Аллаһын һакимијјәти алтында бүтүн варлыглар бирлик вә сүлһ ичиндә јашајырды
Нәјә ҝөрә Аллаһын Падшаһлығына еһтијаҹымыз вар?
Бәшәр тарихинин лап башланғыҹында Јараданымыз Јеһоваa јеҝанә Һөкмдар иди. О, мәһәббәтлә һакимијјәт сүрүрдү. Инсанларын јашамасы үчүн ҝөзәл Әдән бағы салмышды, онлары чешид-чешид гидаларла тәмин етмишди. Һәмчинин инсанлара шәрәфли иш тапшырмышды (Јарадылыш 1:28, 29; 2:8, 15). Бәшәријјәт Аллаһын рәһбәрлији алтында галсајды, һәмишә әмин-аманлыг ичиндә јашајаҹагды.
Илк инсанлар Аллаһы Һөкмдар кими рәдд етди
Мүгәддәс Китабда ҝөстәрилир ки, сонралар Шејтан Иблис адланан бир үсјанкар мәләк Аллаһын һөкмранлыг етмәк һүгугуну суал алтына алды. О иддиа етди ки, инсанлар Аллаһын һакимијјәтинә табе олмасалар, Онун мәсләһәти илә јашамасалар, даһа хошбәхт оларлар. Әфсуслар олсун ки, улу валидејнләримиз Адәмлә Һәвва Шејтанын далынҹа ҝетдиләр вә Аллаһа гаршы үсјан етдиләр (Јарадылыш 3:1—6; Вәһј 12:9).
Аллаһы Һөкмдар кими рәдд етдикләринә ҝөрә Адәмлә Һәвва ҹәннәтдән вә мүкәммәл сағламлыға саһиб олараг әбәди јашамаг үмидиндән мәһрум олдулар (Јарадылыш 3:17—19). Онларын гәрары сонрадан дүнјаја ҝәтирдикләри өвладларына да тәсир етди. Мүгәддәс Китабда дејилир ки, Адәм ҝүнаһ етдијинә ҝөрә ҝүнаһ дүнјаја дахил олду, өлүм дә ҝүнаһ васитәсилә дүнјаја ҝирди (Ромалылара 5:12). Ҝүнаһ башга бир фаҹиәјә дә јол ачды. Мүгәддәс Китабда бу аҹы һәгигәт белә тәсвир олунуб: «Инсанын инсана ағалыг етмәси инсанын зәрәринә олуб» (Ваиз 8:9). Башга сөзлә, инсанларын бир-бирини идарә етмәси онлара бәладан башга бир шеј ҝәтирмәјиб.
ИНСАН ҺАКИМИЈЈӘТИ ПЕЈДА ОЛУР
Нәмруд Јеһоваја гаршы үсјан етди
Мүгәддәс Китабда инсанлардан олан илк һөкмдар кими Нәмрудун ады чәкилир. О да Јеһованын һакимијјәтинә үсјан едиб. Нәмрудун дөврүндән бәри гүдрәтли инсанлар өз сәлаһијјәтләриндән суи-истифадә етмишләр. Тәхминән 3000 ил әввәл һикмәтли Сүлејман падшаһ јазмышды: «Мәзлумларын ҝөз јашыны ҝөрдүм, онлара тәсәлли верән јох иди. Ҝүҹ залымларын әлиндә иди» (Ваиз 4:1).
Бу ҝүн дә вәзијјәт ејнидир. 2009-ҹу илдә Бирләшмиш Милләтләр Тәшкилатынын бир нәшриндә јазылмышды ки, «ҹәмијјәтдәки бүтүн писликләрин әсас сәбәбләриндән биринин» пис һөкумәт олдуғу ҝетдикҹә даһа габарыг сурәтдә өзүнү бүрузә верир.
ВАХТ ЈЕТИШИБ!
Бәшәријјәтин јахшы рәһбәрләрә вә јахшы һөкумәтә еһтијаҹы вар. Јараданымыз да елә буну вәд едир!
Ән јахшы инсан һөкумәтләри белә бәшәријјәтин ҹидди проблемләрини һәлл етмәк игтидарында олмајыб
Аллаһ бир Падшаһлыг, башга сөзлә, һөкумәт тәсис едиб. Бу Падшаһлыг бүтүн инсан һөкумәтләрини девирәҹәк, өзү исә әбәди дураҹаг (Дәнјал 2:44). Милјонларла инсанын дуа етдији Падшаһлыг һәмин бу Падшаһлыгдыр (Мәтта 6:9, 10). Лакин Аллаһ бу Падшаһлығы Өзү идарә етмәјәҹәк. О, бир заманлар јер үзүндә јашамыш бир кәси Падшаһ тәјин едиб. Бәс ҝөрәсән о кимдир?
[Һашијә]
a Мүгәддәс Китаба әсасән, Аллаһын ады Јеһовадыр (Зәбур 83:18).