Аллаһ бәлалара неҹә чарә гылаҹаг?

Мүгәддәс Китабда Шејтанын сәбәб олдуғу бәлалара Аллаһын вә Иса Мәсиһин неҹә чарә гылаҹағы дејилир. Мәсиһ «мәһз Иблисин ишләрини дағытмаг үчүн ҝәлмишди» (1 Јәһја 3:8). Тәмәли тамаһкарлыг, нифрәт вә пислик үзәриндә гојулан бу дүнја мәһв едиләҹәк. Иса пејғәмбәр вәд етмишди ки, «бу дүнјанын һөкмдары» олан Шејтан Иблис девриләҹәк (Јәһја 12:31). Шејтанын тәсири олмајаҹағы әдаләтли јени дүнја гурулаҹаг вә јер үзү сүлһә бүрүнәҹәк (2 Петер 3:13).

Һәјат тәрзләрини дәјишмәк истәмәјән вә пис ишләриндән әл чәкмәјән тәрс инсанларын ахыры неҹә олаҹаг? Аллаһын бу вәди үзәриндә дүшүнүн: «Әмәлисалеһләр јер үзүндә сакин олаҹаг, камилләр бурада галаҹаг. Пис адамлар бу торпагдан атылаҹаг, хаинләрин көкү бурадан гопарылаҹаг» (Сүлејманын мәсәлләри 2:21, 22). Писләрин бәшәријјәтә тәсири архада галаҹаг. Бу ҹүр сүлһ шәраитиндә итаәткар инсанлар мирас алдыглары гејри-камилликдән јаваш-јаваш азад олаҹаглар (Ромалылара 6:17, 18; 8:21).

Јени дүнјада Аллаһ пислији неҹә арадан галдыраҹаг? О, буну инсанларын әлиндән ирадә азадлығыны алыб робот һалына салараг етмәјәҹәк. Әксинә, Јеһова итаәткар инсанлара Өз јолларыны өјрәдәҹәк, еләҹә дә онлара пис һәрәкәтләрдән вә фикирләрдән азад олмаға көмәк едәҹәк.

Бәс Аллаһ-Таала гәфил баш верән бәлалара неҹә чарә гылаҹаг? О вәд едиб ки, гурдуғу Падшаһлыг тезликлә јер үзүнү идарә едәҹәк. Аллаһ Падшаһ тәјин етдији Иса Мәсиһә истәнилән хәстәлији сағалтмаг ҝүҹү вериб (Матта 14:14). Исанын тәбиәт гүввәләри үзәриндә дә һөкмү вар (Марк 4:35—41). Буна ҝөрә дә «вахт вә тәсадүф» нәтиҹәсиндә баш верән бәлаларын һеч бири артыг олмајаҹаг (Ваиз 9:11, Јени Дүнја тәрҹүмәси). Мәсиһин һакимијјәти алтында бәшәријјәт бир даһа бәлаларла үзләшмәјәҹәк (Сүлејманын мәсәлләри 1:33).

Бәс фаҹиәви шәкилдә һәлак олан милјонларла ҝүнаһсыз инсанлар? Досту Лазары дирилдәндән бир гәдәр сонра Иса пејғәмбәр демишди: «Дирилмә вә һәјат мәнәм» (Јәһја 11:25). Бәли, Иса өлүләри дирилтмәјә, јәни һәјата ҝери гајтармаға гадирдир!

Пис шејләрин јахшы инсанларын башына ҝәлмәјәҹәји бир дүнјада јашамаг истәрдинизми? Онда сиз Аллаһ вә Онун нијјәти һаггында Мүгәддәс Китабда јазыланлары билмәлисиниз. Јеһованын Шаһидләри сизә бу биликләрә јијәләнмәјинизә көмәк етмәјә шад оларлар. Јахынлығынызда јашајан Јеһованын Шаһидләри илә әлагә сахламаға вә ја өјрәнмәк истәјинизи бу журналын наширләринә јазмаға чәкинмәјин.