Аллаһын һөкумәти пејғәмбәр үчүн нијә өнәмлидир?

Өтән мәгаләдә дә гејд олундуғу кими, «Аллаһын падшаһлығы һаггында хош хәбәри тәблиғ [етмәк]» иши Иса Мәсиһин хидмәтинин өзәји иди (Лука 8:1). О, Аллаһын Падшаһлығы һагда инсанлара өјрәтмәк үчүн Исраили гарыш-гарыш ҝәзмишди. Иса Мәсиһин хидмәтиндән бәһс едән дөрд Мүждәдә Падшаһлыг мөвзусуна 100 дәфәдән чох истинад едилир. Ән чох бу истинадлара Иса Мәсиһин сөзләриндә раст ҝәлирик. Анҹаг бунлар Исанын Аллаһын Падшаһлығы һагда данышдыгларынын һеч јарысы да дејилди! (Јәһја 21:25).

Иса пејғәмбәр јер үзүндә оларкән Аллаһын Падшаһлығына нијә бу гәдәр өнәм верирди? О билирди ки, Аллаһ ону гурдуғу Падшаһлыға Падшаһ сечиб (Јешаја 9:6; Лука 22:28—30). Анҹаг пејғәмбәрин мәгсәди һакимијјәт вә ја шөһрәт саһиби олмаг дејилди (Матта 11:29; Марк 10:17, 18). О, Падшаһлығы өз мәнфәәтини ҝүддүјү үчүн бәјан етмирди. Иса Мәсиһ Падшаһлығын Аллаһын ады наминә вә садиг давамчыларынын рифаһы үчүн нәләр едәҹәјини билирди. Бу, онун Падшаһлығы бәјан етмәсинин әсас сәбәби иди. Кечмишдә олдуғу кими, бу ҝүн дә Падшаһлыгa Иса Мәсиһ үчүн өнәмлидир.

ПАДШАҺЛЫГ АЛЛАҺ НАМИНӘ НӘЛӘР ЕДӘҸӘК?

Иса Мәсиһин Аллаһа ҝүҹлү бағлылығы вар (Сүлејманын мәсәлләри 8:30; Јәһја 14:31). О, Јараданынын мәһәббәт, мәрһәмәт вә әдаләт кими ҝөзәл хүсусијјәтләринә мәфтундур (Ганунун тәкрары 32:4; Јешаја 49:15; 1 Јәһја 4:8). Тәәссүф ки, Аллаһын адына чохлу ифтиралар атылыр, дејирләр ки, Аллаһ инсанларын изтирабларына биҝанә јанашыр, бизә әзаб чәкдирән Одур. Иса белә јаланлара нифрәт едир. Бу, онун Падшаһлыг һаггында хош хәбәри ҹанла-башла тәблиғ етмәсинин сәбәбләриндән бири иди. О билирди ки, Падшаһлыг Аллаһ-Тааланын ад–саныны тәмизә чыхараҹаг (Матта 4:23; 6:9, 10). Бәс бу, неҹә олаҹаг?

Падшаһлыг васитәсилә Јеһова бәшәријјәтин рифаһы наминә бөјүк ишләр ҝөрәҹәк. Аллаһ садиг «инсанларын ҝөзләриндән бүтүн јашлары силәҹәк». Јеһова ҝөз јашларына сәбәб олан һәр шеји арадан ҝөтүрәҹәк, «нә өлүм, нә дәрд, нә фәрјад, нә дә ағры олаҹаг» (Вәһј 21:3, 4). Падшаһлыг васитәсилә Аллаһ инсанларын чәкдији бүтүн әзаб-әзијјәтләрә сон гојаҹагb.

Иса Мәсиһин нәјә ҝөрә инсанлара Падшаһлыг һагда данышмаг үчүн ҹан атдығы ајдындыр! О билирди ки, Падшаһлыг Аллаһын гүдрәтли вә рәһмли олдуғуну әјан едәҹәк (Јагуб 5:11). Һәмчинин о билирди ки, бу, севдији салеһ инсанлара да фајда ҝәтирәҹәк.

ПАДШАҺЛЫГ САЛЕҺ ИНСАНЛАРЫН РИФАҺЫ ҮЧҮН НӘ ЕДӘҸӘК?

Иса Мәсиһ јерә ҝәлмәздән хејли әввәл ҝөјдә, Аллаһын дәрҝаһында јашајырды. Аллаһ сәмадакы сајсыз-һесабсыз улдузлары, галактикалары, ҝөзәл планетимизи вә һејванат аләмини, бир сөзлә, һәр шеји Исајла бирҝә јаратмышды (Колослулара 1:15, 16). Амма она ән чох фәрәһ ҝәтирән инсан өвлады иди (Сүлејманын мәсәлләри 8:31).

Иса пејғәмбәрин инсанлара олан мәһәббәти хидмәтиндә өзүнү бүрузә верирди. Хидмәтинә башладығы елә илк ҝүндән о, ајдын билдирди ки, јер үзүнә ҝәлишинин сәбәби хош хәбәри еһтијаҹ дујан һәр кәсә чатдырмагдыр (Лука 4:18). Амма Иса Мәсиһ инсанлара көмәк етмәк һагда данышмагдан даһа чох шеј етди. О, инсанлары севдијини дәфәләрлә әмәлдә ҝөстәрди. Мәсәлән, бөјүк издиһам она гулаг асмаг үчүн топлашанда «Исанын онлара јазығы ҝәлди вә хәстәләрини сағалтды» (Матта 14:14). Бир дәфә ағыр хәстәликдән әзијјәт чәкән бир инсан Иса пејғәмбәрин истәдији тәгдирдә ону сағалда биләҹәјинә иманыны изһар етди. Иса мәһәббәтдән ирәли ҝәләрәк шәфгәтлә: «Истәјирәм. Тәмизлән», — дејиб она шәфа верди (Лука 5:12, 13). Јахын досту Мәрјәмин гардашы Лазарын өлүмүнә ҝөрә матәм ичиндә олдуғуну ҝөрәндә Иса Мәсиһ «бәрк гәһәрләнди», «дәриндән аһ [чәкди]» вә «ҝөзләриндән јаш ахды» (Јәһја 11:32—36). Сонра о, мөҹүзәви бир шеј етди — дөрд ҝүнүн өлүсү олан Лазары дирилтди! (Јәһја 11:38—44).

