Јеһова бизи хилас етмәк үчүн горујур
«Сиз өзүнүз дә ахыр заманларда ашкар олаҹаг хиласа ҝәтирдијиниз иман сајәсиндә Аллаһын ҝүҹү илә горунурсунуз» (1 ПЕТ. 1:4, 5).
НЕҸӘ ҸАВАБ ВЕРӘРДИН?
Јеһова бизи һәгиги ибадәтә неҹә ҹәлб едиб?
Јеһованын мәсләһәтләринин бизә рәһбәрлик етмәсинә неҹә јол верә биләрик?
Јеһова бизи неҹә руһландырыр?
1, 2. а) Мүгәддәс Китаб бизи неҹә әмин едир ки, Аллаһ нөгсансызлығымызы горумагда бизә көмәк едәҹәк? б) Јеһова һәр биримизи нә дәрәҹәдә таныјыр?
«АХЫРА кими дөзән хилас олаҹаг» (Мат. 24:13). Иса бу сөзләрлә ајдын шәкилдә ҝөстәрди ки, Аллаһ Шејтанын системини мәһв едәндә биз сағ галмаг үчүн сонадәк нөгсансызлығымызы горумалыјыг. Анҹаг бу, о демәк дејил ки, Јеһова сынаглара таб ҝәтирмәјимизи бизим мүдриклијимизә вә ҝүҹүмүзә бурахыб. Мүгәддәс Китаб бизи әмин едир: «Аллаһ вәфалы Аллаһдыр, О гојмаз ки, сиз ҝүҹүнүз чатмајан сынаглара мәруз галасыныз вә сынаг вахты дөзә биләсиниз дејә, сизә чыхыш јолу да ҝөстәрәҹәк» (1 Кор. 10:13). Бәс бу сөзләр һансы мәнаны кәсб едир?
2 Ҝүҹүмүздән артыг сынанмағымыза јол вермәмәк үчүн Јеһова ҝәрәк бизим барәмиздә һәр шеји, мәсәлән, чәтинликләримизи, фәрди гурулушумузу вә сынаглара нә гәдәр таб ҝәтирә биләҹәјимизи билсин. Доғруданмы, Аллаһ бизи бу гәдәр јахшы таныјыр? Бәли. Мүгәддәс Јазыларда дејилир ки, Јеһова һәр биримиз һагда һәр шеји билир. О, бизим ҝүндәлик һәјатымызла вә вәрдишләримизлә танышдыр. Јеһова һәтта дүшүнҹәләримизә вә үрәјимизин нијјәтләринә дә бәләддир. (Мәзмур 139:1—6 ајәләрини оху.)
3, 4. а) Давудун нүмунәсиндән Јеһованын һәр биримизә ајры-ајрылыгда диггәт јетирмәси неҹә ҝөрүнүр? б) Јеһова бизим ҝүнләрдә һансы һејрәтамиз иши һәјата кечирир?
3 Аллаһын фани инсанларла бу дәрәҹәдә марагланмасы шиширдилмәјиб ки? Бу суал мәзмурчу Давуду да дүшүндүрүрдү. О, Јеһоваја демишди: «Әлләринин иши олан ҝөјләри, өз јеринә дүздүјүн ај вә улдузлары ҝөрдүкдә дејирәм: “Инсан кимдир ки, онун һаггында дүшүнүрсән?”» (Мәз. 8:3, 4). Јәгин ки, Давуд өз тәҹрүбәсиндән ирәли ҝәләрәк бу суалы вермишди. Давуд Јессејин кичик оғлу ола-ола, Јеһова ону «үрәјинә јатан бир адам» адландырмышды вә «отлагларда гојун отаранда ҝөтүрүб» ону халгы Исраил үзәринә падшаһ гојмушду (1 Шам. 13:14; 2 Шам. 7:8). Давуд балаҹа чобан оланда Каинатын Јараданы онун үрәјиндәки фикирләрә диггәт јетирмишди. Тәсәввүр едирсән, о, бу барәдә дүшүнәндә һансы һиссләри кечирирди?
