Валидејнләр ушагларына ҹинси тәрбијә вермәлидирләрми?

▪ Ушаглары тәһлүкәли хәстәлијә тутулмасын дејә валидејнләр әлиндән ҝәләни едирләр. Онлары әхлагсыз дүшүнҹә тәрзиндән горумаг үчүн дә валидејнләр ејни сәји ҝөстәрмәлидирләр. Буну етмәјин үсулларындан бири ушаға мүнасиб ҹинси тәрбијә вермәкдир (Сүлејманын мәсәлләри 5:3—23). Ушаглар тез-тез телевизија, Интернет, китаблар вә мобил телефон васитәсилә јајылан әхлагсыз материалларын тәсиринә мәруз галдыглары үчүн бу ҹүр тәрбијә бөјүк әһәмијјәт кәсб едир.

«Бу ҝүн проблем онда дејил ки, ушаглар ҹинси мүнасибәтләр һаггында нә исә өјрәнирләр, — дејә профессор вә мүәллиф Дајан Левин изаһ едир. — Проблем онларын бу барәдә нә, нечә јашларында вә кимдән өјрәнмәләриндәдир. Реклам, филмләр, шоу-бизнес вә саирәнин ҝүҹлү тәсири алтында ушагларда ҹинси мүнасибәтләр барәдә тәһриф едилмиш фикир формалашыр».

Валидејнләр ушагларыны бу дүнјада һөкм сүрән позғун вә әхлагсыз дүшүнҹә тәрзиндән горумалыдырлар (Сүлејманын мәсәлләри 5:1; Ефеслиләрә 6:4). Ушаглар бәдән гурулушлары, она неҹә гуллуг ҝөстәрмәли олдугларыны вә өзләрини әхлагсыз инсанлардан неҹә горумалы олдуглары барәдә өјрәнмәлидирләр. Гыз ушаглары, һәлә ҹинси јетишкәнлијин илк әламәтләриндән өнҹә, бәдәнләриндә олан дәјишикликләри вә буна сәбәб олан амилләри билмәли, еләҹә дә ајбашынын нә үчүн вә неҹә олдуғуну баша дүшмәлидирләр. Ејнилә оғлан ушаглары да әввәлҹәдән поллјусија, јәни јухуда икән, өзүндән асылы олмадан (гејри–иради) тохум мајесинин (сперманын) ахмасы барәдә хәбәрдар олмалыдырлар. Валидејнләр ушагларыны кичик јашларында бәдән үзвләринин адларыны өјрәдә биләрләр. Гајғыкеш валидејнләр ушагларына нөвбәти үч гајданы өјрәтмәлидирләр: 1) бәдәнин бәзи үзвләри мәһрәмдир, 2) онлар һаггында пис шәкилдә данышмаг олмаз, 3) онлара һеч ким тохунмамалы вә онлары һеч кимә ҝөстәрмәк олмаз. Гадынын неҹә һамилә галдығыны бөјүјән ушагларына изаһ етмәк үчүн валидејнләр мүнасиб вахт сечмәлидирләрa.

Бәс валидејнләр бу һагда нә вахт данышмалыдырлар? Бир чохларынын дүшүндүјүндән дә тез. Гызларда ајбашы 10 јашында, һәтта бундан да әввәл башлаја биләр. Оғланларда илк поллјусија артыг 11—12 јашларында ола биләр. Әҝәр ушаглар бәдәнләриндә нәјин баш вердијини баша дүшмәсәләр, бу шејләр онлары чох нараһат едә биләр. Ушаглары габагҹадан маарифләндирмәк лазымдыр ки, бәдәнләриндә баш верән бу дәјишикликләрин нормал олдуғуну билсинләр. Бу дөвр ушаглара Мүгәддәс Китабын әхлаг нормаларына әмәл етмәјин дәјәрини вә ваҹиблијини баша салмағын ән мүнасиб вахтыдыр. Чүнки белә әхлаг нормалары, демәк олар ки, дүнјанын һеч бир ҹинси тәрбијә програмларында хатырланмыр (Сүлејманын мәсәлләри 6:27—35).

[Һашијә]