Еһтијат тәблиғчинин јарашығыдыр
1. Нәјә ҝөрә тәблиғ хидмәтиндә еһтијатлы олмаг ваҹибдир?
1 «Позғун вә әхлагсыз нәслин ичиндә» тәблиғ едән Аллаһын хидмәтчиләри, санки, «ҹанаварлар арасына гузу кими» ҝөндәрилибләр (Мат. 10:16; Филип. 2:15). Дүнјаны бүрүјән иғтишашларын, күтләви һүҹумларын вә инсан оғурлуғу кими амансыз ҹинајәтләрин артмасы барәдә арды-арасы кәсилмәјән мәлуматлар пис инсанларын «даһа да пис ишләр» ҝөрдүкләринә дәлаләт едир (2 Тим. 3:13). Һансы Мүгәддәс Китаб принсипләри хидмәтдә «еһтијатлы» олмаға бизә көмәк едә биләр? (Мат. 10:16).
2. Һансы вәзијјәтләрдә тәблиғ етдијимиз әразини тәрк едиб хидмәтимизи башга јердә давам етдирмәк мәсләһәтдир?
2 Узагҝөрән олун. Сүлејманын мәсәлләри 22:3 ајәсиндә вурғуланыр ки, тәһлүкәдән гачмаг мүдрик һәрәкәтдир. Еһтијаты әлдән вермәјин! Тәһлүкәсизлијин һөкм сүрдүјү әразидә вәзијјәт ҝөзләнилмәдән дәјишә биләр. Ола билсин, сиз дә күчәләрдә полисләрин фәалијјәтинин артмасынын вә ја инсанларын күтләви шәкилдә топлашмасынын шаһидисиниз. Бәзән һансыса ев саһиби јахшы нијјәтдән ирәли ҝәләрәк тәһлүкә барәдә бизи хәбәрдар едир. Белә һалларда мараг хатиринә һәмин әразидә галмаг әвәзинә, ораны дәрһал тәрк едиб хидмәтимизи башга јердә давам етдирмәк узагҝөрәнлик әламәти оларды (Сүл. мәс. 17:14; Јәһ. 8:59; 1 Салон. 4:11).
3. Ваиз 4:9 ајәсиндәки принсип хидмәтимизлә неҹә бағлыдыр?
3 Әмәкдашлыг един. Ваиз 4:9 ајәсиндә дејилир: «Ики адам бир адамдан јахшыдыр». Ола билсин, сиз тәк хидмәт етмәји адәт етмисиниз вә индијәдәк башыныза бир иш ҝәлмәјиб. Бәс инди дә белә етмәк тәһлүкәсиздирми? Бәзи јерләрдә тәһлүкәсиздир. Лакин диҝәр јерләрдә баҹынын вә ја ҝәнҹ тәблиғчинин саһәни тәкбашына ишләмәси (хүсусилә дә ҝүнбатандан сонра) тәһлүкәлидир. Тәҹрүбә ҝөстәрир ки, јанымызда диггәтли әмәкдашын олмасынын јерини һеч нә верә билмәз (Ваиз 4:10, 12). Әҝәр груп шәклиндә тәблиғ едирсинизсә, сизинлә бирҝә хидмәт едән тәблиғчиләрин дә тәһлүкәсизлијини дүшүнүн. Саһәни тәрк едәндә чалышын, һәмишә онлара бу барәдә хәбәр верәсиниз.
4. Бүтүн јығынҹағын тәһлүкәсизлијини тәмин етмәк үчүн нә етмәк олар?
4 Рифаһынызы дүшүнән ағсаггалларын јерли әразинин тәләбатына ујғун ҝөстәришләр вермәк мәсулијјәти вар (Ибр. 13:17). Әмин ола биләрик ки, әҝәр биз бир мәсиһчи кими тәвазөкарлыг тәзаһүр етдирир вә онларла там әмәкдашлыг едириксә, Јеһова хејир-дуасыны биздән әскик етмәјәҹәк (Мик. 6:8; 1 Кор. 10:12). Ҝәлин тәјин олунмуш әразимиздә сәмәрәли шаһидлик вермәк ишинә өз төһфәмизи верәрәк еһтијат тәдбирләрини һеч вахт јадымыздан чыхартмајаг!