Һизгијал

6 Мәнә јенә Јеһованын сөзү назил олду: 2 «Еј бәни-адәм, үзүнү Исраил дағларына тутуб онлара гаршы пејғәмбәрлик ет. 3 Онлара белә сөјлә: “Еј Исраил дағлары, Күлли-Ихтијар Јеһованын сөзүнү динләјин. Күлли-Ихтијар Јеһованын дағлара, тәпәләрә, чајлара, дәрәләрә сөзү будур: “Мән үстүнүзә гылынҹ ҝөндәрәҹәјәм, сәҹдәҝаһларынызы* дармадағын едәҹәјәм. 4 Гурбанҝаһларыныз јерлә јексан олаҹаг, бухурданларыныз сындырылаҹаг,+ ҝәбәрдиләнләринизи ијрәнҹ бүтләринизин габағына сәрәҹәјәм.+ 5 Исраиллиләрин ҹәсәдләрини ијрәнҹ бүтләринин габағына сәрәҹәјәм, сүмүкләринизи гурбанҝаһларынызын әтрафына сәпәләјәҹәјәм.+ 6 Мәскунлашдығыныз һәр јердә шәһәрләриниз харабазара дөнәҹәк,+ сәҹдәҝаһларыныз дағыдылаҹаг, виранә галаҹаг.+ Гурбанҝаһларыныз учурулаҹаг, дашы-даш үстдә галмајаҹаг, ијрәнҹ бүтләриниз јох олаҹаг, бухурданларыныз сындырылаҹаг, әлинизин иши һеч олуб ҝедәҹәк. 7 Ҝөзүнүзүн габағында ҹамааты ҝәбәрдиб јерә сәрәҹәкләр.+ Онда биләҹәксиниз ки, Мән Јеһовајам.+

8 Амма бәзиләринизи сағ сахлајаҹағам. Өлкәләрә сәпәләнәндә бәзиләриниз гылынҹдан ҹаныны гуртараҹаг.+ 9 Сағ галанлар әсир апарылдыглары халгларын арасында јашајанда Мәни јада салаҹаглар.+ Баша дүшәҹәкләр ки, Мәндән дөнән хәјанәткар үрәкләри, ијрәнҹ бүтләринә шәһвәтлә бахан ҝөзләри+ гәлбимә неҹә јара вуруб.+ Онда етдикләри шәр әмәлләрдән, мурдар ишләрдән ијрәнәҹәк, утаныб јерә ҝирәҹәкләр.+ 10 Биләҹәкләр ки, Мән Јеһовајам, башларына бу мүсибәти ҝәтирәҹәјими дејәндә онлары әбәс јерә һәдәләмирдим”.+

11 Күлли-Ихтијар Јеһова белә дејир: “Әлинизлә башынызы тутун*, ајагларынызы јерә чырпын. Исраил евинин етдији бүтүн шәр ишләрә, мурдар әмәлләрә ҝөрә инләјиб-сызлајын. Чүнки онлар гылынҹдан кечириләҹәкләр, аҹлыгдан, хәстәликдән гырылаҹаглар.+ 12 Узагда оланын аманыны хәстәлик кәсәҹәк, јахында олан гылынҹа туш ҝәләҹәк. Бунлардан гуртулуб сағ галанларынса ахырына аҹлыг чыхаҹаг. Мән бүтүн гәзәбими онларын үстүнә төкәҹәјәм.+ 13 Ҝәбәрәнләрин ҹәсәдләри гурбанҝаһларынын әтрафында,+ һүндүр тәпәләрин башында, дағларын зирвәсиндә, ҝур јарпаглы ағаҹларын алтында, бөјүк ағаҹларын будаглары алтында — ијрәнҹ бүтләрини разы салмаг үчүн әтирли тәгдимәләр ҝәтирдикләри һәр јердә һәмин бүтләрин арасында јерә сәриләҹәк.+ Онда биләҹәксиниз ки, Мән Јеһовајам.+ 14 Әлими онлара гаршы галдырыб өлкәләрини виранә гојаҹағам, бүтүн јашајыш јерләри Диблаһ јахынлығындакы сәһрадан да бош, кимсәсиз галаҹаг. Онда биләҹәкләр ки, Мән Јеһовајам”».