Гој үмидимиз бизә севинҹ версин
«Һеч вахт јалан данышмајан Аллаһын әзәлдән бәри вәд етдији әбәди һәјат [үмидинә маликик]» (ТИТ. 1:2).
ТӘКРАР ҮЧҮН СУАЛЛАР
Һарадан билирик ки, мәсһ олунмуш мәсиһчи јер үзүндә һәјатыны сәдагәтлә баша вуранда ҝөјләрин сакинләри севинир?
Башга гојунларын үмидинин ҝерчәкләшмәси мәсһ олунмушларын үмидинин ҝерчәкләшмәси илә неҹә бағлыдыр?
Үмидимизин ҝерчәкләшәҹәји вахты ҝөрмәк үчүн биз мүгәддәс давраныша вә Аллаһа сәдагәтә хас олан һансы ишләрлә мәшғул олмалыјыг?
1. Јеһованын вердији үмид бизә һәр бир вәзијјәтә таб ҝәтирмәјә неҹә көмәк едир?
ҺӘВАРИ ПАВЕЛ Јеһованы «үмид мәнбәји олан Аллаһ» адландырдыгдан сонра әлавә етмишди: «Гој [О,]... иманыныз сајәсиндә үрәјинизи севинҹ вә сүлһлә бол-бол долдурсун вә үмидиниз мүгәддәс руһун гүввәти илә долуб-дашсын» (Ром. 15:13). Әҝәр үмидимиз долуб-дашса, биз һәр бир вәзијјәтә таб ҝәтирәҹәк, еләҹә дә сүлһ вә севинҹимизи горујаҹағыг. Мәсһ олунмуш мәсиһчиләрин үмиди онлар үчүн «етибарлы вә мөһкәм ҝәми лөвбәри» олдуғу кими, бизим үмидимиз дә бизим үчүн етибарлы вә мөһкәм ҝәми лөвбәри ола биләр (Ибр. 6:18, 19). Һәјатымызда «туфан» гопанда үмид јапышдығымыз бир шејдир, үмид бизи «башга сәмтә» ҝетмәјә, јәни јаваш-јаваш шүбһәләрә гәрг олмаға гојмур вә иманымызы мөһкәм сахламаға көмәк едир. (Ибраниләрә 2:1; 6:11 ајәләрини оху.)
2. Бизим дөврдәки ики груп мәсиһчинин һансы үмиди вар вә нәјә ҝөрә мәсһ олунмушларын үмиди башга гојунлары марагландырыр?
2 Сон ҝүнләрдә јашајан мәсиһчиләрин гаршысында ики ҹүр үмид вар. «Кичик сүрү»нүн јер үзүндә галан мәсһ олунмуш мәсиһчиләри үчүн ҝөјдә өлмәз һәјата говушараг Падшаһлыгда Мәсиһлә бирҝә падшаһ вә каһин кими хидмәт етмәк үмиди вар (Лука 12:32; Вәһј 5:9, 10). Сајҹа онлардан хејли чох олан «башга [гојунларын]», јәни «бөјүк... издиһам»ын исә Ҹәннәтә чевриләҹәк јер үзүндә Мәсиһин Падшаһлығынын тәбәәләри кими әбәди јашамаг үмиди вар (Вәһј 7:9, 10; Јәһ. 10:16). Башга гојунлар һеч вахт унутмамалыдырлар ки, онларын хиласы һәлә јер үзүндә јашајан Мәсиһин мәсһ олунмуш гардашларыны фәал шәкилдә дәстәкләмәләриндән асылыдыр (Мат. 25:34—40). Мәсһ олунмушлар өз мүкафатларыны алаҹаглар, башга гојунларын үмиди исә ҝерчәкләшәҹәк. (Ибраниләрә 11:39, 40 ајәләрини оху.) Ҝәлин илк өнҹә мәсһ олунмушларын үмидинә нәзәр салаг.
МӘСҺ ОЛУНМУШЛАРЫН «ҸАНЛЫ» ҮМИДИ
3, 4. Мәсһ олунмуш мәсиһчиләр онлары «ҹанлы үмидә» говушдуран «јени һәјат»ы неҹә алырлар вә онларын үмиди нәдир?
