Аллаһ һаггындакы билијә гаршы чыхан һәр ҹүр фикри арадан галдырын!

1. Һәвари Булус мәсһ олунмуш мәсиһиләрә һансы хәбәрдарлығы вермишди?

«БУНДАН СОНРА бу зәманәјә ујғунлашмајын», — дејә һәвари Булус јазмышды (Ром. 12:2). О, бу сөзләри биринҹи әсрдә јашамыш мәсиһиләрә үнванламышды. Булус нәјә ҝөрә өзүнү Аллаһа һәср етмиш вә мүгәддәс руһла мәсһ олунмуш киши вә гадынлара бу ҹүр ҹидди хәбәрдарлыг вермишди? (Ром. 1:7).

2, 3. Јеһовадан үз дөндәрмәјимиз үчүн Шејтан һансы үсуллара әл атыр вә зеһнимиздәки «ҝүҹлү истеһкамлары» неҹә јыха биләрик?

² Ҝөрүнүр, Булусун нараһатлығына сәбәб бәзи мәсиһиләрин Шејтан дүнјасынын тәлгин етдији зәрәрли дүшүнҹә вә фәлсәфәјә јолухмасы иди (Ефес. 4:17—19). Һәр биримизин бу тәләјә дүшмәк тәһлүкәси вар. Бу дүнјанын Аллаһы олан Шејтан бизи Јеһовадан дөндәрмәк истәјилә алышыб јаныр вә бунун үчүн мүхтәлиф фәндләрә әл атыр. Мәсәлән, о, биздә худбинлијә вә шөһрәтпәрәстлијә мејил ҝөрәндә бундан истифадә едәрәк бизи Јеһовадан дөндәрмәјә чалышыр. Шејтан һәтта аилә үзвләримиздән, һәмчинин мәктәбдәки вә әтрафымыздакы инсанлардан өјрәндијимиз мүәјјән шејләр васитәсилә бизи онун кими дүшүнмәјә сөвг едә биләр.

³ Бәс зеһнимиздәки «ҝүҹлү истеһкамлары» јыхмаг мүмкүндүр? (2 Кор. 10:4). Ҝөрүн Булус бу суала неҹә ҹаваб верир: «Биз Аллаһ һаггындакы билијә гаршы чыхан һәр ҹүр фикри вә манеәни арадан галдырырыг, һәр ҹүр фикри әсир алыб Мәсиһә табе етдиририк» (2 Кор. 10:5). Бәли, Јеһованын көмәји илә јанлыш фикирләри дәф едә биләрик. Дәрман зәһәрин тәсирини өлдүрдүјү кими, Аллаһын Кәламы да Шејтан дүнјасынын зәһәрли фикирләрини мәһв етмәјә гадирдир.

«БҮСБҮТҮН ДӘЈИШИН»

4. Һәгигәти өјрәнәндә чохларымыз һансы дәјишикликләри етмишик?

⁴ Аллаһын Кәламындакы һәгигәти илк дәфә өјрәнәндә вә Јеһоваја ибадәт етмәјә гәрар верәндә һансы дәјишикликләри етмишдиниз? Бир чохумуз Аллаһын бәјәнмәдији әмәлләрә сон гојмушуг (1 Кор. 6:9—11). Јеһоваја шүкүрләр олсун ки, бизә ҝүнаһлы әмәлләрдән јаха гуртармаға көмәк едиб!

5. Ромалылара 12:2 ајәсиндә һансы ики аддымдан бәһс олунур?

⁵ Лакин дүшүнмәмәлијик ки, даһа дәјишмәјә еһтијаҹ јохдур. Вәфтиздән өнҹә ишләдијимиз ҹидди ҝүнаһлары даһа етмәсәк дә, вар ҝүҹүмүзлә чалышмалыјыг ки, көһнә әмәлләрә сөвг едә биләҹәк һәр шејдән узаг дураг. Буну неҹә едә биләрик? Һәвари Булус демишди: «Бундан сонра бу зәманәјә ујғунлашмајын. Әксинә, дүшүнҹәнизи јениләшдирәрәк бүсбүтүн дәјишин» (Ром. 12:2). Демәли, ики аддым атмалыјыг. Биринҹиси, бу дүнјаја ујғунлашмамалыјыг, јәни онун бизи формалашдырмасына јол вермәмәлијик. Икинҹиси, дүшүнҹәмизи јениләшдирәрәк дәјишмәлијик.

