Муса пејғәмбәр — иман саһиби
ИМАН НӘДИР?
Аллаһын Кәламында дејилдији кими, иман етибарлы сүбутлара әсасланмыш мөһкәм инамдыр. Аллаһа иман ҝәтирән инсан Онун бүтүн вәдләринин һәјата кечәҹәјинә там әминдир.
МУСАНЫН ИМАН САҺИБИ ОЛДУҒУ НӘДӘН БӘЛЛИ ИДИ?
Муса Худавәндин вәдләринә там етибар етдијини сүрдүјү һәјат тәрзи илә ҝөстәрирди (Јарадылыш 22:15—18). Онун Мисирдә ҹаһ-ҹалал ичиндә фираван јашамаг имканы вар иди, лакин «о, ҝүнаһдан мүвәггәти һәзз алмагданса, Аллаһын халгы илә бирликдә әзијјәтә гатлашмағы үстүн тутду» (Ибраниләрә 11:25). Демәк олармы ки, о, бу гәрары дүшүнмәдән верди вә сонрадан пешман олду? Әсла, чүнки Мүгәддәс Китабда Муса пејғәмбәр һагда дејилир ки, о, «Ҝөзәҝөрүнмәз Аллаһы ҝөрүрмүш кими мәтин иди» (Ибраниләрә 11:27). О, һеч вахт имандан ирәли ҝәләрәк вердији гәрарлара ҝөрә пешман олмајыб.
Муса пејғәмбәр башгаларынын да иманыны мөһкәмләндирирди. Бир нүмунәјә нәзәр салаг. Исраиллиләр Мисирдән чыхыб Гырмызы дәнизин саһилләринә ҝәлиб чатмышдылар. Башларыны галдырыб фиронун бөјүк ордусунун үзәрләринә ҝәлдијини ҝөрәндә онлары дәһшәт бүрүдү. Ҹанына өлүм горхусу дүшмүш халг Мусаја вә Аллаһа үз тутду. Бәс пејғәмбәр нә етди?
Аллаһын исраиллиләрә гуртулушу Гырмызы дәнизи аралајараг верәҹәји Муса пејғәмбәрин һеч ағлына да ҝәлмәзди. Амма о, Күлли-Ихтијарын Өз халгыны горумаг үчүн мүтләг бир тәдбир ҝөрәҹәјинә зәррә гәдәр дә шүбһә етмирди. Пејғәмбәр истәјирди ки, онда олан әминлик сојдашларында да олсун. Мүгәддәс Јазылардан онун бу сөзләрини охујуруг: «Горхмајын! Дурун, Рәббин бу ҝүн сизи неҹә хилас едәҹәјинә бахын» (Чыхыш 14:13). Бәс исраиллиләрин иманы мөһкәмләндими? Бәли, чүнки Аллаһын Кәламында дејилир ки, тәкҹә пејғәмбәр јох, бүтүн исраиллиләр «иман сајәсиндә, Гырмызы дәнизи санки гурудан кечән кими кечдиләр» (Ибраниләрә 11:29). Бу ҹүр иманын бәһрәсини јалныз Муса пејғәмбәр јох, онун кими Аллаһа бел бағлајан бүтүн халг ҝөрдү.
БИЗИМ ҮЧҮН ИБРӘТ ДӘРСИ.
Муса пејғәмбәр кими, биз дә гәрар верәркән Аллаһын вәдләринә инандығымызы ҝөстәрә биләрик. Мәсәлән, Аллаһ бизи әмин едир ки, Она ибадәт етмәји һәјатымызда һәр шејдән үстүн тутдуғумуз тәгдирдә, бизим физики тәләбатларымызын гејдинә галаҹаг (Матта 6:33). Вар-дөвләт һәрислијинә јолухмуш дүнјада чохлу пула вә мал-мүлкә саһиб олмаг арзусуну боғмаг чәтин ола биләр. Анҹаг садә һәјат тәрзи сүрмәјә гәтијјәтли олсаг вә бүтүн диггәтимизи ибадәтә јөнәлтсәк, архајын ола биләрик ки, Јеһова бизи лазым олан һәр шејлә тәмин едәҹәк. О, буна Өзү зәманәт верир: «Сәни һеч бир вәҹһлә атмарам вә һеч вахт тәрк етмәрәм» (Ибраниләрә 13:5).
Биз башгаларынын да мөһкәм иман саһиби олмаларына көмәк етмәлијик. Мисал үчүн, Аллаһ горхусу олан һикмәтли валидејнләр өвладларына көрпә јашларындан Аллаһа иман ашыламаг мәсулијјәтләрини дәрк едирләр. Ушаглар бөјүдүкҹә өјрәнмәлидирләр ки, башларынын үстүндә онлары јарадан Аллаһ вар вә бизим үчүн нәјин јахшы, нәјин пис олдуғуну О гәрарлашдырыр. Үстәлик, онлар әмин олмалыдырлар ки, Аллаһын гојдуғу гајда-ганунлара риајәт етмәк ән јахшы һәјат јолудур (Јешаја 48:17, 18). Валидејнләр өвладларына Аллаһын «варлығына вә Ону ҹидд-ҹәһдлә ахтаранлара мүкафат вердијинә [инанмаға]» көмәк етмәлидирләр. Бунунла онлар балаларына ән јахшы мирасы вермиш олурлар (Ибраниләрә 11:6).