3 Һәвари Петер «сечилмишләр» адландырдығы мәсһ олунмуш мәсиһчиләрә ики мәктуб үнванламышды (1 Пет. 1:2). О, кичик сүрүјә бәхш олунан еҹазкар үмидин тәфсилатлары барәдә јазмышды. Петерин биринҹи мәктубунда дејилир: «Ағамыз Иса Мәсиһин Атасы вә Аллаһына шүкүрләр олсун! О, бөјүк мәрһәмәтинә ҝөрә Иса Мәсиһи дирилтмәклә бизә јени һәјат вериб бизи ҹанлы үмидә говушдурду. О, бизә әбәди, ләкәсиз вә солмаз мирас верди. Бу мирас сизин үчүн ҝөјдә горунуб сахланылыр. Сиз өзүнүз дә ахыр заманларда ашкар олаҹаг хиласа ҝәтирдијиниз иман сајәсиндә Аллаһын ҝүҹү илә горунурсунуз. Инди сиз буна чох севинирсиниз» (1 Пет. 1:3—6).
4 Јеһова Мәсиһлә бирҝә ҝөјдә һөкмранлыг етмәк үчүн сечдији мәсиһчиләрә «јени һәјат» бәхш едир. Сајы мәһдуд олан бу мәсиһчиләри Јеһова мүгәддәс руһу илә оғуллуға ҝөтүрәрәк падшаһ вә каһин тәјин едир (Вәһј 20:6). Петер дејир ки, «јени һәјат» онлара ҹанлы үмид бәхш едир вә бу үмиди онлар үчүн ҝөјдә горунуб сахланылан «әбәди, ләкәсиз вә солмаз мирас» адландырыр. Тәәҹҹүблү дејил ки, мәсһ олунмушлар белә бир ҹанлы үмидә малик олдугларына ҝөрә чох севинирләр! Анҹаг үмидләринин ҝерчәкләшмәси онларын садиг галмаларындан асылыдыр.
5, 6. Нәјә ҝөрә мәсһ олунмуш мәсиһчиләр алдыглары дәвәтә лајиг шәкилдә јашамаға вар ҝүҹләри илә чалышмалыдырлар?
5 Мәсһ олунмушлара үнванладығы икинҹи мәктубунда Петер онлары тәшвиг едирди: «Алдығыныз дәвәтә вә Аллаһ тәрәфиндән сечилдијинизә лајиг јашамаг үчүн вар гүввәнизлә чалышын» (2 Пет. 1:10). Онлар вар ҝүҹләри илә иман, сәдагәт, гардашлыг севҝиси вә мәһәббәт кими мәсиһчи хүсусијјәтләрини инкишаф етдирмәјә ҹан атмалыдырлар. Петер демишди: «Әҝәр бүтүн бунлар сиздә варса вә даһа да артырса, сиз... фәалијјәтсиз вә бәһрәсиз галмајаҹагсыныз». (2 Петер 1:5—8 ајәләрини оху.)
6 Дирилдилмиш Мәсиһ Кичик Асијада јерләшән Филаделфија шәһәриндәки руһдан доғулан јығынҹаг ағсаггалларына мүраҹиәтиндә демишди: «Мәним дөзүмүм һаггындакы сөзә әмәл етдијин үчүн, мән сынаг вахты сәни горујаҹағам. О заман бүтүн дүнја — јер үзүндә јашајанларын һамысы сынанаҹаг. Мән тезликлә ҝәләҹәјәм. Јеридијин доғру јолда әзмлә аддымла ки, һеч кәс таҹыны әлиндән алмасын» (Вәһј 3:10, 11). Нөгсансызлығыны горумајан мәсһ олунмуш мәсиһчи сонадәк садиг галан сечилмишләрә вәд олунан «солмаз шөһрәт чәләнҝи»ни ала билмәјәҹәкди (1 Пет. 5:4; Вәһј 2:10).
ПАДШАҺЛЫҒА АЧЫЛАН ГАПЫ
7. Јәһуда өз мәктубунда һансы мөһтәшәм үмидә тохунур?
