Јеһованын ҝәләҹәк һөкмләри илә бағлы нәји билирик?

1. Тарихин һәјәҹанлы бир дөврүндә јашадығымызы нәләр ҝөстәрир?

БИЗ тарихин чох һәјәҹанлы дөврүндә јашајырыг! Мүгәддәс Китабдакы пејғәмбәрликләр һәр ҝүн ҝөзүмүзүн өнүндә јеринә јетирир. Мәсәлән, «шимал падшаһы» илә «ҹәнуб падшаһы»нын дүнјаја ағалыг етмәк уғрунда бир-бири илә чәкишдијини ҝөрүрүк (Дән. 11:40). Аллаһын Падшаһлығы һаггында мүждә ҝөрүнмәмиш мигјасда тәблиғ олунур. Милјонларла инсан хош хәбәрә мүсбәт һај верир (Әшј. 60:22; Мәт. 24:14). Һәмчинин биз «вахтлы-вахтында» бол руһани гида алырыг (Мәт. 24:45—47).

2. Нәји дәгиг билирик вә нәји гәбул етмәк лазымдыр?

² Чох тезликлә дүнјада мүһүм һадисәләр баш верәҹәк. Јеһова һәмин һадисәләри ҝетдикҹә даһа ајдын баша дүшмәјимизә көмәк едир (Мәс. 4:18; Дән. 2:28). Бир шеј дәгигдир: бөјүк мүсибәт башламаздан әввәл биз артыг биләҹәјик, һәмин чәтин дөврдә сәдагәт вә дөзүм ҝөстәрмәк вә бирлијимизи горумаг үчүн нә етмәлијик. Амма гәбул етмәк лазымдыр ки, јахын ҝәләҹәјимизлә бағлы билмәдијимиз шејләр дә вар. Бу мәгаләдә һәмин һадисәләрдән бәзиләри һагда данышаҹағыг. Ҝөрәк онлар һагда дедикләримизә нәјә ҝөрә дүзәлиш етмәк лазым ҝәлиб. Сонра ҝәләҹәјимизлә вә Јеһованын ҝөрәҹәји ишләрлә бағлы билдијимиз бәзи һадисәләри јадымыза салаҹағыг.

БИЛМӘДИКЛӘРИМИЗ

3. Әввәлки изаһата әсасән инсанларын нә вахта гәдәр Јеһоваја иман ҝәтирмәк имканы олаҹагды вә нәјә ҝөрә белә дүшүнүрдүк?

³ Әввәлләр биз белә баша дүшүрдүк ки, бөјүк мүсибәт башлајандан сонра иманда олмајан инсанларын артыг Јеһованын тәрәфини тутмаг вә Армаҝеддондан хилас олмаг имканы олмајаҹаг. Бәс нәјә ҝөрә белә дүшүнүрдүк? Чүнки әввәлләр биз елә баша дүшүрдүк ки, Нуһун Дашгыны дөврүндә баш верәнләр ҝәләҹәкдә олаҹаг һадисәләрин тимсалыдыр. Мәсәлән, белә дејирдик: Дашгын башламаздан әввәл Јеһова ҝәминин гапысыны бағладығы кими бөјүк мүсибәтин башланғыҹында да «гапыны» Шејтан дүнјасынын үзүнә бағлајаҹаг. Беләҹә, даһа һеч кәсин хилас олмаг имканы олмајаҹаг (Мәт. 24:37—39).

4. Нәјә ҝөрә артыг Нуһун дөврүндә баш верәнләрин ҝәләҹәкдәки һадисәләрин тимсалы олдуғуну дүшүнмүрүк? Изаһ един.

⁴ Бәс Нуһун Дашгынында баш верәнләрин ҝәләҹәкдәки һадисәләрин тимсалы олдуғуну дүшүнмәлијик? Хејр. Нәјә ҝөрә? Чүнки Мүгәддәс Китаб белә дүшүнмәјә һеч бир әсас вермирa. Дүздүр, Иса өз һүзуруну «Нуһун вахты»на бәнзәтмишди. Амма о демәмишди ки, Дашгын дөврүндә баш верән һәр бир шеј ҝәләҹәкдәки һадисәләрин тимсалыдыр, һеч ҝәминин гапысынын бағланмасынын да ҝәләҹәкдә хүсуси бир мәна кәсб едәҹәјини вурғуламамышды. Амма бу о демәк дејил ки, биз Нуһ вә Дашгынла бағлы һадисәдән үмумијјәтлә һеч нә өјрәнә билмәрик.