6. Иса Мәсиһин Мәтта 12:43—45 ајәләриндә јазылмыш сөзләриндән нә өјрәнирик?

⁶ Булус «дәјишин» дејәндә садәҹә заһирән дәјишмәји нәзәрдә тутмурду. Бу дәјишиклик варлығымызын һәр бир зәррәсинә нүфуз етмәлидир. («Дәјишмисиниз, јохса ҹилдә ҝирмисиниз?» адлы чәрчивәјә бахын.) Биз үрәјимизин дәринлијиндәки фикирләри, һиссләри, арзулары, бир сөзлә, бүтүн дүшүнҹәмизи дәјишмәлијик. Одур ки, һәр биримиз өзүмүздән сорушмалыјыг: «Мәсиһи олмаг үчүн етдијим дәјишикликләр садәҹә үздәндир, јохса мән дахилән дәјишмәјә чалышырам?» Бунларын арасында бөјүк фәрг вар. Иса Мәсиһ Мәтта 12:43—45 ајәләриндә нә етмәли олдуғумузу демишди. (Ајәләри охујун.) Бу сөзләрин мәғзи ваҹиб бир һәгигәти вурғулајыр: јанлыш фикирләрдән азад олмаг кифајәт дејил, јаранан бошлуғу Аллаһын бәјәндији фикирләрлә долдурмаг лазымдыр.

«ДАИМА ДҮШҮНҸӘ ТӘРЗИНИЗИ ЈЕНИЛӘШДИРМӘЛИСИНИЗ»

7. Дахили кимлијимизи неҹә дәјишә биләрик?

⁷ Дахили кимлијимизи, башга сөзлә, дүшүнҹә тәрзимизи дәјишмәк мүмкүндүр? Аллаһын Кәламы бунун мүмкүн олдуғуну вурғулајыр. Орада јазылыб: «Даима дүшүнҹә тәрзинизи јениләшдирмәлисиниз, Аллаһын ирадәсинә әсасән вә һәгиги салеһликлә сәдагәтә ујғун јарадылмыш јени шәхсијјәтә бүрүнмәлисиниз» (Ефес. 4:23, 24). Бәли, дахили варлығымызы дәјишмәк мүмкүндүр, лакин бу, асан дејил. Јанлыш арзулары боғмаг, пис әмәлләрә сон гојмаг кифајәт дејил. Бунун үчүн дүшүнҹә тәрзини дәјишмәк лазымдыр. Бура арзу вә истәкләримизи, мејилләримизи вә мотивләримизи дәјишмәк дахилдир. Бунун үчүн исә даима үзәримиздә ишләмәлијик.

8, 9. Бир гардашын һадисәси дахилән дәјишмәјин ваҹиблијини неҹә ҝөстәрир?

⁸ Ҝәлин кечмишдә давакар инсан олмуш бир гардашын нүмунәсинә нәзәр салаг. О, сәрхошлуға вә дава-далаша сон гојандан сонра вәфтиз олунур. Бу, онун јашадығы әразидәки инсанлар үчүн ҝөзәл шаһидлик иди. Амма вәфтизиндән гыса мүддәт сонра о, ҝөзләмәдији сынагла үзләшир. Бир ахшам сәрхош бир киши онун евинә ҝәлир вә ону даваја тәһрик едир. Әввәл-әввәл гардашымыз өзүнү ҹиловлаја билир. Лакин киши Јеһованын адына күфр едәндә гардаш дөзә билмир, чөлә чыхыб кишини дөјүр. Гардаш нә үчүн белә бир һәрәкәт едир? Мүгәддәс Китабы өјрәнмәси давакарлыға мејлини ҹиловламаға көмәк етсә дә, гардаш дүшүнҹә тәрзини, дахилиндәки инсаны һәлә дәјишмәмишди.

⁹ Лакин о тәслим олмур (Мәс. 24:16). Ағсаггалларын көмәјилә өз үзәриндә ишләмәјә давам едир. Бир вахтдан сонра исә ағсаггал тәјинаты алыр. Ҝүнләрин бир ҝүнү бу гардаш ибадәт евинин чөлүндә илләр өнҹә үзләшдији вәзијјәтлә үзләшир. О, бир сәрхош кишинин башга бир ағсаггалы вурмаг истәдијини ҝөрүр. Гардаш нә едир? О, сәрхош киши илә сакит, мүлајим тәрздә сөһбәт едир, ону сакитләшдирир вә һәтта евинә өтүрүр. Гардаш нәјин сајәсиндә белә һәлим даврана билмишди? О, дүшүнҹә тәрзини дәјишмишди. Дахилән сүлһпәрвәр, һәлим бир инсан олмушду вә давранышы илә Јеһованын адыны уҹалтмышды!

