Фалчылыг вә өлүләрлә әлагә. Бу, Аллаһдандырмы?

Барбараa ушаглыгдан ҝөрүнтүләр ҝөрүр вә сәсләр ешидирди; әмин иди ки, бунлар онун өлән гоһумлары иди. О вә онун һәјат јолдашы Јоахим фалчылыг һаггында китаблар охујурдулар вә пешәкарҹасына картла фала бахмаға өјрәндиләр. Бунун сајәсиндә онлар чохлу пул газанырдылар. Ҝүнләрин бир ҝүнү картла фала бахаркән евләринә тәһлүкәли инсанларын ҝәләҹәјини ҝөрдүләр вә өзләрини горумалары һаггында ҝөстәриш алдылар.

СЕҺИРБАЗЛЫГ вә ја фалчылыг дәбдән дүшмүш сајылса да, фөвгәлтәбии шејләрә мараг ҝениш јајылыб. Бир чох инсанлар ҝөз мунҹуғу, дуалар вә бу кими әшјалар тахырлар, ҝәләҹәкләрини билмәк вә өзләрини шәрдән горумаг үчүн медиумлара вә фалчылара мүраҹиәт едирләр. Алманијанын «Фокус» журналында дәрҹ олунан бир мәгаләдә дејилирди ки, «Интернетин сајәсиндә инсанларын маҝијаја марағы ҝетдикҹә артыр» («Laptop and Lucifer», «Focus»).

Мүгәддәс Китабда ҹадуҝәрликлә вә ја фалчылыгла бағлы нә дејилдијини билирсинизми? Бу суалын ҹавабы сиздә тәәҹҹүб доғура биләр.

Аллаһын Кәламында фалчылыға вә ја ҹадуҝәрлијә даир нә дејилир?

Аллаһын гәдим Исраил халгына вердији ганунунда дејилир: «Аранызда... фалчы, ҝәләҹәјидејән, бахыҹы, ҹадуҝәр, овсунчу, ҹиндарлара вә руһчағыранлара мүраҹиәт едән јахуд өлүләричағыран олмасын. Рәбб белә иш ҝөрәнләрә нифрәт едир» (Ганунун тәкрары 18:10—12). Нәјә ҝөрә Јеһова белә сәрт ганунлар вермишди?

Мәгаләнин әввәлиндә ҝәтирилән нүмунәдән ҝөрүрүк ки, бир чох инсанлар өлүләрлә әлагә јаратмағын вә онлардан мүәјјән мәлумат алмағын мүмкүн олдуғуна инанырлар. Бу инанҹларын көкүндә бир чох динләрин өјрәтдији тәлим — өлүмдән сонра инсанын руһани аләмдә јашамаға давам етмәси тәлими дурур. Мүгәддәс Китабда исә бу һагда дејилир: «Дириләр өләҹәкләрини билир, анҹаг өлүләр һеч нә билмир» (Ваиз 9:5). Аллаһын Кәламында өлүләрин вәзијјәти дәрин јуху илә мүгајисә олунур. Онлар әтрафларында баш верәнләрдән тамамилә хәбәрсиздирләр (Матта 9:18, 24; Јәһја 11:11—14)b. Бәс јахшы, онда инсанларла баш верән фөвгәлтәбии һадисәләри неҹә изаһ етмәк олар? Бунларын архасында ким вә ја нә дурур?

Руһани аләмлә әлагә

Мүгәддәс Јазыларда дејилир ки, Иса пејғәмбәр јер үзүндә оланда руһани варлыгларла данышырды. Марк 1:23, 24 ајәләринә әсасән, бир мурдар руһ Исаја белә демишди: «Сәнин ким олдуғуну јахшы билирәм». Руһани варлыглар сәнин дә ким олдуғуну јахшы билирләр. Бәс сән онларын ким олдуғуну билирсәнми?

Аллаһ инсанлары јаратмаздан өнҹә чохсајлы руһани варлыглары, јәни мәләкләри јаратды (Әјјуб 38:4—7). Мәләкләрин һәјаты бизимкиндән гат-гат фәргләнир (Ибраниләрә 2:6, 7). Онлар ҝүҹлү вә һәдсиз ағыллыдырлар вә Аллаһын ирадәсини јеринә јетирмәк үчүн јарадылыблар. «Зәбур» китабында гејд олунур: «Рәббә алгыш един, еј Онун мәләкләри, еј Онун сөзүнә бахыб иҹра едән гүдрәтли иҝидләр!» (Мәзмур 103:20).

