“Инсанлар тимсалында һәдијјәләр” Аллаһын сүрүсүнү һәвәслә отарырлар
1 Јеһова, Оғлунун васитәсилә “инсанлар тимсалында һәдијјәләр” вермәклә, неҹә дә бөјүк гајғы ҝөстәрмишдир! (Ефес. 4:8, ЈД, 11, 12). Онларын чохсајлы вәзифәләриндән бири — Аллаһын сүрүсүнү чалышганлыгла вә сә’јлә отармагдыр (1 Пет. 5:2, 3). Бу чох лазымлы ишдир вә бизим һамымыза фајда ҝәтирир. Ағсаггаллар, чәтинликләрлә гаршылашан вә ја зәифликләри илә мүбаризә апаран, һәгигәтдә илк аддымлар атан вә ја бүдрәјән бүтүн инсанларын руһани рифаһына дәрин мараг ҝөстәрирләр (Филип. 2:4; 1 Салон. 5:12–14).
2 Дүнјада баш верән һәјәҹанландырыҹы һадисәләр бизи нараһат едәндә, бу чобанлар “јелдән сахланаҹаг бир јер кими вә туфана гаршы өртүлү бир јер кими” олурлар. Өзүмүзү јорғун вә ја јүкләнмиш һисс едәндә вә тәсәллијә еһтијаҹ дујанда, онлар бизә тәравәт верирләр. Онлар бизим үчүн “гураг јердә ахар сулар кими, јоруҹу дијарда бөјүк гаја көлҝәси” кимидирләр (Иш. 32:2).
3 Гејри–фәал оланлары руһландырырлар. Ағсаггаллар гејри–мүнтәзәм вә гејри–фәал оланлара, јығынҹағын бүтүн ишләриндә јенидән фәал иштирак етмәкдә көмәк едәрәк, онлары хүсуси тәрздә руһландырмаға чалышырлар. Ағсаггал зијарәтләри сајәсиндә гејри–фәал оланларын әксәријјәти јығынҹаг ҝөрүшләринә мүнтәзәм ҝәлмәјә башлајыр вә руһән о дәрәҹәдә мөһкәмләнирләр ки, јенидән тәблиғ етмәјә башлајырлар. Ағсаггалларын буна бәнзәр бүтүн ишләриндә Јеһованын зәриф гајғысы вә Иса Мәсиһин фәал рәһбәрлији әкс олунур. Исанын өзү, азмыш вә ја итмиш гојунлара гајғы ҝөстәрмәклә нүмунә вермишдир (Мат. 18:12–14; Јәһ. 10:16, 27–29).
4 Чобанлар, гојунлардакы руһани зәифлијин әламәтләрини мүәјјәнләшдирмәјә чалышырлар. Өзүндә мә’јуслуг әламәти ашкар едәнләр, јығынҹаға надир һалларда ҝәләнләр вә ја аз тәблиғ едәнләр, чох еһтимал ки, руһани көмәјә еһтијаҹ дујурлар. Ағсаггаллар, һәмчинин дүнјада дәбдә олан ләјагәтсиз ҝејимә вә хариҹи ҝөрүнүшә үстүнлүк вермәјә вә ја јығынҹаға тәнгиди јанашмаға башлајанлара да көмәк етмәјә чалышырлар. Сәмими мараг ҝөстәрәрәк вә инҹә һиссләр дујараг, гајғыкеш ағсаггаллар белә тәблиғчиләрә Јеһоваја олан мәһәббәтләрини јенидән алышдырмаға көмәк етмәјә чалышараг өз ҹанларыны һәвәслә вермәјә һазырдырлар (1 Салон. 2:8).
5 Елә олур ки, сағламлыгла әлагәдар јаранан проблемләр уҹбатындан, игтисади мүвәффәгијјәтсизлик вә ја аилә һәјатындакы чәтинликләр үзүндән, вәфтиз олунмуш бә’зи мәсиһчиләр јығынҹагла үнсијјәти дајандырыр вә руһани ҹәһәтдән гејри–фәал олурлар. Тәнгиддән гачынараг, ағсаггаллар онлары шәфгәтлә әмин едирләр ки, Јеһова бүтүн гојунларына гајғы ҝөстәрир вә онлара чәтин анларында јардым едир (Мәз. 55:22; 1 Пет. 5:7). Диггәтли чобанлар гојунлара көмәк едирләр ки, онлар “Аллаһа јахынлаш”арларса Аллаһын да онлара јахынлашаҹагыны, онлара тәсәлли верәҹәјини вә гүввәтләндирәҹәјини анласынлар (Јаг. 4:8; Мәз. 23:3, 4).
6 Зәифләрә дәстәк олурлар. Севән чобанлар, һәмчинин инсанлар тәрәфиндән хор ҝөрүлән кәсләрә дә гајғы ҝөстәрирләр. Һәр бир јығынҹагда, еһтимал ки, гоҹалар евиндә вә мүалиҹәханаларда јашајан зәиф вә хәстә адамлар вар. Ајдындыр ки, бу ҹүр вәзијјәтдә онлар чох тәблиғ едә билмирләр. Ола билсин ки, јалныз хәстә јанына ҝәләнләрә, хәстә бахыҹысына вә башга хәстәләрә тәблиғ едирләр. Буна бахмајараг, онларын едә билдикләринә, үмумдүнја тәблиғ ишинә гијмәтли һәдијјә кими бахылыр (Мат. 25:15).
7 “Инсанлар тимсалында һәдијјәләр” һәмиманлыларынын руһани тәләбатларына илин бу мөвсүмүндә, јазда, Хатирә Ҝеҹәсинин кечириләҹәји вахтда хүсуси диггәт јетирирләр. Бу, ағсаггалларын, хүсуси сә’ј ҝөстәрәрәк азмыш бүтүн тәблиғчиләрә јығынҹагла һәрарәтли үнсијјәтдән бир даһа севинҹ вә гәлб раһатлығы дујмагда көмәк етмәләри үчүн ән мүнасиб вахтдыр. Бу ҹүр баҹы–гардашлар — “иманлылар аиләси” — јығынҹаг ҝөрүшләринә ҝәләндә, фидијә гурбанлығына иманларыны јенидән тәсдигләјәрәк хидмәтдә иштирак едәндә, биз һамымыз бөјүк севинҹ һисси дујуруг (Галат. 6:10; Лука 15:4–7; Јәһ. 10:11, 14).