Филиалларын һәсролунма мәрасимләри

«ҮРӘЈИМ севинҹдән долуб-дашыр!» Бу сөзләр 2015-ҹи ил јанварын 24-ү шәнбә ҝүнү Мадагаскар филиалынын һәсролунма мәрасиминдә иштирак етмиш бир баҹынын дилиндәндир. О вә 583 гонаг 19 отаглы јашајыш бинасыны, ҝенишләндирилмиш јемәкхананы вә тәмир олунмуш мәтбәхи ҝөрәндә чох севинмишдиләр. Хидмәт, мүһасибат вә јерли тәмир-иншаат шөбәләри дә даһа чох офислә тәмин олунмушду. Бундан әлавә, Аудио/Видео вә Жест дили шөбәләри јени студијаларла тәҹһиз едилмиш, Брајл Транскрипсија Шөбәси јарадылмышдыр. Мадагаскарда ҝедән тәблиғ фәалијјәтинин тарихи иҹмалыны динләјәндән сонра Рәһбәрлик Шурасынын үзвү Марк Сандерсон һәсролунма мәрузәси илә чыхыш етмишди.

Индонезијанын Ҹакарта шәһәриндә 2015-ҹи ил февралын 14-ү филиалын һәср олунмасы планлашдырылмышды. Өлкәни басан сел суларынын вахтында чәкилмәсини ҝөрән баҹы-гардашлар раһатлыгла нәфәс алдылар. Филиал инди 42 мәртәбәли офис гүлләсинин бир мәртәбәсини вә јахынлыгдакы јашајыш бинасынын 12 мәртәбәсини әһатә едир. Бундан әлавә, јахынлыгдакы кичик биналарда бир нечә бејтел шөбәләри јерләшир. Рәһбәрлик Шурасынын үзвү Ентони Морис һәсролунма мәрузәси илә чыхыш етди. Нөвбәти ҝүн исә 15 257 нәфәр футбол стадионунда бир араја ҝәләрәк гардашын «Мәтанәтлә јахшы иш ҝөрүн» адлы мәрузәсини динләдиләр. Програм 41 әразијә јајымланды вә беләҹә, ҝөрүшү 11 189 нәфәр дә динләди. Илк дәфә иди ки, Индонезијада Јеһованын халгы арасындан бу гәдәр адам бир араја ҝәлмишди. Индонезијаја ҝәлән илк хүсуси тәјинатлы мүждәчиләрдән бири олан Роналд Јака дејир: «1951-ҹи илдә бура ҝәләндә бүтүн өлкәдә ҹәми-ҹүмләтаны 26 тәблиғчи вар иди. Бу ҝүн исә 26 000-дән чох адам бу хүсуси мәрасимдә иштирак едир. Бәли, Јеһованын әли Индонезијада јашајан халгынын үзәриндәдир!»