Суаллар гутусу
◼ Мәһбуслара тәблиғ едәркән һансы хәбәрдарлыглары нәзәрә алмаг лазымдыр?
Бүтүн дүнја үзрә һәбсханаларда тәхминән сәккиз милјон адам вар вә онлардан бә’зиләри хош хәбәрә мараг ҝөстәрирләр (1 Тим. 2:4). Бир филиал мәһбуслардан вә онларын гоһумларындан ајда орта һесабла 1 400 мәктуб алыр. Онлар бу мәктубларда Јеһованын Шаһидләриндән мәһбуслара әдәбијјат ҝөндәрмәји вә ја онлара баш чәкмәји хаһиш едирләр. Бир чох мәһбуслар һәгигәтлә доғрудан да мараглансалар да, тәҹрүбә ҝөстәрир ки, онларын бә’зиләри өзләрини марагланан кими ҝөстәрәрәк, Аллаһын хидмәтчиләриндән өз худбин мәгсәдләриндә истифадә етмәјә имкан ахтарырлар. Буну нәзәрә алараг, мәһбуслара тәблиғ едән тәблиғчиләрин һамысы еһтијатлы олмалыдыр.
Һәбсханаларда оланлара чох вахт мәктуб васитәсилә шәһадәтлик едилир. Исрарла мәсләһәт олунур ки, һәтта руһани ҹәһәтдән көмәк етмәк мәгсәдилә олса да, баҹылар мәһбус кишиләрлә мәктублашмасынлар. Бу ҹүр мәктублашманы јалныз тәҹрүбәли гардашлара һәвалә етмәк олар. Мүгәддәс Китаб һәгигәтинә сәмими мараг ҝөстәрән мәһбус гадынларла мәктубалашмағы исә, мүнасиб баҹылара тапшырмаг олар. Мәһбуслар хаһиш етсәләр дә, онлара пул вә ја һәдијјә ҝөндәрмәк лазым дејил.
Әҝәр мәһбус Мүгәддәс Китаб һәгигәти илә марагланырса, онун адыны вә үнваныны дустагхананын әразисиндә јерләшән јығынҹаға ҝөндәрмәк лазымдыр. Адәтән һәмин әразидә јашајан гардашлар мәһбусларла үнсијјәтдә олмагда тәҹрүбәлидирләр, буна ҝөрә бу вә ја диҝәр вәзијјәтдә нә етмәк лазым ҝәлдијини билирләр. Әҝәр бу мә’луматы һансы јығынҹаға ҝөндәрәҹәјинизи билмирсинизсә, филиала ҝөндәрин.
Тә’јин олунмуш гардашлар, ејни вахтда бир неҹә мәһбусун иштиракы илә һәбсханаларда ҝөрүшләр кечирирләрсә, бурада сәһв бир шеј јохдур. Лакин тәблиғчиләрин мәһбусларла азад сурәтдә үнсијјәтдә олмалары үчүн хүсуси тәдбирләр кечирмәк лазым дејил. Бундан әлавә исрарла мәсләһәт олунур ки, тәблиғчиләр лазыми һазырлыг олмадан, өзбашына һәбсханаја ҝедиб мәһбусларла јахын үнсијјәтдә олмасынлар.
Ҝәлин мәһбуслара хош хәбәри тәблиғ едәркән, ‘иланлар кими мүдрик вә ҝөјәрчинләр кими мә’сум олаг’ (Мат. 10:16).