10. Дахилән дәјишмәк үчүн нә етмәк лазымдыр?

¹⁰ Гардашын бу ҹүр дәјишмәси нә бир ҝеҹәнин ичиндә, нә дә өз-өзүнә баш верди. Дәјишмәк үчүн узун илләр әрзиндә вар ҝүҹүмүзлә чалышмаг лазым ҝәлә биләр (2 Бут. 1:5). Амма бу дәјишиклик садәҹә Јеһоваја узун мүддәт хидмәт етдијимизә ҝөрә баш вермир. Биз дахилимиздәки инсаны дәјишмәк үчүн әлимиздән ҝәләни етмәлијик. Бир нечә ваҹиб аддым бу саһәдә көмәјимизә чатаҹаг. Ҝәлин онлардан бәзиләрини арашдыраг.

ДҮШҮНҸӘ ТӘРЗИНИ ДӘЈИШМӘЈИН ЈОЛУ

11. Дуа дүшүнҹә тәрзимизи дәјишмәјә неҹә көмәк едир?

¹¹ Дуа етмәк атмалы олдуғумуз илк ваҹиб аддымдыр. Мәзмурчу кими дуа етмәлијик: «Мәндә тәмиз үрәк јарат, ичимә тәзә, мәтин бир руһ гој» (Зәб. 51:10). Биз дүшүнҹә тәрзимизи дәјишмәли олдуғумузу гәбул етмәли вә Јеһовадан көмәк истәмәлијик. Бәс неҹә әмин ола биләрик ки, О, дәјишмәјимизә көмәк едәҹәк? Јеһованын Һизгијалын дөврүндә јашамыш инадкар исраиллиләрлә бағлы вердији вәд бизи руһландыра биләр. «Мән сизә ваһид үрәк верәҹәјәм, дахилинизә јени руһ үфүрәҹәјәм,.. әтдән үрәк верәҹәјәм [јәни Аллаһын бујругларына бојун әјән үрәк]» (Һизг. 11:19, һаш.). Јеһова дәјишмәләри үчүн исраиллиләрә көмәк етмәјә һазыр иди, О, бизә дә көмәк етмәк истәјир.

12, 13. а) Зәбур 119:59 ајәсинә әсасән, нәјин үзәриндә дәриндән дүшүнмәлијик? б) Өзүмүзә һансы суаллары вермәлијик?

¹² Дүшүнмәк икинҹи ваҹиб аддымдыр. Һәр ҝүн Аллаһын Кәламыны охујаркән һансы фикир вә һиссләри дәјишмәли олдуғумуз барәдә дәриндән дүшүнмәјә вахт ајырмалыјыг. (Зәбур 119:59 ајәсини охујун; Ибр. 4:12; Јаг. 1:25.) Инсан фәлсәфәсиндән гајнагланан фикир вә һиссләримизи ашкара чыхармалыјыг. Зәифликләримизи дүрүстҹәсинә бојнумуза алмалы вә онлардан азад олмаг үчүн вар ҝүҹүмүзлә чалышмалыјыг!

¹³ Мәсәлән, дүшүнүн: «Үрәјимдә аз да олса гысганҹлыг вә пахыллыг һисси јохдур ки?» (1 Бут. 2:1). «Мәншәјимә, тәһсилимә, јахуд мадди дурумума ҝөрә өзүмү башгаларындан үстүн сајмырам ки?» (Мәс. 16:5). «Саһиб олдуғум шејләрә саһиб олмајанлара вә ја башга иргдән оланлара јухарыдан ашағы бахырам?» (Јаг. 2:2—4). «Шејтан дүнјасынын тәклиф етдији шејләр мәни ҹәлб едир?» (1 Јәһ. 2:15—17). «Әхлагсыз вә зоракы әјләнҹә нөвләринә мејилим вар?» (Зәб. 97:10; 101:3; Амс. 5:15). Бу суаллар васитәсилә үзәриндә ишләмәли олдуғумуз саһәләри үзә чыхара биләрик. Ҝүҹлү истеһкама бәнзәр бу ҹүр фикирләри ашмагла сәмави Атамызы севиндирәҹәјик (Зәб. 19:14).

