Хидмәтә шөвглү ол

МҮЖДӘНИН тәблиғи бу ҝүн дүнјада ән ваҹиб ишдир. Сөзсүз ки, сән Јеһованын хидмәтчиси кими, шаҝирд һазырламаг ишини өзүнә шәрәф санырсан. Анҹаг јәгин разылашарсан ки, нә пионерләрә, нә дә диҝәр тәблиғчиләрә хидмәтдә шөвгү горумаг һәмишә асан олмур.

Бәзи тәблиғчиләр ев-ев хидмәт едәркән сакинләрлә әмәлли-башлы сөһбәт едә билмирләр. Әксәр сакинләр евдә олмур. Евдә оланда да, хош хәбәрә ја лагејд јанашырлар, ја да бу хәбәри гәзәблә гаршылајырлар. Елә тәблиғчиләр дә вар ки, тәблиғ саһәсинин ҝенишлији вә мәһсулдарлығы онлары үркүдүр. Онлара елә ҝәлир ки, һеч вахт бу тапшырығын өһдәсиндән ҝәлә билмәјәҹәкләр. Бундан башга, јығынҹағын бәзи үзвләри илләрдир тәблиғ едирләр. Бу вахт ҝөзләдикләриндән артыг сүрдүјүндән онлар үзүлүб әлдән дүшүрләр.

Бәли, Јеһоваја хидмәт едән һәр бир инсан хидмәтә һәвәсини зәифләдән чәтинликләрлә үзләшир. Бунда гејри-ади һеч нә јохдур. Чүнки биз «Шәририн», јәни Шејтан Иблисин ағалыг етдији дүнјада јашајырыг вә Аллаһдан ҝәлән ниҹат хәбәрини бәјан етмәјин асан олаҹағыны ҝөзләмирик (1 Јәһ. 5:19).

Мүждәнин тәблиғиндә үзләшдијин чәтинликләрдән асылы олмајараг, әмин ол ки, Јеһова онлары ашмаға сәнә көмәк едәҹәк. Бәс онда, хидмәтә шөвгүнү артырмаға нә көмәк едә биләр? Ҝәл бәзи мәсләһәтләри нәзәрдән кечирәк.

ТӘҸРҮБӘСИ АЗ ОЛАНЛАРА КӨМӘК

Һәр ил минләрлә адам Јеһованын Шаһиди кими вәфтиз олунур. Әҝәр сән дә бу јахынларда өзүнү Аллаһа һәср едиб вәфтиз олунмусанса, јәгин истәјәрдин ки, узун мүддәт тәблиғ едән баҹы-гардашларын тәҹрүбәсиндән бәһрәләнәсән. Јох әҝәр сән чохданын тәблиғчисисәнсә, јахшы оларды ки, өзүн јениләрә көмәк едәсән. Белә етсән, севинҹ дујаҹагсан.

Иса Мәсиһ јахшы билирди ки, шаҝирдләринин мәһарәтли мүждәчи олмасы үчүн онларын көмәјә еһтијаҹы вар вә о, бу иши ҝөрмәјин тәһәрини онлара өјрәтмишди (Лука 8:1). Бу ҝүн дә баҹы-гардашларын јахшы мүждәчиләр олмасы үчүн онлары өјрәтмәк лазымдыр.

Биз дүшүнмәмәлијик ки, јени тәблиғчиләр тәблиғин сирләринә елә тәблиғ едә-едә јијәләнәҹәкләр. Һәр бир тәблиғчини сәбирлә вә меһрибанлыгла өјрәтмәк лазымдыр. Бунун үчүн тәҹрүбәси аз олан тәблиғчијә 1) тәгдимә һазырламағын вә истифадә етмәјин, 2) сакинлә, јахуд јолдан кечәнлә сөһбәт етмәјин, 3) әдәбијјат тәклиф етмәјин, 4) тәкрар баш чәкмәјин вә 5) Мүгәддәс Китаб дәрсинә башламағын үсулуну ҝөстәрмәк лазымдыр. Тәҹрүбәси аз олан тәблиғчи она көмәк едән тәблиғчијә бахыб онун хидмәтдә истифадә етдији үсуллары тәкрар етсә, чох еһтимал ки, јахшы нәтиҹәләр әлдә едәҹәк (Лука 6:40). Шүбһәсиз, һәр бир јени тәблиғчијә хош олар ки, кимсә ону динләсин вә лазым оланда көмәјинә чатсын. Тәриф сөзләринин вә фајдалы мәсләһәтләрин тәҹрүбәси аз олан тәблиғчиләрә бөјүк көмәји дәјәҹәк (Ваиз 4:9, 10).

