Аллаһын халгы кими “һәмаһәнҝ” шәкилдә бирләшибләр
1 Мәҝәр инсан бәдәнинин гурулушу сизи һејран етмирми? (Мәз. 139:14). Бәдәнин һәр бир һиссәси диҝәрләри илә һәмаһәнҝ сурәтдә фәалијјәт ҝөстәрир. Мүгәддәс Китаб мәсиһчи јығынҹағыны бу ҹүр ҝөзәл гурулуша малик олан бәдәнлә мүгајисә едир. Мәсиһин башчылығы алтында јығынҹағын бүтүн үзвләри “һәр бир буғумун јардымы илә һәмаһәнҝ олуб, тәшкил олунур” (Ефес. 4:16а). Јеһова өзүнүн бирләшмиш халгыны мәһарәтлә истифадә едәрәк, валеһедиҹи ишләр ҝөрүр.
2 Биринҹи әсрдә јығынҹағын үзвләри бир-бирләринин руһани вә мадди тәләбатлары үчүн бирликдә гајғы ҝөстәрирдиләр (Һәв. иш. 2:44-47). Онлар ҝүҹлү тә’гибләрлә гаршылашырдылар, лакин Јеһованын көмәји вә өз бирликләри сајәсиндә һәр шеји дәф едирдиләр (Һәв. иш. 4:24-31). Онлар ҝетдикләри һәр јердә Падшаһлыг һаггында хәбәри тәблиғ едир, хош хәбәри о заман мә’лум олан бүтүн дүнјаја јајырдылар (Колос. 1:23). Бизим ҝүнләрдә мәсиһчи јығынҹағы һәмин ишләри бөјүк мигјасда мүтәшәккил тәрздә һәјата кечирирләр. Бирлијимизә көмәк едән нәдир?
3 Аллаһын тә’лими илә бирләшибләр. Биз бүтүн дүнјада ибадәтимиздә мүтәшәккиллик тәшкил едирик. Нәјә ҝөрә? Чүнки Јеһованын бизи руһани ҹәһәтдән “вахтлы-вахтында... јемәк” илә тә’мин етдији каналы е’тираф едирик (Мат. 24:45). Биз, һәмчинин Онун јығынҹаглара мүәллимләр кими вердији “инсанлар тимсалында һәдијјәләри” дә јүксәк гијмәтләндиририк. Әҝәр Јеһованын вердији руһани гиданы һәлимликлә гәбул едириксә, Аллаһын Кәламыны анламаг габилијјәтимиз артаҹагдыр, бунун сајәсиндә исә бирликдә Исаны тәглид етмәк вә онун шаҝирдләри олмаг истәјимиз олаҹагдыр. Биз, сәмими гәлбдән “иманда... бирлијә” чатмаг үчүн, бундан сонра да Аллаһын Кәламыны өјрәнмәјә давам етмәлијик (Ефес. 4:8, ЈД, 11-13). Сән Мүгәддәс Китабы һәр ҝүн охујараг руһани бирлијимизә көмәк едирсәнми?
4 Мәсиһчи гардашлығында бирләшмишик. Мәһәббәт бизи, мәсиһчи јығынҹагларында гардашларымызла даһа да сых бағлајыр. Бу ҝөрүшләрдә бир-биримизи үрәкләндирмәк имканымыз вар (Ибр. 10:24, 25). Бунун үчүн һәмиманлыларымызла һәгиги мә’нада марагланмалы, јахындан таныш олмалы вә онлары дәјәрли шејләр кими гәбул едәрәк, онлара Јеһованын ҝөзү илә бахмалыјыг (Һаг. 2:7). Гардашларымызын өз иманларыны неҹә тәзаһүр етдикләрини ешидәндә, онлара олан мәһәббәтимиз даһа дәрин олур вә бирлик бағларымыз мөһкәмләнир. Өзүнү ҝөрүшләрә мүнтәзәм ҝәлән адам кими танытмысанмы?
5 Хидмәтдә әмәкдашлар. Һәмиманлыларымызла бирликдә хош хәбәри тәблиғ етмәк бизи, Аллаһын ирадәсини јеринә јетирмәкдә бирләшдирир. Һәвари Павел, “Аллаһын Падшаһлығы үчүн” онун әмәкдашлары оланлары чох гијмәтләндирирди (Колос. 4:11, И-93). Хидмәтдә олдуғумуз заман башымыза ҝәлән әһвалатлары данышараг бир-биримизә көмәк едәндә, мәсиһчи ишини јеринә јетирмәк асан олур вә бирлијимиз мөһкәмләнир (Колос. 3:14).
6 Мүгәддәс руһун бирләшдириҹи тә’сири. Диггәтимизи Јеһованын ирадәсини јеринә јетирмәјә ҹәмләшдирәндә, О бизә мүгәддәс руһуну верир. Бу исә бизә наразылыглары арадан галдырмаға вә гардашлар кими бир јердә јашамаға көмәк едир (Мәз. 133:1). Биз, һәмчинин “руһун вәһдәтини сүлһ бағы илә сахламаға сә’ј” ҝөстәририк (Ефес. 4:3). Һәр кәс башгалары илә үнсијјәтдә оларкән руһун сәмәрәсини тәзаһүр етдирмәклә, Аллаһын халгы арасында олан бирлијә өз көмәјини ҝөстәрә биләр (Галат. 5:22, 23).
7 Мәсиһин башчылығы алтында һәмаһәнҝ хидмәтимиз сајәсиндә “бәдән гамәтини артырыр ки, мәһәббәтлә инкишаф етсин” (Ефес. 4:16б). Бундан әлавә, бу ҹүр хидмәт, “сүлһ верән Аллаһ” Јеһованы иззәтләндирир (Ром. 16:20).