4 Бу ҝүн дә Јеһованын һәр биримизә шәхсән мараг ҝөстәрмәси, һәгигәтән дә, һејрәтамиздир. О, «милләтләрин вар-дөвләти»ни топлајараг онлары һәгиги ибадәтдә бирләшдирир вә хидмәтчиләринә нөгсансызлыгларыны горумаға көмәк едир (Һаг. 2:7). Јеһованын буну неҹә етдијини даһа јахшы баша дүшмәк үчүн ҝәлин, илк нөвбәдә, Онун инсанлары һәгиги ибадәтә неҹә ҹәлб етдији барәдә дүшүнәк!
АЛЛАҺ БИЗИ ҸӘЛБ ЕДИБ
5. Јеһова инсанлары Өз Оғлуна неҹә ҹәлб едир? Нүмунә әсасында изаһ ет.
5 Иса демишди: «Әҝәр мәни ҝөндәрмиш Атам ҹәлб етмәсә, һеч ким мәним ардымҹа ҝәлә билмәз» (Јәһ. 6:44). Бу сөзләр ҝөстәрир ки, Мәсиһин шаҝирди олмаг үчүн Аллаһын көмәји мүтләгдир. Јеһова һәлим инсанлары Өз Оғлуна неҹә ҹәлб едир? О, буну хош хәбәрин тәблиғи вә мүгәддәс руһунун фәалијјәти васитәсилә едир. Мисал үчүн, Павел миссионер хидмәтиндә онун әмәкдашлары олан гардашларла бирликдә Филипидә оларкән Лидија адлы бир гадынла растлашдылар вә она хош хәбәри тәблиғ етмәјә башладылар. Мүгәддәс Китабда јазылдығы кими, бу заман «Јеһова онун үрәјини ачды ки, о, Павелин дедикләрини гәбул етсин». Бәли, Јеһова руһу васитәсилә Лидијаја хош хәбәрин мәғзини анламаға көмәк етди вә нәтиҹәдә о, аиләси илә бирҝә вәфтиз олунду (Һәв. иш. 16:13—15).
6. Јеһова һамымызы һәгиги ибадәтә неҹә ҹәлб едиб?
6 Лидијанын һадисәси истисна идими? Әсла јох! Әҝәр сән өзүнү Аллаһа һәср едән мәсиһчисәнсә, онда демәк олар ки, сән дә Аллаһ тәрәфиндән һәгиги ибадәтә ҹәлб олунмусан. Сәмави Атамыз Лидијанын үрәјиндә гијмәтли бир шеј тапдығы кими, сәнин дә үрәјиндә јахшы бир шеј тапыб. Сән хош хәбәрә гулаг асанда Јеһова Өз мүгәддәс руһу илә сәнә ону баша дүшүб гәбул етмәјә көмәк етмишди (1 Кор. 2:11, 12). Өјрәндикләрини тәтбиг етмәјә чалышанда Јеһова Онун ирадәсинә ујғун давранмаг сәјләринә хејир-дуа вермишди. Һәјатыны Она һәср едәндә О, үрәкдән севинирди. Бәли, һәјата апаран јола гәдәм гојдуғун илк ҝүндән Јеһова һәр ан сәнин јанында олуб.
7. Һарадан билирик ки, Јеһова бизә Она садиг галмаға көмәк едәҹәк?
7 Јеһова бизи Өзү илә јеримәјә башламаға көмәк етдикдән сонра Она садиг галмағымызы өз өһдәмизә бурахмајыб. О билир ки, биз һәгигәтә өзүмүз ҝәлмәмишик вә һәгигәтдә өзүмүз гала билмәјәҹәјик. Һәвари Петер мәсһ олунмушлара белә сөзләр үнванламышды: «Сиз өзүнүз дә ахыр заманларда ашкар олаҹаг хиласа ҝәтирдијиниз иман сајәсиндә Аллаһын ҝүҹү илә горунурсунуз» (1 Пет. 1:4, 5). Бу сөзләр, маһијјәт етибарилә, бүтүн мәсиһчиләрә аиддир вә бу, һәр биримизи марагландырмалыдыр. Нәјә ҝөрә? Чүнки һәр биримиз Аллаһа садиг галмаг үчүн Онун көмәјинә мөһтаҹыг.
