2 Ишмуил

18 Давуд јанындакы адамлары сајды вә онларын үзәринә јүзбашылар, минбашылар гојду.+ 2 Онларын үчдә бирини Јуаба+, үчдә бирини Јуабын гардашы Сәрја+ оғлу Абшаја+, о бири үчдә бирини исә ҹатлы Иттаја+ тапшырды. Падшаһ деди: «Мән дә сизинлә дөјүшә ҝедәҹәјәм». 3 Ҹамаат исә деди: «Јох, сән ҝетмә.+ Дөјүшчүләр гачса, һәтта гошунун јарысы өлсә белә, онларын веҹинә олмајаҹаг. Чүнки сән бизим он минимизә бәрабәрсән.+ Она ҝөрә дә јахшы олар ки, сән шәһәрдән бизә көмәк ҝөндәрәсән». 4 Падшаһ онлара деди: «Неҹә мәсләһәт билирсиниз, елә дә едәрәм». Падшаһ шәһәр дарвазасынын јанында дурду. Гошун јүз-јүз, мин-мин шәһәрдән чыхды. 5 Падшаһ Јуаба, Абшаја вә Иттаја тапшырды: «Мәним хәтримә о ҹаванла, Абсаламла кобуд давранмајын».+ Падшаһын Абсаламла әлагәдар башчылара вердији ҝөстәриши һамы ешитди.

6 Гошун исраиллиләрлә дөјүшмәк үчүн ирәлиләди. Дөјүш Әфраим мешәсиндә баш тутду.+ 7 Исраиллиләр+ Давудун адамлары гаршысында басылдылар.+ Һәмин ҝүн чохлу адам — 20 000 нәфәр гырылды. 8 Дөјүш бүтүн бөлҝәни бүрүдү. Үстәлик, һәмин ҝүн мешәдә өләнләрин сајы гылынҹдан өләнләрин сајындан чох олду.

9 Нәһајәт, Абсалам Давудун дөјүшчүләри илә үз-үзә ҝәлди. Абсалам гатырын үстүндә ҝедирди. Гатыр бөјүк бир ағаҹын алтындан кечәндә онун сачы ағаҹын сых будагларына долашды. Гатыр ҝетди, о исә һавада асылы галды. 10 Бир нәфәр ону ҝөрүб Јуаба+ хәбәр верди: «Абсаламы ҝөрдүм, ағаҹдан асылыб галмышды». 11 Јуаб она деди: «Ҝөрмүсән, бәс нијә елә орадаҹа вуруб јерә сәрмәмисән? Белә етсәјдин, сәнә он ҝүмүш, үстүндә дә бир гуршаг пешкәш едәрдим». 12 О адам исә Јуаба деди: «Мәнә мин ҝүмүш дә версәјдиләр, јенә һөкмдарын оғлуна әл галдырмаздым. Падшаһын сәнә, Абшаја вә Иттаја: “Һамыныза дејирәм, о ҹавандан, Абсаламдан муғајат олун”, — тапшырдығыны өз гулағымызла ешитдик.+ 13 Әҝәр падшаһын әмриндән чыхыб ону өлдүрсәјдим, бу, падшаһдан ҝизли галмазды, һеч сән дә мәнә гаһмар чыхмаздын». 14 Онда Јуаб она деди: «Сәнинлә сөз ҝүләшдирмәјә вахтым јохдур!» О, үч мизраг* ҝөтүрдү вә ағаҹын будаглары арасында асылы галан вә һәлә сағ олан Абсаламын көксүнә саплады. 15 Јуабын он силаһдары ҝәлди вә Абсаламы вуруб өлдүрдү.+ 16 Јуаб шејпур чалыб тәгиби дајандырды. Дөјүшчүләр Исраили тәгиб етмәкдән әл чәкиб ҝери гајытдылар. 17 Онлар Абсаламын ҹәсәдини мешәдә бөјүк бир чухура атдылар вә үстүнә бөјүк бир даш галағы јығдылар.+ Бүтүн исраиллиләр дағылышыб евләринә гачдылар.