Әлбәттә, Иса пејғәмбәр дәрк едирди ки, инсанларын дәрдини азалтмаг үчүн етдији шејләр мүвәггәтидир, чүнки әввәл-ахыр онун сағалтдығы хәстәләр јенидән хәстәләнәҹәк вә дирилтдији инсанлар јенидән өләҹәкләр. Лакин Иса Мәсиһ ону да билирди ки, Аллаһын Падшаһлығы бу кими проблемләри бирдәфәлик һәлл едәҹәк. Буна ҝөрә дә о сырф мөҹүзәләр ҝөстәрмирди, «падшаһлыг һаггында хош хәбәри» дә шөвглә тәблиғ едирди (Матта 9:35). Онун мөҹүзәләри Аллаһын Падшаһлығынын тезликлә јер үзүндә едәҹәји мөһтәшәм ишләрин кичик бир нүмунәси иди. Ҝәлин һәмин дөврүн неҹә олаҹағыны тәсәввүр етмәк үчүн Мүгәддәс Китабда гәләмә алынан вәдләрә нәзәр салаг.

• 

  Хәстәлик олмајаҹаг

  «О вахт корларын ҝөзләри, карларын гулаглары ачылаҹаг. Ахсаглар ҹејран кими һоппанаҹаг, лалларын дили севинҹлә нәғмә дејәҹәк». Үстәлик, һеч ким «“хәстәјәм” демәјәҹәк» (Јешаја 33:24; 35:5, 6).

• 

  Өлүм олмајаҹаг

  «Салеһләр өлкәни мүлк олараг алаҹаг, онлар орада әбәди мәскән салаҹаг» (Мәзмур 37:29).

  «Өлүмү әбәди олараг јох едәҹәк, Худавәнд Рәбб бүтүн адамларын үзүндән ҝөз јашларыны силәҹәк» (Јешаја 25:8).

• Өлүләр дириләҹәк

  «Гәбирләрдә оланларын һамысы онун сәсини [ешидиб]... дириләҹәкләр» (Јәһја 5:28, 29).

  «Өлүләрин дирилмәси олаҹагдыр» (Һәвариләрин ишләри 24:15, Инҹил, 1993).

• 

  Евсизлик вә ишсизлик проблеми олмајаҹаг

  «Онлар евләр тикиб орада мәскунлашаҹаг, үзүм бағлары салаҹаг, бәһрәләриндән јејәҹәк. Тикдикләри евдә өзҝәләр јашамајаҹаг, әкдикләри бағын мејвәләрини башгалары јемәјәҹәк... сечилмишләрим әлләринин ишләриндән зөвг алаҹаг» (Јешаја 65:21, 22).

• 

  Мүһарибәләр олмајаҹаг

  «О, јерин уҹгарларынадәк дөјүшләри дајандырар» (Мәзмур 46:9).

  «Милләт милләтә гаршы гылынҹ галдырмајаҹаг, артыг дава етмәји өјрәнмәјәҹәк» (Јешаја 2:4).

• 

  Аҹлыг олмајаҹаг

  «Јер үзү бәһрәсини верәҹәк, Аллаһ, бизим Аллаһымыз бизә рузи-бәрәкәт верәҹәк» (Мәзмур 67:6, «Јени Дүнја Тәрҹүмәси»).

  «Јердә чөрәк бол олаҹаг, дағ башында зәмиләр ашыб-дашаҹаг» (Мәзмур 72:16, «Јени Дүнја Тәрҹүмәси»).

• Касыбчылыг олмајаҹаг

  «Јохсулларса һәмишәлик унудулмаз» (Мәзмур 9:18, «Јени Дүнја Тәрҹүмәси»).

  «О, имдад дејиб чағыран фәгирләри, мәзлумлары, көмәксизләри гуртарыр. Јохсула, фәгирә рәһм едир, фәгирләрин ҹанларыны азад едир» (Мәзмур 72:12, 13).

Аллаһын Падшаһлығынын ҝәләҹәкдә нәләр едәҹәји һагда охујанда бу Падшаһлығын Иса Мәсиһ үчүн нәјә ҝөрә бу гәдәр өнәмли олдуғуну, јәгин, анлајырсыныз. О, јер үзүндә оларкән Аллаһын Падшаһлығы һагда сөһбәтләрә гулаг асмаг истәјән һәр кәсә бу барәдә севинҹлә данышырды, чүнки билирди ки, бу ҝүн гаршылашдығымыз үзүҹү проблемләрә јалныз Падшаһлыг сон гојаҹаг.

Мүгәддәс Китабда Падшаһлыг һагда дејиләнләр сизи марагландырыр? Падшаһлыг һагда даһа әтрафлы мәлуматы неҹә әлдә етмәк олар? Онун ҝәтирәҹәји хејир-дуалары алмаг үчүн сиздән нә тәләб олунур? Бу силсиләдән олан сонунҹу мәгаләдә бу суаллара ҹаваб верилир.