Јеһованын јашлы хидмәтчиләрини гијмәтләндир
1 Дул олмасына вә јашынын өтмәсинә бахмајараг 84 јашлы Анна “мә’бәд әразисиндән һеч ајрылмаз” иди. Садиглијинә ҝөрә Јеһова она хүсуси хејир-дуа верди (Лука 2:36-38). Бу ҝүн чох баҹы-гардашлар мүхтәлиф чәтинликләрә бахмајараг, Аннаја бәнзәр тәрздә, ҝөзәл руһ тәзаһүр етдирирләр. Аллаһын садиг хидмәтчиләри хәстәләнәндә вә ја јашлы олдуглары үчүн әввәлләр етдији гәдәр хидмәт едә билмәјәндә, онлар руһдан дүшә биләрләр. Ҝәлин онлары руһландырмаға вә руһани фәалијјәт үчүн јахшы график тутмагда көмәк етмәјә даир бир нечә практики имканы нәзәрдән кечирәк.
2 Јығынҹаг ҝөрүшләри вә тәблиғ хидмәти. Гајғыкеш гардашлар јашлы баҹы-гардашлары ҝөрүш кечирилән јерә нәглијјатла ҝәтирәндә, јығынҹаг ҝөрүшләриндә мүнтәзәм олараг иштирак етмәк онлара бир гәдәр асан олур. Бу, һәм онлары — Јеһоваја узун илләр сәдагәтлә хидмәт едән јашлылары, һәм дә јығынҹағын диҝәр үзвләрини руһән мөһкәмләндирир. Сән јашлы инсанлара бу ҹүр јахшылыг етмисәнми? (Ибр. 13:16).
3 Тәблиғ хидмәтиндә мүнтәзәм иштирак етмәк мәсиһчиләрә севинҹ вә мәмнунлуг ҝәтирир. Лакин јашлы вә зәифләр үчүн бу иш чох чәтиндир. Елә етмәк олмазмы ки, јашлы олан әзиз баҹы-гардашларымыз хидмәтин бә’зи нөвләриндә сәнин ‘әмәкдашларын’ олсунлар? (Ром. 16:3, 9, 21). Онлары бирликдә телефонла шәһадәтлик етмәјә, кимә исә тәкрар баш чәкмәјә вә ја Мүгәддәс Китаб өјрәнмәси кечирмәјә дә’вәт етмәк олар. Әҝәр јашлы баҹы-гардашларымыз евдән чыха билмирләрсә, Мүгәддәс Китабы өјрәнән адам онун евинә ҝәлә билмәзми?
4 Өјрәнмә вә үнсијјәт. Һәрдәнбир бә’зиләри јашлы баҹы-гардашлары өзләринин аиләви өјрәнмәләринә дә’вәт едир, диҝәрләри исә бу ҹүр өјрәнмәни һәмин баҹы-гардашларын евиндә кечирирләр. Бир ана ики ушағы илә “Мәним Мүгәддәс Китаб һекајәләри китабым” нәшрини өјрәнмәк үчүн јашлы баҹынын евинә ҝедир. Бу ҹүр үнсијјәт исә гаршылыглы руһландырылмаја сәбәб олур. Јашлылары наһар јемәјинә вә ја бирликдә вахт кечирмәјә дә’вәт етдикдә дә миннәтдарлыг һисси дујурлар. Әҝәр јашлы баҹы вә ја гардаш өзүнү пис һисс едирсә вә узун сүрән зијарәтләр арзу олунмаздырса, онларла бирликдә нә исә охумаг, дуа етмәк вә ја руһландырыҹы һадисәләрлә бөлүшмәк үчүн онлара садәҹә олараг зәнҝ вурмаг вә ја гыса мүддәт үчүн баш чәкмәк олар (Ром. 1:11, 12).
5 Јеһова, јашлы хидмәтчиләрини гијмәтләндирир (Ибр. 6:10, 11). Әҝәр биз дә онлары гијмәтләндирәр вә руһани фәалијјәт үчүн јахшы графикә әсасән јашамагда онлара көмәк едәриксә, Јеһованы тәглид едә биләрик.