Хидмәтдә әлимдән ҝәләни едирәмми?
1. Садиг мәсиһчиләри нә нараһат едә биләр?
1 Нә вахтса өзүнүзә белә бир суал вермисинизми? Ола билсин, гоҹалыг вә зәиф сәһһәтиниз уҹбатындан, јахуд да аилә мәсулијјәтиниз артдығындан хидмәтдә әввәлкиндән даһа аз иштирак етдијиниз үчүн мәјуслуға гапылырсыныз. Үч ушаг бөјүдән бир баҹы јазыр ки, аиләсинин гајғысына галмаг үчүн чохлу вахт вә гүввә сәрф етдијиндән хидмәтә чох аз вахты галыр, буна ҝөрә дә виҹданы ону нараһат едир. Бу кими мәсәләләрдә таразлы олмаға нә көмәк едәр?
2. Јеһова биздән нә ҝөзләјир?
2 Јеһова биздән нә ҝөзләјир? Шүбһәсиз, бизләрдән һәр биримиз хидмәтдә даһа чох иштирак етмәк истәјирик. Лакин чох вахт арзуларымызла имканларымыз үст-үстә дүшмәјә биләр. Даһа чох хидмәт етмәк истәмәјимиз өзүмүздән разы инсан олмадығымызы ҝөстәрир. Анҹаг унутмамалыјыг ки, Јеһова имканларымызын мәһдуд олдуғуну билир вә ҝүҹүмүздән артыг һеч нә тәләб етмир (Мәз. 103:13, 14). Јахшы, бәс онда О, биздән нә ҝөзләјир? Јеһова истәјир ки, биз әлимиздән ҝәләни едәрәк Она ҹанла-башла хидмәт едәк (Колос. 3:23).
3. Хидмәтдә ҝүҹүмүзүн нәјә чатдығыны неҹә мүәјјән едә биләрик?
3 Бәс нәјә ҝүҹүмүз чатдығыны биз неҹә мүәјјән едә биләрик? Дуада Јеһовадан хаһиш едә биләрик ки, вәзијјәтимизи олдуғу кими ҝөрмәјә көмәк етсин (Мәз. 26:2). Бизи јахшы таныјан вә нәдә дәјишиклик етмәли олдуғумузу демәјә чәкинмәјән етибарлы вә јеткин мәсиһчи достумуз да бу ишдә бизә көмәк едә биләр (Сүл. мәс. 27:9). Һәмчинин унутмаг лазым дејил ки, вәзијјәтимиз һәр ан дәјишә биләр, буна ҝөрә дә өз шәраит вә имканларымызы мүнтәзәм олараг нәзәрдән кечирмәк јахшы оларды (Ефес. 5:10).
4. Хидмәтә даир алдығымыз хатырлатмалара неҹә јанашмалыјыг?
4 Хатырлатмалара неҹә јанашмалыјыг? Адәтән, гачыш үзрә јарышларда азаркешләр иштиракчылары јарыша һәвәсләндирирләр. Онларын мәгсәди јарышчылары чашдырмаг јох, һәдәфә чатмаға көмәк етмәкдир. Ејнилә, јығынҹаг ҝөрүшләриндә вә нәшрләримиздә јубанмадан тәблиғ етмәјә тәшвиг олунмағымыз вә алдығымыз хатырлатмалар бизим хејримизә хидмәт едир вә онларын мәгсәди сәјләримизин кифајәт гәдәр олмадығыны ҝөстәрмәк дејил (2 Тим. 4:2). Әмин ола биләрик ки, әҝәр әлимиздән ҝәләни етмәјә чалышсаг, Јеһова Онун ады наминә ҝөстәрдијимиз «мәһәббәти» вә чәкдијимиз зәһмәти унутмајаҹаг (Ибр. 6:10).