Бир-биринизи үрәкдән бағышлајын
«Бир-биринизә гаршы һәмишә сәбирли олун,.. бир-биринизи үрәкдән бағышлајын» (КОЛОС. 3:13).
НЕҸӘ ҸАВАБ ВЕРӘРДИНИЗ?
Нәјә ҝөрә бағышламаға һазыр олмалыјыг?
Бағышламағы баҹармағын ваҹиблијинә даир Иса һансы нүмунәни чәкди?
Башгаларыны бағышламаға һазыр олмагла һансы хејир-дуалар әлдә едәҹәјик?
1, 2. Бағышламаға һазыр олуб-олмадығымызы нәјә ҝөрә јохламалыјыг?
МҮГӘДДӘС КИТАБДАН Јеһованын ҝүнаһа олан нөгтеји-нәзәри, һәмчинин инсан ҝүнаһа јол верән заман Онун неҹә мүнасибәт ҝөстәрмәси барәдә өјрәнирик. Орадан бағышламаға даир дә чох шеј өјрәнирик. Әввәлки мәгаләдә Јеһованын Давуду вә Менашшени нә үчүн бағышладығыны арашдырдыг. Онлар әмәлләринә ҝөрә чох пешман олдулар, Јеһованын гаршысында ҝүнаһларыны бојунларына алдылар вә пис әмәлләриндән әл чәкәрәк сәмими гәлбдән төвбә етдиләр. Јеһова да, өз нөвбәсиндә, онлара јенидән лүтф ҝөстәрди.
2 Ҝәлин инди бизим башгаларыны бағышламаға һазыр олуб-олмадығымызы нәзәрдән кечирәк. Әҝәр әзизләриндән кимсә Менашшенин ҝүнаһсыз гурбаны олсајды, сән она гаршы нә һисс едәрдин? Ону бағышлаја биләрдин? Бу суал бизим ҝүнләрдә дә чох актуалдыр, чүнки биз ганунсуз, зоракы вә худбин бир дүнјада јашајырыг. Бәс нәјә ҝөрә мәсиһчиләр бағышламаг хүсусијјәтини инкишаф етдирмәлидирләр? Тәһгирә вә ја һагсызлыға мәруз галанда, сәнә тәмкинли вә бағышламаға һазыр олмаға, еләҹә дә Јеһованын истәдији кими реаксија ҝөстәрмәјә нә көмәк едә биләр?
НӘЈӘ ҜӨРӘ БАҒЫШЛАМАҒЫ БАҸАРМАЛЫЈЫГ?
3-5. а) Бағышламағын ваҹиблијини вурғуламаг үчүн Иса һансы нүмунәни чәкмишди? б) Исанын Матта 18:21—35 ајәләриндәки нүмунәсинин мәғзи нәдән ибарәтдир?
3 Аилә үзвләримизлә, достларымызла, диҝәр инсанларла вә Јеһова илә сүлһ мүнасибәтләримизи горујуб сахламаг истәјириксә, мәсиһчи јығынҹағынын үзвү олуб-олмамасындан асылы олмајараг, хәтримизә дәјән инсанлары бағышламағы баҹармаг мүтләгдир. Мүгәддәс Јазылар ҝөстәрир ки, башгалары дәфәләрлә хәтримизә дәјсә дә, бир мәсиһчи кими, биздән онлары бағышламаг тәләб олунур. Бу тәләбин ағлабатан олдуғуну Иса чохлу борҹу олан нөкәр һагда нүмунә чәкмәклә ҝөстәрмишди.
4 Бу нөкәрин ағасына бир ишчинин 60 милјон ҝүнлүк әмәк һаггына бәрабәр борҹу вар иди; буна бахмајараг, ағасы онун борҹуну ләғв етди. Һәмин нөкәр ағасынын јанындан чыхдыгдан сонра она ҹәми 100 ҝүнлүк әмәк һаггына бәрабәр борҹу олан диҝәр нөкәр јолдашыны тапыб пулуну гајтармағы тәләб етди. Борҹу олан нөкәр јолдашына јалварды ки, она вахт версин, анҹаг күлли-мигдарда борҹу бағышланан нөкәр ону һәбсханаја атды. Нөкәрин бу давранышы ағасыны бәрк гәзәбләндирди. «Мәҝәр мән сәнә рәһм етдијим кими, сән дә нөкәр јолдашына рәһм етмәли дејилдин?» — дејә ағасы сорушду. «О, [бағышламајан] нөкәри һәбсхана рәисләринә верди ки, борҹуну сон гәпијинә кими өдәјәнә гәдәр һәбсханада галсын» (Мат. 18:21—34).