АЛЛАҺ БИЗИ СӘҺВ АДДЫМДАН ЧӘКИНДИРИР
8. Бизим сәһв аддым атмағымыза нәләр сәбәб ола биләр?
8 Һәјатын гајғылары вә гејри-камиллијимиз руһани сајыглығымызы итирмәјимизә вә һәтта өзүмүзүн дә хәбәри олмадан јанлыш аддымлар атмағымыза ҝәтириб чыхарда биләр. (Галатијалылара 6:1 ајәсини оху.) Буну Давудун һәјатында баш вермиш һадисәдән ҝөрмәк олар.
9, 10. Јеһова Давуду сәһв аддым атмагдан неҹә чәкиндирди вә бу ҝүн О, бизим үчүн нә едир?
9 Пахыл падшаһ олан Шаул Давуду тәгиб едәндә о, ондан гисас алмады вә бунунла тәрифәлајиг тәмкинлилик ҝөстәрди (1 Шам. 24:2—7). Лакин бу һадисәдән бир гәдәр сонра Давуд гејри-камиллији уҹбатындан өзү илә баҹара билмәдији үчүн аз гала сәһв аддым атсын. Азугәјә еһтијаҹлары олан Давуд вә адамлары һөрмәтҹил шәкилдә исраилли Навалдан онлара әл тутмағы хаһиш етдиләр. Лакин Навал онлары о ки вар тәһгир етди. Бундан гәзәбләнән Давуд Навалын евиндәки бүтүн кишиләрдән гисас алмаг фикринә дүшдү. О, ағлына белә ҝәтирмирди ки, ҝүнаһсыз инсанларын ганыны төкмәклә Јеһова гаршысында ҝүнаһ газанаҹаг. Јалныз Навалын арвады Авигаилин бу ишә вахтында мүдахилә етмәси Давуду ағыр ҝүнаһ төрәтмәкдән сахлады. Авигаилин Јеһова тәрәфиндән ҝөндәрилдијини дәрк едән Давуд она деди: «Исраилин Аллаһы Рәббә алгыш олсун ки, бу ҝүн мәни гаршыламаға сәни ҝөндәрди. Ағлына бәрәкаллаһ, хејир-дуалы оласан! Бу ҝүн мәни ган төкмәкдән вә әлимлә өз гисасымы алмагдан сахладын» (1 Шам. 25:9—13, 21, 22, 32, 33).
10 Бу һадисәдән өзүмүз үчүн һансы ибрәт дәрси ҝөтүрә биләрик? Јеһова Давуду јанлыш аддымдан чәкиндирмәк үчүн Авигаилдән истифадә етмишди. О, бу ҝүн дә буна бәнзәр бир шеј едир. Әлбәттә, биз ҝөзләмәмәлијик ки, һәр дәфә сәһв етмәк үзрә оланда Јеһова киминсә васитәсилә вәзијјәтә мүдахилә едәҹәк. Бундан әлавә, биз билмирик, Јеһова һәр бир вәзијјәтдә неҹә давранаҹаг вә нијјәтини јеринә јетирмәк үчүн нәләрә јол верәҹәк (Ваиз 11:5). Бунунла белә, әмин ола биләрик ки, Јеһова һәмишә вәзијјәтимиздән хәбәрдардыр вә Она садиг галмаға бизә көмәк едәҹәк. О, бизи әмин едир: «Сәнә тәлим верәҹәјәм, ҝедәҹәјин јолу өјрәдәҹәјәм. Нәсиһәт верәҹәјәм, ҝөзүм сәнин үстүндә олаҹаг» (Мәз. 32:8). Јеһова мәсләһәтләрини бизә неҹә верир? Биз онлардан неҹә бәһрәләнә биләрик? Вә нәјә ҝөрә биз әмин ола биләрик ки, Јеһова бу ҝүн Өз халгына рәһбәрлик едир? Ҝөрәк «Вәһј» китабы бу суаллара неҹә ҹаваб верир.