18 Абсалам сағлығында Падшаһ дәрәсиндә+ өзү үчүн сүтун уҹалтмышды. О, өз-өзүнә дејирди: «Оғлум јохдур ки, адымы јашатсын».+ Она ҝөрә дә сүтуна өз адыны гојмушду. Сүтун бу ҝүнәдәк Абсалам абидәси адланыр.

19 Садығын оғлу Әхимас+ деди: «Хаһиш едирәм, иҹазә вер, ҝедим падшаһа хәбәр чатдырым. Јеһова ону дүшмәнләриндән гуртарыб, онун үчүн һагг-әдаләти бәргәрар едиб».+ 20 Лакин Јуаб она деди: «Сән бу ҝүн хәбәр апарма. Башга ҝүн апарарсан, бу ҝүн јох. Бу ҝүн падшаһын оғлу өлүб».+ 21 Јуаб кушлу+ бир адама деди: «Ҝет, нә ҝөрмүсән падшаһа даныш». Кушлу Јуаба тәзим едиб гачды. 22 Садығын оғлу Әхимас бир дә Јуабдан хаһиш етди: «Нә олур-олсун, гој мән дә кушлунун далынҹа гачым». Јуаб она деди: «Гачыб нә дејәҹәксән, оғлум? Ахы сәнин үчүн апармаға хәбәр јохдур». 23 О исрар етди: «Нә олур-олсун, гој гачым». Онда Јуаб деди: «Гач!» Әхимас Иордан бөлҝәси јолу илә гачыб кушлуну өтдү.

24 Давуд шәһәрин ики дарвазасы арасында отурмушду.+ Ҝөзәтчи+ дивардакы дарвазанын дамына чыхыб бахды, бир нәфәрин гачдығыны ҝөрдү. 25 Ҝөзәтчи гышгырыб буну падшаһа билдирди. Падшаһ деди: «Әҝәр о, тәкдирсә, демәли, хәбәр ҝәтирир». О адам ҝетдикҹә јахынлашырды. 26 Ҝөзәтчи башга бир адамын да гача-гача ҝәлдијини ҝөрдү. Ҝөзәтчи дарваза кешикчисини һајлајыб деди: «Бир нәфәр дә гача-гача ҝәлир!» Падшаһ деди: «О да хәбәр ҝәтирир». 27 Ҝөзәтчи деди: «Биринҹи адам гачмағындан Садыг оғлу Әхимаса бәнзәјир».+ Падшаһ деди: «О, јахшы адамдыр, јахшы хәбәрлә ҝәлир». 28 Әхимас падшаһы сәсләјиб деди: «Һәр шеј јахшыдыр!» Буну дејиб јерәдәк падшаһа тәзим етди. Сонра әлавә етди: «Еј һөкмдарым, гијамчылары сәнә тәслим едән Аллаһын Јеһоваја алгыш олсун!»+

29 Падшаһ сорушду: «Абсалам сағ-саламатдыр?» Әхимас деди: «Еј һөкмдар, Јуаб сәнин гулуну вә мәни ҝөндәрәндә ҝөрдүм ки, орада нәсә гарышыглыг вар, амма билмәдим нә олуб».+ 30 Падшаһ деди: «Кеч, бурада дур». Әхимас кечиб о тәрәфдә дурду.

31 Кушлу ҝәлиб чатды+ вә деди: «Еј һөкмдарым падшаһ, сәнә хәбәрим вар. Бу ҝүн Јеһова сәни гијамчыларын әлиндән гуртарараг һагг-әдаләти бәргәрар етди».+ 32 Падшаһ кушлудан сорушду: «Абсалам сағ-саламатдыр?» Кушлу деди: «Гој һөкмдарымын бүтүн дүшмәнләри, она гијам галдырыб хәтәр јетирмәк истәјәнләрин һамысы о ҹаванын ҝүнүнә дүшсүн!»+

33 Бу хәбәр падшаһы сарсытды. О, ағлаја-ағлаја дарвазанын үстүндәки отаға галхды. Ҝедә-ҝедә дејирди: «Оғлум, оғлум Абсалам, оғлум Абсалам! Каш сәнин јеринә мән өләјдим, Абсалам, оғлум, оғлум!»+