ӘМӘКДАШЫНЛА СӨҺБӘТ ЕТ

Бәзән биз хидмәт заманы ев сакинләри илә сөһбәт етмәјә нә гәдәр ҹәһд ҝөстәрсәк дә, чох вахт ән јахшы сөһбәт елә өз әмәкдашымызла алыныр. Јадындадырса, Иса шаҝирдләрини тәблиғә ики-ики ҝөндәрмишди (Лука 10:1). Онлар бирҝә хидмәт едәркән бир-бирләрини руһландыра вә һәвәсләндирә биләрдиләр. Демәли, хидмәтдә әмәкдашымызла бирҝә кечирдијимиз вахт әрзиндә бир-биримизи руһландыра биләрик (Ром. 1:12).

Бәс әмәкдашла нә һагда сөһбәт етмәк олар? Мәсәлән, хидмәтдә башыныза ҝәлән мараглы һадисәдән, шәхси вә ја аиләви өјрәнмә заманы өјрәндијиниз мараглы мәлуматлардан, јахуд јығынҹагда ешитдијиниз руһландырыҹы фикирләрдән бәһс етмәк олар. Ҝеҹ-ҝеҹ хидмәтдә олдуғун адамла әмәкдашлыг едәндә исә, чалыш онунла јахындан таныш оласан: о, һәгигәтә неҹә ҝәлиб, бу тәшкилаты Јеһованын идарә етдијинә ону нә инандырыб, хидмәтдә һансы наилијјәтләр әлдә едиб, бу јолда һансы тәҹрүбәни газаныб. Сән дә өзүн һагда даныша биләрсән. Тәблиғ вахты һансы мүнасибәтлә гаршылашсан да, әмәкдашынла үнсијјәт бир-биринизи мөһкәмләндирмәјә көмәк едәҹәк (1 Салон. 5:11).

ҺӘМИШӘ ШӘХСИ ӨЈРӘНМӘ КЕЧИР

Хидмәтә һәвәсимиз сојумасын дејә һәмишә шәхси өјрәнмә кечирмәлијик. «Садиг вә ағыллы нөкәр» нәшрләримиздә мүхтәлиф мөвзулары ишыгландырыр (Мәт. 24:45). Бу о демәкдир ки, бизә ачылан руһани сүфрә ҹүрбәҹүр наз-немәтлә долудур. Мәсәлән, шәхси өјрәнмә вахты Падшаһлыг мүждәсини тәблиғ етмәјин нә үчүн ваҹиб олдуғуну арашдыра биләрсән. Бу мәгаләдәки чәрчивәдә бунун бәзи сәбәбләри ҝәтирилир.

Чәрчивәдәки бәндләр сәни шөвглә тәблиғ етмәјә һәвәсләндирә биләр. Шәхси өјрәнмә заманы тәблиғин ваҹиблијинин башга сәбәбләрини дә тапа биләрсән. Сонра бу сәбәбләр вә онлары тәсдигләјән ајәләр үзәриндә дүшүн. Сөзсүз, бу, сәнин хидмәтә һәвәсини аловландыраҹаг.

МӘСЛӘҺӘТИ ГӘБУЛ ЕТ

Хидмәтдә пүхтәләшмәјимиз үчүн Јеһованын тәшкилаты бизә һәмишә мәсләһәтләр верир. Мәсәлән, ев-ев тәблиғдән савајы, мәктуб јаза, телефонла шаһидлик едә, күчәдә, башга иҹтимаи јерләрдә, ишҝүзар әразиләрдә, јахуд гејри-рәсми сурәтдә мүждәни бөлүшмәк олар.

Бәс сән бу мәсләһәтләри гәбул едирсән? Онлары сынагдан кечирирсән? Чохлары буну едир, фајдасыны да ҝөрүр. Ҝәл үч нүмунәјә бахаг.

