Гоһумунуз үнсијјәтдән мәһрум олунан заман Аллаһа сәдагәтли галын
1. Мәсиһчинин Аллаһа сәдагәти һансы сәбәбдән сынаға мә’руз гала биләр?
1 Аилә үзвләрини бир-биринә бағлајан телләр чох мөһкәм олур. Буна ҝөрә дә, мәсиһчинин һәјат јолдашы, ушағы, валидејнләриндән бири вә ја башга јахын гоһуму јығынҹагдан кәнар олунанда, ја да үнсијјәтдән имтина едәндә, онун Аллаһа сәдагәти сынаға мә’руз галыр (Мат. 10:37). Садиг мәсиһчиләр бу ҹүр гоһума неҹә мүнасибәт бәсләјәҹәкләр? Һәмин шәхсин мәсиһчиләрлә бир евдә јашамасы әһәмијјәт кәсб едирми? Ҝәлин әввәлҹә бу барәдә Мүгәддәс Китабда дејиләнләри нәзәрдән кечирәк. Мүгәддәс Китабын принсипләри јығынҹагдан мәһрум олунан вә үнсијјәтдән имтина едәнләрә ејни тәрздә тәтбиг едиләндир.
2. Мүгәддәс Китаба әсасән, мәсиһчиләр јығынҹагдан кәнар едиләнләрә неҹә мүнасибәт бәсләмәлидирләр?
2 Јығынҹагдан кәнар едиләнләрә неҹә мүнасибәт бәсләмәли. Аллаһын Кәламы мәсиһчиләрә, јығынҹагдан кәнар едилән һеч бир кәслә үнсијјәтдә олмамаг ҝөстәриши верир: “Өзүнү гардаш адландырыб, әхлагсызлыг, тамаһкарлыг, бүтпәрәстлик, аҹыдиллик, сәрхошлуг вә јахуд гәсбкарлыг едәнлә отуруб-дурмајасыныз. [...] Пис адамы сыраныздан кәнара атын” (1 Кор. 5:11, 13). Исанын Матта 18:17 ајәсиндә јазылан сөзләрин дә һәмән мәсәләјә аидијјаты вар: “Гој о [мәһрум олунан] сәнин үчүн бир бүтпәрәст вә верҝијыған кими олсун”. Исаны динләјән инсанлар билирдиләр ки, о заманлар јәһудиләр бүтпәрәстләрдән кәнар ҝәзирдиләр вә рәдд едилмиш адамлар кими верҝијығанлардан гачырдылар. Бу јолла, Иса давамчыларына јығынҹагдан кәнар едиләнләрлә үнсијјәтдә олмамаға даир ҝөстәриш верди (“Ҝөзәтчи Гүлләси”нин 1982-ҹи ил 1 март сајына, 10-12-ҹи сәһ. бах, рус.)
3, 4. Үнсијјәтдән мәһрум олунан вә ја имтина едән шәхслә һансы нөв үнсијјәт гадағандыр?
3 Бүтүн бунлар о демәкдир ки, Аллаһа сәдагәтләрини горујан мәсиһчиләр, јығынҹагдан кәнар едиләнләрлә руһани мөвзулара даир сөһбәт етмирләр. Лакин даһа артыг шеј тәләб олунур. Аллаһын Кәламында јазылыб ки, биз “һәтта беләләри илә бир јердә чөрәк белә” јемәмәлијик (1 Кор. 5:11). Беләликлә биз, јығынҹагдан кәнар едиләнлә достҹасына үнсијјәтдән дә гачынырыг. Онунла сејрә, ахшам гонаглығына, мағазаја вә ја театра ҝетмәјәҹәјик вә онунла һәр-һансы бир идман ојунлары ојнамајаҹаг, јахуд да ки, евдә вә ја ресторанда бирликдә јемәк јемәјәҹәјик.
4 Үнсијјәтдән мәһрум олунан шәхслә данышмаг олармы? Баш верә биләҹәк бүтүн һаллар Мүгәддәс Китабда нәзәрдән кечирилмәсә дә, Јәһјанын 2-ҹи мәктубунун 10-ҹу ајәси, бу саһәдә Јеһованын фикрини баша дүшмәкдә бизә көмәк едир: “Әҝәр бир кимсә јаныныза ҝәлиб бу тә’лими ҝәтирмәзсә, ону евә бурахмајын вә она салам вермәјин”. Бу ајәни шәрһ едәрәк, “Ҝөзәтчи Гүлләси”нин 1982-ҹи ил 1 март сајынын 17-ҹи сәһифәсиндә (рус.) гејд олунурду: “Адиҹә саламламаг үнсијјәтә, һәтта киминләсә достлуг әлагәсинин јаранмасына илк аддым ола биләр. Биз, үнсијјәтдән мәһрум олунан инсана мүнасибәтдә бу илк аддымы атмаг истәјирикми?”
