Мүхтәлиф мәншәли инсанлар хилас олаҹаглар
1. Аллаһ гаршысындакы мөвгејимиз нәдән асылыдыр?
1 Аллаһын илтифаты хиласа јол ачмышдыр. Јеһованын ирадәси ондан ибарәтфир ки, һәр милләтдән олан «инсанлар хилас олуб, һәгигәти дәрк етсинләр» (1 Тим. 2:3, 4). Аллаһ гаршысындакы мөвгејимиз игримиздән, сосиал вәзијјәтимиздән, габилијјәт вә ја хариҹи ҝөрүнүшүмүздән јох, Исанын фидијә гурбанлығына иман ҝәтирмәјимиздән асылыдыр (Јәһ. 3:16, 36). Аллаһын әмәкдашлары олан бизләр, Јеһованын гәбул етмәјә һазыр олдуғу инсанлара гәрәзли мүнасибәт ҝөстәрмәк мејлиндән азад олмалыјыг.
2, 3. Инсанлары заһири ҝөрүнүшләринә ҝөрә мүһакимә етмәмәкдә бизә нә көмәк едә биләр?
2 Мүһакимә етмәјин. Јеһова инсанларын дахилән неҹә олдугларыны ҝөрүр вә онлара әдавәт вә гәрәзли мүнасибәт бәсләмир (1 Шам. 16:7). О, һәмчинин инсанларын потенсиал имканларыны да ҝөрүр. Буна ҝөрә дә Јеһова Она мәгбул олмаг истәјәнләрин һамысыны ҹаһ-ҹәлала бәнзәдир (Һаг. 2:7). Башгаларына Аллаһын нөгтеји-нәзәри илә бахырыгмы?
3 Тәблиғдә растлашдығымыз бә’зи инсанлар өз хариҹи ҝөрүнүшләрилә бизи чашгынлыға сала биләрләр. Онларын палтары сәлигәсиз вә ја әдәбсиз, саггалы пыртлашыг, јахуд да бурун вә ја додагларында һалга ола биләр. Евсизләрлә дә растлаша биләрик. Ким исә бизимлә кобуд даврана биләр. Бу ҹүр инсанларын һеч вахт Јеһованын хидмәтчиләри олмајаҹагларыны дүшүнмәк әвәзинә, мүсбәт әһвал-руһијјәјә малик олмалыјыг, «чүнки биз дә бир заманлар анлагсыз, итаәтсиз, јолуну азмыш» адамлар олмушуг (Тит. 3:3). Буну дәрк едәрәк, һәр бир кәсә, һәтта заһирән ләјагәтсиз ҝөрүнәнләрә белә тәблиғ етмәјә һазырыг.
4, 5. Биз Исанын вә Павелин нүмунәсиндән нә өјрәнирик?
4 Биринҹи әсрин нүмунәләри. Иса Мәсиһ, башгаларынын фикринҹә дүзәлмәси мүмкүн олмајан адамлара белә көмәк едирди (Лука 8:26-39). Иса пис әмәлләрә һеч заман ҝөз јуммаса да, о, бә’зи инсанларын шәраит уҹбатындан бу јола дүшдүкләрини хатырлајырды (Лука 7:37, 38, 44-48). Буна ҝөрә дә Исанын «онлара јазығы ҝәлди; чүнки чобансыз гојунлар кими идиләр» (Марк 6:34). Онун нүмунәсини тәглид едә биләрикми?
5 Һәвари Павел бир нечә дәфә даша басылмыш, дөјүлмүш вә зиндана атылмышдыр (Һәв. иш. 14:19; 16:22, 23). Бу ҹүр амансыз һаллар ону сәртләшдирдими? Бә’зи инсанлара вә халглара тәблиғ етмәк үчүн сәрф етдији вахтын әбәс олдуғуну дүшүндүмү? Әсла јох! Павел билирди ки, бүтүн халглар арасында сәмими гәлбли инсанлар вар вә о, бу ҹүр инсанлары тапмаға гәти гәрарлы иди. Тәблиғ саһәмиздә јашајан башга милләтләрә вә мәдәнијјәтләрә мәнсуб олан инсанлара биз дә бу ҹүр јанашырыгмы?
6. Јығынҹаг ҝөрүшләринә јени ҝәләнләрә мүнасибәтимиз онлара неҹә тә’сир бағышлаја биләр?
6 Башгаларыны саламлајырыг. Аллаһын хидмәтчиләринин чоху шаддыр ки, илк дәфә јығынҹаға ҝәләндә, хариҹи ҝөрүнүшләринә бахмајараг, баҹы-гардашларымыз онлары сәмимијјәтлә гаршыламышдылар. Алманијада Падшаһлыг Залына саггалы пыртлашыг, сачлары чијнинә дүшән вә чиркли палтарда бир киши ҝәлди. Пис ад газанмасына бахмајараг, ону меһрибанлыгла гаршыладылар. Бу она елә тәәссүрат бағышлады ки, бир һәфтәдән сонра јығынҹаға бир дә ҝәлди. Гыса вахт әрзиндә хариҹи ҝөрүнүшүнү сәлигәјә салды, сигарети атды вә јашадығы гадынла гануни никаһ бағлады. Бир мүддәтдән сонра, онлар вә ушаглары, меһрибан бир аилә кими Јеһоваја хидмәт етмәјә башладылар.
7. Инсанларын кимлијинә бахмајан Аллаһымызы неҹә тәглид едә биләрик?
7 Ҝәлин инсанларын кимлијинә бахмајан Аллаһымызы тәглид едәк вә Онун илтифатына һај вермәкдә һамыја көмәк едәк.
[3 сәһифәдәки шәрһ]
«Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур» (Һәвариләрин ишләри 10:34, 35).