Мүгәддәс Китаб ачыглајыр ки, мүәјјән мүддәтдән сонра бәзи мәләкләр Аллаһын иҹазәси олмадан инсанларла әлагә јаратмышлар. Нә мәгсәдлә? Илк инсан олан Адәмлә Һәвваны онлары јарадан Аллаһдан узаглашдырмаг үчүн. Буна наил олмаг үчүн бу мәләкләрдән бири јалана әл атды. Белә давранмагла һәмин мәләк Шејтан Иблис олду, јәни Аллаһа бөһтан атды вә Онун дүшмәнинә чеврилди (Јарадылыш 3:1—6).

Сонрадан диҝәр мәләкләр ҝөјләрдә «онлара мүнасиб мәканы» тәрк едәрәк инсан ҹилдинә ҝирдиләр вә јер үзүндә ҝөзәл гадынларла јашамаға башладылар (Јәһуда 6; Јарадылыш 6:2). Бу үсјанкар мәләкләр вә онлардан төрәмиш нәһәнҝ өвладлар инсанлара о дәрәҹәдә зүлм едирдиләр ки, «дүнја зоракылыгла долмушду». Јәгин, Аллаһын Кәламында бәһс олунан Нуһун ҝүнләриндә баш верән Дашгын барәдә ешитмисиниз. Һәмин Дашгында Аллаһ зоракылығы вә пис инсанлары мәһв етмишди (Јарадылыш 6:3, 4, 11—13).

Дашгын һәмин мәләкләри инсан ҹилдини тәрк едиб јенидән руһани аләмә гајытмаға мәҹбур етди. Лакин Јарадан онлары әввәлки «мәканларына» гајытмаға иҹазә вермәди. Бунун әвәзиндә онлар «зүлмәт гаранлығын диби» илә мүгајисә олунан алчалдылмыш вәзијјәтә салындылар (2 Петер 2:4, 5). Мүгәддәс Китабда үсјанкар мәләкләр «ҹинләр» адланыр (Јагуб 2:19). Фалчылыгла овсунчулуғун архасында дуран да мәһз елә бунлардыр.

Ҹинләрин мәгсәди нәдир?

Инсанларла әлагә јарадан ҹинләрин илк мәгсәди — онлары һәгиги Аллаһ Јеһоваја ибадәтдән узаглашдырмагдыр. Бир чохларынын верҝи кими гәбул етдикләри гејри-ади баҹарыглар инсанларын Аллаһ һаггында дәгиг билик алмаларына вә Она јахынлашмаларына мане олмагдан башга бир шеј дејил.

Ҹинләрин икинҹи мәгсәди онларын башчылары Шејтанын Исаны имтаһана чәкмәсиндән ајдын ҝөрүнүр. Шејтан Исаја «дүнјанын бүтүн падшаһлыгларыны вә онларын ҹалалыны» тәклиф етди. Бәс бунун әвәзиндә о, Исадан нә истәди? Диз чөкүб она сәҹдә гылмасыны. Бәли, Шејтан вә онун ҹинләри онлара ибадәт едилмәсини арзулајырлар. Амма Исанын Аллаһдан вә һәгиги ибадәтдән дөнмәк фикри һеч ағлындан белә кечмирди (Матта 4:8—10).

Бу ҝүн ҹинләр надир һалларда инсанлара бирбаша јахынлашырлар. Еһтијатсыз инсанлары алдатмаг мәгсәди илә онлар даһа чох кристал күрәдән, гәһвә чөкүнтүсүндән, карт вә әл фалындан, улдуз фалындан, тәсбеһ вә ја һансыса дини китабла фала бахмаг кими зәрәрсиз ҝөрүнән шејләрдән истифадә едирләр. Бунлара алданмајын! Бу шејләр садәҹә олараг намәлум дүнја илә әлагә гурмаг васитәләри дејил. Ҹинләр инсанлары Јеһова Аллаһа ибадәтдән узаглашдырмаг мәгсәди илә онлары маҝијаја олан марагларындан истифадә едәрәк алдадырлар. Мәгсәдләринә наил олмадыгда исә чох вахт тәләләринә салдыглары инсанлары инҹидир вә әзаб верирләр. Әҝәр сән дә ҹинләрин тәсири алтына дүшмүсәнсә, онлардан ҹаныны неҹә гуртара биләрсән?

