Охуҹуларын суаллары

Мәсиһчинин порнографијаја бахмаг вәрдиши о һәддә ҝәлиб чата биләрми ки, ону јығынҹагдан кәнар етмәк лазым ҝәлсин?

▪ Бәли, ола биләр! Бу, порнографијанын һәр бир нөвүндән узаг дурмаг үчүн нә гәдәр бөјүк сәј ҝөстәрмәјин ваҹиб олдуғуну вурғулајыр. Бураја китабларда, журналларда, филмләрдә, видео вә Интернет сајтларында ҝөстәрилән вә ја јазылы шәкилдә тәгдим олунан порнографик материаллар дахилдир.

Порнографија бәласына дүнјанын һәр јериндә раст ҝәлмәк мүмкүндүр. Интернет порнографик материаллары даһа әлчатан етдији үчүн она бахан инсанларын сајы ҝүнү-ҝүндән артыр. Бәзи ҝәнҹләр вә јашлы инсанлар порнографик веб-сајтлара тәсадүфән дахил олмушлар. Диҝәрләри исә белә сајтлара биләрәкдән ҝирирләр, онлар евдә вә офисдә тәк оланда порнографик материаллара ҝизлиҹә бахыр вә ја охујурлар. Нәјә ҝөрә бу, мәсиһчиләр үчүн ҹидди мәсәләдир?

Бунун әсас сәбәбләриндән бирини Исанын нөвбәти хәбәрдарлығында тапырыг: «Гадына бахыб она гаршы шәһвәтлә аловланан һәр бир адам артыг үрәјиндә онунла зина етмиш олур» (Мат. 5:28). Јалныз әр-арвад арасындакы нормал ҹинси әлагә дүзҝүндүр вә әр-арвад бу мүнасибәтдән һәзз ала биләр (Сүл. мәс. 5:15—19; 1 Кор. 7:2—5). Лакин порнографијанын әсасында бунлар дурмур. Әксинә, порнографик материалларда тәгдим олунан гејри-гануни ҹинси әлагә инсанларда әхлагсыз фикирләрин јаранмасына тәкан верир. Елә Исанын сөјләдији хәбәрдарлыг мәһз буна гаршы иди. Ајдындыр ки, порнографијаја бахмаг вә ја бу кими материаллар охумаг бирбаша олараг Аллаһын нөвбәти ҝөстәришинә зиддир: «Буна ҝөрә дә торпагдан јарадылмыш бәдәнинизин үзвләриндәки мејилләри — ҹинси әхлагсызлыға, натәмизлијә, шәһвәтә, еһтираса вә бүтпәрәстлик олан тамаһкарлыға мејилләри өлдүрүн» (Колос. 3:5).

Әҝәр мәсиһчи бир-ики дәфә порнографијаја бахыбса, нә баш верә биләр? Онун вәзијјәти мүәјјән мәнада мәзмурчу Асәфин үзләшдији тәһлүкәли вәзијјәтә охшајыр. О демишди: «Ајагларым аз гала бүдрәмишди, аддымларым мәни јыхмышды». Әҝәр мәсиһчи ҝөзүнү чәкмәдән чылпаг гадын вә ја кишиләрин порнографик шәкилләринә, јахуд да ики нәфәрин әхлагсызлыгла неҹә мәшғул олдуғуна бахырса, демәк олармы ки, онун виҹданы Аллаһ гаршысында тәмиздир вә о, Аллаһла сүлһ мүнасибәтиндәдир? Асәф дә өзүнә јер тапа билмирди: «Һәмишә әзијјәтә дүшүрәм, һәр сәһәр төһмәтә раст ҝәлирәм» (Мәз. 73:2, 14).

Бу пислијин тәләсинә дүшән мәсиһчи ајылмалы вә руһани көмәјә еһтијаҹы олдуғуну бојнуна алмалыдыр. Белә көмәји мәсиһчи јығынҹағында тапмаг олар: «Әҝәр кимсә билмәдән сәһв бир иш ҝөрәрсә, сиз јеткин мәсиһчиләр, ону мүлајимҹәсинә дүзәлтмәјә чалышын. Ејни заманда, өзүнүздән муғајат олун» (Галат. 6:1). Бир вә ја ики ағсаггал, хәстәни сағалтмаға гадир олан «иманла едилән дуа» да дахил олмагла, һәмин инсана лазыми көмәји ҝөстәрәҹәк вә онун «тәгсири бағышланаҹаг» (Јаг. 5:13—15). Порнографија бәласындан азад олмаг мәгсәдилә көмәк истәјән мәсиһчиләр, Асәф кими, онлар үчүн Аллаһа јахынлашмағын јахшы олдуғуну ҝөрмүшләр (Мәз. 73:28).