7 Ерамызын тәхминән 65-ҹи илиндә Исанын өҝеј гардашы Јәһуда «чағырылмышлар» адландырдығы мәсһ олунмуш мәсиһчиләрә мәктуб јазмышды. (Јәһуда 1; мүгајисә ет: Ибраниләрә 3:1 ајәси илә.) Үмумијјәтлә, Јәһуданын нијјәти Аллаһын сәмави Падшаһлығына чағырылан мәсиһчиләр үчүн «үмуми» олан мөһтәшәм хилас үмиди барәдә мәктуб јазмаг иди (Јәһуда 3). Онун тохунмалы олдуғу башга ваҹиб мәсәләләр олса да, гыса мәктубунун сонунда о, мәсһ олунмуш мәсиһчиләрин ҝөзәл үмидинә истинад едәрәк јазды: «Сизи јыхылмагдан горуја билән вә Өз шәрәфли һүзуруна бөјүк севинҹлә, ләкәсиз ҝәтирә билән Хиласкарымыз јеҝанә Аллаһа ешг олсун! Шөһрәт, әзәмәт, гүдрәт вә һакимијјәт Ағамыз Иса Мәсиһ васитәсилә әзәлдән әбәдијјәтә гәдәр Онун олсун» (Јәһуда 24, 25).
8. Јәһуда 24 ајәсинә әсасән, мәсһ олунмуш мәсиһчи сонадәк садиг галанда ҝөјүн сакинләринин она ҝөрә севиндикләрини нә ҝөстәрир?
8 Әлбәттә, һәр бир садиг мәсһ олунмуш мәсиһчи јыхылыб мәһв олмаг истәмир. Онларын Мүгәддәс Китаба әсасланан үмиди бундан ибарәтдир ки, Иса Мәсиһ онлары дирилдәҹәк вә Аллаһын һүзуруна бөјүк севинҹлә камил руһани варлыг кими ҝәлмәләринә иҹазә верәҹәк. Мәсһ олунмуш мәсиһчиләрдән бири сон нәфәсинәдәк садиг галанда там әминликлә демәк олар ки, о, «ҹалал ичиндә... руһани варлыг кими дирилдилир» вә «чүрүмәјә мәруз галмыр» (1 Кор. 15:42—44). Әҝәр ҝөјүн сакинләри «төвбә едән бир ҝүнаһкардан өтрү» чох севинирләрсә, ҝөрүн, јер үзүндә һәјатыны сәдагәтлә баша вуран руһдан доғулмуш Мәсиһин бир гардашына ҝөрә онлар нә гәдәр севинирләр! (Лука 15:7). Јеһова вә садиг руһани варлыглар «бөјүк севинҹлә» мүкафатыны алан мәсһ олунмуш мәсиһчи үчүн фәрәһләнирләр. (1 Јәһја 3:2 ајәсини оху.)
9. Һансы мәнада Падшаһлығын гапысы садиг мәсһ олунмушларын үзүнә ҝениш ачылыб? Бу үмид һәлә јер үзүндә јашајан мәсһ олунмушлара неҹә тәсир едир?
9 Һәвари Петер дә мәсһ олунмуш мәсиһчиләрә јазмышды ки, әҝәр садиг галараг алдыглары дәвәтә лајиг јашасалар, «Ағамыз вә Хиласкарымыз Иса Мәсиһин әбәди падшаһлығынын гапысы [онларын үзүнә] ҝениш ачылаҹаг» (2 Пет. 1:10, 11). Петер Падшаһлығын гапысынын мәсһ олунмушларын үзүнә ҝениш ачылаҹағыны демәклә, ола билсин, онларын ҝөјләрә бөјүк әзәмәтлә дахил олаҹағы факты нәзәрдә тутурду. Петер һәмчинин һәјат уғрунда гачышы уғурла баша вуран бу мәсиһчиләрин ҝөјләрдә алаҹағы сајсыз-һесабсыз хејир-дуалара да истинад едә биләрди. Онлар архаја бојланыб сәдагәтлә јашадыглары һәјатларына нәзәр саланда үрәкләри севинҹ вә миннәтдарлыгла долуб-дашаҹаг. Шүбһә јохдур ки, бу үмид һәлә јер үзүндә јашајан мәсһ олунмуш мәсиһчиләри мөһкәмләндирәрәк ағылларыны фәалијјәтә һазырламаға көмәк едир (1 Пет. 1:13).
БАШГА ГОЈУНЛАР ҮЧҮН ҮМИД
10, 11. а) Башга гојунлар үчүн һансы үмид вар? б) Башга гојунларын үмидинин ҝерчәкләшмәси Иса Мәсиһлә вә Аллаһын оғулларынын мејдана чыхмасы илә неҹә бағлыдыр?