5. Јығынҹагдан кәнар едилән шәхс нәдән мәһрум олур?
5 Һәмин “Ҝөзәтчи Гүлләси”нин 23-ҹү сәһифәсиндә дејилирди: “Е’тираф етмәк лазымдыр ки, ҝүнаһа тәслим олан вә үнсијјәтдән мәһрум олунаҹаг вәзијјәтә дүшән мәсиһчи чох шејдән — Аллаһын лүтфүндән... гардашларла хош үнсијјәтдән, һәмчинин мәсиһчи олан гоһумларла ҝениш үнсијјәтдән мәһрум олур”.
6. Мәсиһчидән тәләб олунурму ки, аиләнин дахилиндә јашајан јығынҹагдан кәнар едилмиш гоһуму илә һәр ҹүр үнсијјәти кәссин? Изаһ един.
6 Аиләдә јашајан гоһум. Јухарыда дејиләнләр о демәкдирми ки, јығынҹагдан кәнар едилмиш шәхслә бир евдә јашајанлар онунла данышмамалы, бирликдә чөрәк јемәмәли вә ҝүндәлик мәшғулијјәтләр заманы үнсијјәтдә олмамалыдырлар? “Ҝөзәтчи Гүлләси”нин 1991-ҹи ил 15 апрел сајында, 22-ҹи сәһифәдәки (рус.) һашијәдә гејд олунурду: “Јығынҹагдан кәнар едилән шәхс мәсиһчи аиләсиндә јашајырса, о, аиләнин ишләриндә вә евә даир ҝүндәлик мәшғулијјәтләрдә иштирак едир”. Беләликлә аиләнин үзвләри, үнсијјәтдән мәһрум олунан шәхслә истәр јемәк заманы, истәрсә дә ҝүндәлик башга ишләрдә онларла бир јердә олмаг гәрарыны гәбул етмәк ихтијарындадырлар. Буна бахмајараг, гардашларда елә тәәссүрат јаранмамалыдыр ки, һәр шеј үнсијјәтдән мәһрум олунмаздан әввәл олдуғу кимидир.
7. Аиләнин үзвү јығынҹагдан кәнар едилдикдә, аиләдәки руһани үнсијјәт неҹә дәјишилир?
7 “Ҝөзәтчи Гүлләси”нин 1982-ҹи ил 1 март сајында, 20-ҹи сәһифәдә (рус.) јығынҹагдан кәнар едилән вә ја үнсијјәтдән имтина едән шәхс һаггында сонра бунлар гејд олунурду: “Әввәлки руһани бағлар тамамилә гырылмышдыр. Бу, һәтта онун гоһумларына, о ҹүмләдән онунла бир евдә јашајан гоһумларына да аиддир. [...] Бу о демәкдир ки, бу вахта гәдәр мөвҹуд олан руһани мүнасибәтләрдә дәјишиклик баш верәҹәк. Мисал үчүн, әҝәр әр үнсијјәтдән мәһрум едилибсә, онда онун аиләви өјрәнмәјә рәһбәрлик етмәси вә ја Мүгәддәс Китабы бирҝә охумасы, ја да аиләни дуада тәгдим етмәси һәјат јолдашынын вә ушагларынын хошуна ҝәлмәјәҹәк. Әҝәр о, мәсәлән, јемәк јемәздән әввәл уҹадан дуа етмәк истәјирсә, онда буну өз евиндә етмәк ихтијарына маликдир. Амма бу заман башгалары Аллаһа өзләри сакитҹә дуа едә биләрләр (Сүл. мәс. 28:9; Мәз. 119:145, 146). Әҝәр аиләнин үнсијјәтдән мәһрум олунмуш үзвләриндән бири, диҝәрләри Мүгәддәс Китабы бирликдә охујаркән вә ја өјрәнәркән онларын јанында олмаг истәјәрсә нә етмәли? Әҝәр һәмин шәхс аиләнин галан үзвләрини өјрәтмәјә вә ја өз дини бахышларыны онларла бөлүшмәјә чалышмајаҹагса, галанлары онун иштирак етмәсинә иҹазә верә биләрләр”.