5 Исанын бу нүмунәсинин мәғзи нәдән ибарәт иди? О, сөзләринә белә јекун вурду: «Буну билин ки, әҝәр һәр бириниз гардашынызы үрәкдән бағышламасаныз, сәмави Атам да сизинлә беләҹә давранаҹаг» (Мат. 18:35). Исанын нә демәк истәдији ајдындыр. Биз гејри-камил олдуғумуз үчүн тез-тез сәһвләрә јол веририк. Буна ҝөрә дә Јеһованын нормаларына там шәкилдә риајәт етмәјимиз гејри-мүмкүндүр. Анҹаг О, бизи бағышламаға, башга сөзлә десәк, әввәлки ҝүнаһларымызы силиб атмаға һазырдыр. Бу сәбәбдән Јеһова илә дост олмаг истәјән кәсләр башгаларынын мәнфи ҹәһәтләрини, гејри-камиллијини бағышламаға борҹлудурлар. Һәмчинин Иса Дағүстү тәблиғиндә демишди ки, «әҝәр инсанларын тәгсирләрини бағышлајырсынызса, сәмави Атаныз да сизи бағышлајаҹаг. Лакин онларын тәгсирләрини бағышламырсынызса, Атаныз да сизин тәгсирләринизи бағышламајаҹаг» (Мат. 6:14, 15).
6. Нәјә ҝөрә башгаларыны бағышламаг һәмишә асан олмур?
6 «Буну демәк асандыр», — дејә фикирләшә биләрсән. Чүнки башгалары гәлбимизи гыранда биз чох вахт емосијалара гапылырыг. Бу заман инсан әсәбиләшә биләр вә она хәјанәт едилдијини дүшүнәрәк мәсәләнин әдаләтлә һәлл олунмасыны истәјә, һәтта хәтринә дәјән инсандан гисас алмаг фикринә дүшә биләр. Үстәлик, бәзиләри инҹидикләри инсаны һеч вахт бағышлаја билмәјәҹәкләрини дүшүнүрләр. Ола билсин, сән дә ејни һиссләри кечирирсән. Анҹаг Јеһова башгаларыны бағышламағы тәләб етдији үчүн сән нә етмәлисән?
ҺИССЛӘРИНИ ТӘҺЛИЛ ЕТ
7, 8. Кимсә сәнинлә кобуд рәфтар едәндә мәјуслуға гапылмамағына нә көмәк едә биләр?
7 Бәзән кимсә хәтримизә дәјә биләр. Јахуд да бизә елә ҝәлә биләр ки, хәтримизә дәјибләр. Белә олан һалда ҝүҹлү мәјуслуг һиссинә гапыла биләрик. Ҝәлин ҝөрәк бир ҝәнҹ бир дәфә чох әсәбиләшән заман баш верәнләри неҹә изаһ едир: «Бир дәфә... елә һирсләнмишдим ки, евдән чыхыб ҝетдим вә сөз вердим ки, һеч вахт гајытмајаҹағам. Ҝөзәл јај ҝүнү иди. Тәк-тәнһа дар бир ҹығырла хејли јол ҝетдим. Ора чох сакит вә ҝөзохшајан иди. Бир нечә саатдан сонра һирсим сојуду вә кор-пешман евә гајытдым». Бу нүмунәдән ҝөрүндүјү кими, әҝәр өзүнә сакитләшмәк үчүн вахт версән, сонрадан пешман олаҹағын тәрздә реаксија ҝөстәрмәк әвәзинә, вәзијјәти һәртәрәфли ҝөрә биләҹәксән (Мәз. 4:4; Сүл. мәс. 14:29; Јаг. 1:19, 20).
8 Бәс әҝәр мәнфи һиссләр вахт кечдикдән сонра да сәндән әл чәкмирсә, онда неҹә? Бу ҹүр һиссләри нәјә ҝөрә кечирдијини мүәјјән етмәјә чалыш. Бәлкә, сәнә гаршы һагсызлыг вә кобудлуг едибләр? Јохса елә дүшүнүрсән ки, һәмин инсан сәнә биләрәкдән зәрәр јетирмәк истәјиб? Онун һәрәкәти, һәгигәтәнми, олдугҹа писдир? Белә реаксија ҝөстәрмәјинин сәбәбини тәһлил едиб баша дүшдүкдән сонра бу кими һиссләрин өһдәсиндән ҝәлмәкдә сәнә һансы Мүгәддәс Китаб принсипләринин көмәк едәҹәјини мүәјјән едә биләҹәксән. (Сүлејманын мәсәлләри 15:28; 17:27 ајәләрини оху.) Бу ҹүр ҝөтүр-гој етмәјин сајәсиндә мәсәләјә даһа реал бахаҹаг вә бағышламағы баҹараҹагсан. Буну етмәк чәтин олса да, Мүгәддәс Китаб сәнә үрәјинин дүшүнҹә вә нијјәтләрини үзә чыхармаға, еләҹә дә бағышламаг саһәсиндә Јеһованы тәглид етмәјә көмәк едәҹәк (Ибр. 4:12).
