НИФРӘТ ЗӘНҸИРИНИ НЕҸӘ ГЫРМАГ ОЛАР?
3 | Дүшүнҹәнизи дәјишин
Тәлим:
«Бундан сонра бу зәманәјә ујғунлашмајын. Әксинә, дүшүнҹәнизи јениләшдирәрәк бүсбүтүн дәјишин ки, Аллаһын јахшы, хош вә камил ирадәсини дәрк едәсиниз» (РОМАЛЫЛАРА 12:2).
Мәнасы:
Аллаһ бизим дүшүнҹәләримизә фикир верир (Әрәмја 17:10). Дүздүр, нифрәт долу сөзләрдән, әмәлләрдән узаг дурмалыјыг. Анҹаг бир шеј вар ки, нифрәт инсанын үрәјиндә, ағлында баш галдырыр. Буна ҝөрә дә нифрәт ојадан фикирләри дәрһал ағлымыздан силиб атмалыјыг. Јалныз бу һалда биз бүсбүтүн дәјишиб, нифрәт зәнҹириндән гуртула биләрик.
Сиз нә едә биләрсиниз?
Башгалары һагда, хүсусән дә башга иргдән вә милләтдән олан инсанлар һагда нә дүшүндүјүнүзү дүрүст шәкилдә јохлајын. Өзүнүздән сорушун: «Мән онлара неҹә јанашырам? Мәним бу мүнасибәтим онлар һагда шәхсән билдијим фактлара әсасланыр? Јохса бу мүнасибәтимин көкүндә гәрәз дурур?» Нифрәтин, зоракылығын јер алдығы сосиал медиадан, филмләрдән, јахуд әјләнҹәдән узаг дурун.
Аллаһын Кәламы нифрәти үрәјимиздән вә ағлымыздан гопарыб атмаға көмәк едә биләр
Өз фикирләримизи, һиссләримизи дүрүстҹәсинә јохламаг елә дә асан дејил. Амма Аллаһын Кәламы бизә үрәјимизин «дүшүнҹә вә нијјәтләрини үзә» чыхармаға көмәк едә биләр (Ибраниләрә 4:12). Одур ки, Мүгәддәс Китабы охујуб арашдырын. Фикирләринизи орада јазыланларла мүгајисә един вә онлара ујғунлашдырмаг үчүн вар ҝүҹүнүзлә чалышын. Нифрәт һисси үрәјиниздә вә ағлынызда көк салан ҝүҹлү истеһкам олса белә, Аллаһын Кәламынын көмәји илә ону гопарыб ата биләрсиниз (2 Коринфлиләрә 10:4, 5).