14. Нә үчүн јахшы достлар сечмәк ваҹибдир?

¹⁴ Јахшы достлар сечмәк үчүнҹү ваҹиб аддымдыр. Фәргиндә олсаг да, олмасаг да, отуруб-дурдуғумуз инсанлар бизә ҝүҹлү тәсир ҝөстәрир (Мәс. 13:20). Чәтин ки, ишдә вә мәктәбдә бизи Аллаһы разы салан тәрздә дүшүнмәјә тәшвиг едән достлар тапаг. Лакин јығынҹагда биз ән јахшы достлара саһиб ола биләрик. Чүнки бурада «мәһәббәтә вә јахшы ишләрә» тәшвиг олунуруг (Ибр. 10:24, 25).

«ИМАНДА САРСЫЛМАЗ ОЛУН»

15, 16. Шејтан дүшүнҹәмизи корламаг үчүн нә едир?

¹⁵ Бир шеји јадда сахламалыјыг ки, Шејтан бизим дүшүнҹә тәрзимизи дәјишмәк нијјәтиндәдир. О, ҹүрбәҹүр фикирләр васитәсилә Аллаһын Кәламынын дүшүнҹәмизә ҝөстәрдији мүсбәт тәсири јох етмәк истәјир.

¹⁶ Шејтан Әдән бағында Һәввадан сорушдуғу суалы бизә дә верир: «Доғруданмы, Аллаһ сизә дејиб ки,..» (Јар. 3:1). Онун идарә етдији бу шәр дүнјада фикри гарышдыран бу кими суаллара тез-тез раст ҝәлирик: «Доғруданмы, Аллаһ ејниҹинсли инсанларын никаһына гаршыдыр? Доғруданмы, Аллаһ ад ҝүнләри вә бајрамлары гејд етмәјимизи истәмир? Доғруданмы, Аллаһ ган көчүрмәмәји бујуруб? Доғруданмы, мәһәббәтли Аллаһ јығынҹагдан кәнар олунан јахынларымызла үнсијјәти кәсмәјимизи ҝөзләјир?»

17. Иманымызы сынајан шүбһәли суалларла растлашанда нә етмәлијик вә Колослулара 2:6, 7 ајәләринә әсасән, бунун нәтиҹәси нә олаҹаг?

¹⁷ Инандығымыз шејләрә әмин олмалыјыг. Әҝәр биздә јаранан суаллары ҹавабсыз гојсаг, онлар ҹидди шүбһәјә чеврилә биләр. Бу шүбһәләр јаваш-јаваш дүшүнҹәмизи корлајыб иманымызы мәһв едәр. Бәс нә етмәлијик? Мүгәддәс Китаб дүшүнҹәмизи дәјишмәји бујурур. Бунун нәтиҹәсиндә «Аллаһын јахшы, хош вә камил ирадәсини» дәрк едәҹәјик (Ром. 12:2). Мүнтәзәм мүталиә етмәклә өјрәндијимиз һәгигәтләрин доғрулуғуна әмин ола биләрик. Онда Јеһованын нормаларынын дүзҝүн олдуғуна һеч бир шүбһәмиз галмајаҹаг. Мөһкәм көкләри олан ағаҹ кими, биз дә көк атыб «иманда сарсылмаз» олаҹағыг. (Колослулара 2:6, 7 ајәләрини охујун.)

18. Өзүмүзү Шејтан дүнјасынын зәһәрли фикирләриндән неҹә горуја биләрик?

¹⁸ Һеч ким сизин әвәзинизә иманынызы мөһкәмләндирә билмәз. Одур ки, дүшүнҹә тәрзинизи јениләшдирмәјә давам един. Дурмадан дуа един; Јеһоваја јалварын ки, мүгәддәс руһу илә сизә көмәк етсин. Дәриндән дүшүнүн, фикирләринизи вә нијјәтләринизи даима јохлајын. Дүшүнҹәнизи јахшылыға доғру дәјишмәјә көмәк едәҹәк инсанларла достлуг един. Белә етсәниз, Шејтан дүнјасынын зәһәрли тәсирини мәһв едәҹәк вә «Аллаһ һаггындакы билијә гаршы чыхан һәр ҹүр фикри вә манеәни» арадан галдыраҹагсыныз (2 Кор. 10:5).