МӘСЛӘҺӘТЛӘР БИЗИ ГОРУЈУР
11. Јеһова бүтүн дүнјада олан јығынҹаглардакы вәзијјәтдән нә дәрәҹәдә хәбәрдардыр?
11 «Вәһј» китабынын 2-ҹи вә 3-ҹү фәслиндә гәләмә алынан ҝөрүнтүдә иззәтә говушмуш Иса Мәсиһин Кичик Асијада јерләшән једди јығынҹаға бахыш кечирмәсиндән бәһс олунур. Ҝөрүнтүдән бәлли олур ки, Мәсиһ јығынҹагларда нәинки үмуми, һәтта орадакы ајры-ајры вәзијјәтләри дә ҝөрүр. Бәзи һалларда о һәтта конкрет инсанларын адларыны чәкир вә һәр јығынҹағы нәјәсә ҝөрә тәрифләјир вә ја мәсләһәт верир. Бу, нәјә ишарә едир? Једди јығынҹаг 1914-ҹү илдән сонракы мәсһ олунмушлары тәмсил едир вә једди јығынҹаға верилән мәсләһәтләр, маһијјәт етибарилә, Аллаһын халгынын бу ҝүн бүтүн дүнјадакы јығынҹагларына аиддир. Демәли, бундан белә бир нәтиҹәјә ҝәлирик ки, Јеһова Оғлу васитәсилә халгына фәал шәкилдә рәһбәрлик едир. Биз Онун рәһбәрлијиндән неҹә фајдалана биләрик?
12. Јеһованын аддымларымызы јөнәлтмәсинә неҹә јол верә биләрик?
12 Јеһованын мәһәббәтлә тәгдим етдији рәһбәрлијиндән фајдаланмағын үсулларындан бири шәхси өјрәнмәдир. Садиг вә ағыллы нөкәрин нәшрләри васитәсилә Јеһова бизә күлли мигдарда Мүгәддәс Китабдан мәсләһәтләр верир (Мат. 24:45). Лакин бу мәсләһәтләрдән јарарланмаг истәјириксә, онлары арашдырмаг үчүн вахт ајырмалы вә өјрәндикләримизи тәтбиг етмәлијик. Шәхси өјрәнмә васитәсилә Јеһова бизи «јыхылмагдан» горујур (Јәһуда 24). Елә олубму ки, нәшрләримиздән һансыса бир мәгаләни арашдырдыгдан сонра сәндә онун мәһз сәнин үчүн јазылдығы һисси јарансын? Һәмин мәсләһәтләри Јеһовадан ҝәлән дүзәлиш кими гәбул ет. Достун сәнин диггәтини нәјәсә јөнәлтмәк үчүн еһмалҹа күрәјиндән вурдуғу кими, Јеһова мүгәддәс руһунун көмәјилә диггәтини сәнин — шүбһәсиз ки, бир чохларынын — давранышынын вә ја хасијјәтинин дүзәдиләси ҹәһәтинә јөнәлдә биләр. Руһун рәһбәрлијинә диггәт јетирмәклә биз Јеһоваја аддымларымызы јөнәлтмәјә јол веририк. (Мәзмур 139:23, 24 ајәләрини оху.) Буна ҝөрә дә јахшы оларды ки, шәхси өјрәнмәмизә диггәт јетирәк.
13. Нәјә ҝөрә шәхси өјрәнмәмизин кејфијјәтини јохламаг мүдрик һәрәкәтдир?