5. а) Нуһ пејғәмбәр Дашгындан әввәл иманыны неҹә ҝөстәрмишди? (Ибраниләрә 11:7; 1 Бутрус 3:20). б) Нуһун тәблиғ етмәси илә бу ҝүн бизим тәблиғ етмәјимиз арасында һансы охшарлыг вар?

⁵ Нуһ Јеһованын хәбәрдарлыг сөзләрини ешидәндә ҝәми тикмәјә башлады. Беләҹә, иманлы инсан олдуғуну ҝөстәрди. (Ибраниләрә 11:7; 1 Бутрус 3:20 ајәләрини охујун.) Ејнилә, бу ҝүн дә Аллаһын Падшаһлығы һаггында мүждәни ешидән инсанлар иманларыны әмәлдә ҝөстәрмәлидирләр (Һәв. 3:17—20). Һәвари Бутрус Нуһу «салеһлик ҹарчысы» адландырмышды (2 Бут. 2:5). Амма өтән мәгаләдә дә арашдырдығымыз кими биз дәгиг билмирик, Нуһ Дашгындан әввәл јер үзүндә јашајан бүтүн инсанлара бир-бир тәблиғ едиб, ја јох. Бу ҝүн биз дүнјанын дөрд тәрәфиндә јашајан һәр бир инсана тәблиғ етмәјә ҹан атырыг, бунун үчүн әлимиздән ҝәләни едирик. Амма нә гәдәр чалышырыгса чалышаг, сон ҝәләнә гәдәр јер үзүндә јашајан һәр бир инсана тәблиғ едә билмәрик. Нијә?

6, 7. Сон ҝәлмәздән әввәл хош хәбәри јер үзүндә јашајан һәр бир инсана чатдыра билмәјәҹәјимизи нәјә әсасән дејә биләрик? Изаһ един.

⁶ Иса Мәсиһ тәблиғ иши илә бағлы пејғәмбәрлик едиб демишди: «Мүждә халгларын һамысына шәһадәт олсун дејә бүтүн јер үзүндә тәблиғ едиләҹәк» (Мәт. 24:14). Бу ҝүн бу пејғәмбәрлик ҝөрүнмәмиш мигјасда јеринә јетир. Падшаһлыг һаггында хәбәр 1000-дән чох дилдә дәрҹ едилир вә jw.org сајтымыз васитәсилә Јер күрәсиндә јашајан инсанларын әксәријјәтинин бу хәбәри өјрәнмәк имканы вар.

⁷ Бунунла јанашы, Иса шаҝирдләринә демишди: «[Шәһәрләрин] һамысыны ҝәзиб гуртармамыш инсан Оғлу ҝәләҹәк» (Мәт. 10:23; 25:31—33). Бу о демәк иди ки, шаҝирдләри һәр бир инсана тәблиғ етмәји чатдырмајаҹаглар. Бу ҝүн милјонларла инсан тәблиғ ишинин сәрт гадаға алтында олдуғу әразиләрдә јашајыр. Бундан әлавә, һәр дәгигәдә јүзләрлә ушаг дүнјаја ҝәлир. Биз хош мүждәни «һәр халга, тајфаја, дилә» тәблиғ етмәк үчүн вар ҝүҹүмүзлә чалышырыг (Вәһј 14:6). Амма бир реаллыг вар ки, биз сон ҝәлмәздән әввәл јер үзүндә јашајан һәр бир инсана тәблиғ етмәји чатдыра билмәјәҹәјик.

8. Јеһованын ҝәләҹәк һөкмләри илә бағлы биздә һансы суал јарана биләр? (Һәмчинин шәкилләрә бахын.)

⁸ Тәбии олараг белә бир суал јараныр: Бөјүк мүсибәт башлајана гәдәр хош хәбәри ешитмәк имканы олмајан инсанларын агибәти неҹә олаҹаг? Јеһова вә Онун инсанлара һөкм чыхармаг үчүн тәјин етдији Оғлу Иса Мәсиһ һансы гәрары верәҹәк? (Јәһ. 5:19, 22, 27; Һәв. 17:31). Мәгаләнин әсас ајәсиндән бизә бир шеј мәлумдур: Јеһова «һеч кәсин мәһв олмасыны истәмир, әксинә, истәјир ки, һамы төвбәјә ҝәлсин» (2 Бут. 3:9; 1 Тим. 2:4). Бунунла белә, биз һәлә билмирик ки, Јеһова хош хәбәри ешитмәк имканы олмајан инсанларла бағлы һансы һөкмү чыхараҹаг. Сөзсүз, О бизә етдији вә едәҹәји ишләрлә бағлы ачыглама вермәјә борҹлу дејил.

