«Онун изләри илә ҝедәк»
1. Јахшы тәблиғчи олмаг үчүн нә тәләб олунур?
1 Иса раввин мәктәбләриндә һеч вахт тәһсил алмаса да, тарихдә ән ҝөркәмли Хидмәтчи олмушдур. Хошбәхтликдән Исанын хидмәти һаггында јазылы мәлумат бизим фајдаланмағымыз үчүн горунуб сахланылмышдыр. Јахшы тәблиғчи олмаг истәјириксә, онун ‘изләри илә ҝетмәлијик’ (1 Пет. 2:21).
2. Инсанлары Мәсиһин севдији кими севмәјә бизә нә көмәк едәҹәк?
2 Инсанлара мәһәббәт ҝөстәр. Исаны хидмәтә тәшвиг едән инсанлара дујдуғу мәһәббәт долу гајғы иди (Марк 6:30-34). Әразимиздәки инсанларын әксәријјәти ‘ағры’ ичиндәдир вә һәгигәтә бөјүк еһтијаҹлары вар (Ром. 8:22). Онларын аҹынаҹаглы вәзијјәти вә Јеһованын онлара ҝөстәрдији мәһәббәт вә гајғы үзәриндә дүшүнмәк бизи тәблиғ ишинә давам етмәјә тәшвиг едәҹәк (2 Пет. 3:9). Бундан башга, инсанлар сәмими-гәлбдән онларын гајғысына галдығымызы һисс етсәләр, чатдырдығымыз хәбәрә даһа һәвәслә һај верәҹәкләр.
3. Иса һансы һалларда тәблиғ едирди?
3 Тәблиғ етмәк үчүн һәр фүрсәтдән истифадә ет. Иса хош хәбәри башгаларына чатдырмаг үчүн һәр фүрсәтдән истифадә едирди (Мат. 4:23; 9:9; Јәһ. 4:7-10). Буна бәнзәр тәрздә, биз дә ҝүндәлик ишләримизлә мәшғул оларкән һәгигәт һаггында данышмаға һазыр олмаг истәјирик. Бәзиләри Мүгәддәс Китабы вә әдәбијјаты әлләринин алтында сахлајырлар ки, ишдә, мәктәбдә, јол ҝедәндә, базарлыг едәндә вә саирә һалларда шаһидлик едә билсинләр.
4. Неҹә едә биләрик ки, Падшаһлыг тәблиғимизин әсас мөвзусу олсун?
4 Диггәти Падшаһлыға јөнәлт. Исанын тәблиғинин әсас мөвзусу Падшаһлыг һаггында хош хәбәр иди (Лука 4:43). Тәгдимәмиздә ола биләр, дәрһал вә ја бирбаша Падшаһлыг мөвзусуна тохунмасаг да, тәблиғ етдијимиз инсана Падшаһлығын ваҹиблијини ҝөстәрмәји јаддан чыхармырыг. Һәтта ахыр ҝүнләрдә јашадығымызы ҝөстәрән пис вәзијјәтдән данышанда белә, биз әсасән ‘јахшы шејләр мүждәләјирик’ (Ром. 10:15).
5. Хидмәтимизин сәмәрәли олмасы үчүн Мүгәддәс Китаба һансы јери вермәлијик?
5 Аллаһын Кәламына әсаслан. Иса бүтүн хидмәти бојунҹа Мүгәддәс Јазылара әсасланырды. О өзүндән һеч нә өјрәтмирди (Јәһ. 7:16, 18). Иса Аллаһын Кәламындан гидаланыр вә Шејтанын һүҹумуна мәруз галанда ондан истифадә едирди (Мат. 4:1-4). Башгаларыны јахшы өјрәтмәк үчүн, биз ҝүндәлик олараг Мүгәддәс Китабы охумалы вә тәтбиг етмәлијик (Ром. 2:21). Хидмәтдә верилән суаллары ҹавабландыраркән сөзләримизи Мүгәддәс Китабла тәсдиг етмәли вә имкан јарананда бирбаша Мүгәддәс Китабдан охумалыјыг. Биз истәјирик ки, һәмсөһбәтимиз дедикләримизин өзүмүзүн дејил, Аллаһын фикирләри олдуғуну ҝөрсүн.
6. Иса динләјиҹиләринин үрәјинә јол тапмаг үчүн нә едирди?
6 Өјрәдәркән инсанларын үрәјинә јол тап. «Инсанлар арасында бу Адам кими сөјләјән әсла олмамышдыр» (Јәһ. 7:46). Бу, баш каһинләрин вә фәрисејләрин Исаны нә үчүн тутмадыгларыны сорушдугда, мүһафизләрин онлара вердији ҹавабдыр. Иса садәҹә фактлары чатдырмырды, о елә тәлим верирди ки, бунунла инсанларын үрәјинә јол тапырды (Лука 24:32). О, сөзләринин ҹанлы олмасы үчүн һәјати нүмунәләр ҝәтирирди (Мат. 13:34). Иса динләјиҹиләрини һәддиндән артыг мәлуматла јүкләмирди (Јәһ. 16:12). О, диггәти өзүнә јох, Јеһоваја јөнәлдирди. Иса кими, биз дә јалныз ‘вердијимиз тәлимата диггәт јетирдијимиз’ тәгдирдә јахшы мүәллимләр ола биләрик (1 Тим. 4:16).
7. Иса нә үчүн хидмәтдә мәтанәтли иди?
7 Лагејд мүнасибәтә вә мүгавимәтләрә бахмајараг, мәтанәтли ол. Иса мөһтәшәм ишләр ҝөрсә дә, чохлары она гулаг асмырдылар (Лука 10:13). Һәтта аилә үзвләринә дә елә ҝәлмишди ки, о, «өзүндән чыхыб» (Марк 3:21). Анҹаг Иса мәтанәтини итирмәди. О, мүсбәт әһвал-руһијјәни горуду, чүнки там әмин иди ки, инсанлары азад едә биләҹәк һәгигәти чатдырыр (Јәһ. 8:32). Јеһованын көмәјилә биз дә руһдан дүшмәмәјә гәти гәрарлыјыг (2 Кор. 4:1).
8, 9. Хош хәбәр наминә гурбанлар вермәкдә Исаны неҹә тәглид едә биләрик?
8 Хидмәтдә там иштирак етмәк үчүн лазыми гурбанлар вер. Иса хидмәтә ҝөрә өз раһатлығыны гурбан верирди (Мат. 8:20). О, јорулмадан, бәзән исә сәһәрдән ахшама кими тәблиғ едирди (Марк 6:35, 36). Иса билирди ки, ишини баша чатдырмаг үчүн вахты мәһдуддур. ‘Вахт азалдығы’ үчүн бизә дә Исаны тәглид едәрәк вахтымызы, ҝүҹүмүзү вә вәсаитләримизи гурбан вермәк лазымдыр (1 Кор. 7:29-31).
9 Биринҹи әср мәсиһчиләри Исадан тәлим алдыглары үчүн јахшы тәблиғчи идиләр (Һәв. иш. 4:13). Тарихин ән ҝөркәмли Хидмәтчисини тәглид етсәк, биз дә хидмәтимизи там шәкилдә иҹра едә биләҹәјик (2 Тим. 4:5).