Ҹинләрдән јаха гуртармағын јолу

Алданмајын! Инсанларла данышан руһани варлыглар Аллаһын дүшмәнләридирләр вә мәһвә мәһкум едилибләр (Јәһуда 6). Онлар өлмүш инсанларын ҹилдинә ҝирән фырылдагчы вә јаланчы варлыглардыр. Әҝәр јахшы сандығын достунун фырылдагчы олдуғуну вә сәнин пислијини истәдијини билсәјдин, өзүнү неҹә һисс едәрдин? Әҝәр Интернетдә үнсијјәт гурдуғун инсанын сексуал манјак олдуғуну билсәјдин, нә едәрдин? Ҹинләрлә әлагә исә бундан да бетәр нәтиҹәләрә сәбәб ола биләр! Онларла әлагәни кәсмәк үчүн әлиндән ҝәләни етмәлисән. Бунун үчүн нә етмәк олар?

Мүгәддәс Китабын фалчылыг вә ҹадуҝәрлик һаггында нә өјрәтдијини биләндән сонра гәдим Ефес шәһәринин бәзи сакинләри, нә гәдәр баһалы олса да, бу әмәлләрлә бағлы олан китаблары «јығыб һамынын ҝөзү гаршысында јандырды»лар (Һәвариләрин ишләри 19:19, 20). Мүасир зәманәдә фалчылыға јалныз китаблар, ҝөз мунҹуглары вә бу кими шејләр јох, һәмчинин електрон мәнбәләрдә олан материаллар да дахилдир. Фалчылыг вә ҹадуҝәрлијә аидијјәти олан һәр бир шејдән узаг дурмаға чалыш.

Јухарыда адларыны чәкдијимиз Барбара илә Јоахими јадымыза салаг. Картла фала бахаркән евләринә тәһлүкәли адамларын ҝәләҹәјини ҝөрдүләр вә хәбәрдарлыг алдылар ки, нә онларла данышсынлар, нә дә бир шеј алсынлар. Лакин Јеһованын Шаһидләри олан Кони вә Гудрун гапыны дөјүб Аллаһ һаггында хош хәбәр ҝәтирдикләрини дејәндә Јоахимлә Барбара онлары динләмәк гәрарына ҝәлдиләр. Сөһбәт фалчылыгдан дүшәндә Кони илә Гудрун онлара Мүгәддәс Китабдан бу мәсәләјә даир дәгиг мәлумат вердиләр. Вә бу әр-арвад мүнтәзәм олараг Аллаһын Кәламыны өјрәнмәјә башлады.

Гыса мүддәтдән сонра Јоахимлә Барбара ҹинләрлә бүтүн әлагәни кәсмәк гәрарына ҝәлдиләр. Јеһованын Шаһидләри изаһ етдиләр ки, ҹинләр онлары раһат бурахмајаҹаг. Һәгигәтән дә бу ҹүтлүк чәтин анлар јашады вә ҹинләрин әлиндән чох әзијјәт чәкди. Һәтта һәр ҝеҹә евләриндә галмаг горхулу иди вә бу сәбәбдән башга евә көчдүләр. Бүтүн бу сынаглара бахмајараг, бу ҹүтлүк Филипилиләрә 4:13 ајәсиндәки: «Мәнә гүввәт верәнин сајәсиндә һәр шејә ҝүҹүм чатыр» сөзләринә әмин иди. Јеһова онларын гәтијјәтләрини хејир-дуаландырды вә ҹинләр онлардан әл чәкдиләр. Бу ҝүн Јоахим вә Барбара һәгиги Аллаһ Јеһоваја севинҹлә ибадәт едирләр.

Мүгәддәс Китаб Јеһованын хејир-дуа вердији бүтүн инсанлары чағырыр: «Аллаһа табе олун, Иблисә мүгавимәт ҝөстәрин вә о, сиздән гачаҹаг. Аллаһа јахынлашын, О да сизә јахынлашаҹаг» (Јагуб 4:7, 8). Истәсән, ҹинләрин тәсириндән јаха гуртармаға Јеһова Аллаһ сәнә дә көмәк едә биләр. Фалчылыгдан ҹанларыны неҹә гуртардыгларыны хатырлајан Јоахим вә Барбара Мәзмур 121:2 ајәсиндәки: «Рәбдән мәнә көмәк ҝәләҹәк» сөзләри илә тамамилә разыдырлар.

[Һашијәләр]

[29–ҹу сәһифәдәки шәкил]

Фалчылыгла бағлы мәшғулијјәт Аллаһа јахынлашмаға мане олур

[30–ҹу сәһифәдәки шәкил]

«Аллаһа јахынлашын, О да сизә јахынлашаҹаг» (ЈАГУБ 4:8)