9. Јеһова Кәламы васитәсилә бизә нәји ачыглајыр?

⁹ Јеһова Кәламы васитәсилә бизә ҝәләҹәкдә ҝөрәҹәји бәзи ишләри ачыглајыр. Мәсәлән, Мүгәддәс Китабда дејилир ки, Јеһова «гејри-салеһләри» һәјата гајтараҹаг. Онларын мүждәјә һај вермәк вә һәјатларында дәјишиклик етмәк имканы олмајыб (Һәв. 24:15; Лука 23:42, 43). Амма ортаја башга суаллар чыхыр.

10. Башга һансы суаллар јараныр?

¹⁰ Бөјүк мүсибәт заманы өләнләрин һамысы бирдәфәлик мәһв олаҹаг вә онларын дирилмәсинә даһа үмид олмајаҹаг? Мүгәддәс Китабда ајдын јазылыб ки, Јеһованын әлејһинә чыхан вә Онун вә ордусунун Армаҝеддон мүһарибәсиндә мәһв етдији инсанлар дирилмәјәҹәк (2 Салон. 1:6—10). Бәс диҝәр инсанлар һагда нә демәк олар? Мәсәлән, ола билсин, тәбии фәлакәт вә ја бәдбәхт һадисә нәтиҹәсиндә өлән, јахуд гәтлә јетирилән инсанларын ахыры неҹә олаҹаг? (Ваиз 9:11; Зәк. 14:13). Јени дүнјада «гејри-салеһләр» дирилән заман онлардан да дириләнләр олаҹаг? Билмирик.

БИЛДИКЛӘРИМИЗ

11. Армаҝеддонда инсанлара һөкм чыхарыларкән нә әсас ҝөтүрүләҹәк?

¹¹ Ҝәләҹәкдә баш верәҹәк бәзи һадисәләр һагда мәлуматымыз вар. Мәсәлән, билирик ки, Армаҝеддонда инсанлара һөкм чыхарыларкән онларын Мәсиһин гардашларына неҹә мүнасибәт ҝөстәрдикләри әсас ҝөтүрүләҹәк (Мәт. 25:40). Мәсһ олунмушлары вә Мәсиһи дәстәкләјәнләрә «гојун» һөкмү чыхарылаҹаг. Һәмчинин билирик ки, бөјүк мүсибәт башлајандан сонра Мәсиһин гардашларындан бәзиләри һәлә дә јер үзүндә олаҹаг. Онлар ҝөјә Армаҝеддон мүһарибәси башламаздан гыса мүддәт әввәл галдырылаҹаг. Мәсиһин гардашлары јер үзүндә олдуглары мүддәтдә, ола билсин, сәмими-гәлбли инсанларын онлары вә ҝөрдүкләри иши дәстәкләмәк имканы олсун (Мәт. 25:31, 32; Вәһј 12:17). Бунлар нәјә ҝөрә ваҹиб мәлуматлардыр?

12, 13. Бәзиләри «Бөјүк Бабил»ин мәһвини ҝөрүб һансы гәрара ҝәлә биләр? (Һәмчинин шәкилләрә бахын.)

¹² Һәтта бөјүк мүсибәт башлајандан сонра, ола билсин, кимләрсә «Бөјүк Бабил»ин мәһв олдуғуну ҝөрүб Јеһованын Шаһидләринин узун илләрдир бу барәдә данышдығыны хатырласын. Ола биләрми ки, бу һадисәләри ҝөрән инсанлардан бәзиләри Јеһоваја иман ҝәтирсин? (Вәһј 17:5; Һизг. 33:33).

