2 Падшаһлар

8 Әлјәсә оғлуну һәјата гајтардығы гадына+ деди: «Дур аиләни дә ҝөтүр, һансы мәмләкәтә ҝедә билирсән ҝет, бир мүддәт орада јаша. Јеһова дејиб ки, аҹлыг олаҹаг.+ Аҹлыг дүз једди илә чәкәҹәк». 2 Гадын Аллаһ адамынын дедији кими етди, аиләси илә бирликдә ҝедиб једди ил филиштлиләрин*+ дијарында галды.

3 Једди илин сонунда гадын филиштлиләрин өлкәсиндән гајытды. Евини, торпағыны алмаг үчүн падшаһын һүзуруна ҝәлди. 4 Падшаһ Аллаһ адамынын нөкәри Гиһази илә сөһбәт едирди. О, Әлјәсәнин етдији бүтүн бөјүк ишләри+ данышмағы бујурмушду. 5 Нөкәр падшаһа Әлјәсәнин өлүнү һәјата гајтармасындан+ данышан заман ушағы һәјата гајытмыш гадын ҝәлиб еви вә торпағы үчүн падшаһа јалвармаға башлады.+ Гиһази деди: «Һөкмдар, бу, һәмин гадындыр. Јанындакы да Әлјәсәнин һәјата гајтардығы оғлудур». 6 Падшаһ гадындан хаһиш еләди, о да һәмин әһвалаты данышды. Падшаһ онун үчүн бир сарај мәмуру ајырды вә мәмура тапшырды: «Онун бүтүн мүлкүнү, өлкәдән ҝетдији ҝүндән индијәдәк торпағынын вердији бүтүн мәһсулу она гајтар».

7 Әлјәсә Дәмәшгә+ ҝетди. Арам падшаһы Бәнһәдад+ хәстә иди. Она хәбәр ҝәтирдиләр ки, Аллаһ адамы+ ора ҝәлиб. 8 Падшаһ Һәзаилә+ деди: «Өзүнлә бәхшиш ҝөтүр, Аллаһ адамынын јанына ҝет.+ Гој о, Јеһовадан сорушсун, мән бу хәстәлијимдән сағалаҹағам, ја јох». 9 Һәзаил Дәмәшгин бүтүн наз-немәтиндән гырх дәвәјә һәдијјәләр јүкләјиб Әлјәсәнин јанына ҝетди. Ҝәлиб онун гаршысында дурду вә деди: «Сәнин оғлун, Арам падшаһы Бәнһәдад мәни сәнин јанына ҝөндәриб, хәстәлијиндән сағалыб-сағалмајаҹағыны сорушур». 10 Әлјәсә она деди: «Ҝет она де ки, сағалаҹаг. Лакин Јеһова мәнә онун өләҹәјини әјан едиб».+ 11 Әлјәсә ҝөзүнү Һәзаилә елә зилләди ки, о утанды. Сонра Аллаһ адамы ағламаға башлады. 12 Һәзаил деди: «Аға, нијә ағлајырсан?» О деди: «Чүнки билирәм, сән исраиллиләрә нә диван тутаҹагсан.+ Онларын истеһкамларына од вураҹагсан, иҝидләрини гылынҹдан кечирәҹәксән, көрпәләрини парча-парча едәҹәксән, һамилә гадынларын гарныны јыртаҹагсан».+ 13 Һәзаил деди: «Аға, мәним кими ади бир көпәк белә шеји неҹә едә биләр?» Әлјәсә деди: «Јеһова мәнә әјан едиб ки, сән Арамын падшаһы олаҹагсан».+

14 Һәзаил Әлјәсәнин јанындан чыхыб һөкмдарынын јанына гајытды. Бәнһәдад сорушду: «Әлјәсә нә деди?» О ҹаваб верди: «Деди ки, сағалаҹагсан».+ 15 Сәһәри ҝүн Һәзаил өртүк ҝөтүрүб суда ислатды вә онунла Бәнһәдадын үзүнү гапајыб ону өлдүрдү.+ Һәзаил онун јеринә тахта чыхды.+

16 Исраил падшаһы Әһәб оғлу Јәһурамын һакимијјәтинин бешинҹи илиндә,+ Јәһушафат Јәһуда падшаһы оланда+ Јәһушафат падшаһын оғлу Јәһурам тахта чыхды. 17 Јәһурам падшаһ оланда отуз ики јашында иди вә сәккиз ил Јерусәлимдә һакимијјәт сүрдү. 18 О, Әһәб евиндән оланлар кими,+ Исраил падшаһларынын јолу илә ҝетди,+ чүнки онун арвады Әһәбин гызы иди.+ Јәһурам Јеһованын бәјәнмәдији пис ишләр ҝөрүрдү.+ 19 Амма Јеһова гулу Давудун хатиринә Јәһуданы мәһв етмәк истәмәди,+ чүнки О, Давуда сөз вермишди ки, онун вә оғулларынын чырағы һеч вахт сөнмәјәҹәк.+

20 Онун дөврүндә әдумиләр Јәһудаја гаршы үсјан галдырыб+ үзәрләринә падшаһ гојдулар.+ 21 Јәһурам ҹәнҝ арабалары илә Заирә кечди. О, ҝеҹә икән галхыб ону вә араба башчыларыны мүһасирәјә алан әдумиләри мәғлуб етди. Әдумиләр өз чадырларына гачдылар. 22 Лакин Әдум бу ҝүнә гәдәр Јәһудаја табе олмур. Һәмин вахт Либна+ да үсјан етди.

23 Јәһурамын галан ишләри, бүтүн етдикләри Јәһуда падшаһларынын тарихи китабында јазылмышдыр. 24 Јәһурам ата-бабаларына говушду. Ону Давуд шәһәриндә ата-бабаларынын јанында дәфн етдиләр.+ Оғлу Әһәзја+ онун јеринә тахта чыхды.

25 Исраил падшаһы Әһәб оғлу Јәһурамын һакимијјәтинин он икинҹи илиндә Јәһуда падшаһы Јәһурамын оғлу Әһәзја тахта чыхды.+ 26 Әһәзја тахта чыханда ијирми ики јашында иди вә бир ил Јерусәлимдә һакимијјәт сүрдү. Онун анасы Исраил падшаһы Омринин+ нәвәси Әтәлја+ иди. 27 О, Әһәб евинин јолу илә ҝетди,+ Әһәб еви кими, Јеһованын бәјәнмәдији пис ишләр ҝөрдү, чүнки Әһәб еви илә гоһум олмушду.+ 28 Беләҹә, о, Әһәб оғлу Јәһурамла бирликдә Арам падшаһы Һәзаиллә вурушмаг үчүн Рамут-Ҝилада+ ҝетди. Арамиләр Јәһурамы јараладылар.+ 29 Јәһурам Рамада* Арам падшаһы Һәзаиллә дөјүшдә арамиләрдән алдығы јаралардан сағалмаг үчүн Јизраилә+ гајытды.+ Јәһуда падшаһы Јәһурам оғлу Әһәзја Әһәб оғлу Јәһурамы ҝөрмәк үчүн Јизраилә ҝетди, чүнки о јараланмышды*.