҝөзәл һәјат сүрәҹәк вә јашајаҹаглары һәр ҝүнүн хош хатирәләри онлара севинҹ ҝәтирәҹәк.

Бәс бу ҝүн бизә үрәк ағрысы верән сыхынтылар барәдә нә демәк олар? Аллаһ Јешаја пејғәмбәр васитәсилә вәд едир: «Әввәлки ишләр бир даһа хатырланмајаҹаг, һеч јада дүшмәјәҹәк». Буҝүнкү дүнјада чәкдијимиз бүтүн ағрылар ҝетдикҹә јох олаҹаг. Әҝәр Аллаһын бу ҝөзәл вәди сәни дә ҹәлб едирсә, нәјә ҝөрә Онун һаггында даһа чох өјрәнмәк үчүн әлиндән ҝәләни етмәјәсән?

[Һашијә]

[15–ҹи сәһифәдәки шәкил]

Јеһова Аллаһ кәдәрли хатирәләрә сәбәб олан шејләри тамамилә арадан галдыраҹаг