¹³ Белә бир шеј олса, бу, Муса пејғәмбәрин дөврүндә Мисирдә баш верәнләрә охшајаҹаг. Јадыныздадырса, исраиллиләр Мисири тәрк едәндә «әҹнәбиләрдән ибарәт издиһам» онлара гошулмушду (Чых. 12:38). Ҝөрүнүр, бәзиләри Муса пејғәмбәрин 10 бәла илә бағлы дедикләринин доғру чыхдығыны ҝөрәндә Јеһоваја иман ҝәтирмишди. Ејни шеј Бөјүк Бабил мәһв олунанда баш версә, буна неҹә јанашаҹағыг? Инсанларын сона аз галмыш бизә гошулдуғуну ҝөрүб буну һагсызлыг һесаб едәҹәјик? Тәбии ки, јох. Биз сәмави Атамыза бәнзәмәк истәјирик. О, «рәһмли вә мәрһәмәтли, сәбирли, мәһәббәти бол, һәгигәти әнҝин олан» Аллаһдырb (Чых. 34:6).

14, 15. Инсанын әбәди һәјат үмиди онун нә вахт өлмәсиндән вә ја һарада јашамасындан асылыдыр? Изаһ един (Зәбур 33:4, 5).

¹⁴ Киминсә Јеһоваја гуллуг етмәјән јахыны вәфат едәндә белә фикир ешидирик: «Јахшы ки, о, бөјүк мүсибәт башламаздан әввәл өлдү, инди һеч олмаса, дирилмәсинә үмид вар». Тәбии ки, онлар буну јахшы нијјәтдән ирәли ҝәләрәк дејирләр. Амма демәк олмаз ки, инсанын әбәди јашамасы онун нә вахт өлмәјиндән асылыдыр. Јеһова камил Һакимдир, Онун һәр бир гәрары доғру вә адилдир. (Зәбур 33:4, 5 ајәләрини охујун.) Әмин ола биләрик ки, «бүтүн дүнјанын Һакими» әдаләтлә давранаҹаг (Јар. 18:25).

¹⁵ Онда мәнтигли олараг белә бир гәнаәтә дә ҝәлирик: инсанын әбәди һәјат үмиди онун һарада јашамасындан да асылы дејил. Елә әразиләр вар ки, орада јашајан инсанларын һеч вахт Падшаһлыг һагда хәбәри өјрәнмәјә имканы олмајыб. Ола билмәз ки, Јеһова милјонларла бу ҹүр инсана автоматик «кечи» дамғасы вурсун (Мәт. 25:46). Бүтүн дүнјанын әдаләтли Һакими бу ҹүр инсанлары бизим дүшүндүјүмүздән дә чох дүшүнүр. Биз билмирик, бөјүк мүсибәт вахты Јеһова һадисәләрә неҹә истигамәт верәҹәк. Јеһова бүтүн халглара Өз мүгәддәслијини ҝөстәрәндә, ола билсин, һәмин инсанлардан бәзиләри бөјүк мүсибәт заманы баш верәнләри ҝөрүб Она иман ҝәтирсин (Һизг. 38:16).

16. Јеһова һагда нәләри билирик? (Һәмчинин шәклә бахын.)

¹⁶ Биз Мүгәддәс Китабдан Јеһованын инсан һәјатына чох бөјүк дәјәр вердијини өјрәнмишик. Әбәди јашаја биләк дејә О Өз Оғлуну уғрумузда гурбан вериб (Јәһ. 3:16). Онун севҝисини, шәфгәтини һәр биримиз дујмушуг (Әшј. 49:15). Јеһова һамымызы адбаад таныјыр. О бизи о гәдәр јахшы таныјыр ки, һәтта өлсәк дә, бизи јенидән јаратмаға гадирдир. Чүнки бизимлә бағлы һәр бир хырда детал, јашадығымыз һәр бир хатирә Онун һафизәсиндәдир! (Мәт. 10:29—31). Буна ҝөрә дә тамамилә архајын ола биләрик ки, Јеһова һәр бир инсанла бағлы гәрар верәркән таразлы, әдаләтли вә мәрһәмәтли олаҹаг (Јаг. 2:13).

17. Нөвбәти мәгаләдә һансы суаллара ҹаваб тапаҹағыг?

¹⁷ Тәлимләримизә ҝәтирилән јени изаһатдан сонра баша дүшүрүк ки, бу ҝүн тәблиғ ишимиз һәмишәкиндән даһа тәҹилидир. Буну нәјә әсасән дејирик? Хош хәбәри дурмадан тәблиғ етмәјә бизи нә тәшвиг едир? Нөвбәти мәгаләдә бу суаллары тәфсилаты илә арашдыраҹағыг.