Әшија

20 Ашшур падшаһы Саргонун әмрилә тартан* Ашдода+ һүҹум едиб ону зәбт етдији+ ил 2 Јеһова Амуз оғлу Әшијаја+ белә деди: «Ҝет, белиндән чулу, ајағындан сәндәли чыхар». О, бујруға әмәл едиб чылпаг* вә ајагјалын ҝәзмәјә башлады.

3 Сонра Јеһова деди: «Гулум Әшија Мисир+ вә Һәбәш+ үчүн әламәт вә нишанә+ олараг үч ил чылпаг вә ајагјалын ҝәздији кими, 4 Ашшур падшаһы да Мисир вә Һәбәш әсирләрини,+ һәм ҹаваны, һәм гоҹаны чылпаг, ајагјалын, гуршагдан ашағы лүт сүрҝүнә апараҹаг. Мисирин ејиб јерләри бајырда галаҹаг. 5 Һәбәшә үмид бағлајанлар, Мисирлә фәхр едәнләр дәһшәтә ҝәләҹәк, хәҹаләт чәкәҹәкләр. 6 О ҝүн бу саһилјаны әразинин сакинләри дејәҹәкләр: “Бу да Ашшур падшаһындан гуртулмаг үчүн көлҝәсинә сығындығымыз пәнаһҝаһымыз, үмид јеримиз! Инди биз неҹә хилас олаҹағыг?”»