2 Падшаһлар
20 О вахт Һизгијјә хәстәләниб өлүм јатағына дүшдү.+ Амуз оғлу Әшија пејғәмбәр онун јанына ҝәлиб деди: «Јеһова белә дејир: “Ев әһлинә вәсијјәтини елә, чүнки сағалмајаҹагсан, өләҹәксән”».+ 2 О, үзүнү дивара чевириб Јеһоваја дуа етди: 3 «Јеһова, јалварырам, нә олар, јадына сал, мән неҹә өнүндә сидги-үрәклә, сәдагәтлә јеримишәм, Сәнә мәгбул ишләр ҝөрмүшәм».+ Һизгијјә аҹы-аҹы ағлады.
4 Әшија сарајын орта һәјәтинә чатмамыш Јеһованын сөзү она назил олду:+ 5 «Гајыт, халгымын һөкмдары Һизгијјәјә де ки, әҹдадын Давудун Аллаһы Јеһова белә дејир: “Дуаны ешитдим. Ҝөз јашларыны ҝөрдүм.+ Сәнә шәфа верәҹәјәм.+ Үчүнҹү ҝүн Јеһованын мәбәдинә ҝедәҹәксән.+ 6 Өмрүнү он беш ил артыраҹағам. Сәни дә, бу шәһәри дә Ашшур падшаһынын әлиндән гуртараҹағам.+ Өз адым наминә вә гулум Давудун хатиринә бу шәһәри горујаҹағам”».+
7 Әшија деди: «Әнҹир лавашанасы ҝәтирин». Лавашананы ҝәтириб чибанын үстүнә гојдулар. Һизгијјә јаваш-јаваш сағалды.+
8 Һизгијјә Әшијадан сорушмушду: «Јеһованын мәни сағалдаҹағына, үчүнҹү ҝүн Јеһованын мәбәдинә ҝедәҹәјимә әламәт+ нә олаҹаг?» 9 Әшија демишди: «Јеһова дедији сөзү јеринә јетирәҹәк. Јеһова сәнә бу әламәти верир: неҹә истәјирсән, көлҝә пилләкәнин* үстү илә он пиллә габаға ҝетсин, јохса он пиллә дала?»+ 10 Һизгијјә деди: «Көлҝәнин он пиллә габаға ҝәлмәси он пиллә дала ҝетмәсиндән асандыр». 11 Әшија пејғәмбәр Јеһоваја дуа етди. Аллаһ Әһәз пилләкәнинин пилләләринә дүшмүш көлҝәни он пиллә дала апарды.+
12 Бабил падшаһы Баладан оғлу Бәрдах-Баладан Һизгијјәнин хәстәләндијини ешидиб она мәктублар вә һәдијјәләр ҝөндәрди.+ 13 Һизгијјә елчиләрә хошҝәлдин еләди, бүтүн хәзинәсини+ — гызыл-ҝүмүшү, балзамы, башга баһалы јағлары, ҹәббәханасыны вә хәзинәсиндә олан һәр шеји онлара ҝөстәрди. Евиндә вә бүтүн сәлтәнәтиндә елә шеј галмады ки, онлара ҝөстәрмәсин.
14 Әшија пејғәмбәр Һизгијјә падшаһын јанына ҝәлиб сорушду: «Бу адамлар һарадан ҝәлмишдиләр? Нә дедиләр?» Һизгијјә деди: «Узаг дијардан, Бабилдән ҝәлмишдиләр».+ 15 Әшија сорушду: «Сарајында нәләри ҝөрдүләр?» Һизгијјә деди: «Һәр шеји. Хәзинәмдә онлара ҝөстәрмәдијим шеј галмады».
16 Әшија деди: «Јеһованын сөзүнү динлә.+ 17 “Елә ҝүн ҝәләҹәк ки, сарајындакы һәр шеји, ата-бабаларынын бу ҝүнә гәдәр јығдығы нә варса, һамысыны Бабилә апараҹаглар.+ Һеч нә галмајаҹаг, — дејир Јеһова. — 18 Сәндән төрәјәҹәк оғулларынын да бәзиләрини апараҹаглар.+ Онлар Бабил падшаһынын сарајында сарај мәмуру олаҹаглар”».+
19 Һизгијјә Әшијаја деди: «Јеһованын дедији бу сөз һагдыр».+ Сонра әлавә етди: «Тәки мәним дөврүмдә сүлһ, әмин-аманлыг олсун».+
20 Һизгијјәнин галан ишләри, бүтүн гүдрәтли ишләри, чарһовуз+, су кәмәри тикиб шәһәрә су чәкмәси+ Јәһуда падшаһларынын тарихи китабында јазылмышдыр. 21 Һизгијјә ата-бабаларына говушду.+ Оғлу Мәнәссә+ онун јеринә тахта чыхды.+