ИНҸИМӘЛИСӘНМИ?
9, 10. а) Кимсә хәтринә дәјәндә неҹә реаксија ҝөстәрмәлисән? б) Мүсбәт әһвал-руһијјәдә олмағын вә бағышламағы баҹармағын сајәсиндә нә әлдә едәҹәксән?
9 Инсаны гәзәбләндирән бир чох һаллар ола биләр. Туталым, сән сүкан архасындасан вә башга бир машын аз галыр сәнин машынынла тоггушсун. Бу вахт сән нә едәҹәксән? Бәзиләри өзләриндән чыхараг диҝәр сүрүҹүләрә һүҹум едирләр. Анҹаг сән, бир мәсиһчи кими, белә етмәк истәмәздин.
10 Һадисәјә мүнасибәт билдирмәздән әввәл дүшүнмәк даһа јахшы оларды. Ола билсин, баш верәнләрдә гисмән сәнин дә сәһвин олуб, чүнки һәмин вахт бир аз далғын олмусан. Јахуд да, диҝәр машында техники насазлыг олуб. Әҝәр башгаларынын һәр һансы сәһвә нә үчүн јол вердикләрини баша дүшмәјә чалышсаг, јол верилән сәһвләрин бүтүн сәбәбләрини билмәдијимизи анласаг, еләҹә дә бағышламаға һазыр олсаг, онда башгаларынын сәһвләринә ҝөрә бир о гәдәр әсәбиләшмәјәҹәк вә мәјус олмајаҹағыг. Биз күсәјән, дәјмәдүшәр олмамалыјыг. Неҹә ки, Ваиз 7:9 ајәсиндә дејилир: «Гәзәбләнмәјә тәләсмә, чүнки гәзәб ағылсызларын үрәјиндә јува салар». Чох вахт бизә елә ҝәлә биләр ки, башгалары гәсдән бизим хәтримизә дәјмәјә чалышырлар. Анҹаг унутма ки, инсанлар садәҹә гејри-камил олдугларындан сәһвләрә јол верирләр. Јахуд, ола билсин, сән нәјисә дүз баша дүшмәмисән. Буна ҝөрә дә хош олмајан һәрәкәтә вә ја сөзә објектив јанашмаға чалыш вә мәһәббәтдән ирәли ҝәләрәк бағышламаға һазыр ол. Белә етмәклә сән мәмнунлуг әлдә едәҹәксән. (1 Петер 4:8 ајәсини оху.)
«ДИЛӘДИЈИНИЗ СҮЛҺ СИЗӘ ГАЈЫДАҸАГ»
11. Инсанларын чатдырдығымыз хәбәрә неҹә мүнасибәт ҝөстәрмәләриндән асылы олмајараг, биз нә етмәлијик?
11 Хидмәтдә кимсә сәнә гаршы кобудлуг едәрсә, өзүнә неҹә һаким ола биләрсән? Иса 70 шаҝирдини хидмәтә ҝөндәрәндә дахил олдуглары һәр евә сүлһ арзуламағы тапшырараг демишди: «О евдә сүлһсевәр бир адам јохдурса, диләдијиниз сүлһ сизә гајыдаҹаг; әҝәр варса, онун үзәриндә галаҹаг» (Лука 10:1, 5, 6). Чатдырдығымыз хәбәр инсанлара фајда ҝәтирдијиндән онлар бу хәбәрә һај верәндә биз чох севинирик. Лакин бәзән инсанлар һеч дә сүлһсевәр олмурлар. Бәс онда нә едәҹәјик? Иса демишди ки, белә олан һалда да сүлһү горујуб сахламалыјыг. Ев саһибинин бизимлә неҹә давранмасындан асылы олмајараг, биз дахили сүлһү горумағы баҹармалыјыг. Әҝәр гаршымыздакы инсанын кобуд рәфтарына ҝөрә руһдан дүшсәк, сүлһү горујуб сахлаја билмәјәҹәјик.
