2 | Мүгәддәс Китаб тәсәлли верир

МҮГӘДДӘС КИТАБДА ДЕЈИЛИР: «Әввәлҹәдән јазыланларын һамысы бизә нәсиһәт олараг јазылыб ки, дөзүм сајәсиндә вә Мүгәддәс Јазылардан алдығымыз тәсәлли сајәсиндә үмидимиз олсун» (РОМАЛЫЛАРА 15:4).

Мәнасы

Мүгәддәс Китабда инсана тәсәлли верән ајәләр чохдур. Онлары охудугҹа инсан өзүндә ҝүҹ тапыб мәнфи дүшүнҹәләрлә мүбаризә апара билир. Орада һәмчинин үмидвериҹи бир хәбәр дә вар: чох тезликлә бизә әзаб верән һиссләрдән бирдәфәлик гуртулаҹағыг.

Неҹә тәтбиг едә биләрик?

Бәзән һәр биримизин кәдәрли олдуғу, нараһатлыг кечирдији анлар олур, лакин депрессијада олан, јахуд тез-тез нараһатлыг кечирән инсанлар бу һиссләрлә һәмишә мүбаризә апарырлар. Мүгәддәс Китаб неҹә көмәк едә биләр?

Мүгәддәс Китабда мәнфи фикирләри говмаға көмәк едән чохлу мүсбәт фикирләр вар (Филиппилиләрә 4:8). Аллаһын Кәламынын сајәсиндә дүшүнҹәмизи бизә тәсәлли верән, бизи овудан фикирләрлә гидаландыра биләрик. Нәтиҹәдә, һиссләримизи идарә етмәк даһа асан олаҹаг (Зәбур 94:18, 19).
Мүгәддәс Китаб дәјәрсизлик һиссиндән гуртулмаға бизә көмәк едә биләр (Лука 12:6, 7).
Мүгәддәс Китабын бир чох ајәләриндә дејилир ки, биз тәк дејилик вә Аллаһ кечирдијимиз һиссләри чох јахшы баша дүшүр (Зәбур 34:18; 1 Јәһја 3:19, 20).
Аллаһ Мүгәддәс Китабда вәд едир ки, әзаблы хатирәләрин изи-тозу белә галмајаҹаг (Әшија 65:17; Вәһј 21:4). Мәнфи емосијалар, фикирләр бизә әзаб верәндә бу вәд дөзмәк үчүн ҝүҹ верәҹәк.

Мүгәддәс Китабын көмәји. Ҹесика

Депрессијанын һәјатыма тәсири

«25 јашым оланда әсәб партламасы јашадым вә мәнә ағыр депрессија диагнозу гојулду. Тез-тез пис хатирәләр јадыма дүшүр, мәнә әзаб верирди. Һәкимләрин көмәји сајәсиндә баша дүшдүм ки, мәндәки депрессијанын сәбәби тез-тез мәнфи фикирләрә гапылмағым иди. Бу, кечмишдә јашадығым травмалардан гајнагланырды. Дәрман гәбулундан әлавә, терапија да алдым. Бу мәнә гејри-сағлам дүшүнҹәләри мүәјјән едиб, онларла мүбаризә апармаға көмәк етди.

Мүгәддәс Китабын мәнә фајдасы

Депрессијамын лап ағыр дөнәмләриндә ҝүҹлү нараһатлыг һисси, паник атак кечирирдим вә јухусуз галырдым. Чох вахт ҝеҹәләр бејнимдә нараһат дүшүнҹәләр долашыр, мәни тәлаша салырды. Зәбур 94:19 ајәсиндә дејилир ки, фикирләр бизи чулғајанда Аллаһ бизә тәсәлли вериб овуда биләр. Буна ҝөрә дә, руһландырыҹы ајәләри јаздығым дәфтәри вә Мүгәддәс Китабы јатағымын јанына гојурдум. Јухум гачанда онлары охујуб Аллаһын Кәламындан тәсәлли алырдым.

Мүгәддәс Китаб инсаны тәшвиг едир ки, Аллаһ һагда билдији јанлыш фикирләри рәдд етсин. Әввәлләр өзүмү дәјәрсиз һесаб едирдим, фикирләширдим ки, һеч ким мәни севмир, һеч бир ишә јарамырам. Лакин сонрадан өјрәндим ки, бу ҹүр дүшүнҹәләр Аллаһын Кәламына зиддир, чүнки орада Аллаһын мәһәббәтли, шәфгәтли олдуғу, һәр биримизин гејдинә галдығы дејилир. Тәдриҹән фикирләримин әсири јох, ағасы олдум. Өзүмә мәһәббәтли Аллаһын нәзәри илә бахмаға башладым. Бу өзүмлә бағлы јанлыш дүшүнҹәләри дәф етмәјим үчүн ваҹиб бир аддым олду.

Билирәм ки, тезликлә психоложи проблемләр олмајаҹаг, әзаблы хатирәләр кечмишдә галаҹаг. Бу мәнә инди дөзүмлү олмаға, мүбаризә апармаға ҝүҹ верир вә депрессијадан тамамилә гуртулаҹағым о ҝүнү сәбирсизликлә ҝөзләмәјә көмәк едир».