«Аллаһын Падшаһлығы һаггында ‘әтрафлы шәһадәт верин’»
1. Мартын 14-дән етибарән Јығынҹағын Мүгәддәс Китаб өјрәнмәсиндә нә мүзакирә олунаҹаг?
1 Јығынҹағын Мүгәддәс Китаб өјрәнмәсиндә 2011-ҹи ил мартын 14-дән етибарән «Аллаһын Падшаһлығы һаггында ‘әтрафлы шәһадәт верин’» адлы китаб мүзакирә едиләҹәк. «Һәвариләрин ишләри» китабыны әһатә едән бу нәшр елә тәртиб олунуб ки, охуҹу орада сүрәтлә инкишаф едән һадисәләрин иштиракчысына чевриләрәк һисс-һәјәҹаны јашаја билсин. «Шәһадәт верин» китабынын мәгсәди «Һәвариләрин ишләри» китабыны ајәбәајә арашдырмаг јох, орада јазылан һадисәләрдән дәрс ҝөтүрмәкдә вә өјрәндикләримизи шәхсән неҹә тәтбиг едәҹәјимизи анламагда бизә көмәк етмәкдир (Ром. 15:4).
2. «Шәһадәт верин» китабынын бәзи сәҹијјәви хүсусијјәтләрини садалајын.
2 Китабын диггәтәлајиг ҹәһәтләри. 2-ҹи сәһифәдәки ҝириш сөзләри Рәһбәрлик Шурасынын сәмими мәктубундан ибарәтдир. Онлар арзу едирләр ки, биз бу нәшрдән фајда әлдә едәк. 2-ҹи фәсилдән башлајараг һәр фәслин әсас мөвзусу вурғуланыр вә «Һәвариләрин ишләри» китабынын һансы һиссәсинин арашдырылаҹағы ҝөстәрилир. Бир чох фәсилләрдә инсанлар, јерләр вә һадисәләр һагда гыса мәлумат верән чәрчивәләр јерләшир. Сәһифәләрин кәнарларында бурахылмыш ҝениш бош јерләрдә өјрәнмә заманы гејдләр апармаг олар. Китабда Мүгәддәс Јазылардакы сәһнәләри тәфәррүатына кими тәсвир едән вә ваҹиб һадисәләри тәсәввүрүмүздә ҹанландырмаға көмәк едән рәсмләр, еләҹә дә сонунҹу сәһифәдә бу шәкилләри изаһ едән индекс вар. Китабын өн вә арха форзасларында биринҹи әсрдәки һәмиманлыларымызын хош хәбәри «јерин уҹгарларынадәк» неҹә јајдыгларыны ајдын ҝөрмәјә көмәк едән хәритәләр јер алыр (Һәв. иш. 1:8).
3. «Һәвариләрин ишләри» китабыны арашдыраркән һансы ваҹиб суаллара ҹаваб тапаҹағыг?
3 Ваҹиб суаллара ҹаваб. «Һәвариләрин ишләри» китабы мәсиһчи хидмәти илә бағлы суаллара ајдын ҹаваб тапмаға көмәк едәҹәк. Мәсәлән, һансы иш вә хәбәр Иса Мәсиһин әсил давамчыларыны танымаға көмәк едир? Үмумдүнја тәблиғ ишинә ким вә неҹә рәһбәрлик едир? Тәгиб вә мүгавимәтләр заманы Аллаһын хидмәтчиләринин һансы имканы јараныр? Мүгәддәс руһ хидмәтимиздә һансы ролу ојнајыр?
4. Бу нәшрдән там фајданы неҹә әлдә едә биләрик?
4 Тәгдим олунан бу нәшрдән там фајда әлдә етмәк үчүн әввәлҹәдән һазырлаш вә јығынҹагда мүзакирәдә иштирак ет. Һеч бир ҝөрүшдән галмамаға вә хидмәтдә тәтбиг едә биләҹәјин дәрсләрин үзәриндә дүшүнмәјә чалыш. Гој бу мараглы нәшрин мүзакирәси бизи Аллаһын падшаһлығы һаггында әтрафлы шәһадәт вермәјә тәшвиг етсин (Һәв. иш. 28:23).