Аллаһын Падшаһлығы нә вахтдан һөкмранлыг едир? (II һиссә)

НАВУХОДОНОСОРУН ЈУХУСУ. ГЫСА ИҸМАЛ

Ҹамал: Салам, Шаһбаз. Һәр һәфтә сәнинлә Мүгәддәс Китаб дәрсиa кечәҹәјимиз ҝүнү сәбирсизликлә ҝөзләјирәм. Неҹәсән?

Шаһбаз: Чох сағ ол, јахшыјам.

Ҹамал: Лап јахшы. Кечән дәфә данышдыг ки, нәјә ҝөрә Јеһованын Шаһидләри Аллаһын Падшаһлығынын 1914-ҹү илдә гурулдуғуну дејирb. Арашдырдыг ки, буну «Дәнјал» китабынын 4-ҹү фәслиндә јазылмыш пејғәмбәрликдәки ваҹиб бир мәгамдан билирик. Јадындадыр, орада нә јазылыб?

Шаһбаз: Навуходоносорун һүндүр ағаҹ барәдә јухусу.

Ҹамал: Бәли. Навуходоносор јухуда башы ҝөјләрә чатан ағаҹ ҝөрмүшдү. Сонра Аллаһын мәләји әмр етмишди ки, ағаҹы кәссинләр, көтүјүнү исә чәмбәрләјиб јердә сахласынлар. Једди дөврдән сонра ағаҹ јенидән бөјүјәҹәкдиc. Һәмчинин өјрәндик ки, бу пејғәмбәрлијин ики иҹрасы вар. Јадындадыр, биринҹи дәфә неҹә јеринә јетиб?

Шаһбаз: Навуходоносорун өз үзәриндә јеринә јетмишди дејәсән, һә? О, једди ил ағлыны итирмишди.

Ҹамал: Бәли. Навуходоносор бир мүддәт ағлыны итирди. Бунунла да онун һакимијјәтинә ара верилди. Анҹаг бу пејғәмбәрлијин әсас иҹрасы одур ки, Аллаһын һакимијјәтинә једди дөврлүјә ара верилди. Өјрәндик ки, једди дөвр ерамыздан әввәл 607-ҹи илдә Јерусәлимин мәһв едилмәсилә башлады. О вахтдан јердә Јеһова Аллаһы тәмсил едәрәк Онун халгыны идарә едән падшаһ јох иди. Анҹаг једди дөврүн тамамында Аллаһ халгы үзәриндә јени Падшаһ гојду. Бу Падшаһ ҝөјдә тахта чыхыб. Башга сөзлә, једди дөвр баша чатан вахт Аллаһын сәмави Падшаһлығынын һакимијјәти башлады. Демәли, артыг једди дөврүн нә заман башландығыны арашдырмышыг. Әҝәр бу дөврүн нә гәдәр давам етдијини мүәјјән етсәк, Аллаһын Падшаһлығынын да нә вахт гурулдуғуну биләҹәјик. Бура кими һәр шеј ајдындыр?

Шаһбаз: Һә, јахшы ки, тәкрарладын. Һәр шеј јадыма дүшдү.

Ҹамал: Әла. Ҝәл инди ҝөрәк једди дөвр нә гәдәр давам етди. Бу мөвзуну өзүм дә о ҝүн арашдырдым ки, әсас фикирләри јаддашымда тәзәләјим. Инди чалышаҹағам сәнә дә изаһ едим.

Шаһбаз: Аһа.

ЈЕДДИ ДӨВРҮН ТАМАМЫ, АХЫРЗАМАНЫН БАШЛАНҒЫҸЫ

Ҹамал: Пејғәмбәрлик Навуходоносора аид оланда, ҝөрүнүр, једди дөвр једди илә бәрабәр иди. Амма Аллаһын Падшаһлығына аид оланда исә једди дөвр једди илдән узун вахты әһатә етди.

Шаһбаз: Нәјә ҝөрә?

Ҹамал: Әввәла, једди дөвр Јерусәлимин ерамыздан әввәл 607-ҹи илдә дармадағын едилмәсилә башлады. Һәмин илдән једди ил сонра, јәни ерамыздан әввәл 600-ҹү илдә Аллаһын һакимијјәти илә әлагәли һеч бир шеј баш вермәди. Үстәлик, кечән дәфә дә өјрәндик ки, Иса Мәсиһ јер үзүндә јашајанда једди дөврүн һәлә гуртармадығыны билдирмишди.

Шаһбаз: Һә, јадыма дүшдү.

Ҹамал: Демәли, једди дөвр једди илә бәрабәр ола билмәз. Даһа узун вахты билдирир.

Шаһбаз: Нә гәдәр вахты?