8. Мәсиһчи валидејнләр, онларла јашајан һәдди-бүлуға чатмамыш оғул вә ја гызларына мүнасибәтдә һансы мәс’улијјәти дашыјырлар?
8 Әҝәр валидејнләри илә бирликдә јашајан һәдди-бүлуға чатмамыш оғул вә ја гыз үнсијјәтдән мәһрум олунурса, онда валидејнләри әввәлки кими онун тәрбијәсинә ҹавабдеһдирләр. “Ҝөзәтчи Гүлләси”нин 1989-ҹу ил 15 сентјабр сајында, 17-ҹи сәһифәдә (рус.) дејилирди: “Онлар өз ушагларыны гида, ҝејим вә сығынаҹагла тә’мин етмәјә неҹә давам едирләрсә, ејни тәрздә дә Аллаһын Кәламына мүвафиг тә’лим вермәли вә тәрбијәви өлчүләр ҝөтүрмәлидирләр (Сүл. мәс. 6:20-22; 29:17). Демәли, севән валидејнләр, һәтта ушаг үнсијјәтдән мәһрум олунса да, онунла Мүгәддәс Китаб өјрәнмәси кечирә биләрләр. Әҝәр өјрәнмә јалныз онунла кечирилирсә, ола биләр ки, Мүгәддәс Китаб өјрәнмәсиндән даһа чох фајда әлдә едәҹәк вә дүзәләҹәк. Ја да валидејнләр белә гәрара ҝәлә биләрләр ки, ушаг онларла бирликдә Мүгәддәс Китабын аиләви өјрәнилмәсиндә иштирак едә биләр”. (Һәмчинин “Ҝөзәтчи Гүлләси”нин 2001-ҹи ил 1 декабр сајында 27, 28-ҹи сәһифәләрә дә бах.)
9. Мәсиһчи ајры јашајан үнсијјәтдән мәһрум олунмуш гоһуму илә нә дәрәҹәдә үнсијјәтдә олмалыдыр?
9 Ајры јашајан гоһумлар. “Ҝөзәтчи Гүлләси”нин 1988-ҹи ил 15 сентјабр сајында, 21-ҹи сәһифәдә (рус.) јазылырды: “Јығынҹагдан кәнар едилән вә ја үнсијјәтдән мәһрум олунан гоһум һәмин мәнзилдә аилә илә бирҝә јашамырса, вәзијјәт тамам башга ҹүрдүр. Чох еһтимал, һәмин гоһумла, демәк олар ки, үнсијјәтдә олмамаг мүмкүндүр. Әҝәр аилә ишләриндән һансыларса тәмасда олмаг еһтијаҹы јарадарса, бу имкан чох мәһдуд олмалыдыр”, бу исә Аллаһын биләрәкдән ҝүнаһ ишләдәнлә “отуруб-дурмајасыныз” ҝөстәришинә мүвафигдир (1 Кор. 5:11). Садиг мәсиһчиләр, һәтта ишҝүзар әлагәләри белә мәһдудлашдырараг, бу ҹүр гоһумла јерсиз үнсијјәтдән гачынаҹаглар. (Һәмчинин “Ҝөзәтчи Гүлләси”нин 1982-ҹи ил 1 март сајынын 21-22-ҹү сәһифәләринә дә бах, рус.)
10, 11. Мәсиһчи, үнсијјәтдән мәһрум олунан јахын гоһумуна онун евинә көчмәјә изин вермәздән әввәл нәји нәзәрә алаҹагдыр?
10 “Ҝөзәтчи Гүлләси”ндә, мүмкүн олан даһа бир вәзијјәт һаггында дејилирди: “Бәс үнсијјәтдән мәһрум едилән доғмалардан ким исә, мәсәлән, бир евдә јашамајан, сонрадан исә евә гајытмаг истәјән оғул вә ја валидејнләрдән биридирсә, онда нә етмәли? Вәзијјәтдән асылы олараг, нә етмәји аиләнин өзү гәрара ала биләр. Мисал үчүн, үнсијјәтдән мәһрум олунан ата вә ја ана хәстәләниб, јахуд да мадди вә ја физики ҹәһәтдән өз гајғысына гала билмир. Иманда олан ушаглар, Мүгәддәс Китаба вә әхлаг принсипләринә әсасән, јардым етмәјә борҹлудурлар (1 Тим. 5:8). [...] Онларын нә едәҹәји, еһтимал ки, чох амилләрдән, мәсәлән, ата вә ја ананын әсл тәләбатларындан, онларын дүшүнҹә тәрзиндән вә аилә башчысынын аиләсинин руһани рифаһына даир ҝөстәрдији гајғыдан асылы олаҹаг” (“Ҝөзәтчи Гүлләси”нин 1982-ҹи ил 1 март сајы, 19-21-ҹи сәһифәләр, рус.).
