ҜҮРҸҮСТАН
Әрим дурмадан охујурду
Марина Копалиани
ДОҒУМ ТАРИХИ: 1957
ВӘФТИЗ ТАРИХИ: 1990
ГЫСА МӘЛУМАТ: Марина баҹы вә онун һәјат јолдашы Бадри ики оғлан ушағы бөјүдә-бөјүдә ҹанла-башла тәблиғ едирдиләр. Бадри сонралар өлкә комитәсиндә хидмәт едиб. Гардаш 2010-ҹу илдә вәфат етди. О, сон нәфәсинә кими Јеһоваја садиг галды.
ӘРИМ вә мән илк дәфә Јеһованын Шаһидләри илә 1989-ҹу илдә гоншумузҝилдә таныш олдуг. Ҝиви Барнадзе гардаш гоншумуза Мүгәддәс Китаб дәрси кечирди. Онун Мүгәддәс Китабы јох иди, чүнки о вахт ҝүрҹү дилиндә Мүгәддәс Китаб һәләм-һәләм тапылмырды.
Ешитдикләримиз чох хошумуза ҝәлди. Истәјирдик Мүгәддәс Китабымыз олсун. Әрим доғма гардашыны ҝөрәндә она деди ки, Мүгәддәс Китаб ахтарыр. Гардашынын ҹавабы ону тәәҹҹүбләндирди. Сән демә, гардашы тәзәликҹә ҝүрҹү дилиндә Мүгәддәс Китабын ән сон тәрҹүмәсини алыбмыш вә бөјүк мәмнунијјәтлә она һәдијјә етди.
Бадри евә гајыдан кими стола әјләшди вә ҝеҹәјә гәдәр бу китабы охуду. Сәһәр ојанан кими јенә башлады охумаға. Мән ишә ҝедиб ҝәлдим, о, һәлә дә охујурду. Ону дајандырмаг мүмкүн дејилди. Буна ҝөрә дә она дедим ки, ахыра кими охумаг истәјирсәнсә, бир нечә ҝүн мәзунијјәт ҝөтүр. О, белә дә етди вә Мүгәддәс Китабы ахыра кими охујуб гуртарды.
Сонра Ҝиви гардаш «Әбәди һәјата апаран һәгигәт» китабы васитәсилә бизимлә Мүгәддәс Китаб дәрси кечмәјә башлады. Севинирдик ки, шәхси Мүгәддәс Китабымыз вар. Бу, лап јеринә дүшдү, чүнки бизим «Һәгигәт» китабымыз јох иди, Ҝиви гардашын исә Мүгәддәс Китабы. Бир ил сонра Бадри илә мән вәфтиз олдуг.