Нифрәт зәнҹиринин башланғыҹы

Нифрәт нәдир?

Нифрәт бир адама, јахуд бир груп инсана гаршы дәрин икраһ, кин, наразылыг һиссидир. Бу, садәҹә кимәсә гаршы ани олараг гәзәбләнмәк дејил, үрәкдә көк салмыш гәзәбдир.

НӘЈӘ ҜӨРӘ ИНСАНЛАРДА НИФРӘТ ЈАРАНЫР?

Нифрәтин јаранмасына бир сыра сәбәбләр вар. Чох вахт инсанлара әмәлләринә ҝөрә јох, садәҹә ким олдугларына ҝөрә нифрәт едирләр. Онлара пис адам кими бахырлар, нијјәтләрини писә јозурлар вә дүшүнүрләр ки, һеч вахт јахшылыға доғру дәјишә билмәзләр. Белә инсанлара јухарыдан ашағы бахырлар, тәһлүкә мәнбәји кими јанашырлар, һәр шејин ҝүнаһкары һесаб едирләр. Бәзән исә инсанларын башгаларына нифрәт етмәсинин сәбәби о олур ки, онлар өзләри зоракылыгла, әдаләтсизликлә вә диҝәр хошаҝәлмәз һалларла үзләширләр. Бүтүн бунлар онларын үрәјиндә кин, әдавәт һиссини аловландырыр.

НИФРӘТ НЕҸӘ ЈАЈЫЛЫР?

Бәзән инсан һәтта билаваситә тәмасда олмадығы кәсләрә дә нифрәт едир. Буна сәбәб исә о олур ки, инсан өзү дә билмәдән доғмаларынын, һөрмәт етдији адамларын фикирләринин тәсири алтына дүшүр. Беләҹә, нифрәт асанлыгла јајылыб әтрафдакылара да сирајәт едир.

Демәли, нифрәтин ҹәмијјәти ҹәнҝинә алмасынын бир сәбәби онун јолухуҹу олмасыдыр. Анҹаг нифрәт зәнҹирини гырмаг үчүн ҝәрәк бу зәнҹирин башланғыҹынын һара ҝедиб чыхдығыны биләк. Буну билмәкдә бизә Мүгәддәс Китаб көмәк едә биләр.

НИФРӘТИН КӨКҮ

НИФРӘТИН КӨКҮНДӘ ИНСАНЛАР ДУРМУР. Нифрәтин тәмәли бир мәләјин Аллаһа үсјан етмәсилә гојулду. Белә ки, о үсјан етмәклә гатил олду. Сонрадан Шејтан вә Иблис адыны алан бу мәләк јаланчы вә јаланын атасыдыр. Бу хисләтиндән әл чәкмәјәрәк о бу ҝүнә гәдәр нифрәти, зоракылығы јајмаға давам едир (Јәһја 8:44; 1 Јәһја 3:11, 12). Бу мәләк Мүгәддәс Китабда мәкрли, гәзәбли вә амансыз бир варлыг кими тәсвир олунур (Әјјуб 2:7; Вәһј 12:9, 12, 17).

ИНСАНЛАРДА НИФРӘТӘ АНАДАНҜӘЛМӘ МЕЈИЛ ВАР. Илк инсан олан Адәм Шејтанын јолу илә ҝедиб ҝүнаһ етди. О, ҝүнаһы вә гејри-камиллији ирсән өвладларына өтүрдү. Бунун нәтиҹәсиндә бүтүн инсанлар ҝүнаһлы доғулур (Ромалылара 5:12). Адәмин илк оғлу Габил гардашы Һабилә елә кин-күдурәт бәсләјирди ки, онун һәјатына гәсд етмишди (1 Јәһја 3:12). Дүздүр, бу ҝүн башгаларына мәһәббәтлә, шәфгәтлә јанашан инсанлар вар. Анҹаг ирсән кечән ҝүнаһ уҹбатындан әксәр инсанлар худбин, пахыл, гүрурлудур. Бу хүсусијјәтләр исә нифрәти аловландырыр (2 Тимутијә 3:1—5).

ДӨЗҮМСҮЗЛҮК НИФРӘТИ ГЫЗЫШДЫРЫР. Јашадығымыз дүнјада рәһмсизлик, амансызлыг аб-һавасы һөкм сүрүр. Бу исә нифрәти гызышдырыр. Һазырда дөзүмсүзлүк, гәрәз, тәһгир, тәһдид, вандализм баш алыб ҝедир, чүнки бүтүн дүнја Шәририн әлиндәдир (1 Јәһја 5:19).

Анҹаг Мүгәддәс Китаб садәҹә нифрәтин көкүнү ачыб ҝөстәрмәклә кифајәтләнмир, онун һәлл јолуну да бизә ачыглајыр.