12. Павелин Ефеслиләрә 4:31, 32 ајәләриндәки сөзләринә әсасән, биз нә етмәлијик?
12 Тәкҹә мәсиһчи хидмәтиндә дејил, һәр бир вәзијјәтдә сүлһү горујуб сахламаға чалыш. Әлбәттә, башгаларыны бағышламаг онларын јанлыш һәрәкәтләрини бәјәндијини вә ја башгаларына зәрәр вердијини ҝөрмәздән ҝәлдијини ҝөстәрмир. Әксинә, белә сәһвләрин сәни руһдан салмасына јол вермәдијини вә үрәјиндә сүлһү горудуғуну ҝөстәрир. Бәзи инсанлар мәнфи фикирләрин вә башгаларынын һәрәкәтләринин онлары севинҹдән мәһрум етмәсинә јол верирләр. Сән исә бу кими мәнфи һиссләрин сәни идарә етмәсинә јол вермә. Унутма ки, гәзәбләнмәјә сон гојмасан, хошбәхт ола билмәјәҹәксән. Буна ҝөрә дә, бағышламағы өјрән! (Ефеслиләрә 4:31, 32 ајәләрини оху.)
ЈЕҺОВАНЫ РАЗЫ САЛАН ТӘРЗДӘ РЕАКСИЈА ҜӨСТӘР
13. а) Һансы мәнада мәсиһчи дүшмәнин башына «көз» јығыр? б) Кимсә бизимлә пис рәфтар едәндә мүлајим ҹаваб вермәјин нәтиҹәси неҹә ола биләр?
13 Мәсиһчи олмајан бир нәфәр сәнинлә пис рәфтар едәндә Мүгәддәс Китаб нормаларына ујғун давранараг она ҝөзәл шаһидлик верә биләрсән. Һәвари Павел јазырды: «“Дүшмәнин аҹдырса, ону једиздир, сусуздурса, она су вер, беләҹә, онун башына көз јығаҹагсан”. Пислијә мәғлуб олма, пислијә јахшылыгла галиб ҝәл» (Ром. 12:20, 21). Кимсә сәни аҹыгландыран заман нәзакәтли олмагла һәтта сәнинлә сәрт рәфтар едән адамын белә мүнасибәтини јумшалда вә јахшы кејфијјәтләрини үзә чыхара биләрсән. Хәтринә дәјән адама анлајыш, шәфгәт, еләҹә дә мәрһәмәт ҝөстәрмәклә һәмин адама Мүгәддәс Китаб һәгигәтләрини өјрәнмәјә көмәк едә биләрсән. Һәр неҹә олса да, мүлајим ҹаваб инсаны сәнин бу ҹүр јахшы рәфтарын үзәриндә дүшүнмәјә вадар едәҹәк (1 Пет. 2:12; 3:16).
14. Инсан сәнинлә нә гәдәр пис давранса да, нәјә ҝөрә бағышламаға һазыр олмалысан?
14 Бәзи инсанларла достлуг мүнасибәти гурмағымыз һеч дә дүзҝүн олмазды. Бу, бир заманлар јығынҹағын үзвү олан, анҹаг сонрадан ҝүнаһа јол вердији вә төвбә етмәдији үчүн јығынҹагдан кәнар едилән кәсләрдир. Әҝәр белә бир инсан сәнә зәрәр јетирибсә, ону бағышламаг чох чәтин ола биләр. Һәтта о, төвбә етмиш олса белә, онун вурдуғу емосионал јаранын сағалмасы вахт ала биләр. Белә вәзијјәтдә төвбә етмиш ҝүнаһкары бағышламаг үчүн Јеһовадан көмәк диләјә биләрсән. Бу ваҹибдир, чүнки сән һеч вахт башгасынын үрәјиндәкиләри билә билмәзсән. Јеһова исә билир. Јеһова инсанын үрәјинин дәринлијиндәки һиссләри арашдырыр вә ҝүнаһ ишләдәнләрә тәһәммүл едир (Мәз. 7:9; Сүл. мәс. 17:3). Елә бу сәбәбдән Мүгәддәс Јазыларда дејилир: «Һеч кимә пислик әвәзинә пислик етмәјин. Һамынын ҝөзүндә јахшы сајылан ишләри ҝөрүн. Имкан дахилиндә, әлиниздән ҝәлән гәдәр һамы илә сүлһдә олмаға чалышын. Әзизләрим, өз гисасынызы алмајын, лакин Аллаһын гәзәби үчүн јер гојун. Чүнки јазылыб: “Јеһова белә дејир: “Гисас Мәнимдир, әвәзини Өзүм верәҹәјәм”» (Ром. 12:17—19). Сән башгасыны әдаләтлә мүһакимә едә биләрсән? Хејр (Мат. 7:1, 2). Анҹаг Јеһованын там әдаләтлә һөкм чыхараҹағына әмин ола биләрсән.