Биринҹи нүмунә «Бизим Падшаһлыг Хидмәтимиз»дә Мүгәддәс Китаб дәрсләринә башламаға даир дејиләнләрлә бағлыдыр. Бу мәсләһәтләри охујан Ејпрл адлы баҹы үч иш јолдашына Мүгәддәс Китабы өјрәнмәји тәклиф етди. Һәр үчүнүн бу тәклифи гәбул етмәси баҹы үчүн ҝөзләнилмәз олду. Онлар һәтта јығынҹаг ҝөрүшләринә дә ҝәлмәјә башладылар.

Икинҹи нүмунә журнал пајламагла бағлыдыр. Нәшрләримиздә мәсләһәт ҝөрүлүрдү ки, журналларымызда ишыгландырылан хүсуси мөвзуларла марагланаҹаг инсанлары тапаг. Бирләшмиш Штатлардакы бир рајон нәзарәтчиси демишди ки, машын шини һагда мәлумат олан «Ојанын!» журналыны бир әразидәки шин мағазаларынын менеҹерләринә пајламышды. Һәмчинин о, арвады илә «Һәкимләрин зәһмәтини гијмәтләндирин» адлы «Ојанын!» журналыны өз рајонларында 100-дән артыг клиникаја пајламышды. Гардаш дејир: «Бунун сајәсиндә биз өзүмүзү вә журналларымызы о јерләрдә ишләјән инсанлара асанлыгла танытдыг. Онларла хош мүнасибәт гурмағымыз сөһбәтимизи сонра да давам етдирмәјә имкан јаратды».

Үчүнҹү нүмунә телефонла шаһидлик етмәклә бағлыдыр. Ҹуди адлы бир баҹы мәркәзи идарәјә мәктуб јазараг телефонла шаһидлик етмәк мәсләһәтинә ҝөрә миннәтдарлығыны билдирмишди. О, јазырды ки, сәһһәтиндә проблемләри олан 86 јашлы анасы бу хидмәт нөвүндә мүнтәзәм иштирак едир. О, бөјүк мәмнунијјәтлә 92 јашлы бир гадынла Мүгәддәс Китабы арашдырыр.

Нәшрләримиздә тәблиғлә бағлы верилән мәсләһәтләр, һәгигәтән дә, ишә јарајыр. Онлары тәтбиг ет. Бу, сәнә хидмәтдән севинҹ дујмаға, һәвәсини горумаға көмәк едәр.

ГАРШЫНА ӘЛЧАТАН МӘГСӘДЛӘР ГОЈ

Тәблиғ ишиндә мүвәффәгијјәтимиз, әсас етибарилә, нә гәдәр журнал пајламағымызла, нечә нәфәрә Мүгәддәс Китабы өјрәтмәјимизлә, јахуд нә гәдәр адама Јеһованын хидмәтчиси олмаға көмәк етмәјимизлә өлчүлмүр. Јадына сал, Нуһ пејғәмбәр өз аиләсиндән башга нечә нәфәрә Јеһованын хидмәтчиси олмаға көмәк етмишди? Амма Јеһова ондан бир тәблиғчи кими разы иди. Одур ки, әсас мәсәлә Јеһоваја сәдагәтлә хидмәт етмәкдир (1 Кор. 4:2).

Падшаһлығын бир чох тәблиғчиләри тәблиғә һәвәсләрини артырмаг үчүн гаршыларына әлчатан мәгсәдләр гојурлар. Бу мәгаләдәки чәрчивәдә һәмин мәгсәдләрдән бәзиләри садаланыб.

Јеһовадан көмәк истә вә хидмәтинин сәмәрәли олмасы үчүн гаршына мәгсәдләр гој. Мәгсәдләринә чатанда мәмнунлуг дујаҹагсан, хош хәбәрин тәблиғиндә әлиндән ҝәләни етдијин үчүн севинҹ дадаҹагсан.

Сөзсүз ки, мүждәни тәблиғ етмәк асан иш дејил. Лакин мүәјјән амилләр бизә Падшаһлығын чалышган тәблиғчиси олмаға көмәк едә биләр. Әмәкдашынла бир-биринизи руһландырын, һәмишә шәхси өјрәнмә кечир, садиг нөкәрин мәсләһәтләринә әмәл ет вә гаршына әлчатан мәгсәдләр гој. Ән үмдәси, унутма ки, Јеһова Аллаһ сәни бөјүк шәрәфә, Онун Шаһиди кими мүждәни бәјан етмәк шәрәфинә лајиг ҝөрүб (Әшј. 43:10). Хидмәтә шөвглү олмаг сәнә бөјүк севинҹ ҝәтирәҹәк.