Лакин һәвари Павел јазмышды ки, ҝүнаһ ишләдәнләрин бәзиләри «натәмиз ишләриндән, ҹинси әхлагсызлыгдан вә позғун давранышларындан әл чәкиб»a төвбә етмәмишләр (2 Кор. 12:21). Бурада «натәмиз ишләр» кими тәрҹүмә едилән јунан сөзү барәдә профессор Марвин Винсент јазмышды ки, бу сөзүн алтында ијрәнҹ натәмизлик нәзәрдә тутулур. Әфсуслар олсун ки, бәзи порнографик материаллар чылпаг инсанларын тәсвир олундуғу, еләҹә дә киши вә гадынларын әхлагсызлыгла мәшғул олдуглары сәһнәләрдән даһа бетәрдир. Ијрәнҹ, икраһ доғуран порнографијаја һомосексуализм (ејни ҹинсдән олан инсанларын бир-бири илә әлагәдә олмасы), груп шәклиндә ҹинси әлагә, һејванла ҹинси әлагә, ушаг порнографијасы, груп шәклиндә зорлама, вәһшиҹәсинә гадынлара әзаб верәрәк ҹинси һәзз алмаг, өзләрини бир-бирләринә бағлајан инсанларын ҹинси әлагәјә ҝирмәси вә ја ҹинси һәзз алмаг мәгсәдилә башгаларына ишҝәнҹә вермәк кими нөвләри дахилдир. Зеһинләри гаранлыгда олан Павелин бәзи мүасирләри «абыр-һәјаны бүсбүтүн итирәрәк аҹҝөзлүклә һәр ҹүр натәмиз иш ҝөрмәк үчүн өзләрини позғунлуг ҝирдабына гәрг [етмишдиләр]» (Ефес. 4:18, 19).

Павел Галатијалылара 5:19 ајәсиндә дә «натәмизлик» сөзүндән истифадә едир. Бир британијалы алим гејд етмишдир ки, бу ајәдә бу сөз «даһа чох бүтүн гејри-тәбии истәкләрә» аид ола биләр. Һансы мәсиһчи етираз едәр ки, јухарыда гејд олунан ијрәнҹ, гејри-тәбии ҹинси әлагәнин тәсвир олундуғу порнографијанын нөвләри «гејри-тәбии истәкләр» дејил вә инсанда икраһ доғурмур? Галатијалылара 5:19—21 ајәләриндә Павел сонда гејд едир ки, бу ҹүр натәмиз «ишләрлә мәшғул оланлар Аллаһын падшаһлығына ҝирмәјәҹәкләр». Беләликлә, әҝәр ијрәнҹ, гејри-тәбии ҹинси әлагә илә бағлы олан порнографијаја бахмаг вәрдиши кимдәсә дәрин көк салыбса вә узун мүддәтдир ки она бахырса, үстәлик, төвбә едиб әмәлиндән әл чәкмирсә, белә инсан мәсиһчи јығынҹағында гала билмәз. Јығынҹағын тәмизлијини вә овгатыны, јәни аб-һавасыны горумаг үчүн ону јығынҹагдан кәнар етмәк лазымдыр (1 Кор. 5:5, 11).

Амма порнографијанын ијрәнҹ нөвләринә алудә оланларын бәзиләри ағсаггаллара мүраҹиәт етмиш вә һәјатларында көклү дәјишиклик етмәк үчүн лазыми руһани көмәк алмышлар. Гәдим Сардис шәһәриндә јашајан бәзи мәсиһчиләрә мүраҹиәтиндә Иса демишди: «Јахасыны ҝүҹ-бәла илә өлүмдән гуртаранлары гүввәтләндир... Алдығын вә ешитдијин шејләри јадына сал, онлары гору вә төвбә ет. Әҝәр ојанмасан,.. нә вахт ҝәләҹәјими билмәјәҹәксән» (Вәһј 3:2, 3). Төвбә етмәк вә од-аловдан гуртулмаг мүмкүндүр (Јәһуда 22, 23).

Јухарыда дејиләнләри нәзәрә алараг, мәҝәр тәһлүкәли һәддә јахынлашмамаг үчүн гәти аддымлар атмағымыз даһа јахшы дејил? Бәли, биз порнографијанын бүтүн нөвләриндән узаг дурмаг нијјәтимиздә гәти олмалыјыг!

[Һашијә]

[30–ҹу сәһифәдәки јазы]

Бу пислијин тәләсинә дүшән мәсиһчи ајылмалы вә руһани көмәјә еһтијаҹы олдуғуну бојнуна алмалыдыр