13 Әҝәр биз әјләнҹәләрә һәддән артыг чох вахт сәрф етсәк, шәхси өјрәнмә үчүн вахт галмајаҹаг. Бир гардаш бунун чох асанлыгла баш верә билдијинә диггәт јетирмишди. О дејир: «Бу ҝүн әјләнҹәләр һәмишәкиндән даһа әлчатан вә уҹуздур. Һәмин әјләнҹәләр телевизор, компүтер вә телефонларда вар. Биз, санки, әјләнҹәләрлә әһатә олунмушуг». Әҝәр еһтијаты әлдән версәк, дәрин шәхси өјрәнмә үчүн тәләб олунан вахты ҝетдикҹә азалда, сонда исә үмумијјәтлә ону дајандыра биләрик (Ефес. 5:15—17). Һәр биримиз өзүмүздән сорушмалыјыг: «Аллаһын Кәламыны дәриндән арашдырмаг үчүн мән тез-тез, јохса јалныз јығынҹагда тапшырығым вә ја чыхышым оландан-олана вахт ајырырам?» Әҝәр бу беләдирсә, онда јахшы оларды ки, аиләви ибадәт вә ја шәхси өјрәнмә үчүн ајрылан вахтдан сәмәрәли истифадә едәрәк хәзинә кими Аллаһын мүдриклијини ахтараг, чүнки бу мүдриклик васитәсилә Јеһова бизи хилас үчүн горујур (Сүл. мәс. 2:1—5).
ТӘСӘЛЛИ БИЗӘ ТАБ ҜӘТИРМӘЈӘ КӨМӘК ЕДИР
14. Јеһованын һиссләримизә диггәт јетирдијини Мүгәддәс Јазылар неҹә ҝөстәрир?
14 Давудун һәјатында гәм-кәдәр аз дејилди (1 Шам. 30:3—6). Аллаһдан илһам алараг јаздығы сөзләрдән ҝөрүрүк ки, Јеһова онун һиссләринә бәләд иди. (Мәзмур 34:18; 56:8 ајәләрини оху.) Аллаһ бизим дә һиссләримизә бәләддир. Гәлбимиз јаралы оланда вә ја өзүмүзү руһән әзилмиш һисс едәндә О, бизә даһа да јахын олур. Артыг буну билмәк, Давуд кими, бизә дә мүәјјән тәскинлик верә биләр. О охујурду: «Мән Сәнин мәһәббәтиндә шад олуб севинәҹәјәм, чүнки мәзлум һалымы ҝөрмүсән, чәкдијим әзабы билмисән» (Мәз. 31:7). Лакин Јеһова нәинки бизим гәм-кәдәримизи ҝөрүр, О тәсәлли вермәклә вә руһландырмагла бизә бунлара таб ҝәтирмәјә көмәк едир. Буну етмәјин үсулларындан бири мәсиһчи ҝөрүшләридир.
15. Асәфин нүмунәсиндән нә өјрәнирик?
15 Јығынҹаг ҝөрүшләриндә иштирак етмәјин нә гәдәр фајдалы олдуғуну мәзмурчу Асәфин нүмунәсиндән ҝөрүрүк. Әтрафда баш верән әдаләтсизликләрин үзәриндә дүшүндүјү үчүн онда Аллаһа хидмәт етмәјин дәјәрли олдуғуна даир шүбһәләр јаранмаға башлады. Асәф руһдан дүшдү. О, өз һиссләрини белә ифадә етди: «О вахт көнлүм зәһәрләнмишди, гәлбим дәлик-дешик олмушду». Нәтиҹәдә, о, аз галмышды ки, Аллаһа хидмәти дајандырсын. Бәс она дүшүнҹә тәрзини дәјишмәјә нә көмәк етмишди? О дејир: «Аллаһын Мүгәддәс мәканына [ҝирдим]». Бурада, Јеһоваја ибадәт едән һәмиманлылары арасында о, јенә дә дүзҝүн дүшүнмәјә башлады. О дәрк етди ки, писләрин газандығы уғур мүвәггәтидир вә Јеһова мүтләг әдаләти бәрпа едәҹәк (Мәз. 73:2, 13—22). Буну бизим барәмиздә дә демәк олар. Шејтан дүнјасында үзләшдијимиз әдаләтсизликләрин јаратдығы стресс бизи дә әлдән сала биләр. Гардашларымызла ҝөрүшмәк бизә тәравәт ҝәтирир вә Јеһоваја севинҹлә хидмәтимизи давам етдирмәјә көмәк едир.