15. Бизимлә пис рәфтар едән инсана гаршы гәзәбләнмәмәјә нә көмәк едәр?
15 Әҝәр сән әдаләтсизлијин гурбаны олдуғуну дүшүнүрсәнсә вә төвбә етмиш ҝүнаһкары бағышлаја билмирсәнсә, онда јахшы оларды ки, онун да гурбан олдуғуну унутмајасан. Сәнин кими, о да мирас алдығы гејри-камилликдән әзијјәт чәкир (Ром. 3:23). Јеһова бүтүн ҝүнаһлы бәшәријјәтә мәрһәмәт ҝөстәрдији үчүн биз дә хәтримизә дәјән адам үчүн дуа етмәлијик. Јәгин ки, белә олан һалда һаггында дуа етдијимиз адама гәзәбләнмәјимиз јерсиз оларды. Исанын: «Дүшмәнләринизи һәмишә севин вә сизи тәгиб едәнләр үчүн һәмишә дуа един», — сөзләриндән ајдын ҝөрүнүр ки, бизимлә пис рәфтар етмәләриндән асылы олмајараг, башгаларына гаршы кин сахламамалыјыг (Мат. 5:44).
16, 17. Мәсиһчи ағсаггалларын төвбә етмиш ҝүнаһкары бағышламасына неҹә јанашмалысан вә нәјә ҝөрә?
16 Јеһова Аллаһ мәсиһчи ағсаггаллара јығынҹагда ганун позунтусуна јол верәнләрлә бағлы мәсәләләри һәлл етмәји һәвалә едиб. Бу гардашлар, Онун кими, һәр бир вәзијјәтлә бағлы бүтүн тәфсилатлары билмәсәләр дә, онлар мүгәддәс руһун рәһбәрлији алтында Аллаһын Кәламында јазылмыш ҝөстәришләрә ујғун гәрарлар чыхармаға чалышырлар. Буна ҝөрә дә әмин ола биләрик ки, онларын Јеһовадан дуада көмәк истәдикдән сонра бу кими мәсәләләрлә бағлы вердикләри гәрарлар Аллаһын нөгтеји-нәзәрини әкс етдирир (Мат. 18:18).
17 Белә вәзијјәтләрдә биздән садиглик тәләб олунур. Сән төвбә етмиш ҝүнаһкары бағышлајыб, она мәһәббәт ҝөстәрәҹәксәнми? (2 Кор. 2:5—8). Әҝәр сән вә јахуд аилә үзвләриндән кимсә онун јанлыш һәрәкәтинин гурбаны олубса, буну етмәк хүсусилә чәтин ола биләр. Лакин Јеһоваја ҝүвәнмәклә вә јығынҹагдакы мәсәләләри бу јолла һәлл етмәклә мүдрик давранмыш олаҹагсан. Бунунла башгаларыны бағышламаға һазыр олдуғуну ҝөстәрәҹәксән (Сүл. мәс. 3:5, 6).
18. Бағышламағы баҹарсан һансы фајданы әлдә едәҹәксән?
18 Психологлар дејирләр ки, инсанын бағышламағы баҹармасы онун хејринәдир. Бу, сағламлыға мәнфи тәсир едән ҝәрҝинликдән вә нараһатчылыгдан азад едир, сағламлыға мүсбәт тәсир ҝөстәрир вә мүнасибәтләри мөһкәмләндирир. Бундан фәргли олараг, инсан бағышламајанда бу, она баһа баша ҝәлир — онда сәһһәтинин зәифләмәсинә вә стрессин јаранмасына сәбәб олур, башгалары илә мүнасибәтләри позулур вә үнсијјәт етмәкдә чәтинлик чәкир. Сәмави Атамыз Јеһова илә јахшы мүнасибәтләримизин олмасыны истәјириксә, бағышламағы баҹармаг олдугҹа ваҹибдир. (Колослулара 3:12—14 ајәләрини оху.)
[27–ҹи сәһифәдәки шәкил]
Бу нүмунәни чәкмәклә Иса нәји вурғулады?
[30–ҹу сәһифәдәки шәкил]
Бағышламаға һазыр олмаг мәсиһчи үчүн тәләбдир