10 Һәвари Павел Аллаһын руһдан доғулмуш оғулларынын Мәсиһин һәмварисләри олмаг кими мөһтәшәм үмиди барәдә јазмышды. Даһа сонра исә о, сајы мәлум олмајан башга гојунлара Јеһованын вердији ҝөзәл үмид барәдә хатырлады: «Бүтүн хилгәт [инсанлар]... бөјүк сәбирсизликлә Аллаһын оғулларынын [мәсһ олунмушларын] мејдана чыхаҹағы вахты ҝөзләјир. Ахы хилгәт пучлуға өз хошу илә табе олмамышдыр, ону табе едән буну үмидлә етмишдир. Беләликлә, хилгәт чүрүклүк әсарәтиндән гуртулуб Аллаһын өвладларынын шанлы азадлығына говушаҹагдыр» (Ром. 8:14—21).
11 Јеһова «өвлад» васитәсилә бәшәријјәти «гәдим илан» адланан Шејтан Иблисдән азад едәҹәјини вәд едәндә бу үмиди вермишди (Вәһј 12:9; Јар. 3:15). «Өвлад»ын әсас һиссәси Иса Мәсиһдир (Галат. 3:16). Иса Мәсиһин өлүб дирилмәси сајәсиндә бәшәријјәтин ҝүнаһ вә өлүмүн әсарәтиндән гуртулмаг кими әсаслы үмиди вар. Бу үмидин ҝерчәкләшмәси «Аллаһын оғулларынын мејдана [чыхмасы]» илә бағлыдыр. Ҝөјдә иззәтә говушмуш мәсһ олунмуш мәсиһчиләр «өвлад»ын икинҹи дәрәҹәли һиссәсидир. Онлар нә заман мејдана чыхаҹаглар? Илк өнҹә Мәсиһлә бирҝә Шејтанын пис системини мәһв едәҹәкләри заман (Вәһј 2:26, 27). Бу, бөјүк мүсибәтдән чыхаҹаг башга гојунлара хилас ҝәтирәҹәк (Вәһј 7:9, 10, 14).
12.Мәсһ олунмушларын мејдана чыхмасы бәшәријјәт үчүн һансы мөһтәшәм хејир-дуалары ҝәтирәҹәк?
12 Мәсиһин Миниллик Һөкмранлығы заманы «хилгәт», јәни инсанлар неҹә дә раһатлыгла нәфәс алаҹаг! О вахт иззәтә говушмуш Аллаһын оғуллары башга мәнада да мејдана чыхаҹаглар: онлар Мәсиһлә бирҝә онун фидјә гурбанлығынын дәјәрини бәшәријјәтә тәтбиг едәрәк каһин ролунда чыхыш едәҹәкләр. Сәмави Падшаһлығынын тәбәәси олан «хилгәт» ҝүнаһ вә өлүмүн тәсириндән азад олмаға башлајаҹаг. Итаәткар инсанлар тәдриҹән «чүрүклүк әсарәтиндән» гуртулаҹаглар. Әҝәр Миниллик заманы Јеһоваја садиг галсалар вә сонунҹу имтаһандан кечсәләр, онларын ады әбәдилик олараг һәјат китабында јазылаҹаг. Онлар «Аллаһын өвладларынын шанлы азадлығына [говушаҹаглар]» (Вәһј 20:7, 8, 11, 12). Бу, һәгигәтән дә, мөһтәшәм үмиддир!
ГОЈ ҮМИДИМИЗ ҺӘМИШӘ ҸАНЛЫ ГАЛСЫН
13. Үмидимиз нәјә әсасланыб вә Мәсиһ нә заман зүһур едәҹәк?
13 Петерин Аллаһдан илһам алараг јаздығы ики мәктубунда һәм мәсһ олунмуш мәсиһчиләрә, һәм дә башга гојунлара үмидләрини ҹанлы сахламаға көмәк едән чохсајлы мәсләһәтләр вар. О гејд етмишди ки, онлар өз үмидләрини әмәлләри сајәсиндә газанмајыблар, бу, Јеһованын лүтфүнүн тәзаһүрүдүр. Петер јазмышды: «Һәр вахт ајыг олун, үмидинизи Иса Мәсиһин зүһуру вахты сизә ҝөстәриләҹәк лүтфә бағлајын» (1 Пет. 1:13). Мәсиһ садиг давамчыларыны мүкафатландырмаға вә аллаһсызлар үзәриндә Јеһованын һөкмүнү иҹра етмәјә ҝәләндә зүһур едәҹәк. (2 Салоникилиләрә 1:6—10 ајәләрини оху.)