16. Ханнанын нүмунәсиндән неҹә јарарлана биләрик?
16 Бәс јығынҹагдакы һансыса бир хошаҝәлмәз вәзијјәт уҹбатындан ҝөрүшләрдә иштирак етмәк сәнин үчүн чәтиндирсә, онда неҹә? Ола билсин ки, сән һансыса мәсулијјәтдән имтина етмәли олмусан вә буна ҝөрә утанырсан, јахуд да һәмиманлынла аранда фикир ајрылығы јараныб. Әҝәр сән бу вәзијјәтләрдән һәр һансы бири илә үзләшмисәнсә, Ханнанын нүмунәси сәнә көмәк едә биләр. (1 Шамуел 1:4—8 ајәләрини оху.) Ханнанын ҝүнүсү Пенинна ону өзүнә рәгиб һесаб едирди вә бунун уҹбатындан аиләдә јаранан вәзијјәт Ханнанын ҝүнүнү гара етмишди. Һәр ил бүтүн аилә Шилоја Јеһоваја гурбан ҝәтирмәк үчүн ҝедәндә бу, онун үчүн даһа да дөзүлмәз олурду. Дәрд-гәмдән Ханна ағлајырды вә онун боғазындан чөрәк кечмирди. Анҹаг о јол вермирди ки, мөвҹуд вәзијјәт ону Јеһоваја ибадәт едилән јерә ҝетмәкдән сахласын. Ханнанын садиглији Јеһованын ҝөзүндән јајынмады вә Јеһова ону хејир-дуаландырды (1 Шам. 1:11, 20).
17, 18. а) Јығынҹаг ҝөрүшләриндә биз неҹә руһланырыг? б) Хилас олмағымыз үчүн Јеһованын тәгдим етдији зәриф гајғы барәдә сән нә дүшүнүрсән?
17 Бу ҝүн мәсиһчиләр дә Ханнанын нүмунәсини тәглид етмәлидирләр: биз јығынҹаглары бурахмамалыјыг. Өз тәҹрүбәмиздән ҝөрдүјүмүз кими, јығынҹаг руһланмағымызда ваҹиб рол ојнајыр (Ибр. 10:24, 25). Јығынҹагда баҹы-гардашларымызын мәһәббәтини һисс едирик вә бу, бизи руһландырыр. Мәрузәдә сөјләнилән һәр һансыса бир фикир вә ја киминсә вердији шәрһ үрәјимизи исиндирә биләр. Ҝөрүшдән әввәл вә ја сонра һәмиманлыларымызла үнсијјәт едәндә үрәјимизи кимәсә бошалда вә ја тәсәлливериҹи сөз ешидә биләрик (Сүл. мәс. 15:23; 17:17). Јеһоваја бирҝә һәмд нәғмәләри охујанда үрәјимиз севинҹлә долур. Хүсусилә дә «дахилән чох нараһат» оланда, јәни һансыса фикирләр бизә раһатлыг вермәјәндә јығынҹагдан алдығымыз тәсәллијә еһтијаҹ дујуруг. Бурада Јеһова бизә тәсәлли вермәклә јанашы, Она садиг галмаг гәтијјәтимизи дә мөһкәмләндирир (Мәз. 94:18, 19).
18 Нөвбәти сөзләри дејән Асәф кими, биз дә Аллаһын зәриф гајғысы сајәсиндә өзүмүзү тәһлүкәсизликдә һисс едирик: «Мәним сағ әлимдән тутмусан. Нәсиһәтинлә мәнә јол ҝөстәрирсән» (Мәз. 73:23, 24). Јеһоваја неҹә дә миннәтдарыг ки, О, бизи хилас етмәк үчүн горујур!
[28–ҹи сәһифәдәки шәкил]
Јеһова сәни дә ҹәлб едиб
[30–ҹу сәһифәдәки шәкил]
Аллаһын мәсләһәтләрини тәтбиг етмәк бизим үчүн мүдафиәдир
[31–ҹи сәһифәдәки шәкил]
Алдығымыз тәсәлли бизә таб ҝәтирмәјә көмәк едир