11 Һәмин мәгаләдә ушаглар барәсиндә дејилирди: “Бә’зән мәсиһчи валидејнләр үнсијјәтдән мәһрум олунмуш, сонрадан исә физики вә ја мә’нәви ҹәһәтдән хәстәләнән ушағы мүвәггәти олараг јенидән евләринә гәбул едирләр. Лакин һәр бир вәзијјәтдә валидејнләр фәрди олараг шәраити ҝөтүр-гој етмәлидирләр. Мәсәлән, вәзијјәт о јердәдирми ки, мәһрум олунмуш оғул артыг мүстәгил јашаја билмәјә? Јохса о, евдә јашамаг раһат олаҹаг дејәми гајытмаг истәјир? Онун әхлагы вә дүшүнҹә тәрзи һансы вәзијјәтдәдир? Аиләјә “маја” дахил етмәјәҹәк ки? (Галат. 5:9)”.
12. Ҝүнаһ ишләдән шәхсләрин үнсијјәтдән мәһрум олунмалары нәјә көмәк едир?
12 Јеһоваја ҝөстәрилән сәдагәт мүкафатландырылыр. Мүгәддәс Китабын үнсијјәтдән мәһрум едилмәјә даир принсипләринә риајәт етмәк вә төвбә етмәјән ҝүнаһкарлардан узаглашмаг фајдалыдыр. Бу, јығынҹағын тәмизлијини горујур вә бизи Мүгәддәс Китабын јүксәк әхлаг нормаларынын тәрәфдарлары кими фәргләндирир (1 Пет. 1:14-16). Бу бизи, парчалајыҹы тә’сирләрдән горујур (Галат. 5:7-9). Бу, һәмчинин ҝүнаһ ишләдән шәхсә, “салеһлијин динҹлик сәмәрәсини” һасил едән мәзәммәтдән там фајда әлдә етмәјә имкан верәҹәкдир (Ибр. 12:11).
13. Бир аилә һансы дәјишикликләри етди вә нәтиҹәси неҹә олду?
13 Рајон конгресиндә мә’рузәни динләдикдән сонра, бир гардаш вә онун баҹысы баша дүшдүләр ки, артыг алты илдир ки, үнсијјәтдән мәһрум олунан аналарына гаршы мүнасибәтләрини дәјишмәлидирләр. Конгресдән дәрһал сонра гардаш башга јердә јашајан анасына зәнҝ вуруб, ону севдикләрини билдирди вә изаһ етди ки, ваҹиб аилә мәсәләләрини шәхсән мүзакирә етмәк тәләб олунан һаллардан башга онунла үнсијјәтдә олмајаҹаглар. Тезликлә ана ҝөрүшләрә ҝәлмәјә башлады вә нәһајәтдә јенидән јығынҹағын үзвү олду. Бундан әлавә, онун бу јолда олмајан әри Мүгәддәс Китабы өјрәнмәјә башлады вә вахтилә вәфтиз олунду.
14. Үнсијјәтдән мәһрум олунма тәдбирләринә нәјә ҝөрә сәдагәтлә риајәт етмәлијик?
14 Үнсијјәтдән мәһрум олунмаг мәсәләсиндә Мүгәддәс Јазыларда тәсвир едилмиш тәдбирләрә сәдагәтлә риајәт етмәклә, Јеһоваја мәһәббәтимизи сүбут етмиш олаҹаг вә Онун адына ләкә ҝәтирәнә ҹаваб верәҹәјик (Сүл. мәс. 27:11). Өз нөвбәсиндә исә әмин ола биләрик ки, Аллаһ бизи мүкафатландыраҹагдыр. Давуд падшаһ Јеһова һаггында јазырды: “Ганунлары исә, онлардан мән ајрылмадым. Инајәтли [“сәдагәтли”, ЈД] илә инајәтли [“сәдагәтли”, ЈД] олурсан” (2 Сам. 22:23, 26).