14, 15. а) Үмидимизи ҹанлы сахламаг үчүн диггәтимизи нәјә ҹәмләмәлијик? б) Петер һансы мәсләһәти вермишди?
14 Үмидимиз һәмишә ҹанлы олсун дејә биз үзүмүзә ҝәлән Јеһованын ҝүнү барәдә һеч вахт унутмамалыјыг вә бу, бизим һәјат тәрзимиздән ҝөрүнмәлидир. Һәмин ҝүн «ҝөјләр» — һал-һазыркы инсан һакимијјәтләри, еләҹә дә «јер» —пис инсан ҹәмијјәти вә онун «тәркиб һиссәләри» мәһв едиләҹәк. Петер јазмышды: «Ҝөрүн сиз... неҹә инсан олмалысыныз, Јеһованын ҝүнүнү бәрк-бәрк јадда сахлајыб ҝөзләмәлисиниз. О ҝүн од тутуб јанан ҝөјләр дағылаҹаг вә һәмин о көзәрмиш тәркиб һиссәләри әријиб төкүләҹәк!» (2 Пет. 3:10—12).
15 Индики «ҝөјләр» вә «јер» «јени бир ҝөј [Мәсиһин Падшаһлығы] вә јени јер [јени инсан ҹәмијјәти]» илә әвәз олунаҹаг (2 Пет. 3:13). Бундан сонра Петер вәд олунмуш јени ҝөјләрә вә јени јерә даир үмидимизин ҝерчәкләшмәсини ҝөзләдијимиз мүддәтдә нә етмәли олдуғумуза даир ајдын мәсләһәт верди: «Буна ҝөрә дә әзизләрим, бүтүн бунлары ҝөзләјәркән вар ҝүҹүнүзлә чалышын ки, Аллаһ сизи ахырда ләкәсиз, гүсурсуз вә әмин-аманлыг ичиндә јашајан тапсын» (2 Пет. 3:14).
ҮМИДИНИЗӘ ЛАЈИГ ТӘРЗДӘ ЈАШАЈЫН
16, 17. а) Мүгәддәс давраныша вә Аллаһа сәдагәтә хас олан һансы ишләрлә мәшғул олмалыјыг? б) Бизим үмидимиз неҹә ҝерчәкләшәҹәк?
16 Үмидимизи ҹанлы сахламаг кифајәт дејил, биз она лајиг тәрздә јашамалыјыг. Биз руһани ҹәһәтдән неҹә инсан олдуғумуза фикир вермәлијик. «Мүгәддәс давраныш» дејилдикдә әхлаги тәмизлијимизи горујараг «башга милләтләрин арасында» нүмунәви тәрздә давранмаг нәзәрдә тутулур (2 Пет. 3:11; 1 Пет. 2:12). Арамызда мәһәббәт олмалыдыр. Бу о демәкдир ки, үмумдүнја гардашлығымызда, һәтта өз јығынҹағымызда һөкм сүрән бирлији горумаг үчүн әлимиздән ҝәләни әсирҝәмәмәлијик (Јәһ. 13:35). «Аллаһа сәдагәт» дејилдикдә исә Јеһова илә мүнасибәтләримизи горумаға көмәк едән ишләр нәзәрдә тутулур. Бураја мәналы, долғун дуалар, Мүгәддәс Китабы һәр ҝүн охумаг, јахшы шәхси өјрәнмә, аиләви ибадәт, о ҹүмләдән Падшаһлыг һагда хош хәбәри фәал шәкилдә тәблиғ етмәк дахилдир (Мат. 24:14).
17 Һәр биримиз Јеһованын бәјәндији вә бу пис систем мәһв олуб ҝедәндә Онун хилас етдији инсан олмаг истәјирик. Онда бизим үмидимиз, јәни «һеч вахт јалан данышмајан Аллаһын әзәлдән бәри вәд етдији әбәди һәјат» үмиди ҝерчәкләшәҹәк (Тит. 1:2).
[22–ҹи сәһифәдәки шәкил]
Мәсһ олунмуш мәсиһчиләр онлары «ҹанлы үмидә» говушдуран «јени һәјат»ы алырлар
[24–ҹү сәһифәдәки шәкил]
Аиләликҹә үмидинизи ҹанлы сахлајын