Ҹамал: Бу суалын ҹавабыны «Вәһј» китабынын көмәјилә тапа биләрик. Бу китабы охујанда «Дәнјал» китабыны баша дүшмәк олур. «Вәһј»дә дејилир ки, үч дөвр јарым 1260 ҝүндүрd. Демәли, једди дөвр, јәни ики дәфә үч дөвр јарым 2520 ҝүнә бәрабәрдир. Ајдындыр?

Шаһбаз: Аһа, бу, ајдындыр. Амма јенә дә баша дүшмүрәм ки, бу, Аллаһын Падшаһлығынын 1914-ҹү илдә гурулдуғуну неҹә ҝөстәрир.

Ҹамал: Ҝәл бахаг. Мүгәддәс Китабдакы бәзи пејғәмбәрликләрдә ҝүн или тәмсил едирe. Бу принсиплә ҝөтүрсәк, једди дөвр 2520 илә бәрабәр олаҹаг. Ерамыздан әввәл 607-ҹи илдән 2520 ил сајсаг, ерамызын 1914-ҹү илинә ҝәлиб чыхырыгf. Једди дөврүн 1914-ҹү илдә битдијини, Иса Мәсиһин һәмин ил Аллаһын Падшаһлығынын Падшаһы олдуғуну буна әсасән дејирик. Өзү дә мараглыдыр ки, Мүгәддәс Китабда ахырзаманла бағлы габагҹадан дејилән һадисәләр дә 1914-ҹү илдән баш верир.

Шаһбаз: Һансы һадисәләр?

Ҹамал: Ҝәл Мәтта 24:7 ајәсини охујаг. Ҝөр Иса ҝөјдә тахта чыхаҹағы вахт барәдә нә демишди: «Милләт милләтә гаршы, дөвләт дөвләтә гаршы галхаҹаг. Ҝаһ бурада, ҝаһ орада гытлыг, зәлзәләләр олаҹаг». Фикир вердин, јазылыб ки, гытлыглар, зәлзәләләр олаҹаг. Өтән әсрдә дүнјада нә гәдәр бәлалар баш верди?

Шаһбаз: Һә, дүздүр.

Ҹамал: Бу ајәдә Иса һәм дә дејир ки, Аллаһын Падшаһлығынын Падшаһы кими һакимијјәт сүрәндә мүһарибәләр олаҹаг. «Вәһј» китабында дејилир ки, ахырзаманда мүһарибәләр тәкҹә ајры-ајры өлкәләрдә олмајаҹаг, бүтүн дүнјаны ҹәнҝинә алаҹагg. Јадындадыр, биринҹи дүнја мүһарибәси нә вахт башлады?

Шаһбаз: 1914-ҹү илдә. Исанын тахта чыхдығы илдә. Сән бир ишә бах.

Ҹамал: Бүтүн фактлары дүшүнәндә, једди дөврлә бағлы пејғәмбәрлији, ахырзаманла бағлы пејғәмбәрликләри нәзәрә аланда һәр шеј ајдын олур. Јеһованын Шаһидләри әминдирләр ки, Иса Мәсиһ 1914-ҹү илдән Аллаһын Падшаһлығынын Падшаһы кими һакимијјәт сүрүр вә елә һәмин илдән дә ахырзаман башлајыб.

Шаһбаз: Ачығы мән һәлә буну баша дүшмәјә чалышырам.

Ҹамал: Бу, тәбиидир. Бајаг да дедим, буну там баша дүшмәк үчүн мәнә дә вахт лазым олду. Амма үмид едирәм, сәнә ајдын олду ки, Мүгәддәс Китабда конкрет ил јазылмаса да, Јеһованын Шаһидләри 1914-ҹү иллә бағлы Мүгәддәс Китаб әсасында бу гәнаәтә ҝәлибләр.

Шаһбаз: Һә, сиздә ән чох хошума ҝәлән ҹәһәт дә елә одур ки, нә дејирсинизсә, һәр шеји Мүгәддәс Китаба әсасландырырсыныз. Һеч вахт өз фәрзијјәләринизи өјрәтмирсиниз. Садәҹә, мәнә мараглыдыр ки, нәјә ҝөрә һәр шеји белә гәлизләшдирмәк лазым иди. Нәјә ҝөрә Аллаһ Мүгәддәс Китабда бирбаша јаздырмајыб ки, Иса Мәсиһ 1914-ҹү илдә ҝөјдә тахта чыхаҹаг?

Ҹамал: Бу, чох јахшы суалдыр. Әслиндә, Мүгәддәс Китабда чох шеј барәдә бирбаша јазылмајыб. Аллаһ Мүгәддәс Китабы елә јаздырыб ки, ону баша дүшмәк үчүн инсанлар зәһмәт чәксин. Истәјирсән, ҝәлән дәфә бунун сәбәби барәдә данышарыг.

Шаһбаз: Олар, мараглы мөвзудур.