«О... дириләрин Аллаһыдыр»

Өлүм Аллаһдан ҝүҹлүдүр? Әлбәттә јох! Нә өлүм, нә дә башга бир шеј «Күлли-Ихтијар Аллаһ» олан Јеһовадан ҝүҹлү ола билмәз (1 Коринфлиләрә 15:26; Чыхыш 6:3). Аллаһ өлүмү арадан галдырмаг игтидарындадыр вә сөз верир ки, јер үзү Ҹәннәт оланда өлүләри дирилтмәклә буну едәҹәкa. Онун вәди нә дәрәҹәдә етибарлыдыр? Иса Мәсиһин бунунла әлагәдар дедији сөзләри биздә үмид јарадыр. (Матта 22:31, 32 ајәләрини охујун.)

Дирилмәјә инанмајан садукејләрлә (дин хадимләри) сөһбәтиндә Иса пејғәмбәр демишди: «О ки галды өлүләрин дирилмәјинә, мәҝәр Аллаһын сизә: “Мән Ибраһимин Аллаһы, Исһагын Аллаһы вә Јагубун Аллаһыјам”, — дедијини охумамысыныз? Бәли, О, өлүләрин јох, дириләрин Аллаһыдыр». Бурада Иса б. е. ә. 1514-ҹү илдә Муса пејғәмбәрин Аллаһла јанан колун јанындакы сөһбәтинә истинад едир (Чыхыш 3:1—6). Иса Мәсиһин сөзләринә әсасән, Јеһова Аллаһын Мусаја дедији: «Мән Ибраһимин Аллаһы, Исһагын Аллаһы вә Јагубун Аллаһыјам», — сөзләри дирилмә һагда вәдин һөкмән јеринә јетәҹәјинә дәлаләт едир. Нәјә ҝөрә белә нәтиҹәјә ҝәлмәк олар?

Контекстә нәзәр салаг. Јеһова Муса илә данышдығы заман Аллаһын гуллары олан Ибраһим, Исһаг вә Јагуб артыг чохдан вәфат етмишдиләр. Ибраһим 329, Исһаг 224, Јагуб исә 197 ил иди ки, һәјатда јох иди. Бунунла белә, Јеһова Аллаһ Чыхыш 3:6 ајәсиндәки сөзләри кечмиш јох, санки, онларын үчү дә һәлә сағмыш кими, индики заманда демишди. Нәјә ҝөрә?

Иса пејғәмбәр изаһ етмишди: «О, [Јеһова] өлүләрин јох, дириләрин Аллаһыдыр». Ҝәлин бир анлыг бу сөзләрин мәнасы үзәриндә дүшүнәк. Әҝәр өлүләрин дирилмәси олмаса, Ибраһим, Исһаг вә Јагуб һеч вахт өлүм пәнҹәсиндән азад ола билмәзләр. Белә һалда Јеһова дириләрин јох, өлүләрин Аллаһы оларды. Онда белә чыхаҹагды ки, өлүм Аллаһдан ҝүҹлүдүр вә О, садиг хидмәтчиләрини өлүм әсарәтиндән азад етмәкдә аҹиздир.

Белә исә, Ибраһим, Исһаг, Јагуб пејғәмбәр кими өлән садиг хидмәтчиләр барәдә һансы гәнаәтә ҝәлирик? Иса Мәсиһ бу ҹүр тәсирли сөзләр демишди: «Онун үчүн онларын һамысы сағдыр» (Лука 20:38). Һәгигәтән дә, Јеһованын садиг хидмәтчиләрини дирилтмәк нијјәти о гәдәр гәтидир ки, онлары өлмүш һесаб етмир (Ромалылара 4:16, 17). Јеһова дирилмә ҝүнүнә кими өлән бүтүн садиг хидмәтчиләрини мисилсиз јаддашында сахлајаҹаг.

Мәҝәр итирдијиниз әзизләринизә говушаҹағынызы билмәк сизи севиндирмир? Һеч вахт унутмајын ки, Аллаһ өлүмдән гат-гат ҝүҹлүдүр. Јеһоваја өлүләри дирилтмәк нијјәтини һәјата кечирмәјә һеч нә әнҝәл ола билмәз. Нијә дә дирилмә вә буну вәд едән Аллаһ һагда даһа чох өјрәнмәјәсиниз? Әмин олун ки, онда сиз дириләрин Аллаһы олан Јеһоваја даһа јахын олаҹагсыныз.